Үйл явдал
Сэлбэ голын голдирлыг тэлж, түшиц хана барих ажил 60 хувьтай үргэлжилж байна
Улаанбаатар хотын Натурын гүүрнээс урд талын төмөр замын гарам хүртэл нийт 1.5 км урт, 4.1-6.1 метр өндөртэй төмөр бетон хийцтэй үерийн даланг барьж байгаа билээ.
Тус Сэлбэ голын голдирлыг тэлж, түшиц хана хийх үерийн хамгаалалтын байгууламжийн угсралтын ажил 60 хувьтай үргэлжилж байгаа талаар УБЗАА-ны Хотын инженерийн байгууламжийн хэлтсийн дарга, Ерөнхий инженер М.Балдандоржоос тодрууллаа.
Тэрбээр “Нийслэлээс 2024-2025 онд хийж буй хөрөнгө оруулалт, бүтээн байгуулалтын ажлын явцтай долоо хоног тутам танилцдаг. Сүүлийн үед хөрөнгө оруулалт, бүтээн байгуулалтын ажил дуусах шатандаа байна. “S.Outlet” орчимд барьж буй үерийн хамгаалалтын 1.5 км шугамын барилга угсралтын ажил 60 хувьтай явж байна. Энэ ажилд хамгийн их хүндрэл учруулж байсан төвийн хэсгийн хөрсний усны 800 диаметртэй шугам хоолойг 500 метр шилжүүлэх санхүүжилт болон холбогдох асуудлыг шийдвэрлэсэн. Газар шорооны ажлууд бүрэн дууссан. 10 мянгын 6 хос кабель шугамыг 800 метр газар шилжүүлж байна. Хотын төвийн хэсгийн томоохон албан байгууллага, бусад аж ахуйн нэгжийн цахилгаан эрчим хүчний шугам сүлжээг шилжүүлэх ажил ийнхүү дууслаа. Аравдугаар сарын 20-нд түшиц ханыг хийж дуусна. Барилга угсралтын ажлын явц, аюулгүй байдалд байнгын хяналт тавьж, тулгарсан асуудлыг цаг тухай бүрт шийдээд явж байна” гэв.
Түүнчлэн Улаанбаатар хотын 25 байршилд борооны ус зайлуулах шугам сүлжээ, үерийн хамгаалалтын барилга байгууламж барьж байгаа бөгөөд 20 гаруй байршилд ажлыг гүйцэтгэсэн. Нийт ажлын явц 80 хувьтай байна. Үргэлжлүүлэн Жаргалантын аманд үерийн хамгаалалтын байгууламжийг барьж дуусгана. Соёмботой хөшөөний замыг бөглөх ажил болон Чингэлтэй дүүргийн үерийн хамгаалалтын барилга, байгууламжийн ажлыг аравдугаар сард дуусгах юм.
Үйл явдал
Шинэ хичээлийн жилийн бэлтгэл болон бусад цаг үеийн ажлын талаар хэлэлцлээ
Боловсролын сайдын шуурхай хуралдаанаар боловсролын салбарын шинэ хичээлийн жилийн бэлтгэл болон бусад цаг үеийн ажлын талаар хэлэлцлээ.
Хуралдаанаар:
-2026-2027 оны хичээлийн жилээс 1 дүгээр ангийн сурах бичгийг шинээр зохиох, хэвлэх, түгээх ажил болон бусад ангиудын сурах бичгийн нөхөн хангалтын хүртээмж
-Ерөнхий боловсролын сургуулийн хичээлийн жилийн бүтэц, цэцэрлэг, сургуулийн элсэлт, бүртгэл
-“COP 17” арга хэмжээтэй холбоотойгоор хичээл сургалтын зохицуулалт
-Нийслэлийн хэмжээнд хотхоны бага сургууль болон төрөлжсөн ахлах сургууль байгуулах ажлын хүрээнд байгуулагдсан ажлын хэсэг Сонгинохайрхан, Чингэлтэй, Баянгол, Баянзүрх, Хан-Уул дүүргүүдэд ажиллах
-Боловсролын зээлийн сангийн 2026 оны сонгон шалгаруулалтын үр дүн, тэтгэлэг, зээл, төлбөрийн хөнгөлөлтийн хэрэгжилтийн явц, төсвийн нөхцөл байдал
-2027 оны төсвийн төлөвлөлт болон боловсролын салбарын 2026 оны хөрөнгө оруулалтын ажлын гүйцэтгэл болон Дэлхийн банк, Азийн хөгжлийн банкны төслүүдийн явцтай танилцах
-Тажикстан Улсын Ерөнхийлөгчийн айлчлалын хүрээнд боловсролын салбарт хамтран ажиллах санамж бичигт гарын үсэг зурах зэрэг асуудлуудын талаар хэлэлцлээ.
Боловсролын сайдын шуурхай хуралдаанаар Боловсролын яамны Төрийн нарийн бичгийн дарга Т.Ням-Очир танилцуулсан асуудал бүр дээр шийдэл, шаардагдах төсөв, хугацааг тодорхой тусгаж, хэрэгжилтийг хангаж ажиллахыг бүтэц, нэгжийн удирдлагуудад даалгалаа.
Үйл явдал
НӨАТ-ын урамшууллын сугалааны тохирол маргааш болно
НӨАТ-ын урамшууллын 2026 оны 07 дугаар сарын сугалааны тохирол тааруулах шууд нэвтрүүлгийг 2026 оны 07 дугаар сарын 22-нд 13.00 цагт ибаримт аппликейшн болон Боловсрол суваг телевизээр орон даяар шууд дамжуулна.
Иргэн та 2026 оны 06 дугаар сарын 01-нээс 30-ны өдрийн хооронд худалдан авалт хийсэн цахим төлбөрийн баримтаа 07 дугаар сарын 21-ний өдрийн 12 цаг 59 минутаас өмнө бүртгүүлж, сугалаандаа хамрагдана уу.
Сугалааны тохирол таарсан азтанд урамшуулал олгохдоо тухайн худалдан авалт хийсэн аймаг, дүүргийн баримт хэвлэлтийн өсөлтийн хувиар урамшууллыг нэмэгдүүлэн олгодог ба дэлгэрэнгүй мэдээллийг https://sugalaa.ebarimt.mn/ цахим хуудаснаас үзээрэй.
Үйл явдал
Мөнгөний нийлүүлэлт 53.4 их наяд төгрөгт хүрч, өмнөх оны мөн үеэс 26.6 хувиар өсжээ
Монгол Улсын мөнгөний нийлүүлэлт (М2) 2026 оны зургаадугаар сарын эцсийн урьдчилсан гүйцэтгэлээр 53.4 их наяд төгрөгт хүрч, өмнөх оны мөн үеэс 11.2 их наяд төгрөгөөр буюу 26.6 хувиар өссөн байна.
Үндэсний статистикийн хорооны мэдээлснээр энэхүү өсөлтөд төгрөгийн хадгаламж 5.9 их наяд төгрөгөөр (26.3 хувь), төгрөгийн харилцах 2.8 их наяд төгрөгөөр (29.3 хувь), валютын харилцах 2.7 их наяд төгрөгөөр (75.4 хувь) тус тус нэмэгдсэн нь голлон нөлөөлжээ.
Мөн 2026 оны зургаадугаар сарын байдлаар аж ахуйн нэгж, иргэдэд олгосон зээлийн өрийн үлдэгдэл 49.3 их наяд төгрөг болсон байна. Үүнээс чанаргүй зээл 2.5 их наяд төгрөг, анхаарал хандуулах зээл 1.2 их наяд төгрөг байгааг Үндэсний статистикийн хороо мэдээлэв.
Түүнчлэн зургаадугаар сарын валютын сарын дундаж ханшаар 1 ам.доллар 3576.65 төгрөг, 1 евро 4117.99 төгрөг, 1 юань 527.86 төгрөг, 1 рубль 48.40 төгрөг байсан байна.
Эдгээр үзүүлэлт нь 2026 оны зургаадугаар сарын урьдчилсан гүйцэтгэл болохыг Үндэсний статистикийн хороо онцолжээ.
-
Дэлхий нийтээр..2020/11/24
Хувийн мэдээлэл зөрүүтэйн улмаас сугалааны урамшуулал нь буцаагдсан иргэдийн анх...
-
Дэлхий нийтээр..2020/07/07
Хөдөлгөөнт удирдлагын байрыг бүрэн тоноглож, ашиглалтад оруулав
-
Үйл явдал2023/10/31
Үс шинээр үргээлгэх буюу засуулахад тохиромжгүй
-
Дэлхий нийтээр..2020/11/23
Үйл ажиллагааг нь хязгаарлаагүй салбарын ажилтан, албан хаагчид 07.00-22.00 цагт...