Дэлхий нийтээр..
Малайз: Авлигын талаар мэдээлэх төрийн албан хаагчид тун цөөхөн байна...
Эх сурвалж: dailyexpress.com
Малайз Улс нь 1.6 сая орчим төрийн албан хаагчтай бөгөөд тэдгээрээс ердөө 0.01 хувь нь өөрийн ажилладаг яам, агентлагийнхаа үйл ажиллагаан дахь авлигын талаар мэдээлэх зоригтой байдаг талаар тус улсын Авлигатай тэмцэх хороо /МАТХ/-ны орлогч дарга, тэргүүн дэд комиссар Шамшун Бахарин Мохд Жамил хэлэв. Мэдээлэх зориг гаргасан албан хаагчдад олон төрлийн урамшуулал олгосон хэдий ч энэ үзүүлэлт бага хэвээрээ байгааг мөн нэмж хэллээ.
МАТХ-ны мэдээллийн сангаас харахад 2012 оноос 2019 оны хооронд ердөө 343 төрийн албан хаагч авлигын талаар мэдээлсэн байна.
“Төрийн албан хаагчид хахууль авах нь гэмт хэрэг гэдгийг ойлгох хэрэгтэй ба хэрэв тэдэнд авлига өгөхөөр санал болгосон талаар мэдээлснээр холбогдох арга хэмжээг авах боломжтой юм. Төрийн албан хаагчид ийнхүү мэдээлснээр зохих журмыг зөрчин зөвшөөрөл олгох, давуу байдал олгох явдлаас сэргийлнэ. Төрийн албан хаагчдад аливаа авлигийн талаар мэдээлэх соёлыг суулгахыг зорьж байгаа ба ингэснээр төрийн албанд авлига, албан тушаалын эрх мэдлээ урвуулан ашиглах явдлыг арилгах юм” хэмээн Дэйли Экспресст өгсөн ярилцлагынхаа үеэр хэллээ.
Ноён Шамшун Бахарин Мохд Жамил 2011 онд Засгийн газрын Хэрэг эрхлэх газраас авлигийн талаар мэдээлсэн төрийн албан хаагчдыг урамшуулахыг зөвшөөрөх тухай гаргасан удирдамжаас иш татан авлигын талаар мэдээлсэн төрийн албан хаагчид тухайн санал болгосон хахуулийн хэмжээтэй ижил дүнтэй мөнгөн урамшуулал болгон авах болно гэж ярьжээ.
МАТХ-оос өнгөрсөн онд авлигын талаар мэдээлэл өгсөн 343 төрийн албан хаагчид 600.000 малайз ринггит /147.3 мянган ам.доллар/ олгожээ.
Түүний хэлснээр төрийн албан хаагчид авлигын талаар мэдээлэх үүрэгтэй бөгөөд энэ үүргээ биелүүлээгүй албан хаагч гэм буруутай нь тогтоогдвол Авлигатай тэмцэх тухай хуулийн 25 дугаар зүйлд зааснаар 100,000 Малайз Ринггит /24,545 доллар/ хүртэлх хэмжээгээр торгуулах, эсвэл 10 жил хүртэл хугацаагаар хорих ялаар шийтгүүлнэ.
Өнгөрсөн 12 дугаар сарын 2-ны өдөр Куала Лумпурын шүүхээс Сангийн яамны 5 ажилтанд 1500 – 2000 Малайз Ринггит /368-490 доллар/ -ын торгууль ногдуулсан нь дээрх хуулийг хэрэгжүүлсэн анхны тохиолдол байв.
Авлигаас ангид нийгмийг бий болгохын тулд яам, агентлагууд авлигыг илчилсэн ажилтан, албан хаагчдаа хамгаалах, дэмжлэг үзүүлэх үүргийг гүйцэтгэх хэрэгтэй байгааг онцолсон ба 2010 оны Шүгэл үлээгчийг хамгаалах тухай хууль, 2009 оны гэрчийг хамгаалах тухай хуулийн дагуу МАТХ нь авлигын талаар мэдээлсэн албан хаагчдыг хамгаална гэж амлажээ.
Дэлхий нийтээр..
Германы прокурорууд “Умардын урсгал”-ын халдлагыг Украины тал захиалсан гэж үзжээ
Германы прокурорууд 2022 онд “Умардын урсгал” хийн хоолойд гарсан дэлбэрэлттэй холбоотойгоор Украины армийн офицер асан этгээдэд яллах дүгнэлт үйлджээ. Түүнийг Украины төрийн байгууллагын нэрийн өмнөөс ажиллаж, хоолойг дэлбэлэх ажиллагаанд оролцсон гэж буруутгаж байна.
Германы хувийн мэдээлэл хамгаалах журмын дагуу Серхий К. гэж нэрлэгдсэн уг этгээдийг иргэний зориулалттай байгууламжид халдсан, дэлбэрэлт үүсгэсэн, дэд бүтэц сүйтгэсэн, нийтийн үйлчилгээг тасалдуулсан бүлэгт багтсан гэж үзжээ. Харин тэрбээр уг хэрэгт холбоогүй гэдгээ мэдэгдсэн байна.
Киевийн эрх баригчид Германы прокуроруудын мэдэгдэлд дэлгэрэнгүй тайлбар өгөх хангалттай мэдээлэл одоогоор байхгүй гэжээ. Украины Ерөнхийлөгч Владимир Зеленский яллах дүгнэлтийн талаар бүрэн мэдээлэл аваагүй тул одоогоор дүгнэлт хийхэд эрт байна гэж мэдэгдсэн байна.
Прокуроруудын мэдээлснээр Серхий К. нь 2022 оны есдүгээр сард шумбагчид, хөлгийн ахмад, тэсрэх бодисын мэргэжилтнээс бүрдсэн багийг удирдан Герман руу хуурамч бичиг баримтаар нэвтэрч, хөлөг түрээслэсэн гэж үзэж байна. Улмаар багийнхан Балтын тэнгист байрлах хоолойн хэсэгт тэсрэх төхөөрөмж байрлуулсан гэх үндэслэлээр шалгагдаж байна.
“Умардын урсгал”-ын дэлбэрэлт 2022 оны есдүгээр сард буюу Орос Украинд бүрэн хэмжээний довтолгоо эхлүүлснээс долоон сарын дараа болсон. Дэлбэрэлтийн улмаас Оросын байгалийн хийг Европ руу дамжуулах гол шугам болох “Умардын урсгал-1” гэмтэж, ашиглалтад ороогүй байсан “Умардын урсгал-2”-ын хэсэг мөн эвдэрсэн юм.
Германы тал уг хэргийг өөрийн харьяалалд хамаарна гэж үзэж байна. Учир нь гэмтсэн хоолойнууд Германы Мекленбург–Өрнөд Померани мужийн Любмин хотод хүрдэг бөгөөд Германы эрчим хүчний аюулгүй байдалд нөлөөлсөн гэж тайлбарлажээ.
Дэлхий нийтээр..
БНСУ-ын Ерөнхийлөгч И Жэ Мён Монгол Улсад төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Солонгос Улсын Ерөнхийлөгч И Жэ Мён, гэргий Ким Хе Гён-ы хамт 2026 оны 07 дугаар сарын 09-11-ний өдрүүдэд Монгол Улсад төрийн айлчлал хийнэ.
Энэ айлчлал БНСУ-ын төрийн тэргүүн 2011 онд манай улсад айлчилснаас хойш 15 жилийн дараа болох юм.
Айлчлалын хүрээнд Ерөнхийлөгч У.Хүрэлсүх, И Жэ Мён нар албан ёсны хэлэлцээ хийж, “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах болон олон улс, бүс нутгийн тавцан дахь хамтын ажиллагаа зэрэг чиглэлээр санал солилцоно.
Айлчлалын үеэр талууд харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөж байна.
БНСУ-ын Ерөнхийлөгч И Жэ Мён, гэргий Ким Хе Гён нар Үндэсний их баяр наадмын нээлтийн ёслолд хүндэт зочдын хувиар оролцоно.
Хоёр улс:
2006 онд “Сайн хөршийн, найрамдал, хамтын ажиллагааны түншлэл”
2011 онд “Иж бүрэн түншлэл”
2021 онд “Стратегийн түншлэл”-ийн харилцаа тогтоосон.
Монгол Улс, Бүгд Найрамдах Солонгос Улс 1990 оны 03 дугаар сарын 26-ны өдөр дипломат харилцаа тогтоосон. БНСУ 1990 онд Улаанбаатар хотноо, манай улс 1991 онд Сөүл хотноо Элчин сайдын яамаа нээжээ.
Дэлхий нийтээр..
Пакистан: Афганы хил орчимд явуулсан ажиллагаагаар 29 зэвсэгт этгээдийг устгасан гэж мэдэгдэв
Пакистаны аюулгүй байдлын хүчнийхэн Афганистантай залгаа хилийн бүсэд явуулсан хуурай замын ажиллагаа болон дараах агаарын цохилтын үеэр 29 зэвсэгт этгээдийг устгасан гэж тус улсын эрх баригчид мэдэгдлээ.
Пакистаны Мэдээллийн сайд Аттаулла Тарарын мэдээлснээр, уг ажиллагааг сүүлийн үед тус улсын нутаг дэвсгэрт гарсан хэд хэдэн зэвсэгт халдлагын хариу арга хэмжээ болгон зохион байгуулжээ. Тэрбээр ажиллагааны үеэр зэвсэгт бүлэглэлүүдийн байрлаж байсан нуугдах газар, баазуудад чиглэсэн цохилт өгсөн гэж мэдэгдсэн байна.
Энэхүү ажиллагаа нь Карачи хот дахь Пакистаны хилийн цэргийн төв байр руу зэвсэгт халдлага үйлдэгдсэний дараахан болсон юм. Уг халдлагын улмаас гурван цэргийн алба хаагч амь үрэгдэж, хэд хэдэн хүн шархадсан бөгөөд халдлагын хариуцлагыг Пакистаны Талибантай холбоотой Жамаат-ул-Ахрар бүлэглэл хүлээжээ.
Сүүлийн жилүүдэд Пакистаны баруун хойд бүсэд зэвсэгт халдлагын тоо эрс нэмэгдэж, тус улсын эрх баригчид ихэнх халдлагыг Пакистаны Талибан (TTP) болон түүнтэй холбоотой бүлэглэлүүдтэй холбон тайлбарлаж ирсэн. Харин Афганы эрх баригчид өөрийн нутаг дэвсгэрийг ийм зорилгоор ашиглуулахгүй гэсэн байр сууриа удаа дараа илэрхийлж байгаа юм.
-
Хэн юу хэлэв...2020/08/27
Улаанбаатарын зовлонг нимгэлэх гэр хороолол дахь инженерийн хувьсгал
-
Дэлхий нийтээр..2024/05/30
Хурдан морины бүсийн уралдааныг аймгийн баяр наадамтай хамтатган зохион байгуулн...
-
Дэлхий нийтээр..2021/03/31
"Эмч, эмнэлгийн ажилтнуудаа сонсъё" цахим уулзалт боллоо
-
Тод зураг2019/09/04
Улаанбаатарт өдөртөө 25 хэм дулаан