Дэлхий нийтээр..
Монгол-Беларусийн парламентын бүлгүүд цахим уулзалт хийлээ
Улсын Их Хурлын гишүүн, Аюулгүй байдал, гадаад бодлогын байнгын хорооны дарга, УИХ дахь Монгол-Беларусийн парламентын бүлгийн дарга Б.Энх-Амгалан Бүгд найрамдах Беларусь улсын үндэсний хурал дахь Монгол Улстай хамтран ажиллах ажлын хэсгийн ахлагч Щастны Анатолий Тадеушевич нар өнөөдөр (2022.02.15) парламентын бүлэг хоорондын 2023 оны анхны уулзалтыг цахимаар амжилттай зохион байгууллаа.
Уулзалтад Монгол Улсаас Бүгд Найрамдах Беларусь Улсад суугаа Онц бөгөөд Бүрэн эрхт Элчин сайд Б.Баярсайхан, Гадаад харилцааны дэд сайд Г.Амартүвшин, УИХ-ын Тамгын газрын Гадаад харилцааны хэлтсийн дарга Ц.Жамбалдорж болон бусад албаны төлөөлөл байлцав.
Уулзалт Монгол Улс, Бүгд Найрамдах Беларусь Улсын хооронд дипломат харилцаа тогтоосны 30 жилийн ойн хүрээнд болж байгаагаар онцлог. Талууд хоёр улсын парламентын зүгээс өөрийн улсын нийгэм, эдийн засгийн хөгжлийг тогтвортой урагшлуулахад шаардлагатай эрх зүйн үндсийг бүрдүүлэхэд голлон анхаарч буй чиглэлийн талаар мэдээлэл солилцсон юм.
Хоёр улс нь нийгэм, эдийн засгийн бүхий л салбарт харилцан ашигтай хамтын ажиллагааг хөгжүүлэхийг эрмэлздэг. Сүүлийн жилүүдэд хоёр орны харилцаа хөдөө аж ахуй, зам тээвэр, онцгой байдал, боловсролын салбарт идэвхтэй хөгжиж байгааг УИХ-ын гишүүн, УИХ дахь Монгол-Беларусийн парламентын бүлгийн дарга Б.Энх-Амгалан уулзалтын эхэнд тэмдэглээд цар тахлын үеэр Минск хотод Монгол Улсын Элчин сайдын яам нээгдэж, анхны суурин суух Элчин сайд томилогдон ажиллаж байгаа нь Монгол Улс Беларусь Улстай хоёр талын харилцааг хөгжүүлэхэд ихээхэн ач холбогдол өгч байгаагийн илрэл гэж онцлов.
Мөн тэрбээр хамтын ажиллагааны хүрээнд тохиролцсон боловч удаашралтай байгаа дараах асуудлыг хоёр тал анхааралдаа авч, ажил хэрэг болгох хүсэлтийг уламжиллаа. Үүнд:
- Белаз, ГМЗ/Гродненский механический завод/ зэрэг том оврын ачааны автомашины дистрибьютер байгуулж, албан ёсны засвар, механик, сэлбэг үйлчилгээний төв байгуулах ажлыг хэрэгжүүлэх,
- Говь-Алтай аймгийн Гуулин тосгонд усалгаатай тариалангийн дэргэд байгуулагдах үнээний фермийг түшиглэсэн “Беларусь” тракторын механикжсан автобааз байгуулах,
- Улаанбаатар хотод ачааны вагон угсардаг үйлдвэр байгуулах,
- Соёлын хамтын ажиллагааг идэвхжүүлэх,
- Оюутан солилцооны хөтөлбөрийг эхлүүлэх,
- Эдийн засгийн форум хоёр талдаа харилцан зохион байгуулах,
- Хоёр орны урлагийн мастеруудын тоглолтыг зохион байгуулах зэрэг олон ажлуудыг хэрэгжүүлэх шаардлагатай байна гэв.
Бүгд найрамдах Беларусь улсын үндэсний хурал дахь Монгол Улстай хамтран ажиллах ажлын хэсгийн ахлагч Щастны Анатолий Тадеушевич хоёр улсын хамтын ажиллагаа өргөжин тэлж, хөдөө аж ахуй, боловсрол, нийтийн тээвэр, онцгой байдал, зам тээвэр зэрэг олон салбарт амжилттай төсөл хөтөлбөрүүд хэрэгжиж байгааг онцлон тэмдэглэв.
Уулзалтаар хоёр тал хоёр улсын парламентын харилцааг хөгжүүлэх, бүлгүүд болон Парламентын тэргүүн нарын харилцан айлчлалыг зохион байгуулах бэлтгэх ажлыг хангах зэрэг асуудалд санал нэгдлээ. УИХ дахь Монгол-Беларусийн парламентын бүлгийн дарга Б.Энх-Амгалан Бүгд найрамдах Беларусь улсын үндэсний хурал дахь Монгол Улстай хамтран ажиллах ажлын хэсгийн ахлагч Щастны Анатолий Тадеушевичийг тааламжтай цагтаа Монгол Улсад айлчлахыг урилаа хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.
Дэлхий нийтээр..
БНХАУ-д зорчих иргэдийн анхааралд...
Дэлхий нийтээр..
Ши Жиньпин, Доналд Трамп нар Бээжинд уулзаж, хоёр улсын харилцааны гол асуудлуудыг хэлэлцэж байна
БНХАУ-ын дарга Ши Жиньпин АНУ-ын Ерөнхийлөгч Доналд Трамптай Бээжин хотноо хэлэлцээ хийж байна. Олон улсын хэвлэлүүдийн мэдээлж буйгаар, хоёр улсын төрийн тэргүүн нарын уулзалтаар худалдаа, тариф, Тайванийн асуудал, хиймэл оюун ухаан, мөн Ираны нөхцөл байдал зэрэг олон улсын анхаарал татсан сэдвүүдийг хэлэлцэж байна.
“Reuters” агентлагийн мэдээлснээр, энэ удаагийн уулзалт АНУ, БНХАУ-ын худалдааны түр тохиролцоог баталгаажуулах, хоёр талын эдийн засаг, технологийн салбар дахь маргаантай асуудлуудыг хэлэлцэх өндөр ач холбогдолтой уулзалт болж байна. АНУ-ын тал Хятадтай худалдаа, хиймэл оюун ухаан, чип үйлдвэрлэл, нисэхийн салбар дахь хамтын ажиллагаа болон Америкийн компаниудын Хятадын зах зээлд нэвтрэх боломжийг хөндөж байгаа талаар мэдээлжээ.
Уулзалтын бас нэг гол сэдэв нь Тайванийн асуудал байна. Бээжин АНУ-ын Тайваньд үзүүлж буй дэмжлэг, зэвсгийн худалдаанд эсэргүүцэл илэрхийлсээр байгаа бол Вашингтон Тайванийн асуудлаарх бодлогодоо өөрчлөлт ороогүй гэж өмнө нь мэдэгдсэн байна. Тайвань нь АНУ, БНХАУ-ын харилцааны хамгийн эмзэг сэдвүүдийн нэг хэвээр байгааг ажиглагчид онцолж байна.
Мөн АНУ-ын тал Ираны нөхцөл байдалтай холбоотойгоор Хятад улс Тегеранд үзүүлэх нөлөөгөө ашиглан хурцадмал байдлыг намжаахад дэмжлэг үзүүлэхийг хүсэж байгаа талаар “Reuters” мэдээлэв. Гэхдээ шинжээчид Бээжин Ираны эсрэг хатуу байр суурь баримтлах магадлал бага гэж үзэж байна.
АНУ-ын Ерөнхийлөгч Доналд Трамп уулзалтын эхэнд Ши Жиньпинийг “агуу удирдагч” хэмээн тодорхойлж, энэ уулзалтыг томоохон ач холбогдолтой гэж үнэлсэн талаар олон улсын хэвлэлүүд мэдээлж байна. Харин БНХАУ-ын тал хоёр улсын харилцааны тогтвортой байдал нь дэлхийн эдийн засаг, олон улсын аюулгүй байдалд чухал нөлөөтэйг онцолжээ.
Уулзалтын хүрээнд хоёр талын албан ёсны хэлэлцээ, төрийн хүндэтгэлийн арга хэмжээ болон бизнесийн хүрээний уулзалтууд болох төлөвтэй байна. АНУ-ын төлөөлөгчдийн бүрэлдэхүүнд технологи, санхүү, үйлдвэрлэлийн салбарын томоохон компанийн удирдлагууд багтсан нь энэ удаагийн айлчлал эдийн засаг, технологийн хамтын ажиллагаанд онцгой ач холбогдол өгч байгааг харуулж байна.
Дэлхий нийтээр..
Хятад, АНУ-ын төрийн тэргүүнүүд дахин нүүр тулан уулзана
Хятад улсын дарга Ши Жиньпиний урилгаар АНУ-ын ерөнхийлөгч Дональд Трамп 5-р сарын 13-15-ны хооронд БНХАУ-д төрийн айлчлал хийж байна.
Энэ нь Хятад, АНУ-ын төрийн тэргүүнүүдийн өнгөрсөн оны 10-р сард Пусан хотод уулзсаны дараа хоёр дахь удаагаа нүүр тулан уулзах бөгөөд АНУ-ын Ерөнхийлөгчийн есөн жилийн хугацаанд Хятадад хийсэн анхны айлчлал юм. Хоёр орны тэргүүн Хятад, Америкийн харилцаа, дэлхийн энх тайван, хөгжлийн гол асуудлаар гүнзгий санал солилцох болно.
