Тод мэдээ
АНУ-ын Хөдөө аж ахуйн департаментийн төлөөлөгчидтэй уулзлаа
Хүнс, хөдөө аж ахуй, хөнгөн үйлдвэрийн сайд Х.Болорчулуун АНУ-аас Монгол Улсад суугаа Элчин сайд Ричард Буанган болон АНУ-ын Хөдөө аж ахуйн департамент (яам)-ийн төлөөлөгчдийг хүлээн авч уулзлаа.
АНУ-ын Хөдөө аж ахуйн департамент (яам)-ийн төлөөлөгчид олон жилийн дараагаар манай улсад дахин айлчилж буй юм.
Уулзалтад Хөгжлийн төлөө хүнс хөтөлбөрийн Олон улсын төсөл хөтөлбөр хариуцсан мэргэжилтнүүд, АНУ-аас БНХАУ-д суугаа ЭСЯ-ны Гадаад хамтын ажиллагааны албаны Хөдөө аж ахуйн газрын төлөөлөгч, АНУ-аас БНХАУ-д суугаа суурин төлөөлөгчийн газрын Амьтан, ургамлын эрүүл мэнд, хорио цээрийн алба, АНУ-ын Хөдөө аж ахуйн департамент (яам)-ийн БНХАУ, Монгол Улсыг хариуцсан Дэд захирал нар оролцон санал солилцлоо.
АНУ-ын Вашингтон хотноо 2023 оны 2 дугаар сарын 2-ны өдөр болсон Монгол Улсын Гадаад харилцааны яам, АНУ-ын Төрийн департамент хоорондын Эдийн засгийн бодлогын IV зөвлөлдөх уулзалтын үеэр хүнс, хөдөө аж ахуйн салбарт тодорхой саналуудыг дэвшүүлж, Гадаад харилцааны яамаар дамжуулан хүргүүлсэн нь тодорхой үр дүн гарч байна. Тухайлбал,
Монгол Улсын Хүнсний хангамж, аюулгүй байдлыг хангах хөтөлбөрийг хэрэгжүүлэх хүрээнд 4 улирлын хүлэмж барих төсөл, малын вакцин болон бордооны үйлдвэр байгуулах талаар холбогдох техник, эдийн засгийн үндэслэл, танилцуулга болон концепцийг хүргүүлсэн нь АНУ-ын Олон улсын хөгжлийн агентлаг, НҮБ-ын ХХААБ-тай хамтран ХХААХҮЯ нь 4 улирлын хүлэмж байгуулах, зохих судалгаа, сургалтыг зохион байгуулах, боловсон хүчин бэлтгэх цогц төслийг хэрэгжүүлэх гэрээнд гарын үсэг зураад байна. Төслийн нээлт энэ сарын 31-ий өдөр болох юм.
Мөн АНУ-ын Хөдөө аж ахуйн департамент (яам)-ийн төлөөлөгчдийн айлчлалын үеэр Монгол Улс, АНУ-ын Засгийн газар хоорондын Худалдаа, хөрөнгө оруулалтын 7 дугаар хуралдаан зохион байгуулагдсан бөгөөд салбарын хамтын ажиллагааны хүрээнд фосфорит, кали болон азотын исэл дээр тулгуурласан бордооны үйлдвэр байгуулах, мал, амьтны эрүүл мэндийг хамгаалах ажлын хүрээнд био аюулгүй байдал, вакцины чиглэлээр хамтран ажиллах, Монголын ноос, ноолуур, сүлжмэл эдлэл, бүтээгдэхүүнүүдийг АНУ-ын зах зээлд нийлүүлэх өөр арга замыг хамтран олж тогтоох, мах, махан бүтээгдэхүүн боловсруулах АНУ-ын дэвшилтэт техник, технологийг нэвтрүүлэх, Хойд Америкийн Махны Хүрээлэнтэй Монголын махны холбоотой харилцаа холбоо тогтоох, хамтын ажиллагааг эхлүүлэх зэрэг асуудлуудыг хөндөж хэлэлцсэн юм.
Эх сурвалж: ХХААХҮЯ
Тод мэдээ
Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл өргөн мэдүүллээ
Монгол Улсын Их Хурлын дарга Д.Амарбаясгаланд 2025 оны долоодугаар сарын 03-ны өдөр Улсын Их Хурлын гишүүн Д.Рэгдэл, Б.Уянга, Г.Хосбаяр нар Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл өргөн барилаа.
Тус хуулийн нэмэлт, өөрчлөлтөд:
- Төрийн өмчит эрдэм шинжилгээний байгууллага нь тухайн байгууллагын судалгааны үндсэн чиглэлээр Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу зарлагдсан сонгон шалгаруулалтад оролцоход тендерийн болон гүйцэтгэлийн баталгаанаас чөлөөлөх тухай зохицуулалтыг тусгасан.
- Үндэсний эрдэм шинжилгээний бүтээлийн нэгдсэн санг олон улсын жишигт нийцүүлэн хөгжүүлж, мэдлэгийн дата төв байгуулж, ил тод байлгах зохицуулалтыг тусгасан. Үүнийг Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хуулийн 42-р зүйлийн 42.2 буюу захиалагчийн эрх үүрэгт судалгааны ажлыг ил тод байлгах үүргийг тусгах байдлаар, ингэхдээ энэхүү үүргээ ШУТ сангийн цахим хуудаст байршуулах, шинээр MORI платформ үүсгэх, tendergov.mn сайтад байршуулах, эсхүл www.sudalgaa.gov.mn үндэсний судалгааны нэгдсэн платформд байршуулах замаар шилэн болгох зохицуулалтыг тусгажээ.
- Хуулийн 18-р зүйлийн 18.2.2-ийг “Дээд боловсролын тухай хуулийн 4.1.4-т заасан судалгааны их сургууль” гэж өөрчилсөн.
- Хуулийн 32 дугаар зүйлийн 32.2 дахь хэсгээс “Үндэсний хорооны тогтоол, зөвлөмжийг үндэслэн” гэсэн агуулгыг хасах тухай заалтыг оруулсан байна гэж Улсын Их Хурлын Хэвлэл мэдээллийн газраас мэдээллээ.
Тод мэдээ
Унадаг дугуйтай бага насны хүүхэд замын хөдөлгөөнд оролцож байх үедээ ачааны машинд дайруулж, амь насаа алджээ
Унадаг дугуйтай бага насны хүүхэд замын хөдөлгөөнд оролцож байх үедээ ачааны машинд дайруулж, амь насаа алдсан гэх харамсалтай дуудлага мэдээлэл бүртгэгджээ. Тодруулбал, энэ оны зургаадугаар сарын 27-ны өдөр Увс аймгийн цагдаагийн газарт “Гурван замын уулзварт ачааны автомашин унадаг дугуйтай хүүхэд дайрсан байна” гэсэн мэдээллийг ирүүлсэн байна.
Тус аймгийн цагдаагийн газрын жижүүрийн шуурхай бүрэлдэхүүний алба хаагчид шалгалтын ажиллагааг явуулахад урьдчилсан байдлаар иргэн “Б” нь HOWO ZZ3257 маркийн улсын дугаартай автомашиныг жолоодож яваад унадаг дугуй унаж явсан бага насны хүүхдийг дайрч, амь насыг нь хохироосон харамсалтай нөхцөл байдал тогтоогдоод байна.
Сурагчдын зуны амралт эхэлсэн эдгээр өдрүүдэд эцэг эхчүүд та бүхэн хүүхдэд тавих хараа хяналтаа сайжруулах, хүүхдийг унадаг дугуй, суррон, скүүтэртэй Замын хөдөлгөөнд оролцуулахгүй байх, Жолооч та хөдөлгөөний аюулгүй байдлыг сайтар хангаж, анхаарал болгоомжтой зорчихыг сэрэмжлүүлж байна.
Тод мэдээ
Тэтгэврийн зээлд тавьсан хязгаарлалтыг цуцлах асуудлаар санал нэгдлээ
Тэтгэвэр барьцаалсан зээлд тавьсан 5050 өр орлогын харьцааг ахмадууд эсэргүүцэж буйтай холбогдуулан Ерөнхий сайд Г.Занданшатар Монголбанкны Ерөнхийлөгч Б.Лхагвасүрэнтэй уулзаж ярилцлаа.
Улмаар тэтгэврийн зээлд ямар нэг хязгаарлалт тавихгүй байх талаар талууд санал нэгдлээ. Хэрэглээний зээлийн нийтлэг зохицуулалтаас тэтгэврийн зээлийг гаргах замаар ахмадуудын тавьж буй шаардлагын хүрээнд шийдэл гаргах боломжтой гэж талууд үзсэн байна. Иймээс ирэх даваа гарагт Монголбанкны Мөнгөний бодлогын зөвлөл дахин хуралдаж, тэтгэвэр барьцаалсан зээлийн асуудлыг хэлэлцэхээр болжээ.
Мөн Ерөнхий сайд Г.Занданшатар тэтгэврийн зээлийн хүүг бууруулах чиглэлээр Монголбанк Гэр бүл, хөдөлмөр, нийгмийн хамгааллын яамтай хамтарч ажиллахыг хүслээ.
