Илон Маскийн үүсгэн байгуулсан xAI компани АНУ-ын Миннесота мужийн хиймэл оюунаар бодит хүмүүсийн хуурамч нүцгэн зураг бүтээх технологийг хориглосон шинэ хуулийг эсэргүүцэн холбооны шүүхэд нэхэмжлэл гаргажээ.

Миннесота мужийн хууль энэ оны тавдугаар сард батлагдсан бөгөөд наймдугаар сарын 1-нээс хэрэгжиж эхлэхээр товлогдсон байна. Уг хууль нь хиймэл оюуны тусламжтайгаар бодит хүмүүсийн зөвшөөрөлгүйгээр хуурамч нүцгэн зураг, дүрс бичлэг бүтээх боломж олгодог технологийг хязгаарлах зорилготой бөгөөд АНУ-д ийм төрлийн анхны зохицуулалтад тооцогдож байна.

Харин xAI компани шүүхэд гаргасан нэхэмжлэлдээ зөвшөөрөлгүйгээр ийм төрлийн дүрс бүтээж түгээхийг хориглохыг эсэргүүцэхгүй ч шинэ хууль нь үүнээс хэтэрч, хууль ёсны болон зөвшөөрөлтэй контент хүртэл хамарч, хиймэл оюуны үйлчилгээ үзүүлэгчдэд нэг зөрчил тутамд 500 мянган ам.долларын торгууль ногдуулах боломжтой гэж үзжээ. Мөн үйлчилгээ үзүүлэгчид хууль зөрчлөөс урьдчилан сэргийлэхийн тулд чин шударгаар ажилласан тохиолдолд хамгаалах зохицуулалт байхгүй гэж мэдэгдсэн байна.

Миннесота мужийн Ерөнхий прокурор Кит Эллисон уг хуулийг хамгаалж, хиймэл оюунаар хүмүүсийн зөвшөөрөлгүйгээр хуурамч нүцгэн зураг бүтээх нь хүний нэр төр, сэтгэл зүй болон хувийн амьдралд ноцтой хохирол учруулдаг гэж мэдэгджээ.

xAI компани Грок хиймэл оюуны үйлчилгээнийхээ ашиглалтын нөхцөлд хүний хувийн нууцыг зөрчих, зөвшөөрөлгүйгээр хүний дүр төрхийг өөрчилж бэлгийн шинжтэй зураг бүтээхийг хориглодог бөгөөд ийм төрлийн зөрчил илэрвэл хэрэглэгчийн эрхийг хаах зэрэг арга хэмжээ авдаг гэж шүүхийн баримтдаа дурдсан байна.

Японы Ерөнхий сайд Санаэ Такайчигийн Засгийн газрын дэмжлэгийн үнэлгээ сүүлийн үед нийтлэгдсэн санал асуулгуудаар дараалан буурч, зарим судалгаагаар 50 хувиас доош орсон байна. Жижи Пресс агентлагийн санал асуулгаар Засгийн газрын дэмжлэгийн үнэлгээ өмнөх сараас 5.3 нэгжээр буурч, 49 хувь болсон байна.

Мөн Олл Ниппон Ньюс Нэтворк (ANN)-ийн судалгаагаар дэмжлэгийн түвшин 10.9 нэгжээр буурч, 49.2 хувьд хүрчээ. Харин Майничи Шимбун сонины санал асуулгаар Засгийн газрын дэмжлэгийн үнэлгээ 10 нэгжээр буурч, 41 хувь болсон бол дургүйцлийн үнэлгээ 44 хувьд хүрсэн байна. Ингэснээр Засгийн газрыг дэмжигчдийн хувь анх удаа эсэргүүцэгчдийн түвшнээс доогуур гарчээ.

Консерватив чиглэлийн хэвлэлүүдийн санал асуулгууд ч мөн адил Санаэ Такайчигийн Засгийн газрын дэмжлэг мэдэгдэхүйц буурсан үзүүлэлттэй гарсан байна.

Шинжээчдийн үзэж буйгаар, өргөн хэрэглээний барааны үнийн өсөлттэй холбоотой иргэдийн санаа зовнилыг хангалттай шийдвэрлээгүй, улс төрийн дуулиант асуудлуудад идэвхгүй хандсан, мөн маргаан дагуулсан хуулийн төслүүдийг үргэлжлүүлэн дэмжсэн нь Засгийн газрын нэр хүнд буурахад нөлөөлжээ.

Долдугаар сарын 27-нд Японы Төлөөлөгчдийн танхимын Төсвийн хорооны хуралдааны үеэр санал асуулгын дүнгийн талаар байр суурийг нь асуухад Ерөнхий сайд Санаэ Такайчи "Би өөрөө үүнийг тайлбарлахад хэцүү байна. Шалтгааныг нь мэдэхгүй байна" хэмээн хариулсан байна.

Францын баруун өмнөд хэсэг болон Испанийн хэд хэдэн бүс нутагт ой хээрийн түймэр эрчимтэй тархаж, 250 мянга гаруй хүнийг аюулгүй бүс рүү нүүлгэн шилжүүлээд байна. Түймэр Францын нэрт дарсны бүс болох Бордо хотын орчимд хүрсэнтэй холбоотойгоор онцгой байдлын алба өндөржүүлсэн бэлэн байдалд ажиллаж байна.

Францын Жиронд мужид гарсан түймэр 42 мянган га талбайг хамарч, Парис хотын нутаг дэвсгэрээс дөрөв дахин том газрыг шатаажээ. Хэт халалт, хуурайшилт, салхины чиглэл тогтмол өөрчлөгдөж байгаа нь галыг унтраах ажиллагааг хүндрүүлж байгаа бөгөөд Бордо хотын ойролцоох таван суурингийн оршин суугчдыг шинээр нүүлгэн шилжүүлсэн байна. Харин Бордо хотод одоогоор албан ёсны нүүлгэн шилжүүлэх шийдвэр гараагүй байгаа аж.

Түймэртэй тэмцэх ажиллагаанд 2,500 гаруй гал сөнөөгч, 18 нисэх онгоц болон цэргийн алба хаагчдыг дайчилжээ. Галын улмаас олон зуун орон сууц шатаж, 75 гал сөнөөгч бэртсэн байна. Мөн зарим түймэр өөрийн үүсгэсэн хүчтэй агаарын урсгал, аянгатай үүлний нөлөөгөөр шинэ голомт үүсгэж байгаа нь унтраах ажиллагааг улам хүндрүүлж байгааг албаныхан мэдээлжээ.

Испанид ч түймэр үргэлжилж, Мадрид, Валенсиа орчимд гарсан түймрийн улмаас 76 мянга гаруй хүнийг аюулгүй бүсэд нүүлгэн шилжүүлсэн байна. Мөн нэг хүн амиа алдсан талаар эрх баригчид мэдээлжээ.

Мэргэжилтнүүдийн үзэж буйгаар Европ даяар үргэлжилж буй халуун агаарын давлагаа, хуурайшилт нь энэ жилийн ой хээрийн түймрийн эрсдэлийг эрс нэмэгдүүлж байна. Ирэх өдрүүдэд ч өндөр температур үргэлжлэх төлөвтэй байгаа тул Франц, Испанийн эрх баригчид иргэдийг сонор сэрэмжтэй байхыг уриаллаа.