Дэлхий нийтээр..
“World Naadam Center” төслийн концепц, загвар зураг боловсруулах уралдаан зарлаж байна
Монголчуудын соёлын өв, уламжлал, бахархал болсон Монгол наадмыг үндэсний хэмжээнд дэлгэрүүлэн таниулах, зохион байгуулалтыг өөр түвшинд гаргах, дэлхий дахинд сурталчлах зорилгоор улирлын онцлогт тохирсон, олон нийтэд хүртээмжтэй байдлыг нэмэгдүүлсэн, үзэгч, сонирхогч, хөгжөөн дэмжигчдийн тав тухыг хангасан, үйлчилгээний шинэ соёл бүхий олон улсын болон үндэсний стандарт шаардлага хангасан шинэ цэнгэлдэх хүрээлэн “World Naadam Center”-г байгуулах төслийн концепц болон загвар зургийн шийдлийг мэргэжлийн байгууллага, олон нийтийн оролцоотой тодорхойлох зорилгын хүрээнд энэхүү уралдааныг зарлаж байна.
Тус уралдаанд гадаад, дотоодын зураг төслийн мэргэжлийн байгууллага, хувь хүн, мэргэжлийн уран бүтээлчид, тэдгээрийн нэгдэл, холбооноос ирүүлсэн материалыг 2020 оны 10 дугаар сарын 20-ноос 11 дүгээр сарын 21-ны өдрийг хүртэл хүлээн авна.
Уралдаанд нэг оролцогч хэдэн ч бүтээл ирүүлэх болоомжтой. Мөн оролцогч бүтээл тус бүрд өөрийн нэр, холбоо барих утас, хаягийг тодорхой ирүүлэх бөгөөд уралдаанд зураг төслийн мэргэжлийн байгууллага /гадаад болон дотоодын/, хувь хүн, мэргэжлийн уран бүтээлчид, тэдгээрийн нэгдэл, холбоод хамрагдах юм.
Материалд тавигдах үндсэн шаардлага:
– Монгол үндэстний хэв шинж агуулсан гэр хэлбэртэй байх бөгөөд үндэсний онцлог, бэлгэдлийг агуулсан байх;
– Олон улсын болон үндэсний стандартын дагуу дотоод, гадаад орчин нь олон нийтийн аюулгүй байдал, тав тух, эрүүл ахуйн шаардлагыг бүрэн хангасан байх;
– 12,000-18,000 үзэгчийн суудалтай, үзэгчдийн суудлын төлөвлөлт нь талбай дээр болон агаарын орон зайд болж буй ямар ч үзүүлбэрийг бүтэн харж чадахуйцаар төлөвлөх;
– Үзэгчдийн тав тухыг хангах нэвтрэх систем, ариун цэврийн өрөө, хувцасны өлгүүр, автомашин, мотоцикл, унадаг дугуй, нисдэг тэрэгний зогсоол, амралт, хоол, уух зүйлээр үйлчлэх үйлчилгээний хэсгүүд болон бусад шаардлагатай өрөө тасалгааг төлөвлөсөн байх;
– Барилга байгууламжийн шаардлагатай хэсгүүдийг универсал дизайны зарчмаар тусгай хэрэгцээт хүмүүс, бага насны хүүхэдтэй хүмүүс, өндөр настай хүмүүст зориулан зайлшгүй төлөвлөсөн байх;
– Цогцолборын гол хэсгийг монгол гэрийн өрх маягаар онгорхой байхаар төлөвлөж болох бөгөөд ийнхүү төлөвлөсөн тохиолдолд цаг агаарын нөхцөлөөс хамаарч нээж, хаах боломжтой байдлаар төлөвлөх;
– Барилгын боломжит тодорхой хэсгүүдэд сэргээгдэх эрчим хүчийг дээд хэмжээнд ашиглах, эрчим хүчний хэмнэлттэй, дулаан алдалгүй, халаалт агаар сэлгэлтийн хамгийн орчин үеийн төлөвлөлттэй байх;
– Дотоод, гадаадын жуулчдад зориулж дээврийн хэсэгт гадна орчны байдлыг 360 градус харж болохуйц хэсэгтэй байхаар төлөвлөх;
– Концепц зураг нь барилга бүтээцийн хувьд хийх боломжтой байх бөгөөд барилгын бусад хийц, материал төлөвлөлтийн хувьд эдийн засгийн хэмнэлттэй, үр ашигтай байх;
– Монгол үндэстний бахархал тэмүүллийн бэлгэдэл болохуйц барилга, архитектурын өвөрмөц, шинэлэг шийдэлтэй байх.
Дэлхий нийтээр..
Германы прокурорууд “Умардын урсгал”-ын халдлагыг Украины тал захиалсан гэж үзжээ
Германы прокурорууд 2022 онд “Умардын урсгал” хийн хоолойд гарсан дэлбэрэлттэй холбоотойгоор Украины армийн офицер асан этгээдэд яллах дүгнэлт үйлджээ. Түүнийг Украины төрийн байгууллагын нэрийн өмнөөс ажиллаж, хоолойг дэлбэлэх ажиллагаанд оролцсон гэж буруутгаж байна.
Германы хувийн мэдээлэл хамгаалах журмын дагуу Серхий К. гэж нэрлэгдсэн уг этгээдийг иргэний зориулалттай байгууламжид халдсан, дэлбэрэлт үүсгэсэн, дэд бүтэц сүйтгэсэн, нийтийн үйлчилгээг тасалдуулсан бүлэгт багтсан гэж үзжээ. Харин тэрбээр уг хэрэгт холбоогүй гэдгээ мэдэгдсэн байна.
Киевийн эрх баригчид Германы прокуроруудын мэдэгдэлд дэлгэрэнгүй тайлбар өгөх хангалттай мэдээлэл одоогоор байхгүй гэжээ. Украины Ерөнхийлөгч Владимир Зеленский яллах дүгнэлтийн талаар бүрэн мэдээлэл аваагүй тул одоогоор дүгнэлт хийхэд эрт байна гэж мэдэгдсэн байна.
Прокуроруудын мэдээлснээр Серхий К. нь 2022 оны есдүгээр сард шумбагчид, хөлгийн ахмад, тэсрэх бодисын мэргэжилтнээс бүрдсэн багийг удирдан Герман руу хуурамч бичиг баримтаар нэвтэрч, хөлөг түрээслэсэн гэж үзэж байна. Улмаар багийнхан Балтын тэнгист байрлах хоолойн хэсэгт тэсрэх төхөөрөмж байрлуулсан гэх үндэслэлээр шалгагдаж байна.
“Умардын урсгал”-ын дэлбэрэлт 2022 оны есдүгээр сард буюу Орос Украинд бүрэн хэмжээний довтолгоо эхлүүлснээс долоон сарын дараа болсон. Дэлбэрэлтийн улмаас Оросын байгалийн хийг Европ руу дамжуулах гол шугам болох “Умардын урсгал-1” гэмтэж, ашиглалтад ороогүй байсан “Умардын урсгал-2”-ын хэсэг мөн эвдэрсэн юм.
Германы тал уг хэргийг өөрийн харьяалалд хамаарна гэж үзэж байна. Учир нь гэмтсэн хоолойнууд Германы Мекленбург–Өрнөд Померани мужийн Любмин хотод хүрдэг бөгөөд Германы эрчим хүчний аюулгүй байдалд нөлөөлсөн гэж тайлбарлажээ.
Дэлхий нийтээр..
БНСУ-ын Ерөнхийлөгч И Жэ Мён Монгол Улсад төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Солонгос Улсын Ерөнхийлөгч И Жэ Мён, гэргий Ким Хе Гён-ы хамт 2026 оны 07 дугаар сарын 09-11-ний өдрүүдэд Монгол Улсад төрийн айлчлал хийнэ.
Энэ айлчлал БНСУ-ын төрийн тэргүүн 2011 онд манай улсад айлчилснаас хойш 15 жилийн дараа болох юм.
Айлчлалын хүрээнд Ерөнхийлөгч У.Хүрэлсүх, И Жэ Мён нар албан ёсны хэлэлцээ хийж, “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах болон олон улс, бүс нутгийн тавцан дахь хамтын ажиллагаа зэрэг чиглэлээр санал солилцоно.
Айлчлалын үеэр талууд харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөж байна.
БНСУ-ын Ерөнхийлөгч И Жэ Мён, гэргий Ким Хе Гён нар Үндэсний их баяр наадмын нээлтийн ёслолд хүндэт зочдын хувиар оролцоно.
Хоёр улс:
2006 онд “Сайн хөршийн, найрамдал, хамтын ажиллагааны түншлэл”
2011 онд “Иж бүрэн түншлэл”
2021 онд “Стратегийн түншлэл”-ийн харилцаа тогтоосон.
Монгол Улс, Бүгд Найрамдах Солонгос Улс 1990 оны 03 дугаар сарын 26-ны өдөр дипломат харилцаа тогтоосон. БНСУ 1990 онд Улаанбаатар хотноо, манай улс 1991 онд Сөүл хотноо Элчин сайдын яамаа нээжээ.
Дэлхий нийтээр..
Пакистан: Афганы хил орчимд явуулсан ажиллагаагаар 29 зэвсэгт этгээдийг устгасан гэж мэдэгдэв
Пакистаны аюулгүй байдлын хүчнийхэн Афганистантай залгаа хилийн бүсэд явуулсан хуурай замын ажиллагаа болон дараах агаарын цохилтын үеэр 29 зэвсэгт этгээдийг устгасан гэж тус улсын эрх баригчид мэдэгдлээ.
Пакистаны Мэдээллийн сайд Аттаулла Тарарын мэдээлснээр, уг ажиллагааг сүүлийн үед тус улсын нутаг дэвсгэрт гарсан хэд хэдэн зэвсэгт халдлагын хариу арга хэмжээ болгон зохион байгуулжээ. Тэрбээр ажиллагааны үеэр зэвсэгт бүлэглэлүүдийн байрлаж байсан нуугдах газар, баазуудад чиглэсэн цохилт өгсөн гэж мэдэгдсэн байна.
Энэхүү ажиллагаа нь Карачи хот дахь Пакистаны хилийн цэргийн төв байр руу зэвсэгт халдлага үйлдэгдсэний дараахан болсон юм. Уг халдлагын улмаас гурван цэргийн алба хаагч амь үрэгдэж, хэд хэдэн хүн шархадсан бөгөөд халдлагын хариуцлагыг Пакистаны Талибантай холбоотой Жамаат-ул-Ахрар бүлэглэл хүлээжээ.
Сүүлийн жилүүдэд Пакистаны баруун хойд бүсэд зэвсэгт халдлагын тоо эрс нэмэгдэж, тус улсын эрх баригчид ихэнх халдлагыг Пакистаны Талибан (TTP) болон түүнтэй холбоотой бүлэглэлүүдтэй холбон тайлбарлаж ирсэн. Харин Афганы эрх баригчид өөрийн нутаг дэвсгэрийг ийм зорилгоор ашиглуулахгүй гэсэн байр сууриа удаа дараа илэрхийлж байгаа юм.
