Дэлхий нийтээр..
Хуурай замын цэргийн нэгдсэн тактикийн хээрийн сургууль зохион байгуулагдаж байна
Зэвсэгт хүчний 2023-2024 оны сургуулийн жилийн нэгдүгээр шат төгсөж, нэгтгэл, анги, салбарууд хээрийн гаралт, полигоны дадлагыг зохион байгуулж, үндсэн салбаруудынхаа жигдрэлтийг хангаж байна.
Зэвсэгт хүчний Хуурай замын цэргийн нэгтгэл, ангиуд сургалт бэлтгэлийн төлөвлөгөөний дагуу нэгдсэн хээрийн гаралтыг энэ цаг үед амжилттай гүйцэтгэж байна. Ингэхдээ Улаанбаатар цэргийн хүрээ болон орон нутаг гэсэн хоёр хэлбэрээр буюу Зэвсэгт хүчний 016 дугаар нэгтгэл, 014, 119, 120, 326 дугаар ангиуд анх удаа нэгдсэн хээрийн гаралтыг Зэвсэгт хүчний Сургалтын нэгдсэн төвийн материаллаг баазыг түшиглэн зохион байгуулж байгаа юм.
Хуурай замын цэргийнхний нэгдсэн хээрийн гаралтын районд Зэвсэгт хүчний Хуурай замын цэргийн штабын дарга хурандаа Ц.Буяндэлгэр өнгөрсөн ням гарагт ажиллаж, хүн хүч, техник, зэвсэглэл, гүйцэтгэж буй үүргүүд болон хүн нэг бүр, тасаг тоотын бэлтгэл, салаа салбарын жигдрэлтийн явцтай танилцсан юм.
Нэгдсэн хээрийн гаралт нь өдөр бүр нэгдсэн төлөвлөгөөний сургалт бэлтгэлийг явуулж байгаа бөгөөд сургуулийн төгсгөлд хүч нэмэгдүүлсэн ротын байлдааны буудлагыг гүйцэтгэхээр төлөвлөөд байна.
Нэгдсэн хээрийн гаралт, сургалт дадлагын онцлог, ач холбогдлын талаар Зэвсэгт хүчний 016 дугаар нэгтгэлийн захирагч хурандаа Ж.Мөнхбаяраас тодрууллаа. Тэрээр Хуурай замын цэргийн Улаанбаатар цэргийн хүрээний хээрийн байрлалын ахлагчаар ажиллаж байна.
Хээрийн гаралтын бэлтгэл жигдрэлт хангагдаж байна уу. Нэгдсэн байдлаар гарч байгаа онцлог, ач холбогдлын тухайд ярихгүй юу?
- Сургуулийн жилийн нэгдсэн төлөвлөгөөний дагуу Хуурай замын цэргийн командлагчийн тушаалаар Улаанбаатар цэргийн хүрээний нэгтгэл, ангийн хээрийн гаралтыг анх удаа нэгдсэн байдлаар зохион байгуулж байна. Энэ нь хоёр талын ач холбогдолтой. Нэгдүгээрт, анх удаа нэгдсэн байдлаар зохион байгуулсан нь төрөл мэргэжлийн ангиуд нэгнээсээ суралцах сургалтын том бааз болж байна.
Хоёрдугаарт, алба хаагчид бусад нэгтгэл, ангийн дайчин нөхдийн буудлагатай танилцаж, нэгнийхээ ажил үйлсээр бахархах үзлийг нэмэгдүүлж, нөхөрлөлийг нь бататгаж байна. Хэдий цэргийн алба хаагч ч гэсэн өөрийн нэгтгэл, ангиас өөр буудлага хараагүй, бусдынхаа гүйцэтгэдэг онцгой ажил үүргийг тэр бүр мэддэггүй байх нь бий. Хээрийн байрлалд гарч ирсэн Улаанбаатар цэргийн хүрээний хугацаат цэргийн алба хаагчдын хувьд бүр их сэтгэгдэл өндөр байна. Нэгдсэн сургалт дадлага эхэлснээс хойш дайчдын буудлага, жолоодлого нь мэргэн сайн байгааг дурдах учиртай.
- Төрөл мэргэжлийн зарим ангийн алба хаагчид хээрийн гаралтад мөн олон чиг үүрэгтэйгээр оролцож байгаа тухайд?
- Нэгдсэн байдлаар хээрийн гаралтаа зохион байгуулж байгаагийн хувьд бэлэн байдлаа дээшлүүлэх, нэгнээсээ суралцах чиглэлд нь түлхүү анхаарч байна. Тухайлбал, манай мотобуудлагын артиллер, зенитийн салбарууд мэргэжлийн ангиудтай хамтарсан сургалт дадлагыг явуулж байна. Энэ бол маш чухал. Нөгөө талаар зенитчдийн хувьд ч ялгаагүй үндсэн үүргийнхээ буудлагыг гүйцэтгэж, ур чадвараа нэмэгдүүлж байна.
Зэвсэгт хүчний 119 дүгээр ангийнхны хувьд цацраг, хими, цэвэрлэгээний бүлэг болон химийн хангалтыг зохион байгуулж байгаа бол Зэвсэгт хүчний 014 дүгээр анги мини талбай байгуулах үндсэн үүргээсээ гадна инженерийн тусгай техниктэй Зэвсэгт хүчний Сургалтын нэгдсэн төвийн раойны зарим хэсгийн эвдэрсэн замыг засварлан шинэчилж байна” гэсэн мэдээллийг өглөө.
Хурандаа Ц.Буяндэлгэр нэгтгэл, ангиудын хүн нэг бүр, тасаг тоот, салаа салбарын сургалт дадлагын явцыг үзэж сонирхохын зэрэгцээ тэдний амрах байр, хоолны амт чанар, эрүүл ахуй, хөдөлмөрийн аюулгүй байдалтай нь танилцаж, зарим чиглэлээр үүрэг даалгавар өгсөн юм гэж Зэвсэгт хүчний Жанжин штабаас мэдээллээ.
Дэлхий нийтээр..
Польш улсын бага сургуулиудад гар утас ашиглахыг хориглохоор төлөвлөж байна
Польш улс бага сургуулийн сурагчдыг сургууль дээр гар утас ашиглахыг хориглох хуулийн төслийг хэрэгжүүлэхээр төлөвлөж байна. Польшийн Ерөнхий сайд Дональд Туск энэ сарын 2-нд мэдэгдэхдээ, 2026 оны есдүгээр сарын 1-нээс эхлэн 7-15 насны сурагчдыг сургууль дээр гар утас ашиглахыг хориглохоор ажиллаж байгаагаа хэлжээ.
Засгийн газраас дэмжсэн хуулийн төсөлд бага сургуулийн сурагчдыг хичээлийн үеэр төдийгүй завсарлага, сургуулийн орчин, мөн сургуулиас зохион байгуулсан боловсролын үйл ажиллагааны үеэр гар утас ашиглахыг хориглохоор тусгасан байна. Ухаалаг цаг зэрэг мэдээлэл, харилцааны боломжтой төхөөрөмжүүд ч уг хязгаарлалтад хамрагдахаар байна.
Гэхдээ сурагчид төхөөрөмжөө сургууль дээр авчрах боломжтой бөгөөд сургуулиуд тэдгээрийг хичээлийн хугацаанд хадгалах тусгай байр, зохицуулалт хийх эрх зүйн үндэстэй болох аж.
Польшийн бага сургуулийн боловсрол найман жил үргэлжилдэг бөгөөд 7-15 насны хүүхдүүд хамрагддаг. Хуулийн төсөл цаашид Польшийн парламентын доод танхим болох Сейм, дээд танхим болох Сенатаар хэлэлцэгдэж, батлагдсаны дараа Ерөнхийлөгч гарын үсэг зурснаар хүчин төгөлдөр болох юм.
Ерөнхий сайд Дональд Туск хүүхэд, өсвөр үеийнхний гар утас, цахим платформ, тоглоомд донтох асуудал ноцтой болж, хичээлдээ төвлөрөх болон зан төлөвт сөргөөр нөлөөлж байгааг онцолсон байна.
Дэлхий нийтээр..
БНХАУ Тяньаньмэний үйл явдлыг дурсах арга хэмжээг хязгаарлажээ
БНХАУ-ын эрх баригчид 1989 оны Тяньаньмэний талбайн үйл явдлын 37 жилийн ойг тэмдэглэх, дурсах оролдлогуудыг хязгаарласан байна. Эх сурвалжийн мэдээлснээр, Бээжин хотод амь үрэгдэгсдийн ар гэрийнхнийг ой тохиосон өдөр оршуулгын газарт очихыг зөвшөөрөөгүй байна. “Тяньаньмэний эхчүүд” хэмээх бүлгийн гишүүд олон жилийн турш уг өдөр төрөл төрөгсдийнхөө шарилд очиж, дурсгалын мэдэгдэл уншдаг байсан гэж “Эмнести Интернэшнл” мэдээлжээ.
1989 онд Бээжингийн Тяньаньмэний талбайд ардчилал, эрх чөлөөг шаардан жагссан оюутан, иргэдийн хөдөлгөөнийг Хятадын арми хүчээр тараасан юм. AP-ийн мэдээлснээр, тухайн үед олон зуун, магадгүй мянга гаруй хүн амь үрэгдсэн гэж үздэг.
Хонконгт мөн энэ өдрөөр аюулгүй байдлыг чангатгажээ. Урьд нь жил бүр лаа асаан дурсах томоохон арга хэмжээ болдог байсан Виктория паркийн орчимд цөөн хүн цугласан бөгөөд цагдаа нар хэд хэдэн хүнийг шалгаж, заримыг нь түр саатуулсан байна.
АНУ, Европын Холбоо, Их Британи энэ өдрийг тохиолдуулан мэдэгдэл гаргаж, өнгөрснийг цензурээр арилгах боломжгүй хэмээн онцолжээ. Харин БНХАУ-ын Гадаад хэргийн яам АНУ-ын мэдэгдлийг Хятадын дотоод хэрэгт хөндлөнгөөс оролцсон үйлдэл гэж шүүмжилсэн байна.
Мөн Тайваньд Тяньаньмэний үйл явдлын ойг тохиолдуулан лаа асаах дурсгалын арга хэмжээ зохион байгуулжээ. АНУ-ын Капитолын ордонд хууль тогтоогчид болон 1989 оны хөдөлгөөний төлөөлөгчид оролцсон дурсах арга хэмжээ болсон байна.
“Тяньаньмэний эхчүүд” бүлэг энэ жилийн ойг угтан шударга ёс шаардсан мэдэгдэл гаргаж, тухайн үед болсон үйл явдлын талаар бүрэн мэдээлэл ил болгох, хохирогчдын ар гэрт нөхөн төлбөр олгох, хариуцлага тооцохыг шаарджээ.
Дэлхий нийтээр..
Индонезид авлигын хэрэгтэй холбоотойгоор өндөр албан тушаалтнуудыг баривчилжээ
Индонезид авлигын эсрэг ажиллагаа эрчимжиж, Засгийн газрын өндөр албан тушаалтнуудыг баривчилжээ. “Аль Жазира”-гийн мэдээлснээр, тус улсын Цагаачлалын асуудал эрхэлсэн дэд сайд Силми Каримыг цагаачлалын бичиг баримтын бүрдүүлэлт, удирдлагатай холбоотой зөрчил гаргасан байж болзошгүй хэргээр саатуулсан байна. Түүнийг Авлигатай тэмцэх комиссын байранд 10 орчим цаг байцаасны дараа баривчилжээ.
Авлигатай тэмцэх комиссын төлөөлөгч Будии Прасетьогийн мэдээлснээр, уг хэрэг 2023-2024 онд Силми Карим тухайн үеийн Ерөнхийлөгч Жоко Видодогийн засаг захиргаанд Цагаачлалын асуудал эрхэлсэн ерөнхий захирлаар ажиллаж байх үед гарсан байж болзошгүй аж. Мөн энэ хэрэгт холбогдуулан өөр долоон сэжигтнийг тогтоосон гэж мэдэгдэв.
Үүнээс нэг өдрийн өмнө Индонезийн Ерөнхий прокурорын газар Ерөнхийлөгч Прабово Субиантогийн хүүхдийн хоол тэжээлийн дутагдалтай тэмцэх үнэгүй хоолны хөтөлбөрийг хариуцаж байсан Үндэсний хоол тэжээлийн агентлагийн дарга асан Дадан Хиндаяанаг авлигын хэрэгт холбогдуулан баривчилжээ. Тус хэрэгт мөн хоёр хүнийг саатуулсан байна.
Мөрдөн шалгах байгууллагын мэдээлснээр, үнэгүй хоолны хөтөлбөрийг сургуулиудад үйл ажиллагаа явуулдаг сангуудаар дамжуулан хэрэгжүүлдэг бөгөөд эдгээр санг хууль бус үйл ажиллагаанд ашигласан байж болзошгүй гэж үзэж байгаа юм.
Индонезийн Төрийн нарийн бичгийн дарга Прасетьо Хади сүүлийн хоёр өдөр дараалан өндөр албан тушаалтнууд авлигын хэрэгт холбогдсонд Засгийн газар санаа зовниж буйгаа илэрхийлжээ. Тэрбээр Авлигатай тэмцэх комисс болон Ерөнхий прокурорын газрын явуулж буй хуулийн ажиллагааг Засгийн газар хүндэтгэнэ гэж мэдэгдсэн байна.
Индонезид сүүлийн саруудад авлигын эсрэг ажиллагаа идэвхжиж, өнгөрсөн дөрөвдүгээр сард тус улсын Омбудсманы ерөнхий дарга албан тушаалдаа томилогдоод зургаахан хоногийн дараа хээл хахуулийн хэрэгт холбогдон баривчлагдсан юм.
-
Үйл явдал2021/06/21
Улаанбаатарт өдөртөө 28 хэм дулаан
-
Дэлхий нийтээр..2020/01/17
Нийслэлийн хүн амын махны хангамжийг нэмэгдүүлэх чиглэлээр зохион байгуулах ажлы...
-
Дэлхий нийтээр..2025/03/13
Монгол Улсын Ерөнхийлөгчийн Бүгд Найрамдах Чех Улсад хийсэн төрийн айлчлал өндөр...
-
Хэн юу хэлэв...2020/02/20
Ё.Баатарбилэг: Энэ бүх зохицуулалт хүүхдийн төлөө, тэдний сурч боловсрох эрхийг ...