Тод мэдээ
“Барилгын салбарын ханган нийлүүлэгчдийн чуулган 2023” болно
Барилгын материалын үйлдвэрлэгчид, ханган нийлүүлэгчид, худалдаа, үйлчилгээ эрхлэгчдэд зориулан “Барилгын ханган нийлүүлэгчдийн чуулган”-ыг 2023 оны 04-р сарын 06-ны өдөр МҮХАҮТанхимд зохион байгуулагдах гэж байна.
Уг чуулганаар барилгын ханган нийлүүлэгчдэд тулгамдаж буй асуудлыг ярилцаж, гарцыг тодорхойлон, харилцан уялдаатай ажиллах боломжийг бүрдүүлэхэд чиглэгдэх бөгөөд БХБЯ, БХТ болон төрийн бус байгууллага, барилгын салбарын төсөл хэрэгжүүлэгчид, ханган нийлүүлэгчид, салбарын ААНБ- уудын удирдлагууд, хөрөнгө оруулагчид, худалдааны төлөөлөгчид оролцоно.
Чуулганы үеэр Барилгын материалын салбар болон тээвэр логистик ханган нийлүүлэлтийн чиглэлийн төрийн бодлого, дотоодын үйлдвэрлэлийн өнөөгийн байдал, төслийн худалдан авалтын талаар салбарын мэргэжилтнүүд илтгэл тавьж, хэлэлцүүлэг өрнүүлэх бөгөөд түүнээс гарсан дүгнэлт зөвлөмжийг холбогдох төрийн байгууллагуудад хүргэх юм.
Иймд, барилгын салбарт үйл ажиллагаа явуулж буй барилгын материалын үйлдвэрлэл, худалдаа, гүйцэтгэгч байгууллагуудыг чуулганд оролцон үзэл бодлоо илэрхийлэх, саналаа хүргүүлэхийг урьж байна.
“Барилгын салбарын ханган нийлүүлэгчдийн чуулган 2023” илтгэгчид
Хэлэлцүүлэг
Оролцогчдод өгөх үнэ цэн
-
Шинэлэг мэдээлэл
-
Томоохон төслүүдэд ханган нийлүүлэлт хийх боломж
-
Нетворкинг
-
Мэдлэг
-
Гарын бэлэг - Барилга МН сэтгүүл, "Барилгын ханган нийлүүлэлтийн чуулган 2023" тусгай дугаар
Зохион байгуулагч: БАРИЛГА МН
Дэмжигч байгууллага: БАРИЛГА ХОТ БАЙГУУЛАЛТЫН ЯАМ
БАРИЛГЫН ХӨГЖЛИЙН ТӨВ
МОНГОЛЫН БАРИЛГЫН МАТЕРИАЛ ҮЙЛДВЭРЛЭГЧДИЙН ХОЛБОО
МОНГОЛЫН ХУДАЛДАА АЖ ҮЙЛДВЭРИЙН ТАНХИМ
Ивээн тэтгэгч: МАТЕРИАЛИМПЕКС ХК
Бүртгэлийн хураамж:
Барилга МН-ийн Гишүүн байгууллага 40,000₮
Гишүүн бус байгууллага 80,000₮
Утас: 7711-3333, 9100-0255
Тод мэдээ
Автобусны 19 шинэ буудал ашиглалтад орлоо
Нийслэлийн гэр хорооллын гудамж, зам талбайд нийтийн тээврийн хүртээмж, үйлчилгээг сайжруулах, явган зорчигчдын аюулгүй байдлыг хангах зорилгоор Нийслэлийн Засаг даргын тамгын газар, Азийн хөгжлийн банк хамтран “Гэр хорооллын нийтийн тээврийн үйлчилгээг сайжруулах” төслийг 2019 оноос хэрэгжүүлж байна.
Төслийн хүрээнд Чингэлтэй дүүргийн 17, 18, 23 дугаар хорооны нутаг дэвсгэрт хоёр битүү, 17 задгай шинэ автобусны зогсоолыг ашиглалтад орууллаа. Автобусны буудал тус бүр нийтийн тээврийн мэдээлэл авах ухаалаг самбартай бөгөөд тухайн замд үйлчилдэг нийтийн тээврийн чиглэлийн автобусны ирэх хугацааг харах боломжтой. Мөн автобусны буудал бүрд байршуулсан хяналтын камер нь буудал орчмын аюулгүй байдлыг хянах боломжтой гэдгийг албаны хүмүүс онцоллоо.
Энэ талаар Нийслэлийн нийтийн тээврийн газрын дарга Д.Отгонжаргал "Улаанбаатар хотын хэмжээнд нийт 1115 автобусны буудал бий. Үүний 59 нь автобусны эцсийн зогсоол юм. Нийт автобусны буудлын 65 хувьд нь иж бүрэн тохижилт хийгдээгүй. Бид гэр хорооллын нийтийн тээврийн үйлчилгээг сайжруулах төслийн хүрэнд Чингэлтэй дүүргийн 19 автобусны буудлыг шинээр ашиглалтад орууллаа. Шинэ автобусны буудал ашиглалтад орсонтой холбогдуулан бид автобусны чиглэлийг нэмэгдүүлэхээр ажиллаж байна" гэв.
“Гэр хорооллын нийтийн тээврийн үйлчилгээг сайжруулах” төслийн зохицуулагч О.Мөнхнасан "Төслийн хүрээнд бид нийтийн тээврийн үйлчилгээ эрхэлдэг байгууллагуудын ажилтан, албан хаагч, жолооч нарыг чадавхжуулах, нийтийн тээврийн үйлчилгээ, аюулгүй байдлыг сайжруулах тал дээр үе шаттай ажил арга хэмжээг хэрэгжүүлж байгаа. Үүнээс гадна автобусны буудлыг шинээр ашиглалтад оруулах нь төслийн нэгдүгээр зорилт байсан. Өнөөдөр бид 19 шинэ автобусны буудлыг ашиглалтад оруулж хүлээлгэн өгч байгаа. Ингэхдээ автобусны эцсийн зогсоолд шинээр 0,8 км асфальтбетон замыг барьж ашиглалтад орууллаа" гэв.
Тод мэдээ
Үндэсний орон сууцжуулалтын тухай хуулийн төслийг өргөн барина
Засгийн газрын ээлжит хуралдаан 2024 оны тавдугаар сарын 8-нд болж дараах асуудлыг хэлэлцэн шийдвэрлэлээ.
Үндэсний баялгийн сангийн тухай хуульд “Хуримтлалын сан” газрын хэвлийн баялгийн үр өгөөжийг иргэн бүрд тэгш, шударга хүртээх зорилгоор эрүүл мэнд, боловсрол, орон сууцны зориулалтаар дэмжлэг үзүүлэхээр заасныг хэрэгжүүлэх зорилгоор Үндэсний орон сууцжуулалтын тухай хуулийн төслийг боловсруулж Засгийн газрын өнөөдрийн хуралдаанд танилцуулж хэлэлцүүллээ. Тус төслийг ирэх долоо хоногт УИХ-д өргөн барина.
Уг хууль нь төрөөс иргэдийг орон сууцжуулах зорилгоор орон сууц хөгжүүлэх үйл ажиллагааг санхүүжүүлэх, орон сууцны сан байгуулах, хөрөнгө бүрдүүлэх, удирдах, зарцуулах, гүйцэтгэлд хяналт тавихтай холбоотой харилцааг зохицуулна.
Үндэсний орон сууцжуулалтын тухай хуулийн төсөл зургаан бүлэг, 21 зүйлтэй, Монгол Улсын Үндсэн хууль болон бусад хуультай харшлах зүйлгүй. Хууль батлагдсанаар орон сууцжуулах үйл ажиллагааг нэгдсэн удирдлага зохион байгуулалтаар хангах, санхүүжилтийн эх үүсвэрийг зах зээлийн зарчимд нийцүүлэн тогтвортой нэмэгдүүлж, хүртээмжийг дээшлүүлэх, бага, дунд орлоготой зорилтот бүлгийг түрээсийн, түрээслээд өмчлөх хэлбэрийн орон сууцаар хангах эрх зүйн орчин бүрдэнэ гэж үзэж байна.
Орон сууцны тооллогын 2022 оны дүнгээс харахад манай улсын 941,547 өрхийн 32.1 хувь нь буюу 302,237 нь инженерийн дэд бүтэцтэй орон сууцанд амьдардаг бол 29.7 хувь буюу 279,639 өрх инженерийн дэд бүтцийн бүрэн хангамжгүй байшин хороололд, 38.2 хувь буюу 359,671 нь гэр сууцанд амьдарч байна.
Нийслэлийн 50.1 хувь буюу 216,989 өрх гэр хорооллын бүсэд инженерийн дэд бүтцийн хангамжгүй байшин болон гэр сууцанд амьдарч байгаа нь Улаанбаатар хотын агаар, хөрсний бохирдлын 75 орчим хувийг бүрдүүлж байна. Иймд Улаанбаатар хотын иргэдийг эрүүл аюулгүй орчинд амьдруулж, үр бүтээмжтэй ажиллаж, сурч боловсрох нөхцөлийг бүрдүүлэхэд нэн тэргүүний авч хэрэгжүүлэх арга хэмжээг энэ иргэдийн орон сууцжуулах, өрхийн орлого, амьжиргааны түвшнийг дээшлүүлэх, хөдөө, орон нутагт шилжин суурьшихад нь орон сууцны дэмжлэг үзүүлэхэд анхаарал хандуулах шаардлагатай байна.
Тод мэдээ
Тусгай зориулалтын экскаватораар “S’Outlet” дэлгүүрийн барилгыг нурааж байна
Сэлбэ голын голдирлыг өөрчлөн барьсан “S’Outlet” дэлгүүрийн дөрвөн давхар объект, агуулах, цахилгаан эрчим хүчний гурван дэд станцыг өнгөрсөн гуравдугаар сард буулгаж дууссан.
Тэгвэл өнөөдөр тус дэлгүүрийн төмөр бетонон хийцээр хүчитгэсэн таван давхар барилгыг ХБНГУ-д үйлдвэрлэсэн "Liebherr" брэндийн барилга нураалтын тусгай зориулалтын R940 экскаватороор буулгаж байна.
Уг экскаваторыг өнгөрсөн долоо хоногт хүлээж авсан бөгөөд 7 давхарт буюу 23 метрийн өндөрт хүрч ажиллах боломжтой Монгол Улсад ганц байгаа механизм юм.
Нийслэлийн Засаг дарга бөгөөд Улаанбаатар хотын Захирагч Х.Нямбаатар "Голын голдирол өөрчлөн барьсан объектуудын буулгаж, үерийн даланг хүчитгэх ажлууд үргэлжилж байна. Сэлбэ голын хамгаалалтын бүсэд ААН-д газар олгосноос үүдэн тус голын урсац боогдож, голдиролд өөрчлөлт орсон. Голын голдирлыг өөрчлөн барьсан барилгыг нурааж дууссаны дараа голын урсцыг нэмэгдүүлнэ. Мөн 1.5 км урт, 4-4.5 метр өндөр, төмөр бетонон хийцтэй үерийн даланг хийнэ. Голын сав газар дагуу хууль зөрчиж барилга барьсан ААН, иргэд үерийн уснаас урьдчилан сэргийлэх ажлын хүрээнд тавьж буй шаардлагыг цаг алдалгүй хүлээж авч, хүндэтгэлтэй хандах хэрэгтэй" гэдгийг хэлэв.
-
Тод мэдээ2022/06/03
Соёл урлагийн үзвэр, үйлчилгээний орлогын нэг хувийг хүүхдийн хөгжил, хамгаалалд...
-
Өнөөдөр2021/01/04
Эрчим хүчний яамнаас мэдээлж байна /2021.01.04/
-
Тод мэдээ2022/06/02
Ерөнхий сайд төрийн албан хаагчдыг автобусаар зорчихыг уриаллаа
-
Тод мэдээ2021/07/06
БГД: Эмийн багцыг иргэдэд хүргэх ажлын хэсэг байгууллаа
Сэтгэгдэл