Тод мэдээ
Барселонагийн шүүгч нар 7 сая еврогийн хахууль авсан хэрэгт сэжиглэгджээ
Шүүгчдийн хорооны дэд ерөнхийлөгч асан Хосе Мария Энрикес Негрейратай холбоотой компаниудад долоон сая еврогийн мөнгө хахууль өгсөн гэх үндэслэлээр Барселона клубыг хахууль өгсөн хэрэгт холбогдуулан сэжиглэж байгаа гэж ESPN-ийн сэтгүүлч Сэм Марсден, Моизес Ллоренс нар мэдээлжээ.
Барселона клубын ерөнхийлөгч асан Хосеп Мария Бартомеу, Сандро Росел, Негрейра болон түүний хүү Хавьер Энрикес Ромеро нар мөн тус хэрэгт сэжиглэгдэж байгаа талаар ESPN мэдээлэв.
3-р сард Испанийн шүүхэд Барселона клуб болон ерөнхийлөгч асан Негрейра нарын эсрэг гомдол гаргаж, хахууль өгсөн гэх үндэслэлээр мөрдөн байцаалтын ажиллагаа явуулжээ. Клубыг өмнө нь "спорт дахь авлига, бизнесийн авлига, хуурамч удирдлага, бичиг баримтыг хуурамчаар үйлдсэн" хэргээр буруутгаж байсан гэж ESPN мэдээлэв.
BBC Sport-ийн мэдээлснээр Испанийн цагдаа нар өнгөрсөн пүрэв гарагт Испанийн Шүүгчдийн техникийн хорооны төв байранд нэгжлэг хийжээ. 2001-2018 оны хооронд Негрейра өмнө нь Ла лигт шүүгчээр ажиллаж байгаад шүүгчийн хорооны дэд ерөнхийлөгчөөр ажиллаж байхдаа Барселона клубтэй холбоо хамаарал бүхий компаниудад 7 сая гаруй евро төлсөн гэж сэжиглэгдэж байна.
Барселонагийн ерөнхийлөгч асан Негрейра "Тэрээр клубын тоглосон тоглолтыг шүүсэн шүүгчдийн шийдвэр гаргах, улмаар тэмцээний үр дүнд Барсаг дэмжихэд чиглэсэн үйл ажиллагаа явуулна" гэх агуулгатай гэрээ байгуулсан.
Бартомеу 2014 оноос 2020 онд албан тушаалаасаа огцрох хүртлээ тус клубын ерөнхийлөгчөөр ажиллаж байсан. Росел 2010-2014 оныг хүртэл удирдаж байсан.
Клубын одоогийн ерөнхийлөгч Жоан Лапорта 2021 онд Бартомеугийн оронд сонгогдсон. Тэрээр өмнө нь Негрейрагийн компаниудад өгсөн төлбөрийг "шүүгчдийн техникийн тайлангийн төлбөр" гэж тайлбарлаж байсан.
Лапорта мөн "Барселона" шүүгчдийг “худалдаж авсан” гэдгийг үгүйсгэсэн. Барселона одоогоор Ла лигт Жирона болон Реал Мадридын дараа 5-2-0 гэсэн амжилтаар гуравдугаарт бичигдэж байна.
Тод мэдээ
"Орчлон" хорооллын зүүн талын хашааг буулгаж, явган хүний зам барилаа
СХД-ийн 27 дугаар хороо, "Орчлон" хорооллын зүүн талын хашааг буулгаж, явган хүний зам барьж ашиглалтад орууллаа.
Дээрх байршилд өмнө нь орон сууцны барилга барих зориулалтаар гурван иргэн, аж ахуйн нэгж байгууллага газар эзэмшиж байсан. Газрыг хоёр жил ба түүнээс дээш хугацаагаар зориулалтын дагуу ашиглаагүй, явган хүний орц гарц хааж хашаалсан байсан юм.
Иймээс зөрчлийг арилгаж, дүүргийн Захиалагчийн алба ОНӨААТҮГ-аас өнгөрсөн амралтын өдрүүдэд явган хүний зам барьж ашиглалтад орууллаа.
Тод мэдээ
Ураны төслийг хэрэгжүүлэхэд ОУ-ын итгэмжлэгдсэн лаборатори байгуулж давхар хяналт хийнэ
Монгол-Францын Засгийн газар хоорондын комиссын хуралдаан 11 жилийн дараа Парис хотод болж, дараах асуудлаар харилцан тохиролцоонд хүрлээ. Хуралдаанд Францын талаас Европ, Гадаад хэргийн яамны Ерөнхий нарийн бичгийн дарга, хатагтай Анн-Мари Дэкот, Монголын талаас ЗГХЭГ-ын дарга Н.Учрал нар оролцлоо.
Энэ үеэр:
- Дорноговь аймагт олон улсын итгэмжлэгдсэн лаборатори байгуулж цацраг идэвхит ашигт малтмалын хүн, мал, амьтан, хүрээлэн байгаа орчинд үзүүлэх цацрагийн нөлөөлөлд хийсэн хэмжилт, шинжилгээг давхар хяналтанд оруулах санал гаргалаа. Хөрөнгө оруулагч талын зүгээс итгэмжлэгдсэн лаборатори байгуулахыг дэмжин ажиллах,
- Төслийн дэргэд хараат бус хяналтын зөвлөлийг иргэний нийгмийн байгууллагууд, мэргэжлийн холбоод, орон нутгийн иргэдийн төлөөллийг оролцуулан байгуулж иргэний хяналт тогтоож, ил тод нээлттэй ажиллах нөхцлийг бүрдүүлж, олон нийтийн мэдэх эрхийг хангаж ажиллах,
- Хоёр улс Онцгой байдлын нисдэг тэрэг, техник төхөөрөмжийн туслалцаа, эрчим хүчний эс үүсвэрийг төрөлжүүлэх, боловсрол, соёлын хамтын ажиллагааг өргөжүүлэх,
- Ажлын хэсгийн хуралдааны үеэр Монгол Улсын Иргэний нисэхийн ерөнхий газар, Бүгд Найрамдах Франц Улсын Иргэний нисэхийн ерөнхий газар хоорондын “Иргэний нисэхийн салбарт хамтран ажиллах тухай Техник хамтын ажиллагааны гэрээ”-нд гарын үсэг зурлаа.
Мөн 2026 онд Монгол Улсад зохион байгуулагдах Цөлжилттэй тэмцэх тухай НҮБ-ын суурь конвенцын Талуудын 17 дугаар бага хуралд дэмжин оролцохоор тохиролцлоо.
Сануулахад, энэ онд хоёр улсын хооронд дипломат харилцаа тогтоосны 60 жилийн ой тохиож байна.
Тод мэдээ
Бусдын эрүүл мэндэд хохирол учруулсан 192 хэргийг шүүхээр шийдвэрлүүлжээ
Тээврийн прокурорын газраас 2024 онд зам тээврийн ослын 224 эрүүгийн хэрэгт Эрүүл мэндийн даатгалын тухай хуулийн 12 дугаар зүйлийн 12.1 дэх хэсгийн 12.1.1-т заасны дагуу эрүүл мэндийн даатгалын сангаас гаргасан 412 сая төгрөгийн төлбөрийг гэм буруутай этгээдээр нөхөн төлүүлэхээр шүүхээр шийдвэрлүүлсэн байна.
2025 оны 5 дугаар сарын 01-ний өдрийн байдлаар Эрүүгийн хуулийн 27.10 дугаар зүйлд заасан “Тээврийн хэрэгслийн хөдөлгөөний аюулгүй байдал, ашиглалтын журам зөрчиж” бусдын эрүүл мэндэд хохирол учруулсан 192 хэргийг шүүхээр шийдвэрлүүлсэн. Үүнээс 135 хэрэгт Эрүүл мэндийн даатгалын санд учирсан 230.3 сая төгрөгийн хохирлыг гэм буруутай этгээдээр нөхөн төлүүлэхээр шийдвэрлүүлсэн.
Шүүхээр шийдвэрлэсэн хэргээс “Тээврийн хэрэгслийн хөдөлгөөний аюулгүй байдал, ашиглалтын журам зөрчих” гэмт хэргийн улмаас хүний эрүүл мэндэд хүндэвтэр хохирол учруулсан 97, хүнд хохирол учруулсан 35, хүний амь нас хохироосон 3 хэрэг байна.
Тээврийн прокурорын газраас 2025 оны эхний 5 сарын байдлаар гэмт хэргийн улмаас Эрүүл мэндийн даатгалын санд учирсан хохирлыг гэм буруутай этгээдээс гаргуулж, эрүүгийн хэрэгт хамтатган шийдвэрлүүлсэн хэргийн тоог өмнөх оны мөн үетэй харьцуулахад 31.8 хувиар, шийдвэрлүүлсэн хохирлын хэмжээ 26.7 хувиар тус тус өссөн дүнтэй байна.
