Дэлхий нийтээр..
Монгол Улсад болох СОР17-г Британи улсад нээж Британийн парламентын ордонд арга хэмжээ зохион байгуулав
Монгол Улс Цөлжилттэй тэмцэх тухай НҮБ-ын Конвенцын Талуудын бага хурлын 17 дугаар хуралдаан (СОР17)-ыг энэ онд даргалж буйтай холбогдуулан Британи дахь Монгол Улсын Элчин сайдын яамнаас холбогдох байгууллагуудтай хамтран энэ оны хоёрдугаар сарын 25-ны өдөр Британийн Парламентын ордны Лордуудын танхимд “Монгол Улсад зохион байгуулагдах СОР17-г Британи Улсад нээж, Бэлчээр ба нүүдлийн мал аж ахуй эрхлэгчдийн олон улсын жилийг тэмдэглэсэн үдийн цай хүлээн авалт” арга хэмжээг зохион байгуулав.
Энэхүү арга хэмжээг “Бэлчээрийн тогтвортой менежментийн зөвлөл” (Rangeland Stewardship Council), “Тогтвортой ноос, ноолуурын эвсэл”-ээс санаачлан Цөлжилттэй тэмцэх тухай НҮБ-ын Конвенцын Нарийн бичгийн дарга нарын газар (UNCCD), Монгол-Британийн худалдааны танхим тус Элчин сайдын яамтай хамтран зохион байгуулав. Арга хэмжээг Парламентын ордонд зохион байгуулахад Британийн Лордуудын танхимын гишүүн Баронесс Нортховер, Баронесс Эванс, Британийн Нийтийн танхимын гишүүн, Британийн Парламент дахь Бүх намын Монголын бүлгийн дарга Жэймс Вайлд нар дэмжлэг үзүүлэв.
Британи Улсад суугаа Монгол Улсын Элчин сайд Б.Энхсүх арга хэмжээг нээж үг хэлсэн бөгөөд тэрээр Монгол Улс СОР17-г даргалах хүрээнд баримталж буй тэргүүлэх чиглэлүүд болон дэвшүүлж буй “Тал хээрийн төлөвлөгөө” (Steppe Action Agenda) санаачилгыг танилцуулав. Аж үйлдвэр, эрдэс баялгийн сайд Г.Дамдинням Британи Улсад айлчлах үеэрээ энэхүү арга хэмжээнд оролцож, уур амьсгалын өөрчлөлттэй тэмцэх, цэвэр эрчим хүчинд шилжих олон улсын хүчин чармайлтад Монгол Улс чухал түүхий эдийн салбарын хүрээнд хэрхэн оролцож буй талаар товч танилцуулав.
Мөн арга хэмжээнд НҮБ-ын Хүнс, хөдөө аж ахуйн байгууллага, Олон улсын байгаль хамгаалах холбоо зэрэг байгууллагаас төлөөлөгчид уригдан оролцож үг хэлэв. Түүнчлэн СОР16-г даргалсан Саудын Араб Улсын Байгаль орчны дэд сайд Осама Ибрахим Факийха видео мэндчилгээ дэвшүүлэв.
Энэхүү арга хэмжээний гол зорилго нь Монгол Улсад болох СОР17-ын талаар Британийн холбогдох байгууллагуудад сурталчлан таниулах, тэдний оролцоог нэмэгдүүлэхэд чиглэсэн. Арга хэмжээнд Британийн парламентын гишүүд, засгийн газрын холбогдох албан тушаалтнууд, хувийн хэвшил, төрийн бус байгууллагуудын 200 орчим төлөөлөгч оролцов гэж Монгол Улсаас ИБУИНХУ-д суугаа Элчин сайдын яамнаас мэдээллээ.
Дэлхий нийтээр..
БНХАУ-д зорчих иргэдийн анхааралд...
Дэлхий нийтээр..
Ши Жиньпин, Доналд Трамп нар Бээжинд уулзаж, хоёр улсын харилцааны гол асуудлуудыг хэлэлцэж байна
БНХАУ-ын дарга Ши Жиньпин АНУ-ын Ерөнхийлөгч Доналд Трамптай Бээжин хотноо хэлэлцээ хийж байна. Олон улсын хэвлэлүүдийн мэдээлж буйгаар, хоёр улсын төрийн тэргүүн нарын уулзалтаар худалдаа, тариф, Тайванийн асуудал, хиймэл оюун ухаан, мөн Ираны нөхцөл байдал зэрэг олон улсын анхаарал татсан сэдвүүдийг хэлэлцэж байна.
“Reuters” агентлагийн мэдээлснээр, энэ удаагийн уулзалт АНУ, БНХАУ-ын худалдааны түр тохиролцоог баталгаажуулах, хоёр талын эдийн засаг, технологийн салбар дахь маргаантай асуудлуудыг хэлэлцэх өндөр ач холбогдолтой уулзалт болж байна. АНУ-ын тал Хятадтай худалдаа, хиймэл оюун ухаан, чип үйлдвэрлэл, нисэхийн салбар дахь хамтын ажиллагаа болон Америкийн компаниудын Хятадын зах зээлд нэвтрэх боломжийг хөндөж байгаа талаар мэдээлжээ.
Уулзалтын бас нэг гол сэдэв нь Тайванийн асуудал байна. Бээжин АНУ-ын Тайваньд үзүүлж буй дэмжлэг, зэвсгийн худалдаанд эсэргүүцэл илэрхийлсээр байгаа бол Вашингтон Тайванийн асуудлаарх бодлогодоо өөрчлөлт ороогүй гэж өмнө нь мэдэгдсэн байна. Тайвань нь АНУ, БНХАУ-ын харилцааны хамгийн эмзэг сэдвүүдийн нэг хэвээр байгааг ажиглагчид онцолж байна.
Мөн АНУ-ын тал Ираны нөхцөл байдалтай холбоотойгоор Хятад улс Тегеранд үзүүлэх нөлөөгөө ашиглан хурцадмал байдлыг намжаахад дэмжлэг үзүүлэхийг хүсэж байгаа талаар “Reuters” мэдээлэв. Гэхдээ шинжээчид Бээжин Ираны эсрэг хатуу байр суурь баримтлах магадлал бага гэж үзэж байна.
АНУ-ын Ерөнхийлөгч Доналд Трамп уулзалтын эхэнд Ши Жиньпинийг “агуу удирдагч” хэмээн тодорхойлж, энэ уулзалтыг томоохон ач холбогдолтой гэж үнэлсэн талаар олон улсын хэвлэлүүд мэдээлж байна. Харин БНХАУ-ын тал хоёр улсын харилцааны тогтвортой байдал нь дэлхийн эдийн засаг, олон улсын аюулгүй байдалд чухал нөлөөтэйг онцолжээ.
Уулзалтын хүрээнд хоёр талын албан ёсны хэлэлцээ, төрийн хүндэтгэлийн арга хэмжээ болон бизнесийн хүрээний уулзалтууд болох төлөвтэй байна. АНУ-ын төлөөлөгчдийн бүрэлдэхүүнд технологи, санхүү, үйлдвэрлэлийн салбарын томоохон компанийн удирдлагууд багтсан нь энэ удаагийн айлчлал эдийн засаг, технологийн хамтын ажиллагаанд онцгой ач холбогдол өгч байгааг харуулж байна.
Дэлхий нийтээр..
Хятад, АНУ-ын төрийн тэргүүнүүд дахин нүүр тулан уулзана
Хятад улсын дарга Ши Жиньпиний урилгаар АНУ-ын ерөнхийлөгч Дональд Трамп 5-р сарын 13-15-ны хооронд БНХАУ-д төрийн айлчлал хийж байна.
Энэ нь Хятад, АНУ-ын төрийн тэргүүнүүдийн өнгөрсөн оны 10-р сард Пусан хотод уулзсаны дараа хоёр дахь удаагаа нүүр тулан уулзах бөгөөд АНУ-ын Ерөнхийлөгчийн есөн жилийн хугацаанд Хятадад хийсэн анхны айлчлал юм. Хоёр орны тэргүүн Хятад, Америкийн харилцаа, дэлхийн энх тайван, хөгжлийн гол асуудлаар гүнзгий санал солилцох болно.
