Тод мэдээ
"Дөл-2022” тэмцээнд нийслэлийнхэн амжилттай оролцлоо
Цэрэг-спортын “Дөл-2022” улсын аварга шалгаруулах цогцолбор тэмцээнд амжилттай оролцсон багш, дасгалжуулагч, сурагчдад нийслэлийн удирдлагууд өчигдөр шагнал гардуулж, хүндэтгэл үзүүллээ.
Уг үйл ажиллагаанд Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө, НЗДТГ-ын даргын албан үүргийн түр орлон гүйцэтгэгч И.Баатархүү, НЗДТГ-ын Цэргийн штабын дарга хурандаа Г.Ялалт тэргүүтэй албаныхан оролцов.
Монгол Улсын Ерөнхийлөгчийн ивээл дор зохион байгуулсан, Батлан хамгаалахын сайдын нэрэмжит “Дөл-2022” тэмцээнд нийслэлийн ерөнхий боловсролын 96 сургуулийн 1400 гаруй сурагч оролцож, авхаалж самбаагаа сорьсон юм. Хүүхэд залуусыг ёс суртахуунтай, хувийн зохион байгуулалттай, зорилго тэмүүлэлтэй, эх оронч үзэлтэй иргэн болон төлөвшүүлэхэд чухал ач холбогдолтой уг тэмцээнийг улсын хэмжээнд гурван үе шаттай зохион байгуулсан. Эхний хоёр шат буюу дүүргүүдийн Засаг дарга нарын нэрэмжит цогцолбор тэмцээн өнгөрсөн дөрөвдүгээр сард болж, дүүрэг бүрээс шалгарсан багууд улсад өрсөлдсөн билээ. Энэ хугацаанд НЗДТГ-ын Цэргийн штабаас томилсон бүрэлдэхүүн баталсан хуваарийн дагуу нийслэлийн есөн дүүргээс шалгарсан баг тамирчдад заавар зөвлөмж өгч ажилласан юм.
“Дөл” тэмцээнийг анх 1984 онд “Шонхор” нэрээр зохион байгуулж эхэлсэн. Энэ жил улсын аварга шалгаруулах тэмцээнд 29 багийн 400 гаруй тамирчин өрсөлдсөнөөс
- Тэргүүн байрт Э.Өсөхбаяр тасгийн захирагч, Б.Дэлгэрмаа дасгалжуулагчтай, нийслэлийн Сонгинохайрхан дүүргийн “Цасны барс” тасаг
- Дэд байрт С.Энхбаяр тасгийн захирагч, Б.Батцог дасгалжуулагчтай, нийслэлийн Чингэлтэй дүүргийн “Хар сүлд” тасаг
- Гутгаар байрт А.Ганбаяр тасгийн захирагч, Ч.Гаваа дасгалжуулагчтай, Өвөрхангай аймгийн “Ав хайрхан” тасаг
- Тусгай байрт З.Төгөлдөр тасгийн захирагч, Т.Ганболд дасгалжуулагчтай, нийслэлийн Багануур дүүргийн “Соёмбо” тасаг
- Мөн тусгай байрт Ж.Төгсжаргал тасгийн захирагч, А.Мөнхсувд дасгалжуулагчтай нийслэлийн Сүхбаатар дүүргийн “Алтан-Од” тасаг тус тус шалгарсан байна.
Багийн ажиллагаа, эв нэгдлийн илэрхийлэл болсон уг тэмцээнд амжилттай оролцсон баг тамирчдаас дараах хүмүүс өнөөдөр шагнал гардлаа.
Нийслэлийн Засаг даргын Жуух бичгээр
- Зэвсэгт хүчний 150 дугаар ангийн Навудчик-оператор, ахлагч А.Өнөмөнх
- Сонгинохайрхан дүүрэг дэх Зэвсэгт хүчний 150 дугаар ангийн Тоотын захирагч, ахлах ахлагч Д.Далайцэрэн
- Зэвсэгт хүчний 084 дүгээр ангийн Химийн ахлагч, Сургагч ахлагч С.Очгэрэл
- Зэвсэгт хүчний 084 дүгээр ангийн Төлөвлөлтийн офицер, ахлах дэслэгч Н.Мөнгөнхөлөг
- Зэвсэгт хүчний 084 дүгээр ангийн Тоотын дарга, ахлах ахлагч Д.Адьяа
- Хилийн 0151 дүгээр ангийн Штабын дарга, дэд хурандаа Б.Одсүрэн
- Багануур дүүргийн “Боловсрол” цогцолбор сургуулийн биеийн тамирын багш Т.Ганболд
Нийслэлийн Боловсролын газрын “Шилдэг ажилтан” тэмдгээр
- Баянгол дүүргийн ерөнхий боловсролын 38 дугаар сургуулийн биеийн тамирын багш Г.Түвшинжаргал
- Чингэлтэй дүүргийн ерөнхий боловсролын 24 дүгээр сургуулийн биеийн тамирын багш Б.Батцогт
- Хан-Уул дүүргийн ерөнхий боловсролын 60 дугаар сургуулийн биеийн тамирын багш Х.Ганболд
Нийслэлийн Боловсролын газрын “Багшийн алдар” тэмдгээр
- Сонгинохайрхан дүүргийн ерөнхий боловсролын 124 дүгээр сургуулийн биеийн тамирын багш Х.Хулан
- Сүхбаатар дүүргийн ерөнхий боловсролын 3 дугаар сургуулийн биеийн тамирын багш А.Мөнхсувд
- Сүхбаатар дүүргийн ерөнхий боловсролын 3 дугаар сургуулийн нийгмийн ажилтан Я.Үүрцайх
- Налайх дүүргийн ерөнхий боловсролын 109 дүгээр сургуулийн Биеийн тамирын багш Ч.Есөнтөмөр
Нийслэлийн Боловсролын газрын “Багшийн алдар” тэмдгээр
- Багахангай дүүргийн ерөнхий боловсролын “Хангай” цогцолбор сургуулийн монгол хэл, бичиг, уран зохиолын багш Р.Болортуяа.
“Манлай сурагч” алтан медалиар
- Баянгол дүүргийн ерөнхий боловсролын 38 дугаар сургуулийн 12/2 ангийн сурагч М.Анударь
- Баянзүрх дүүргийн ерөнхий боловсролын 30 дугаар сургуулийн 12б ангийн сурагч З.Баясгалан
- Сонгинохайрхан дүүргийн ерөнхий боловсролын 124 дүгээр сургуулийн 12а ангийн сурагч Э.Ууганзаяа
- Сүхбаатар дүүргийн ерөнхий боловсролын 3 дугаар сургуулийн 12а ангийн сурагч Б.Саруул
- Чингэлтэй дүүргийн ерөнхий боловсролын 24 дүгээр сургуулийн 12 дугаар ангийн сурагч С.Энхбаяр
- Хан-Уул дүүргийн ерөнхий боловсролын 7 дугаар сургуулийн 11б ангийн сурагч Т.Хурцгэрэл
- Налайх дүүргийн ерөнхий боловсролын 109 дүгээр сургуулийн 12/1 ангийн сурагч Б.Ихбаяр
- Багахангай дүүргийн ерөнхий боловсролын “Хангай” цогцолбор сургуулийн 11б ангийн сурагч Ц.Содбаяр тус тус шагнагдсан юм.
Тод мэдээ
Хилийн зурваст зөвшөөрөлгүй нэвтэрч, хулгайн ан хийх гэж байсан иргэдийг саатууллаа
Хилийн цэргийн 0277 дугаар ангийн ... дугаар салбарын хариуцсан хэсэгт 2024 оны 11 дүгээр сарын 18-ны өдөр Завхан аймгийн Баянтэс сумын Хачиг багийн 6 иргэн 1 автомашин, 5 морин уналгатайгаар хулгайн ан хийх зорилготойгоор хилийн зурваст зөвшөөрөлгүй нэвтэрчээ.
Тус ангийн хилчид дээрх хэргийг илрүүлэн хуулийн дагуу шийдвэрлэлээ гэж Хил хамгаалах ерөнхий газраас мэдээллээ.
Тод мэдээ
Монгол Улсын Ерөнхийлөгч 2025 оны Төсвийн тухай хуульд бүхэлд нь хориг тавилаа
Монгол Улсын Ерөнхийлөгч Ухнаагийн Хүрэлсүх Монгол Улсын Үндсэн хуулийн Гучин гуравдугаар зүйлийн 1 дэх хэсгийн 1, Монгол Улсын Ерөнхийлөгчийн тухай хуулийн 12 дугаар зүйлийн 8 дахь хэсгийг тус тус үндэслэн Монгол Улсын 2025 оны Төсвийн тухай хууль, хамт өргөн мэдүүлсэн болон холбогдуулан боловсруулж баталсан хууль тогтоомжид бүхэлд нь хориг тавилаа.
Энэ талаар Ерөнхийлөгчийн Тамгын газрын дарга Г.Занданшатар, Эдийн засгийн бодлогын зөвлөх Б.Даваадалай, Ерөнхийлөгчийн Хэвлэлийн төлөөлөгч Ө.Золбаяр нар мэдээлэл өгөв.
2025 оны улсын төсвийг үр ашигтай, хэмнэлттэй, алдагдалгүй батлах шаардлагатай, төсөвт тодотгол хийх тухай тогтоол баталсан нь хууль дээдлэх үндсэн зарчим зөрчигдөх нөхцөл бүрдүүлсэн гэсэн хоёр үндэслэлээр бүхэлд нь хориг тавилаа.
Ерөнхийлөгч, улсын төсөв нь эдийн засгийн болзошгүй хүндрэл, бэрхшээлийг хохирол багатай даван туулах нөөц боломж, хуримтлал нэмэгдүүлэх, үнэ, ханшийн өсөлтийг хязгаарлах, эдийн засгийн тогтвортой байдал, ард иргэд, аж ахуйн нэгж, татвар төлөгчдийн хэвийн үйл ажиллагааг хангах баталгаа болохыг тэмдэглэлээ.
Мөн гадаад зах зээлийн төлөв байдал, түүхий эдийн үнийн хэлбэлзлийг харгалзан, гадаад валютын улсын нөөц, төсвийн хуримтлалыг нэмэгдүүлэх, өрийг бууруулах зэрэг суурь зарчмыг анхаарч, мөчлөг сөрсөн төсвийн бодлого хэрэгжүүлж, алдагдалгүй төсөв батлах нь зүйтэй гэж үзлээ.
УИХ төсвийг хэлэлцэн батлахдаа Төсвийн тухай хуулийн 6 дугаар зүйлийн 6.4.1-д заасан “төсвийг үр ашигтай, хэмнэлттэй байхаар төлөвлөж, зарцуулах”, хуулийн 6.5.1-д заасан “төсөв хэлэлцэх, батлах үйл ажиллагааг нийтэд нээлттэй байлгаж, төсвийн төлөвлөгөө, гүйцэтгэл, тайлагналын талаар тогтоосон хугацаанд нийтэд ойлгомжтой, хүртээмжтэй байдлаар мэдээлэх”, мөн Төсвийн тогтвортой байдлын тухай хуулийн 5 дугаар зүйлийн 5.1.2-д заасан “төсвийн бодлого, стратегийн зорилт нь макро эдийн засгийн болон татварын тогтвортой орчныг бүрдүүлэх, инфляцийг хязгаарлахад чиглэсэн байх”, 5.1.6-д заасан “төсвийн хөрөнгийн хуваарилалт, байршуулалт, хэрэглээ нь эдийн засгийн үр ашигтай, нийгмийн ач холбогдолтой байх” гэсэн заалтуудыг бүрэн хангаагүй бөгөөд энэ нь хууль дээдлэх Үндсэн хуулийн зарчимд нийцэхгүй байгааг онцоллоо.
Мөн “Монгол Улсын Засгийн газрын 2024-2028 оны үйл ажиллагааны хөтөлбөр”-т тусгагдсан “Төсвийн урсгал зардлын тэлэлтийг хязгаарлаж, төсвийн алдагдал, Засгийн газрын өрийн тусгай шаардлагыг хангана” гэсэн зорилтоо бодитой хэрэгжүүлж ажиллахыг санууллаа.
Төсвийн сахилга батыг чангатгах, үр ашигтай, хэмнэлттэй байх зарчимд нийцүүлэн төсвийн зардлыг бууруулах, чиг үүргийн давхардлыг арилгах, улс төрийн нам, эвслүүд сонгуулийн амлалтаа биелүүлэх зэрэг санал, шүүмжлэл гарч байгаа нь зүй ёсны шаардлага гэж Ерөнхийлөгч үзлээ.
УИХ 2025 оны Төсвийн тухай хууль баталсантай холбогдуулан авах зарим арга хэмжээний тухай 41 дүгээр тогтоол гаргасан.
Энэ нь ирэх оны төсөв Төсвийн болон Төсвийн тогтвортой байдлын тухай хуульд заасан зарчмуудыг бүрэн хангаагүй, төрийн мөнгөний бодлоготой нийцээгүй, төсвийг үр ашигтай, хэмнэлттэй байхаар төлөвлөж чадаагүй гэдгээ УИХ хүлээн зөвшөөрсөн хэрэг гэж Ерөнхийлөгч үзлээ.
2025 оны Төсвийн тухай хууль хүчин төгөлдөр болж, дагаж мөрдөж эхлээгүй, Төсвийн тухай хуулийн 34 дүгээр зүйлийн 34.1-д заасан тохиолдол үүсээгүй байхад тодотгол хийхээр тогтоол баталсан нь Үндсэн хуулийн Нэгдүгээр зүйлийн 2 дахь хэсгийн “. . . хууль дээдлэх нь төрийн үйл ажиллагааны үндсэн зарчим мөн” гэсэн заалтыг зөрчих нөхцөл бий болгосон.
Иймд Монгол Улсын 2025 оны Төсвийн тухай хууль, хамт өргөн мэдүүлсэн болон холбогдуулан боловсруулж баталсан хууль тогтоомжид бүхэлд нь тавьсан хоригийг холбогдох хуулийн дагуу хэлэлцэн шийдвэрлэх нь зүйтэй гэж үзлээ.
Тод мэдээ
“Эрдэнэс Монгол” нэгдэлд хэрэгжих дараагийн реформыг дэмжлээ
Засгийн газрын ээлжит хуралдаан 2024 оны арваннэгдүгээр сарын 20-нд болж дараах асуудлыг хэлэлцэн шийдвэрлэлээ.
“Эрдэнэс Монгол” нэгдлээс хэрэгжүүлсэн манлайлал, засаглал, нэгдлийн үйл ажиллагаа, үр дүнг сайжруулах тогтолцооны шинэчлэл, Үндэсний баялгийн санг бүрдүүлэх реформын хүрээнд авч хэрэгжүүлж буй арга хэмжээний талаар Засгийн газрын гишүүдэд танилцууллаа.
“Эрдэнэс Монгол” нэгдэл засаглал, үйл ажиллагааны менежментээ сайжруулж тогтолцооны шинэчлэлийг хэрэгжүүлж ажилласны үр дүнд 2023 онд 599.6 мянган тонн зэсийн баяжмал, 35.1 сая тонн нүүрс олборлож, борлуулалтын орлого 14.9 их наяд, цэвэр ашиг 4.5 их наяд төгрөгт хүрч, улс болон орон нутгийн төсөвт 4.5 их наяд төгрөгийн татвар төвлөрүүлжээ. Энэхүү амжилтын үр дүнд гадаад валютын албан нөөцийн 77 хувь буюу 3.6 тэрбум ам.долларыг Монгол банканд төвлөрүүлж, нэгдлийн толгой компани 200.0 тэрбум, нэгдлийн хэмжээнд 394.0 тэрбум төгрөгийн хуримтлагдсан өр төлбөрийг төлж барагдуулжээ.
Нэгдлийн үйл ажиллагаа сайжирч, санхүүгийн үзүүлэлт дээшилсэн нь “Эрдэнэс Тавантолгой” ХК-ийн хувьцаа эзэмшигчдэд ногдол ашиг хуваарилах боломжийг бүрдүүлж тус компанийн 2022, 2023 оны цэвэр ашгаас ногдол ашиг хуваарилсан.
Түүнчлэн Монгол Улсын Үндсэн хуулийн суурь зарчмыг хангах, газрын хэвлийн баялгийн үр өгөөжийг Үндэсний баялгийн санд төвлөрүүлэх замаар иргэдэд тэгш, шударга хүртээх, түүний үр өгөөжийн дийлэнх нь ард түмэнд ногдож байх үзэл санааг хэрэгжүүлэх Үндэсний баялгийн сангийн тухай хуулийг Улсын Их Хурлаар хэлэлцүүлэн батлуулсан нь Монгол хүн баялагтаа эзэн байх хууль эрх зүйн үндсийг бүрдүүлсэн төдийгүй “Эрдэнэс Монгол” нэгдлийн эрхзүйн байдал, тогтвортой үйл ажиллагааг явуулах эрхзүйн үндсийг бий болгосон юм. Хуулийн хэрэгжилтийн хангуулж 2024 онд “Эрдэнэс Монгол” нэгдэл 500 тэрбум төгрөгийг Хуримтлалын санд төвлөрүүлснээр 10,000 айл өрх орон сууцны хөтөлбөрт хамрагдах боломжийг бүрдүүлсэн. “Эрдэнэс Монгол” нэгдэл Үндэсний баялгийн сангийн орлогыг нэмэгдүүлэх дараагийн цогц шинэчлэлийн реформыг хэрэгжүүлэхээр төлөвлөж байна.
Танилцуулгатай холбогдуулан, Үндэсний баялгийн сангийн орлогыг нэмэгдүүлэх зорилгоор төрийн өмчит уул уурхайн компанийн засаглал, үйл ажиллагаа, үр ашгийг сайжруулах замаар хуримтлалын санд ногдох орлогыг нэмэгдүүлэх, эрдэс баялгийн үр өгөөжийг ард түмэнд тэгш, шударга хүртээхэд чиглэсэн цогц шинэчлэлийн реформыг үргэлжлүүлэн хэрэгжүүлж ажиллах,
"Ган үйлдвэрлэлийн цогцолбор", "Барилгын материал үйлдвэрлэлийн цогцолбор", "Нүүрс-химийн цогцолбор", "Жонш боловсруулах цогцолбор", "Кокс-химийн цогцолбор" үйлдвэрлэл, технологийн паркуудыг байгуулах газрыг улсын тусгай хэрэгцээнд авах асуудлыг эрчимжүүлэх,
Үйлдвэрлэл технологийн паркт эрхлэх үйлдвэрлэлийн салбар, үйл ажиллагааны чиглэл, бүтээгдэхүүний төрөл, паркийн байршлын жагсаалтад “Эрдэнэс Монгол” ХХК-ийн хэрэгжүүлэх үйлдвэрлэл технологийн зургаан паркийг оруулах зэрэг асуудлыг Засгийн газрын хуралдаанаар хэлэлцүүлэн шийдвэрлүүлэхийг үүрэг болголоо.
Мөн экспортыг эрчимжүүлэх, гадаад валютын орлогыг нэмэгдүүлэх зорилгоор “Эрдэнэс Монгол” нэгдэлд Төрийн болон төрийн өмчийн оролцоотой хуулийн этгээдүүдийн эзэмшлийн ачааны вагоны хуваарилалтыг нэмэгдүүлэх арга хэмжээ авч ажиллахыг холбогдох албан тушаалтнуудад даалгалаа.
