Тод индэр
М.Мөнхгэрэл: Ундны усны шинжилгээний дүнд эерэг сорьц илрээгүй
Долоодугаар сард нийслэлд орсон их хэмжээний борооны улмаас орон сууцны зоорийн давхар, нийтийн эзэмшлийн гудамж, талбайн хөрсөнд бохирдол үүссэн. Үүнтэй холбоотойгоор гэдэсний халдварт өвчин дэгдэх болон бусад эрсдэлээс урьдчилан сэргийлэн ундны ус, хөрсөнд шинжилгээ хийсэн юм. Энэ талаар Нийслэлийн Эрүүл мэндийн газрын эрүүл ахуй, халдвар хамгааллын хяналтын улсын ахлах байцаагч М.Мөнхгэрэлээс тодрууллаа.
-Үерийн дараа хаанаас, ямар сорьц авч шинжилгээ хийсэн бэ?
-Үерийн улмаас үүссэн нөхцөл байдалтай холбоотойгоор хүн амын дунд гэдэсний халдварт өвчин дэгдэх болон бусад эрсдэлээс урьдчилан сэргийлэх зорилгоор хөрсний бохирдлын түвшин, цэвэрлэх байгууламжийн цэвэрлэгээний түвшинг тогтоохоор лабораторийн шинжилгээ хийсэн. Ингэхдээ Ус сувгийн удирдах газар /УСУГ/-ын харьяа ундны усны зургаан эх үүсвэр, зөөврийн болон шугамын ус түгээх 63 байр, нийтэд ус түгээж буй хувийн эзэмшлийн 11 гүний худгийн уснаас нийт 160 сорьц авч, Стандарт хэмжил зүйн газрын лабораторид хими, нян судлалын шинжилгээ хийсэн. Шинжилгээний дүнд эерэг сорьц илрээгүй. Өөрөөр хэлбэл, ундны ус стандартын шаардлага хангаж байна.
Түүнчлэн УСУГ-ын харьяа цэвэрлэх байгууламж руу орж буй, тэндээс цэвэрлэгдээд гарч байгаа бохир уснаас дээж авч Стандарт хэмжил зүйн газрын лабораторид нян судлалын шинжилгээ хийлгүүлсэн. Шинжилгээнд хамрагдсан бүх цэвэрлэх байгууламжийн усанд гэдэсний бүлгийн болон эмгэг төрөгч нян илрээгүй. Түүнчлэн 59 байршилд хөрсний дээж авч, хими, нян судлалын шинжилгээ хийсэн. Үүнээс 30.5 хувь нь дунд зэргийн бохирдолтой, үлдсэн 69.5 хувь бага зэргийн бохирдолтой гэсэн дүгнэлт гарсан.
-Хөрс нь бохирдолтой байршлуудад ариутгал хийх үү. Тухайн байршлуудад шинжилгээнээс өмнө халдваргүйжүүлэлт хийсэн үү?
-Цэвэрлэгээ, ариутгал хийж буй албан хаагчдын эрүүл ахуйг хангах үүднээс шинжилгээ хийхээс өмнө тухайн байршлуудад халдваргүйжүүлэлт хийсэн. Нийслэлийн хэмжээнд хөрсний дээж авахаар тогтоосон 74 байршил байдаг бөгөөд 59 цэгээс нь дээж авсан. Үүнээс Амгалан, Яармаг, Офицеруудын ордон, Шархадны эцэс, Ханын материал, Хайлааст зэрэг 18 нь дунд зэргийн бохирдолтой, бусад нь бага зэргийн бохирдолтой гарсан. Үлдсэн 15 байршлаас шинжилгээ, сорьц авахаар ажиллаж байна. Дунд болон бага зэргийн бохирдолтой гарсан байршлуудад дахин халдваргүйжүүлэлт хийх зөвлөмж, чиглэлийг дүүргүүдийн Засаг дарга нарт хүргүүлээд буй.
-Үерийн дараа хэр хэмжээний талбайд ариутгал, халдваргүйжүүлэлт хийсэн бэ?
-Үерийн улмаас үүссэн лаг, шаврыг цэвэрлэсний дараа ариутгал, халдваргүйтгэлийг гүйцэтгэсэн. Нийслэлийн хэмжээнд 157 орон сууц, тэдгээрийн 340 орц, хонгил, гадна талбай, хүүхдийн тоглоомын талбайн нийт 2,156,288 ам метр талбай, мөн Сэлбэ, Дунд голын ай сав дагуух нийт 1,697,631 ам метр хөрс зэрэг нийт 3,853,919 ам метр талбайд ариутгал, халдваргүйжүүлэлт хийсэн. Мөн үйл явцад хяналт тавин, мэргэжил арга зүйн зөвлөгөө өгөн ажиллалаа. Түүнчлэн гэр хорооллын шаардлага хангахгүй байгаа нүхэн жорлонг шинэчлэх, нөөц бололцоогоороо халдваргүйжүүлэлт хийх зөвлөмжийг дүүргүүдэд хүргүүлж байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод индэр
“Сахал” Ж.Бат-Эрдэнийн хэлсэн үг сэтгүүл зүйд биш шантаачдад чиглэжээ
Хэн дуртай нь хэвлэл мэдээллийн хэрэгслээр хүний нүд рүү хор цацна, ална тална гэдэг. Цахим сүлжээнд өнөөхийг нь сэвж, мөнгөний шантааж, попролыг өдөөдөг муу жишгийг одоо халах цаг болсон. Монгол хүн амны билгээрээ, ах захтай ард түмэн шүү.
Тод индэр
Ахмед Надим: Спортын томоохон үйл явдлыг хурдан шуурхай үзэгчид хүргэхэд хамтран ажиллах хэрэгтэй
Ази, Номхон далайн орнуудын өргөн нэвтрүүлгийн холбооны 62 дугаар Ерөнхий Ассамблейн Спортын хорооны хурал "Туушин" зочид буудалд үргэлжилж байна.
Тус хурлыг нээж Монголын Үндэсний спортын холбооны ерөнхийлөгч Ц.Магалжав, Ази, Номхон далайн өргөн нэвтрүүлгийн холбооны Спортын бүлгийн дэд захирал Нам Сан Вон, Ази Номхон далайн өргөн нэвтрүүлгийн холбооны Ерөнхий нарийн бичгийн дарга Ахмед Надим нар үг хэлсэн.
Спортын хорооны хурлын өнөөдрийн хэлэлцүүлэг "Үндэсний болон соёлын өвийг хамгаалахад спортын хэвлэл мэдээллийн гүйцэтгэх үүрэг" сэдвийн хүрээнд өрнөж байгаа юм.
Энэ хүрээнд МҮОНРТ-ийн Спортын сувгийн захирал О.Ууганбаяр, КВЅ-ийн Спортын төлөвлөлт, продюсерын багийн дэд дарга Нам Сан Вон болон Шри Ланкийн SLRS телевизийн Ерөнхий захирал Маножа Надишана Амарасинхэ нар илтгэлээ хэлэлцүүлж байна.
Ази, Номхон далайн өргөн нэвтрүүлгийн холбооны Ерөнхий нарийн бичгийн дарга Ахмед Надим "Аль ч улсын Үндэсний телевиз болон өргөн нэвтрүүлгийн сүлжээнд томоохон сорилтууд тулгараад байна. Эдгээр сорилт нь дижитал платформуудтай холбогдож байна. Иймд бид бүхэн хоорондоо хамтран ажиллах шаардлагатай. Энэ удаагийн "ABU-62" дугаар Ерөнхий Ассамблейн хурал яг энэ төрлийн хамтын ажиллагааг бэхжүүлэх, стратеги төлөвлөлтийг сайжруулахад чиглэгдсэн чухал уулзалт болж байна.
2026 онд Хөлбөмбөгийн дэлхийн аварга шалгаруулах тэмцээн, Азийн наадам зэрэг спортын томоохон тэмцээн уралдаанууд зохион байгуулагдана. Эдгээр спортын томоохон үйл явдлыг бид хурдан шуурхай үзэгчдэд хүргэхэд хамтран ажиллах хэрэгтэй. Энэ нь олон нийтийг нэгтгэх спортоор дамжуулан нөхөрлүүлэх зэрэг олон давуу талтай байдаг.
Ази, Номхон далайн өргөн нэвтрүүлгийн холбооноос нэгэн платформыг шинээр нэвтрүүлсэн. Энэхүү платформоор дамжуулан цахим хэлбэрээр спортын төрөл бүрийн нэвтрүүлэг хүргэх шинэ боломж бүрдэж байгаа бөгөөд энэ удаагийн Ерөнхий Ассамблейн хурлаар тухайн платформын стратегийн шинжтэй бодлогын асуудлуудыг хэлэлцэнэ” гэдгийг онцолсон юм.
Тод индэр
Г.Гэрэл: “ABU GENERAL ASSEMBLY” олон улсын хуралд 40 гаруй орны хэвлэл мэдээллийн байгууллагууд оролцоно
“ABU GENERAL ASSEMBLY” олон улсын хурал есдүгээр сарын 10-15-ны хооронд болно. Энэхүү хурлын талаар "МҮОНРТ-ийн Ерөнхий захирал Г.Гэрэлтэй "Монголын мэдээ" сувгийн сэтгүүлч ярилцсаныг хүргэж байна.
-МҮОНРТ “ABU GENERAL ASSEMBLY” олон улсын хурлыг эх орондоо хоёр дахь удаагаа зохион байгуулах гэж байна. “ABU GENERAL ASSEMBLY”олон улсын хурлын бэлтгэл ажил хэр хангагдаж байгаа вэ?
-МҮОНРТ Ази, Номхон далайн өргөн нэвтрүүлгийн Радио телевизийн холбооны гишүүнээр 1991 онд элсэн орж, 2006 оноос хойш үйл ажиллагаанд нь маш идэвхтэй оролцсоор ирсэн. 2009 онд манай телевиз Улаанбаатар хотод "ABU” чуулга уулзалтын үндсэн зохион байгуулагчаар ажиллаж байсан. 2025 онд хоёр дахь удаагаа Улаанбаатар хотод олон улсын нэр хүндтэй чуулга уулзалтыг зохион байгуулахаар бэлтгэл ажлаа хангаж байна.
-Энэ хурлаар ямар асуудал яригдах вэ. Энэ талаар дэлгэрэнгүй мэдээлэл өгнө үү?
-“ABU байгууллага нь Ази, Номхон далайн телевиз радиогийн өргөн нэвтрүүлгийн идэвхтэй үйл ажиллагаа явуулж байгаа мэргэжлийн редакцтай байгууллагуудыг гишүүнээр элсүүлдэг. Монгол Улсаас хоёр гишүүн байна. Хамгийн эхэнд TV5 телевиз гишүүнээр элсэж байсан.
Үүний дараа МҮОНРТ гишүүнээр элссэн юм. Холбоонд элсэх нь мэргэжил арга зүйн хувьд хөгжиж дэвших, суралцах боломжийг олгодог. Гадаад хамтын ажиллагааг өрнүүлэхээс гадна нэвтрүүлэг, уран бүтээлтэй холбоотой хамтын ажиллагаа чухал байдаг. Мэргэжлийн байгууллагын хувьд маш чухал хүний нөөцийн хөгжиж дэвших үйл ажиллагаа “ABU” холбоо харилцаанд явдаг.
Энэ жил болох гэж байгаа “ABU GENERAL ASSEMBLY” олон улсын хуралд 40 гаруй орны хэвлэл мэдээллийн тэргүүлэх байгууллагуудын захирал, ерөнхий захирал, продюсер, ажилчид ирэх гэж байна. 2025 онд зохион байгуулагдаж байгаа "ABU GENERAL ASSEMBLY" олон улсын хурал “Үндэсний өв соёлыг хамгаалах, түгээн дэлгэрүүлэхэд хэвлэл мэдээллийн байгууллагын оролцоо” сэдвийн хүрээнд явагдана.
-Бидэнд их ойр сэдэв байна?
-МҮОНРТ үндэсний өв соёлоо түгээн дэлгэрүүлэх үндсэн үүрэг бүхий хөтөлбөрийн бодлогыг эрхлэн гаргадаг. Манай орны үзэгчид болон энэ чиглэлээр үйл ажиллагаа явуулдаг хэвлэл мэдээллийн байгууллагын хувьд их чухал. Есдүгээр сарын 11-нд спортын болон хөтөлбөрийн бодлого, техникийн салбарын уулзалт хурал болно. Есдүгээр сарын 12-ны өдөр спорт, радиогийн болон техникийн бүх форумд оролцогчдын салбар хуралдаан болно.
Есдүгээр сарын 13-ны өдөр Монгол Улсыг зорьж ирсэн хэвлэл мэдээллийн байгууллагын зочдод зориулж, Монголынхоо өв соёлыг харуулсан бэсрэг наадмыг зохион байгуулахаар бэлтгэл ажлаа хангаж байна.
Мөн "ABU GENERAL ASSEMBLY” олон улсын хурлын үеэр дууны наадам зохион байгуулна.
Энэ арга хэмжээнд 10 гаруй орны уран бүтээлчид оролцоно. МҮОНРТ эдгээр орны уран бүтээлчдийн тоглолтыг шууд дамжуулж үзэгчдэд хүргэнэ. Энэ дууны наадамд дэлхийд алдартай “THE HU” хамтлаг оролцоно.
-40 гаруй улсын хэвлэл мэдээллийн байгууллагын удирдлагууд Монгол Улсад ирнэ. Энэ нь Монгол Улсаа сурталчлах сайхан боломж болох нь ээ?
-Дэлхийн хэвлэл мэдээллийн салбарт МҮОНРТ тод мөртэй, 1991 оноос хойш энэ үйл ажиллагаанд идэвхтэй оролцогч байгууллага гэдгээ дэлхий нийтэд зарлана. Мөн телевизийн гадаад харилцаа илүү өргөжин тэлж хамтын ажиллагааг сайжруулах, чуулга уулзалтын үеэр бүх орны хэвлэл мэдээллийн байгууллагаар дамжуулж эх орноо сурталчлах, Монголын өв соёлоо дэлхий нийтэд таниулах боломж нээгдэж байгаа учраас маш их ач холбогдолтой.
Есдүгээр сарын 14-нд шагнал гардуулах ёслол болно. Эндээс бид мэргэжлийн сэтгүүлзүйн үйл ажиллагаа ямар хандлагатай байна. Бид ямар зураглаачийн бүтээлийг шилдэг гэж үзэж байна. Ямар редакцын бодлого, ямар нэвтрүүлэг шилдэг болохыг зарлана гэх зэрэг мэргэжлийн чиг хандлагад чиглэсэн сонирхолтой үйл ажиллагаануудыг зохион байгуулахаар бэлтгэлээ ханган ажиллаж байна.
