Тод мэдээ
АТГ: 2024 онд 16512 нэр дэвшигчийн ХАСУМ-ийг хянаж, хариуг хүргүүлэв

Авлигатай тэмцэх газраас Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасан чиг үүрэг, бүрэн эрхийн хүрээнд хууль зөрчсөн нийтийн албан тушаалтанд хариуцлага тооцуулах, хуулийн хэрэгжилтийг хангуулах чиглэлээр хяналт тавин ажиллаж байна.
Авлигын эсрэг хуулийн үйлчлэлд төрийн албан хаагчдаас гадна төрийн болон орон нутгийн өмчит, өмчийн оролцоотой хуулийн этгээдийн удирдах болон эрх бүхий албан тушаалтнууд хамаарч хөрөнгө, орлогын мэдүүлгийг гаргахаас гадна нийтийн албанд томилогдохоор нэр дэвшсэн тохиолдолд хувийн ашиг сонирхлын урьдчилсан мэдүүлгийг нь хянаж АТГ-аас тухайн албан үүргийг гүйцэтгэхэд ашиг сонирхлын зөрчил үүсэх эсэх талаарх дүгнэлтийг гарган, томилох эрх бүхий байгууллага, албан тушаалтанд хүргүүлдэг.
Энэ хүрээнд 2024 онд нийт 16512 нэр дэвшигчийн ХАСУМ-ийг тус газраас хянаж хариуг хүргүүлсэн байх ба үүнээс албан үүргийг гүйцэтгэхэд илт ашиг сонирхлын зөрчилтэй нөхцөл байдал тогтоогдсон 48, ашиг сонирхлын зөрчил үүсч болзошгүйг анхааруулсан 1265 байв.
Хяналт шалгалтаар ашиг сонирхлын зөрчил үүсэх нөхцөл байдлыг тогтоож анхааруулсан нь өмнөх оны мөн үетэй харьцуулахад 2.2 дахин өссөн байна. Нэр дэвшигч нь тухайн албан тушаалын чиг үүрэгт хамаарах ижил үйл ажиллагаа эрхэлдэг аж ахуйн нэгж, байгууллагын удирдах бүтцэд бүртгэлтэй, өөрийн хамаарал бүхий болон нэгдмэл сонирхолтой этгээдтэй албан үүргийн хувьд шууд захирагдах буюу хяналт тавих нэгжид хамт ажиллахаар нэр дэвшсэн, мөн Төрийн албаны тухай хуульд заасан болон албан тушаалын тодорхойлолт дахь шалгуур, шаардлагыг хангаагүй этгээдийг нэр дэвшүүлэн томилох зэрэг зөрчлүүд гарч байна.
Мөн төрийн өмчийн оролцоотой хуулийн этгээд, аж ахуйн нэгж, байгууллагад удирдах албан тушаалтныг томилохдоо сонгон шалгаруулалтыг нээлттэй, ил тод зарладаггүй, боловсрол, мэргэжил, ажлын туршлага зэрэг хуульд заасан шаардлага хангаагүй нэр дэвшигчийг томилох, улмаар тухайн албанд томилогдсон албан тушаалтнууд нь хувийн сонирхолдоо нийцүүлэн албаны бүрэн эрхээ хэрэгжүүлдэг, цаашлаад авлигын гэмт хэрэгт өртөх эрсдэлийг бий болгох явдал гарсаар байна.
Цаашид нийтийн албанд сул орон тоо гарсан тохиолдолд сонгон шалгаруулалтыг нээлттэй, ил тод зарлах, удирдах албан тушаалтны манлайлал, ёс зүйн байдлыг дээшлүүлэх, ялангуяа хууль бус зөрчил гаргаж төрийн албанаас чөлөөлөгдсөн, халагдсан, улмаар авлига, албан тушаалын гэмт хэрэгт ял шийтгэгдсэн этгээдийг нийтийн албанд нэр дэвшүүлэхгүй байх талаар холбогдох байгууллагуудад үүрэг, чиглэл өгч хяналт тавин ажиллаж байна.
Тод мэдээ
К.Комлан: Агаарын бохирдлыг бууруулах, хүүхдийн суралцах орчныг сайжруулахад хамтарч ажиллах хүсэлтэй байна
Нийслэлийн ИТХ-ын дарга А.Баяр “Бүхнийг хүүхдийн төлөө” уриатай Монгол дахь НҮБ-ын Хүүхдийн сангийн Суурин төлөөлөгч Эваристе Коуасси-Комлантай уулзлаа. Нийслэлийн ИТХ-ын дарга А.Баяр “Хүүхдийн эрүүл мэндийн чиглэлээр Монгол Улсын 21 аймаг, 330 суманд хүрч ажилласан эрхэмтэй дахин уулзсандаа баяртай байна гэдгийг тэмдэглээд, Монгол хүүхдүүд эрүүл аюулгүй орчинд амьдарч, сурч хөгжих хууль эрх зүйн орчныг сайжруулахын төлөө хамтран ажиллахад бэлэн байгаагаа илэрхийллээ. Ноён Эваристе Коуасси-Комлан “Монгол Улсад агаар, ус, хөрсний бохирдлын улмаас хүүхдийн эрүүл, аюулгүй орчинд амьдрах эрх байнга зөрчигдөж байгааг онцоллоо. Тэрбээр, Монголд хүүхэд, жирэмсэн эмэгтэйчүүдийн дунд D витамин болон хоол тэжээлийн дутлаас үүдсэн архаг цус багадалт их байгаа нь бусад өвчинд өвчлөмтгий байх суурь нөхцөл болж байна. Мөн сэтгэцийн эрүүл мэндийг сайжруулах чиглэлд ажиллах зайлшгүй шаардлага бий. Тиймээс агаарын бохирдлыг бууруулах, хүүхдийн суралцах болон амьдрах орчныг сайжруулах, эрүүл Монгол хүний төлөө хамтарч ажиллах хүсэлтэйгээ илэрхийллээ.
НҮБ-ын Хүүхдийн Сангийн Суурин төлөөлөгч Эваристе Коуасси-Комлан, монгол хүүхдүүдэд тулгарч буй асуудал, боловсролын тэгш бус хүртээмж, хоол тэжээлийн дутагдал, эрүүл мэндийн тусламж үйлчилгээ, эмийн чанар, хүчирхийлэлгүй, айдасгүй, аюулгүй орчин гэх мэт хот, хөдөөгийн хүүхдүүдийн бодит нөхцөл байдлын талаарх судалгаа, мэдээллийг танилцууллаа.
Нийслэлийн ИТХ-ын дарга А.Баяр “Эрүүл, аюулгүй, хүчирхийлэлгүй өрх айл бол Монголын хамгийн том баялаг. Тиймээс хүүхэд, гэр бүл рүү чиглэсэн хамтын ажиллагаагаа өргөжүүлэх хүсэлтэй байна. Мөн утааг бууруулах богино хугацааны зорилгод 20 мянган айлыг яндангүй болгохоор LPG газ руу шилжүүлэх ажил эхэлсэн. Цаашид яндангүй айлын тоог 50 мянгад хүргэх, 10 мянган өрхийг нарны панелжуулах зэрэг утааг бууруулах, эрчим хүчний олон талт эх үүсвэртэй холбох чиглэлд хамтарч ажиллах хүсэлтэй байгаагаа илэрхийллээ. Суурин төлөөлөгч Эваристе Коуасси-Комлан “Бодлогын төлөөллийн чиглэлээр манлайлж ажиллахыг А.Баяр даргаас хүсээд, хүүхдийн эрхийг хангах, аюулгүй, эрүүл аж төрөх суурь нөхцөл болсон бүхий л санал санаачилга, бодлого ажиллагаанд олон улсын туршлага, техникийн туслалцаа дэмжлэг үзүүлэхэд бэлэн” гэв.
Тод мэдээ
Бог малын мялзан өвчний идэвхгүй тандалт хийлээ
Мал эмнэлгийн газрын даргын тушаалын хэрэгжилт, бог малын мялзан өвчин дамжин тархахаас урьдчилан сэргийлэх, халдварыг эрт илрүүлэх зорилгоор мал эмнэлгийн тасгийн мэргэжилтнүүдтэй хамтран бог малын мялзан өвчний шинж тэмдэгт суурилсан идэвхгүй тандалтыг зохион байгууллаа.
Тандалтад аймгийн хэмжээний нийт малчин өрхийн 23 хувь буюу 18 сумын 1856 малчин өрх хамрагдаж, асуумж судалгаагаар Баян-Уул сумын Баянбогд багийн 1 малчин өрхийн 199 хонь, 170 ямаа, нийт 369 бог малд эмнэл зүйн үзлэг хийхэд шинж тэмдэг илрээгүй гэж Говь-Алтай аймгийн Мал эмнэлгийн газраас мэдээллээ.
Тод мэдээ
“Сар шинэ-2025” үзэсгэлэн худалдаа эхэллээ
Сар шинийн баярыг тохиолдуулан үндэсний үйлдвэрлэлийг дэмжих, гол нэрийн хүнсний бүтээгдэхүүний хангамжийг нэмэгдүүлэх, дундын зуучлалгүйгээр хэрэглэгчдэд хүргэх, өрхийн орлогыг нэмэгдүүлэх зорилгоор Сонгинохайрхан дүүргийн Засаг даргын Тамгын газраас “Сар шинэ-2025” цагаан сарын үзэсгэлэн худалдааг зохион байгуулж байна.
Үзэсгэлэн худалдаанд дүүргийн 75 иргэн аж ахуйн, нэгж байгууллагууд 20 гаруй төрлийн хоол үйлдвэрлэл үйлчилгээ, бэлэн хувцас, үндэсний дээл, бэлэг дурсгалын бараа бүтээгдэхүүнийг худалдан борлуулж байна.
Үзэсгэлэн худалдаа 2 дугаар сарын 25-ны өдрийг дуустал 10:00-21:00 цагийн хооронд Сонгинохайрхан дүүргийн 29 дүгээр хороо NC builing “Та Чи” мартын хоёр давхарт зохион байгуулагдана. “Сар шинэ-2025” үзэсгэлэн худалдааны хамтран зохион байгуулагчаар Хөдөлмөр, халамжийн үйлчилгээний хэлтэс, жижиг дунд үйлдвэрийг дэмжих мэдээлэл сургалтын төв, жаргалант тосгоны Соёлын ордон, тохижилт цэвэрлэгээ үйлчилгээ, орон нутгийн өмчит, аж ахуйн тооцоот үйлдвэрийн газар, “Та Чи” ХК хамтран ажиллаж байна. Иргэд та бүхнийг “Сар шинэ-2025” цагаан үзэсгэлэн худалдаанд өргөнөөр оролцохыг урьж байна.
СОНГИНОХАЙРХАН ДҮҮРГИЙН ЗДТГ
-
Тод мэдээ2022/05/02
Монгол Улс, Япон Улсын Гадаад харилцааны сайд нар албан ёсны хэлэлцээ хийв
-
Тод мэдээ2024/10/25
Бүгд Найрамдах Казахстан Улсын Ерөнхийлөгч К.Токаев Монгол Улсад төрийн айлчлал ...
-
Тод мэдээ2024/03/01
Боловсролын салбарын их өгөгдлийн шинжилгээний цахим системийн нээлт боллоо
-
Тод мэдээ2024/03/11
Үерийн эрсдэлтэй бүсэд суурьшсан айл өрхүүдэд мэдэгдэл хүргүүллээ