Дэлхий нийтээр..
Улаанбаатар хотын багц хуулийг боловсруулж байна
Нийслэлийн Засаг дарга бөгөөд Улаанбаатар хотын Захирагч Д.Сумъяабазар энэ сарын 13-ны өдөр Сүхбаатар дүүргийн төрийн албан хаагчидтай уулзаж, Гурван суурьт хөтөлбөрийг танилцуулав. Уулзалтад тус дүүргийн ИТХ, ЗДТГ, хороо, хэсэг, сургууль, цэцэрлэг, эрүүл мэндийн байгууллагын төлөөлөл болсон 540 гаруй төрийн алба хаагч оролцсон юм.
Уулзалтын эхэнд Сүхбаатар дүүргийн Засаг дарга Х.Болормаа дүүрэгт хийж, хэрэгжүүлж буй ажлуудын талаар товч танилцууллаа. Сүхбаатар дүүрэг нь 20.8 мянган га газар нутаг, 20 хороо, 38,639 өрх, 145,258 хүн амтай. Дүүргийн төсвийн хөрөнгө оруулалтын дийлэнх буюу 44 хувийг эрүүл мэндийн салбарт, түүний дараагаар 25 хувийг амьдрах орчныг сайжруулах бүтээн байгуулалтад зарцуулж байна. Үүнээс онцолбол, гэр хорооллын шороон замыг засварлан авто зам тавьж, гурван га бүхий спорт цогцолбор байгуулж, дүүргийн Нэгдсэн эмнэлгийг барьж буй юм.
Хотын дарга ажлаа авснаасаа хойш шалтгаанд суурилсан шийдлүүдийг гаргахын тулд эрүүл засаглалыг хөгжүүлж, эдийн засгийг чадавхжуулж, эрх зүйн орчныг шинэчлэх зарчим бүхий Гурван суурьт хөтөлбөрийг хэрэгжүүлж байна. Эрх зүйн хөтөлбөрийн хүрээнд Нийслэл Улаанбаатар хотын эрх зүйн байдлын тухай хуулийг 27 жилийн дараа шинэчлэн батлуулсан юм.
Ингэснээр хотын эрх зүйн чадамж сайжирч, эрдэм шинжилгээний хүрээлэн, их, дээд сургуулийн эрдэмтэн, багш нар, олон улсын судалгааны байгууллагуудын оролцоо бүхий Бодлогын судалгаа, шинжилгээний төв Нийслэлийн Засаг даргын дэргэд ажиллах болсон. Үүний үр дүнд нийслэлийн удирдлагын багийн шийдвэр судалгаа, шинжилгээ, өгөгдөлд үндэслэн, шалтгаанд чиглэн гарч байна. Нийслэлийн “тархи” болсон уг төвөөс гарсан судалгааг Хотын дарга албан хаагчдад мөн танилцуулав. Улаанбаатар хотын төвлөрөл, түгжрэлийн суурь болсон шалтгаан, өгөгдлүүдэд үндэслэн гаргасан шийдэл, гарц гаргалгааг уулзалтад ирсэн албан хаагчид дэмжиж байв. Түүнчлэн Гурван суурьт хөтөлбөрийн хүрээнд цаашид хэрэгжүүлэх арга хэмжээг танилцууллаа.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Хотын хөгжлийг урагшлуулахын тулд хийх бүтээн байгуулалт олон бий. Харин тэднийг хийхэд хэрэгцээтэй хөрөнгийн эх үүсвэрийг бий болгоход эрх зүйн чадамжийг сайжруулах шаардлагатай. Тиймээс эрх зүйн шинэчлэлийг үргэлжлүүлэн хийнэ. Энэ хүрээнд 15 орчим хуулийг нэгтгэн, Улаанбаатар хотын багц хуулийг боловсруулж байна. Дахиад ч өөр хуулиуд нэмэгдэнэ” хэмээсэн юм. Мөн хуулийг УИХ-д өргөн барьж, батлуулахад нийслэл, дүүрэг төдийгүй, тэнд ажиллаж буй төрийн албан хаагчдын оролцоо чухал болохыг тэрбээр онцоллоо.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Дэлхий нийтээр..
Германы прокурорууд “Умардын урсгал”-ын халдлагыг Украины тал захиалсан гэж үзжээ
Германы прокурорууд 2022 онд “Умардын урсгал” хийн хоолойд гарсан дэлбэрэлттэй холбоотойгоор Украины армийн офицер асан этгээдэд яллах дүгнэлт үйлджээ. Түүнийг Украины төрийн байгууллагын нэрийн өмнөөс ажиллаж, хоолойг дэлбэлэх ажиллагаанд оролцсон гэж буруутгаж байна.
Германы хувийн мэдээлэл хамгаалах журмын дагуу Серхий К. гэж нэрлэгдсэн уг этгээдийг иргэний зориулалттай байгууламжид халдсан, дэлбэрэлт үүсгэсэн, дэд бүтэц сүйтгэсэн, нийтийн үйлчилгээг тасалдуулсан бүлэгт багтсан гэж үзжээ. Харин тэрбээр уг хэрэгт холбоогүй гэдгээ мэдэгдсэн байна.
Киевийн эрх баригчид Германы прокуроруудын мэдэгдэлд дэлгэрэнгүй тайлбар өгөх хангалттай мэдээлэл одоогоор байхгүй гэжээ. Украины Ерөнхийлөгч Владимир Зеленский яллах дүгнэлтийн талаар бүрэн мэдээлэл аваагүй тул одоогоор дүгнэлт хийхэд эрт байна гэж мэдэгдсэн байна.
Прокуроруудын мэдээлснээр Серхий К. нь 2022 оны есдүгээр сард шумбагчид, хөлгийн ахмад, тэсрэх бодисын мэргэжилтнээс бүрдсэн багийг удирдан Герман руу хуурамч бичиг баримтаар нэвтэрч, хөлөг түрээслэсэн гэж үзэж байна. Улмаар багийнхан Балтын тэнгист байрлах хоолойн хэсэгт тэсрэх төхөөрөмж байрлуулсан гэх үндэслэлээр шалгагдаж байна.
“Умардын урсгал”-ын дэлбэрэлт 2022 оны есдүгээр сард буюу Орос Украинд бүрэн хэмжээний довтолгоо эхлүүлснээс долоон сарын дараа болсон. Дэлбэрэлтийн улмаас Оросын байгалийн хийг Европ руу дамжуулах гол шугам болох “Умардын урсгал-1” гэмтэж, ашиглалтад ороогүй байсан “Умардын урсгал-2”-ын хэсэг мөн эвдэрсэн юм.
Германы тал уг хэргийг өөрийн харьяалалд хамаарна гэж үзэж байна. Учир нь гэмтсэн хоолойнууд Германы Мекленбург–Өрнөд Померани мужийн Любмин хотод хүрдэг бөгөөд Германы эрчим хүчний аюулгүй байдалд нөлөөлсөн гэж тайлбарлажээ.
Дэлхий нийтээр..
БНСУ-ын Ерөнхийлөгч И Жэ Мён Монгол Улсад төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Солонгос Улсын Ерөнхийлөгч И Жэ Мён, гэргий Ким Хе Гён-ы хамт 2026 оны 07 дугаар сарын 09-11-ний өдрүүдэд Монгол Улсад төрийн айлчлал хийнэ.
Энэ айлчлал БНСУ-ын төрийн тэргүүн 2011 онд манай улсад айлчилснаас хойш 15 жилийн дараа болох юм.
Айлчлалын хүрээнд Ерөнхийлөгч У.Хүрэлсүх, И Жэ Мён нар албан ёсны хэлэлцээ хийж, “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах болон олон улс, бүс нутгийн тавцан дахь хамтын ажиллагаа зэрэг чиглэлээр санал солилцоно.
Айлчлалын үеэр талууд харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөж байна.
БНСУ-ын Ерөнхийлөгч И Жэ Мён, гэргий Ким Хе Гён нар Үндэсний их баяр наадмын нээлтийн ёслолд хүндэт зочдын хувиар оролцоно.
Хоёр улс:
2006 онд “Сайн хөршийн, найрамдал, хамтын ажиллагааны түншлэл”
2011 онд “Иж бүрэн түншлэл”
2021 онд “Стратегийн түншлэл”-ийн харилцаа тогтоосон.
Монгол Улс, Бүгд Найрамдах Солонгос Улс 1990 оны 03 дугаар сарын 26-ны өдөр дипломат харилцаа тогтоосон. БНСУ 1990 онд Улаанбаатар хотноо, манай улс 1991 онд Сөүл хотноо Элчин сайдын яамаа нээжээ.
Дэлхий нийтээр..
Пакистан: Афганы хил орчимд явуулсан ажиллагаагаар 29 зэвсэгт этгээдийг устгасан гэж мэдэгдэв
Пакистаны аюулгүй байдлын хүчнийхэн Афганистантай залгаа хилийн бүсэд явуулсан хуурай замын ажиллагаа болон дараах агаарын цохилтын үеэр 29 зэвсэгт этгээдийг устгасан гэж тус улсын эрх баригчид мэдэгдлээ.
Пакистаны Мэдээллийн сайд Аттаулла Тарарын мэдээлснээр, уг ажиллагааг сүүлийн үед тус улсын нутаг дэвсгэрт гарсан хэд хэдэн зэвсэгт халдлагын хариу арга хэмжээ болгон зохион байгуулжээ. Тэрбээр ажиллагааны үеэр зэвсэгт бүлэглэлүүдийн байрлаж байсан нуугдах газар, баазуудад чиглэсэн цохилт өгсөн гэж мэдэгдсэн байна.
Энэхүү ажиллагаа нь Карачи хот дахь Пакистаны хилийн цэргийн төв байр руу зэвсэгт халдлага үйлдэгдсэний дараахан болсон юм. Уг халдлагын улмаас гурван цэргийн алба хаагч амь үрэгдэж, хэд хэдэн хүн шархадсан бөгөөд халдлагын хариуцлагыг Пакистаны Талибантай холбоотой Жамаат-ул-Ахрар бүлэглэл хүлээжээ.
Сүүлийн жилүүдэд Пакистаны баруун хойд бүсэд зэвсэгт халдлагын тоо эрс нэмэгдэж, тус улсын эрх баригчид ихэнх халдлагыг Пакистаны Талибан (TTP) болон түүнтэй холбоотой бүлэглэлүүдтэй холбон тайлбарлаж ирсэн. Харин Афганы эрх баригчид өөрийн нутаг дэвсгэрийг ийм зорилгоор ашиглуулахгүй гэсэн байр сууриа удаа дараа илэрхийлж байгаа юм.
-
Дэлхий нийтээр..2025/01/08
БНХАУ-ын хотжилтын барилгын хорооны төлөөллүүдтэй уулзлаа
-
Үйл явдал2022/09/09
“Барилга, орон сууц 2022” үзэсгэлэн яармаг нээгдэнэ
-
Дэлхий нийтээр..2021/07/05
Монголбанк: Орон сууцны ипотекийн хөнгөлөлттэй хүүтэй зээлийн төлбөрийг 2021 оны...
-
Дэлхий нийтээр..2023/04/26
УИХ: Өнөөдөр хуралдах ажлын хэсгүүд