Тод мэдээ
Говьсүмбэрчүүд хийсэн ажил, хэлэх үгтэй нэр дэвшигчдэд итгэл хүлээлгэнэ
Монгол Ардын намын дарга, Ерөнхий сайд Л.Оюун-Эрдэнэ өнөөдөр Говьсүмбэр аймгийн иргэд, сонгогчидтой уулзав. “Шинэ сэргэлтийн бодлого”-ын Боомтын сэргэлт, Бүсчилсэн хөгжлийн бодлогын хүрээнд өнгөрсөн хугацаанд Засгийн газраас авч хэрэгжүүлсэн ажил бодит үр дүнгээ өгч эдийн засагт эерэг нөлөө үзүүлж байгаад Говьсүмбэрчүүд талархалтай байна. Иргэд цаашид тогтвортой засаглалыг дэмжиж, хийсэн ажил, хэлэх үгтэй нэр дэвшигчдэд итгэл хүлээлгэхээ илэрхийллээ.
Монгол Ардын намын дарга, Ерөнхий сайд Л.Оюун-Эрдэнэ “Боржигон сэцэн вангийн хошуу, Буддын Таван ухааны төв байсан Говьсүмбэр нутгийн зон олон, иргэд сонгогчидтой дахин уулзаж байгаадаа баяртай байна” гээд энэ удаагийн сонгуульд Ардын нам яагаад ялах ёстойг тайлбарлалаа. Тэрбээр “Тусгаар тогтнол, бүрэн эрхт байдал, парламентын засаглалаа хамгаалан бэхжүүлэх сонголтын өмнө та бид байна. Сонгуулийн үед түр зуурын үйл явдал, худал сурталчилгаа, жижиг гомдол, мөнгөөр үнэт зүйлээ сольж болохгүй. Авлигатай тэмцэхийн тулд, авлигачдаас ард түмэн хүчтэй гэдгээ нотлохын тулд та бүхэн Ардын намыг сонгоорой. Нэг ёсондоо ард түмэн ялах уу, хилийн чанадаас ажиглаж буй бүлэглэл ялах уу гэдэг сонголт юм” гэлээ.
Засгийн газрын эхлүүлсэн шударга ёсны тэмцлийн дүнд өнгөрсөн хугацаанд эдийн засаг -4.6 хувиас 7 хувь болж, валютын нөөц 5 тэрбум долларт хүрч, Хөгжлийн банкны өрүүдийг бүрэн төлж, цалин, тэтгэврийг 2 дахин, хөдөөгийн нэмэгдлийг 40 хувиар нэмэгдүүлж чадлаа. Мөн иргэн бүр байгалийн баялгаасаа өгөөж хүртэх боломж бүрдэж, “Эрдэнэс Тавантолгой”-н 1072 хувьцааг амилуулж, ногдол ашиг хүртээсэн гээд Монгол Ардын намын эхлүүлсэн ажлыг үргэлжлүүлж, дэмжинэ гэдгээ говь нутгийн зон олон хэлж байлаа.
УИХ-ын сонгуулийн VII тойрог буюу Говийн бүсэд Монгол Ардын намаас Б.Дэлгэрсайхан, Б.Золбаяр, Б.Саранчимэг, Г.Батсуурь, Г.Мөнхцэцэг, Т.Энхтүвшин, Н.Наранбаатар нар нэр дэвшиж байна.
Говьсүмбэр аймагт 2016-2024 онд улсын төсөв болон гадаадын зээл, тусламжийн эх үүсвэрээр нийт 279.5 тэрбум төгрөгийн хөрөнгө оруулалтын төсөл, арга хэмжээ хэрэгжүүлсэн байна. Ерөнхий сайд өмнө нь тус аймагт ажиллах үеэр иргэдийн гаргасан санал хүсэлтийн дагуу шаардлагатай төсөл арга хэмжээг эрэмбэлсэн. Энэ хүрээнд Чойр-Мандалговь-Арвайхээр чиглэлийн хэвтээ тэнхлэгийн авто зам, Чойр-Их залаат овооны ар хүртэлх хатуу хучилттай авто замын ажил эхэлсэн. Аймгийн нэгдсэн эмнэлгийн барилга, 2 дугаар сургуулийн барилга, 1 цэцэрлэг ашиглалтад оруулсан байна.
Мөн аймгийн төвийн дулаан хангамжийн хүчин чадлыг нэмэгдүүлэх Дулааны станц, Цэвэрлэх байгууламжийг 2024 онд ашиглалтад оруулахаар ажиллаж байна. Шивээговь сумыг улсын чанартай авто замтай холбох 6.9 км, Баянтал сумыг улсын чанартай авто замтай холбох 3.4 км авто замын ажил эхлээд байгаа юм. Эхлүүлсэн ажлаа үргэлжлүүлэх боломж олгож Монгол Ардын намыг багаар нь сонгож, говь нутгийнхаа төлөө болон улс эх орны хөгжил цэцэглэлтэд илүү их үнэтэй хувь нэмэр оруулахад хүч нэмэхийг Ерөнхий сайд Л.Оюун-Эрдэнэ говьсүмбэрчүүдэд захиж байлаа.
Тод мэдээ
Нийтийн албан тушаалтнуудын 2024 оны ХАСХОМ-ийг шинэчлэн гаргуулах үйл ажиллагааг эхлүүллээ
Авлигатай тэмцэх газрын Хяналт шалгалт, дүн шинжилгээний хэлтэс нь 2024 оны 12 дугаар сарын 30-наас 2025 оны 1 дүгээр сарын 3-ны өдрүүдэд нийтийн албанд томилогдохоор нэр дэвшсэн 689 иргэний хувийн ашиг сонирхлын урьдчилсан мэдүүлгийг шалган, 256 мэдүүлгийг хянан шийдвэрлэлээ. Одоогоор ажиллагаанд 433 нэр дэвшигчийн урьдчилсан мэдүүлэг хянагдаж байна.
Өнгөрсөн долоо хоногт иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 89 гомдол, мэдээллийг хүлээн авч шалгаснаас 12 гомдол, мэдээллийг хянан шийдвэрлэлээ.
Төлөвлөгөөт хяналт шалгалтын хүрээнд 26 албан тушаалтны хувийн ашиг сонирхлын болон хөрөнгө, орлогын мэдүүлгийг хянан шалгав.
Мэдүүлгийн бүрдүүлэлтийн цахим системд улсын хэмжээнд нийтийн албан тушаалтнуудын 2024 оны ХАСХОМ-ийг шинэчлэн гаргуулах үйл ажиллагааг эхлүүллээ.
Тод мэдээ
“Эрдэнэс Тавантолгой”-н “0” давхаргын баяжмалаар шахмал түлш үйлдвэрлэнэ
Монгол Улсын Засгийн газраас “Энержи ресурс” ХХК-тай байгуулсан түүхий эд нийлүүлэх гэрээ дууссан, “Тавантолгой түлш” ХХК-ийн шахмал түлшний түүхий эдийг шинэчлэх, өөрчлөх хэрэгцээ шаардлага үүсэж байгаатай холбогдуулан шахмал түлшний чанарыг сайжруулах зорилгоор үндсэн түүхий эдийг өөрчлөх талаар холбогдох судалгаанууд хийжээ. Тухайлбал, хагас коксон /хөх нүүрс/ шахмал түлш, “Эрдэнэс тавантолгой”-н ордын “0” давхаргын баяжмалаар үйлдвэрлэсэн шахмал түлш зэргийг судалсан байна.
“Эрдэнэс Тавантолгой” ХК-тай гэрээ байгуулан угааж, баяжуулсан завсрын бүтээгдэхүүн болох эрчим хүчний нүүрсийг 2025 оны гуравдугаар сараас нийлүүлнэ.
Улаанбаатар хотын агаарын бохирдолд сөрөг нөлөө үзүүлж түүхий нүүрс түлж байгаа уурын болон усан халаалтын нийт 276 зууханд технологийн шинэчлэл хийж хатуу түлшнээс хийн түлшинд шилжүүлэх, төвлөрсөн дулаан хангамжид холбох, тоног төхөөрөмжийг сайжруулах арга хэмжээ авахаар төлөвлөөд байна. Түүхий нүүрс түлж байгаа зуухуудад шинэчлэл хийж түүхий нүүрсний хэрэглээг хязгаарласнаар агаарын бохирдлыг 13 хувиар бууруулна. Тухайлбал, 2025 онд дээрх зуухын 30 хувийг хийн түлшид шилжүүлэхээр ажиллаж байна.
Нийслэлийн агаарын бохирдлын 6 хувийг ДЦС-уудын яндангаас гарч байгаа утаа эзэлж байна. “Амгалан” дулааны станцаас бусад цахилгаан станцуудын зуух нь бүгд 1961-1990 онд суурилагдсан бөгөөд утааны шүүлтүүрүүд нь хуучирчээ. Ялангуяа, ДЦС-3 ТӨХК-ийн нойтон үнс баригчтай зуухуудын үйл ажиллагаанд технологийн шинэчлэл хийх, ДЦС-2, ДЦС-3-ын шүүлтүүрийг цахилгаанд шилжүүлэх, солих санхүүжилтийг шийдвэрлэх шаардлагатай байгаа юм.
Агаарын бохирдлын 30-аас доошгүй хувийг автомашинаас үүдэлтэй бохирдол эзэлж байна. Нийслэлд 804,656 автомашин бүртгэлтэй байгаагаас 74.2 хувь нь 10-аас дээш жилийн насжилттай. Автомашин 0-5 км/цаг хурдтай явахад түүнээс ялгарах утаанд хорт бодисын хэмжээ энгийн үеэс 2-3 дахин их байдаг. Улаанбаатар хотод 1278 автобус бүртгэлтэй, өдөрт 1128 автобус нийтийн тээврийн үйлчилгээнд ажилладаг. Эдгээр автобусны 84 хувь нь Евро-5 стандартын шатахуун ашигладаг. 2025 оны аравдугаар сарын 01-ний дотор нийтийн тээврийн автобусыг хийн түлш рүү шилжүүлснээр агаарын бохирдлыг бууруулахад нөлөө үзүүлнэ гэж үзэж байна.
Мөн шинээр боловсруулсан Нийслэлийн агаарын бохирдлын хуулийн төслөөр холбогдох зохицуулалтуудыг хийхээр төлөвлөжээ.
Тод мэдээ
“Мэдүүлгийг бүртгэх, хянах, хадгалах эрх бүхий албан тушаалтнуудын сургалт”-ыг зохион байгуулав
Авлигатай тэмцэх газрын Хяналт шалгалт, дүн шинжилгээний хэлтсээс “Мэдүүлгийг бүртгэх, хянах, хадгалах эрх бүхий албан тушаалтнуудын сургалт”-ыг 2025 оны 1 дүгээр сарын 6-8-ны өдрүүдэд зохион байгууллаа.
Цахим хэлбэрээр зохион байгуулсан уг сургалтад төрийн захиргааны төв болон салбар байгууллагын 2000 гаруй эрх бүхий албан тушаалтан оролцов. Сургалтад Авлигатай тэмцэх газрын Хяналт шалгалт, дүн шинжилгээний хэлтсийн Мэдүүлгийн бүрдүүлэлт, дүн шинжилгээний албаны дарга, ахлах комиссар Б.Баярсайхан нарын ажилтнууд УИХ-ын Хууль зүйн байнгын хорооны 2024 оны “Журам, маягт, жагсаалт шинэчлэн батлах тухай” 05 дугаар тогтоолыг танилцуулж, Мэдүүлгийн цахим системийн ашиглалт болон ХАСХОМ шинэчлэн бүртгүүлэх, ашиг сонирхлын зөрчил үүссэн эсэхийг мэдэгдэх, тайлбарлах, ХАСУМ гаргахад анхаарах асуудлын талаар дэлгэрэнгүй мэдээлэл өгөв. Түүнчлэн мэдүүлгийг бүртгэх, хянах, хадгалах эрх бүхий албан тушаалтны үйл ажиллагаа, нэрсийн жагсаалт, мэдүүлгийн мэдээ, тайланг нэгтгэн гаргах талаар арга зүйн заавар зөвлөгөө өглөө.
Энэ жилийн хувьд нийтийн албан тушаалтнууд ХАСХОМ-ээ шинэчилсэн маягтын дагуу гаргах шаардлагатай болсон тул Авлигатай тэмцэх газраас нэгдсэн арга зүй, заавар зөвлөгөө өгөх сургалтыг улсын хэмжээнд тасралтгүй зохион байгуулж байна.
