Дэлхий нийтээр..
Эмгэнэл
/1963-2021/
Бидний дотны анд, Хөвсгөл аймгийн Төмөрбулаг сумын уугуул Гэндэнсүрэн овогтой Сүхбат 2021 оны тавдугаар сарын 4-ний өдөр өвчний учир зуурдаар таалал төгсөж бидэнд нөхөж баршгүй хүнд гарз тохиолоо. Тэрээр 1963 онд Хөвсгөл аймгийн Мөрөн хотод төрж, 1979 онд Хөвсгөл аймгийн нэгдүгээр 8 жилийн сургуулийг төгсч, 1979-1983 онд Дархан хотын Политехникумд суралцан, өрмийн механикч мэргэжил эзэмшсэн.
Г.Сүхбат нь 1983-1990 онд Хөвсгөл аймгийн Геологийн зураглалын экспидицэд өрмийн мастер, бригадын даргаар 1990-1993 онд Хөвсгөл аймгийн Төмөрбулаг, Ханх сумын Монголын хувьсгалт залуучуудын эвлэлийн үүрийн нарийн бичгийн даргаар ажиллаж байлаа. Тэрээр залуучуудын байгууллагыг манлайлан ажиллаж, 1991-1992 онд Болгар улсад мэргэжил дээшлүүлсэн юм.
Г.Сүхбат нь 1993 оноос гадаад худалдааны чиглэлээр хувиараа бизнес эрхэлж байгаад 2003 онд “БЦХ” ХХК-ийг байгуулж, 2014 онд компаниа өргөтгөн барилга угсралтын “Акмихолдинг” ХХК-ийг үүсгэн байгуулж байжээ. Тэрээр Монгол Улсын барилгын салбарт өөрийн үнэтэй хувь нэмрийг оруулсан, бүтээлч, хөдөлмөрч нэгэн байлаа. Г.Сүхбат нь “Акмихолдинг” ХХК-ийн Ерөнхий захирлаар ажиллан, хамт олноо удирдаж Сүхбаатар дүүргийн нутаг дэвсгэрт орших “Циркийн 20 айлын орон сууц”, Хөвсгөл аймгийн Төмөрбулаг сумын Эрүүл мэндийн төвийн барилга, Чингэлтэй дүүрэг, Говьсүмбэр аймгийн Нийгмийн даатгалын хэлтсийн барилга, Баянзүрх дүүргийн 23-р хороонд Бага сургууль, цэцэрлэгийн цогцолборын барилга, Архангай аймгийн Онцгой байдлын газрын Гал унтраах, аврах ангийн барилга, Архангай аймгийн Хөгжимт драмын театрын барилга, Өмнөговь аймгийн Даланзадгад сумын Засаг даргын тамгын газрын барилга, Цогт-Овоо сумын Ерөнхий боловсролын сургуулийн Сурагчдын дотуур байрыг барьж, Үндэсний номын сангийн барилгын бүтээн байгуулалтын ажилд хөдөлмөр бүтээлээ зориулж байсан юм.
Түүний улс эх орныхоо хөгжил дэвшилд оруулсан үнэтэй хувь нэмрийг нь төр засгаас өндрөөр үнэлж МХЗЭ-ийн “Тэргүүний залуу” алтан медаль, “Хөдөлмөрийн алдар” медаль, Ардын хувьсгалын 70, 80, 90 жилийн ойн медаль, “ Монгол Улсын Тэргүүний барилгачин” цол тэмдэг, Монгол Улсын Ерөнхийлөгчийн зарлигаар Алтангадас одон, Хөдөлмөрийн гавьяаны улаан тугийн одонгоор тус тус шагнаж байсан юм.
Тэрбээр Монголын бизнесийн салбарынхан, хамт олон, найз нөхдийнхөө дунд өндөр нэр хүндтэй, нутаг орноо гэсэн халуун дулаан сэтгэлтэй, залуусыг хүсэл мөрөөдлөө биелүүлэхэд нь сэтгэл харамгүй тусалж дэмждэг, өөдрөг, өгөөмөр, тусархуу, найрсаг нэгэн байлаа.
Таны ажилч хичээнгүй, хүнлэг нөхөрсөг, хөдөлмөрч, манлайлагч, сурган хүмүүжүүлэгч, элэгсэг дотно, төлөв түвшин дөлгөөн гэгээн дүр төрх бидний зүрх сэтгэлд үүрд хоногшин үлдэх болно.
Түүний ээж, гэр бүл, үр хүүхэд, ах дүү, төрөл төрөгсөд, найз нөхөд, хамт олонд нь гүн эмгэнэл илэрхийлье.
ХӨВСГӨЛ АЙМГИЙН НУТГИЙН ЗӨВЛӨЛ
Дэлхий нийтээр..
Балбын үер, нурангийн улмаас амиа алдсан хүний тоо 1451-д хүрчээ
Балбын хойд хэсэгт өнгөрсөн сард болсон гамшгийн улмаас амиа алдсан хүний тоо 1451-д хүрснийг тус улсын цагдаагийн байгууллага мэдээлжээ. Есдүгээр сарын 20-ны 17:00 цагийн байдлаар аврах, эрэн хайх ажиллагаа үргэлжилж, 6000 орчим хүн сураггүй хэвээр байна.
Гамшиг наймдугаар сарын 26-нд Балба, Хятадын Төвөдийн хил орчмын өндөр уулын бүсэд мөсөн гол, хад чулуулгийн их хэмжээний нуранги үүссэнээс эхэлжээ. Нурангиас үүссэн лаг шавар, мөс, чулуулгийн урсгал Бхоте Коши болон Тришули голын сав дагуу бараг 100 км үргэлжилж, суурин газар, зам, гүүр, усан цахилгаан станцуудыг сүйтгэсэн байна.
АНУ-ын Геологийн албаны урьдчилсан дүгнэлтээр энэ үйл явдал нь ердийн газар хөдлөлт бус, мөсөн гол оролцсон уулын хажуугийн асар их нуралтаас эхэлсэн бөгөөд үүний дараа хүчтэй үер, хурдас чулуулгийн урсгал үүсчээ.
Олон мянган хүн сураггүй хэвээр байгаа тул эрэн хайх, цогцос таних ажиллагаа үргэлжилж байна. Эрх баригчид танигдаагүй цогцоснуудын ДНХ-ийн дээжийг авч, ар гэрийнхний сорьцтой тулган тогтоох ажлыг явуулж байгаа юм.
Дэлхий нийтээр..
Герман нисэх буудлын дроны хэрэгт Оросыг буруутгав
Германы эрх баригчид өнгөрсөн наймдугаар сард Лейпциг-Халле нисэх буудлаас тэсрэх бодис бүхий дрон илэрсэн хэрэгт Оросын тал холбоотой гэж дүгнэжээ. Харин Москва уг мэдээллийг няцааж, Германы буруутгалыг үндэслэлгүй хэмээн мэдэгдсэн байна.
Наймдугаар сарын 4-ний орой Украины “Антонов Эйрлайнс” компанийн ачааны онгоц байрлаж байсан хэсгийн ойролцоо тэсрэх бодис тээсэн дрон илэрч, нисэх буудлын үйл ажиллагааг түр хугацаанд зогсоожээ. Тэсрэх бодисыг тусгай робот ашиглан аюулгүй болгосон бол өөр нэг дрон нисэх онгоцтой мөргөлдсөний дараа устсан гэх мэдээлэл байна.
Германы Дотоод хэргийн сайд Александер Добриндтын мэдээлснээр, мөрдөн шалгалтаар дроны хийц, ашигласан эд анги нь Орос-Украины дайнд хэрэглэгдэж буй зарим төхөөрөмжтэй ижил төстэй байсныг тогтоосон байна. Тэрбээр цагдаагийн мөрдөн шалгалт болон тагнуулын байгууллагын мэдээлэл Оросын оролцоог нотолж байна гэж мэдэгджээ. Гэхдээ Германы Засгийн газар Москваг уг хэрэгтэй шууд холбосон бүх нотлох баримтаа олон нийтэд дэлгээгүй байна.
Үүний дараа Герман Бонн хот дахь Оросын консулын газрыг есдүгээр сарын 18-наас хаах, Берлин дэх Оросын соёлын төвийн үйл ажиллагааг зогсоохоор шийдвэрлэжээ. Мөн ОХУ-ын Элчин сайдыг Гадаад хэргийн яамандаа дуудан тайлбар шаардсан бөгөөд Европын холбооны хориг арга хэмжээний жагсаалтыг өргөжүүлэх санал гаргахаар болсон байна.
ОХУ-ын Берлин дэх Элчин сайдын яам Германы буруутгалыг “утгагүй” гэж няцаасан байна. ОХУ-ын Ерөнхийлөгч Владимир Путин мөн Германы Засгийн газар дотоодын улс төрийн асуудлаасаа анхаарал сарниулахын тулд Москваг буруутгаж байна хэмээн мэдэгджээ.
Польш, Их Британи, Итали, Швед, Чех зэрэг НАТО-гийн хэд хэдэн улс Германы байр суурийг дэмжсэн бол Европын холбоо уг асуудлаар нэгдсэн хариу арга хэмжээ хэлэлцэхээр төлөвлөж байна.
Дэлхий нийтээр..
Колумбын Ерөнхийлөгч хууль ёсны оршин суух зөвшөөрөлгүй цагаачдыг албадан гаргана
Колумбын Ерөнхийлөгч Абелардо де ла Эсприелла оршин суух зөвшөөрөлгүй олон мянган цагаачийг тус улсаас албадан гаргахаа мэдэгдлээ. Түүний тайлбарласнаар шинэ бодлого нь гэмт хэргийн түвшнийг бууруулах, цагаачлалын хяналтыг чангатгахад чиглэж байна.
Де ла Эсприелла энэ долоо хоногоос эхлэн Колумбын Цагаачлалын алба болон цагдаагийн байгууллагад хамтарсан шалгалт, ажиллагаа явуулах чиглэл өгөхөөр төлөвлөж байгаагаа мэдэгджээ. Эхний ээлжид гэмт хэрэг үйлдэж буй цагаачдыг, дараа нь хууль ёсны статусгүй оршин суугчдыг шалгана гэж тэрбээр онцолсон байна.
Колумбод амьдарч буй цагаачдын дийлэнх нь Венесуэлийн иргэд юм. НҮБ-ын мэдээллээр наймдугаар сарын байдлаар тус улсад 2.8 сая орчим венесуэл иргэн амьдарч байгаа бөгөөд тэдний 2.3 сая орчимд 2021 оноос хэрэгжүүлсэн хөтөлбөрийн хүрээнд түр оршин суух зөвшөөрөл олгожээ.
Шинэ бодлого нь Колумбын өмнөх цагаачлалын чиглэлээс томоохон өөрчлөлт болж байна. Тус улс өмнө нь Венесуэлээс ирсэн дүрвэгсэд, цагаачдад хамгаалалт үзүүлж, хууль ёсны оршин суух эрх авах боломжийг өргөжүүлэх бодлого баримталж ирсэн юм.
Харин цагаачдад тусалдаг байгууллагууд хууль ёсны оршин суух зөвшөөрөл авах гарцыг өргөжүүлэхийн оронд зөвшөөрөлгүй иргэдийг албадан гаргах нь асуудлыг улам хүндрүүлж болзошгүй гэж шүүмжилжээ. Мөн Колумбын Цагаачлалын алба одоогоор байнгын удирдлагагүй байгаа тул шинэ бодлогыг хэрэгжүүлэх ажиллагаа шинэ дарга томилогдсоны дараа эхэлнэ гэж мэдээлсэн байна.
