Дэлхий нийтээр..
Нийгмийн Ардчилал Монголын залуучуудын холбоо 21 аймаг, 9 дүүргийн сургагч багш нараа бэлтгэлээ
Тус сургалтыг орон нутагтаа сургалт бие даан зохион байгуулах боломжтой сургагч багш бэлтгэх, НАМЗХ-ын салбар зөвлөлийн гишүүд дэмжигчдээ чадавхжуулах зорилготойгоор зохион байгуулсан юм. 21 аймаг 9 дүүргээс шалгарсан шилдэг 30 залуус 8 сарын 23-аас 8 сарын 28-ны хооронд амжилттай суралцан сертификатаа гардан авч, төгсөлтийн баяраа тэмдэглэлээ.
Сургагч багш бэлтгэх сургалтын үйл ажиллагааг Х.Сайхансанаа захиралтай Сургалт, судлагааны “Стратеги академи-”ийн хамт олон хамтран зохион байгууллаа. Сургалтын хөтөлбөрийн хүрээнд залуус "Сургагч гэж хэн бэ", "Илтгэгчийн суурь ур чадварууд" , "Нийгмийн ардчиллын үнэт зүйл", "Сургагчийн ур чадвар", "Нийгмийн баримжаат эдийн засаг", "Ерөнхийлөгчийн сонгууль ба олон нийтийн зан төлөв" зэрэг хувь хүний хөгжил, сургагч багшийн мэдлэг авах олон сонирхолтой хичээлд хамрагдан оюуны цар хүрээгээ тэллээ.
Сургалтыг “Нийгмийн Ардчилал” залуучуудын академийн захирал, Хувь хүний хөгжил, бизнес менежментийн сургагч Б.Золбадрал, Удирдлагын академийн захирал Д.Сүрэнчимэг, Хувийн ур чадварын гуру, “Дел Карнеги” болон “JСI” байгууллагын олон улсын сургагч Э.Чинзориг, “POSITIVE MIND” буюу “Эерэг сэтгэлгээний давлагаа” төслийн удирдагч Н.Энхбаатар, “Mongolian leadership institution” гүйцэтгэх захирал Б.Ганпүрэв, Сургалт, судалгааны “Стратеги академи” сургагч багш Г.Чулуун-Үрэл, А.Хишигтөгс, О.Оюундалай, П.Түмэнцэцэг гэсэн шилдэг сургагч багшийн төлөөллүүд өөрийн мэдлэг чадвар, ололт амжилт, туршлагаасаа залуустай хуваалцсан.
Сургалтын хаалтын үйл ажиллагаанд “Нийгмийн Ардчилал" залуучуудын академийн захирал Б.Золбадрал, НАМЗХ-ны ерөнхий нарийн бичгийн дарга Б.Оргил, дэд ерөнхийлөгч, Стратеги академийн захирал Х.Сайхансанаа, УЗ-ийн гишүүн Я.Энхбаатар, Нарийн бичгийн дарга Б.Галсан болон сургалт орсон багш нар оролцлоо.
Энэ үеэр НАЗА-ийн захирал Б.Золбадрал “Сургагч багш та бүхэн залуучуудад хувь хүний хөгжлийн хурыг түгээх маш чухал, ёс төртэй үүргийг хүлээж авлаа. Энд хүрч ирээд зүгээр нэг сургалт үзээд сургагч болж байгаа юм биш, бүгд нэг анги, нэг хамт олон болж, нэг зорилгын төлөө нэгдэж байна. Цаашид олон жил хамтарч ажиллан, бас нөхөрлөнө, түүнчлэн олон залууст эерэг өөрчлөлт, өөрийгөө хөгжүүлэх ухааны хурыг түгээнэ. Тиймээс сургагч багш болж буй залуус бүгд цаашид улам ихийг бүтээнэ гэдэгт эргэлзэхгүй байна” гэдгийг хэлж байлаа.
Мөн НАМЗХ-ны ерөнхий нарийн бичгийн дарга Б.Оргил “Залуус та бүхэнд маш том хариуцлага тулж ирлээ. Сурсан мэдсэн бүх зүйлүүдээ аймаг, сум, дүүргийнхээ залуучуудад харамгүй түгээж, сургаж, дараагийн үеийн залуучуудаа бэлтгэх ажилд идэвхтэй оролцоорой. НАМЗХ-ны эд эс дараагийн үе болж буй залуус та бүхэн улам хийхийг хийж, бүтээх чадвартай гэдгийг онцолъё” гэлээ.
Ийнхүү аймаг, дүүргийн шилдэг залуус “Нийгмийн Ардчилал" залуучуудын академийн сургагчийн ёс зүй, хариуцлагын гэрээг байгуулж, төгсөлтийн үйл ажиллагаа албан ёсоор өндөрлөлөө. Монголын шилдэг илтгэгч сургагч багш нарын үг, туршлага, мэдлэг мэдээлэл бүхэн залууст шинэлэг ололт амжилт, хүсэл тэмүүлэл, итгэл найдвар, урам зориг өглөө гэдгийг залуус онцолж байв. Мөн уг сургалт шинийг сурсан, шинэ үүд хаалга, боломжийг нээсэн, цаашлаад шинэ ур чадварыг олох боломжтой, хаана байгаагаас үл хамааран хамтдаа хөгжих боломжийг бидэнд олголоо гэдгийг ч хэлж байв.
Тус сургалтад залуус нэгдэн оролцсоноороо хувь хүний хөгжил, сургагч багшийн суурь мэдлэг, ур чадвар зэрэг олон зүйлийг суралцан цаашид олон мянган залуусыг чадавхжуулах ур чадварыг эзэмшсэн юм.
Ийнхүү бид цаашид дүүрэг, орон нутгийнхаа залуусыг чадавхжуулах, ур чадвартай шилдэг сургагч багш бэлтгэх суурийг үүгээр тавьж байна. Эдгээр залуусын хүсэл эрмэлзэл, хичээл зүтгэлээс үе үеийн шилдэг сургагч багш төрнө гэдэгт итгэлтэй байна.
Дэлхий нийтээр..
НҮБ дайн үргэлжилбэл дэлхийд өлсгөлөн нэмэгдэх эрсдэлтэйг анхааруулав
НҮБ-ын Дэлхийн хүнсний хөтөлбөр (WFP)-өөс 2026 оны дөрөвдүгээр сарын 16-ны өдөр гаргасан мэдэгдэлд дурдсанаар, Ойрхи Дорнодын бүс нутагт үүсээд буй хурцадмал байдал, ялангуяа Ирантай холбоотой зөрчил үргэлжилбэл дэлхийн хэмжээнд нэмэлт 45 сая хүн хурц өлсгөлөнд нэрвэгдэх эрсдэлтэй байгааг анхааруулжээ.
Энэ талаар НҮБ-ын Дэлхийн хүнсний хөтөлбөрийн Гүйцэтгэх захирал Синди Маккейн анхааруулахдаа, геополитикийн хурцадмал байдал нь дэлхийн хүнсний аюулгүй байдалд ноцтой дарамт учруулж байгааг онцолсон байна.
Тус байгууллагын мэдээлснээр, дайн, зөрчил нь зөвхөн тухайн бүс нутагт төдийгүй дэлхийн хүнсний хангамж, тээвэр логистик, эрчим хүчний зах зээлд шууд болон дам нөлөө үзүүлж байгаа аж. Үүний улмаас хүнсний бүтээгдэхүүний үнэ өсөх, нийлүүлэлт тасалдах, эмзэг эдийн засагтай орнуудын худалдан авах чадвар буурах зэрэг сөрөг үр дагавар нэмэгдэх төлөвтэй байна.
Одоогийн байдлаар дэлхий даяар хэдийнэ олон сая хүн хүнсний хомсдолд өртөөд байгаа бөгөөд дээрх нөхцөл байдал үргэлжилбэл энэ тоо цаашид огцом нэмэгдэх эрсдэлтэйг НҮБ онцолсон байна. Иймд олон улсын хамтын нийгэмлэгийг зөрчлийг намжаах, хүмүүнлэгийн тусламжийг нэмэгдүүлэх, хүнсний хангамжийг тогтвортой байлгахад анхаарахыг уриалжээ.
Шинжээчдийн үзэж буйгаар, геополитикийн тогтворгүй байдал нь дэлхийн эдийн засаг, ялангуяа хүнсний аюулгүй байдалд мэдэгдэхүйц нөлөө үзүүлж байгаа бөгөөд ойрын хугацаанд энэ чиг хандлага үргэлжлэх төлөвтэй байна.
Дэлхий нийтээр..
Хиймэл оюунд суурилсан технологийн хөгжил хурдасч, дэлхийн өрсөлдөөн шинэ шатанд хүрэв
Сүүлийн жилүүдэд хиймэл оюунд суурилсан технологийн хөгжил эрчимжиж, дэлхийн томоохон компаниудын өрсөлдөөн шинэ шатанд хүрлээ. Үйлдвэрлэл, тээвэр, мэдээллийн технологийн салбарт автоматжуулалт, ухаалаг системийн хэрэглээ эрс нэмэгдэж, хүний оролцоог багасгах чиг хандлага давамгайлж байна.
Хиймэл оюуны шинэ үеийн загварууд илүү нарийвчлалтай, хурдтай ажиллах чадвартай болж, их хэмжээний өгөгдлийг богино хугацаанд боловсруулах боломжийг өргөжүүлэв. Энэ нь бизнесийн шийдвэр гаргалтад шууд нөлөөлөх хэмжээнд хүрчээ. Жолоочгүй тээврийн хэрэгсэл, роботжуулсан үйлдвэрлэл бодит хэрэглээнд улам ойртож, туршилтаас хэрэглээ рүү шилжих үе шат идэвхжив.
Нөгөө талаас дата төвүүдийн хүчин чадал нэмэгдэхийн хэрээр эрчим хүчний хэрэглээ өсөж, байгаль орчинд үзүүлэх нөлөөллийн асуудал олон улсын анхаарлын төвд орж байна.
Мөн технологийн энэ хурдац хөдөлмөрийн зах зээлд өөрчлөлт авчирч, зарим ажлын байр буурч, шинэ ур чадварын эрэлт нэмэгдэх нөхцөл бүрдэв.
Иймээс улс орнууд технологийн бодлогоо шинэчилж, инновац, хүний нөөцийн бэлтгэлийг чухалчлах шаардлага улам тодорч байна.
Дэлхий нийтээр..
“Al Jazeera”-гийн сэтгүүлч амь үрэгдсэнд эмгэнэл илэрхийллээ
Газын зурваст ажиллаж байсан Al Jazeera телевизийн сэтгүүлч Вишах Израилын цохилтын үеэр амь үрэгдсэн талаар олон улсын хэвлэлүүд мэдээлж байна. Мэдээллээр, сэтгүүлч Вишах Газын зурваст болж буй үйл явдлыг сурвалжилж байх үед цохилтод өртсөн бөгөөд хамт ажиллаж байсан хэвлэл мэдээллийн ажилтнууд түүнийг эмгэнэн хүндэтгэл үзүүлжээ.
Газын сэтгүүлчид болон хэвлэл мэдээллийн байгууллагууд:
- Сэтгүүлчдийн аюулгүй байдлыг хангахыг
- Сурвалжлагчдыг онилохгүй байхыг
- Олон улсын байгууллагууд анхаарал хандуулахыг уриалсан байна.
Al Jazeera телевизийн зүгээс сэтгүүлчийн амь үрэгдсэнд эмгэнэл илэрхийлж, мөргөлдөөний бүсэд ажиллаж буй сэтгүүлчдийн аюулгүй байдлын асуудал улам ноцтой болж байгааг онцолжээ.
Сүүлийн саруудад Газын зурваст хэд хэдэн сэтгүүлч амь үрэгдсэн талаар олон улсын байгууллагууд анхааруулж байгаа бөгөөд хэвлэл мэдээллийн ажилтнууд мөргөлдөөний бүсэд хамгийн өндөр эрсдэлтэй нөхцөлд ажиллаж буйг тэмдэглэж байна.
Ойрхи Дорнодын нөхцөл байдал хурц хэвээр байгаа бөгөөд Газын зурваст агаарын цохилт, хуурай замын ажиллагаа үргэлжилсээр байна.
