Тод мэдээ
Ардчилсан намдаа өөр өөрийн гэсэн сайн чанараар бэлэг барьж, нэгдмэл “Зөв өв” бүтээцгээе
Та бүхэндээ улс төр, эдийн засгийн хувьд хараат явж ирсэн улс Монголынхоо өрхийг нь татаж, үүдийг нь нээж сэрээсэн Ардчилсан хувьсгалын 35 жил, улс төрийн шинэчлэгч хүчин Ардчиллын төлөөх намууд нэгдсэний 24 жилийн ойн баярын өдөр буюу Монгол Улсад анх удаа олон намын тогтолцоот төр бий болсныг зарлан тунхаглаж, дэлхий ертөнцтэй хөл нийлүүлж, хөгжлийн гараагаа эхэлсэн түүхэн өдрийн мэндийг дэвшүүлье.
Аз болж хонх дуугарсан, арай ядаж нойрноос сэрсэн тэр он жилүүдийг та бид мартаагүй ээ. Ардчилсан нам дангаараа буюу,хамтарч ажиллах үед бизнесийн орчин сайжирч, реформууд хийгдэж, улс орон даяар том ажлууд өрнөдөг гэдгийг ч бас санаж байх нь зүйтэй болов уу.
Ардчилсан нам төр барьсан үүлэн чөлөөний нар шиг хугацаа буюу зөвхөн 2012 оноос 2016 онд 3000 км зам тавьж, 21 аймгийг Улаанбаатар хоттой хатуу хучилттай замаар холбож, Чингэс бонд гаргаж, үндэсний үйлдвэрлэлүүдээ дэмжиж чадсан юмаа. Ардчилсан нам, улс орныхоо эрх чөлөө, хөгжлийн зам тавьж, хөрөнгө оруулагчдад ээлтэй бодлого явуулж чаддаг найрсаг бүтээлч нам билээ. Өнөөдөр ч бид Ардчилсан намынхаа мөрийн хөтөлбөрийг биелүүлэхээр хамтын шийдвэр гарган зорьж, эрчим хүчний реформоос эхлээд, эдийн засгийн их тэлэлт хүртэл олон том ажлуудын ард гарахын тулд, урд нь гарч ханцуй шамлан ажиллаж эхлээд байна.
Ардчилсан нам бас Монголын эрх ашгийн төлөө, хөгжил дэвшлийн төлөө за гэж хэлж чаддаг, хэлсэн бол, амласан бол хийж бүтээж харуулж чаддаг, түрүүнд нь түүчээлж чаддаг тэргүүлэгч нам билээ. Эрхэм журмын нөхдөө, Ардчилсан намын гишүүд дэмжигчдээ, миний та бүхэндээ өгч чадах манлайлж чадах зүйл бол эв нэгдэл, тэсвэр тэвчээр, бүтээмж гурав юмаа. Эрх чөлөө,хөгжлийн түүчээ болсон Ардчилсан намдаа, ардчиллын институтдээ өөр өөрийн гэсэн сайн чанараар бэлэг барьж, нэгдмэл “зөв өв” бүтээцгээе.
Шинэ цаг үеийн хөгжлийн түүчээ, шилдэг тэргүүлэгч улс төрийн хүчин Ардчилсан намын гишүүд дэмжигчид, ардчилсан Монгол Улсын иргэд та бүхэндээ Ардчилсан хувьсгалын 35 жил, Ардчиллын төлөөх намууд нэгдсэний 24 жилийн ойн баярын мэнд хүргэж, эрүүл энх сайхан бүхнийг дэвшүүлье.
Тод мэдээ
“Хавдар судлалын үндэсний II төв”-ийн бүтээн байгуулалтын ажил ирэх зургаадугаар сард эхэлнэ
Монгол Улсын Ерөнхийлөгчийн ивээл дор бүтээн байгуулах “Хавдар судлалын үндэсний II төв”-ийг СХД-т барих бөгөөд тус дүүргийн 34 дүгээр хороонд инженерийн дэд бүтцэд бүрэн холбогдсон 15 га газрыг нийслэлээс шийдвэрлэсэн. Өнөөдрийн байдлаар тус төвийн зураг төслийн ажил үргэлжилж байна. Бүтээн байгуулалтын ажлыг ирэх зургаадугаар сард эхлүүлнэ. Энэ хүрээнд Монгол Улсын Ерөнхийлөгч У.Хүрэлсүх, УИХ-ын гишүүд, Эрүүл мэндийн сайд Т.Мөнхсайхан болон Нийслэлийн Засаг дарга бөгөөд Улаанбаатар хотын Захирагч Х.Нямбаатар болон холбогдох албаныхан тухайн байршилд ажиллалаа.
Нийслэлийн Засаг дарга бөгөөд Улаанбаатар хотын Захирагч Х.Нямбаатар “ХСҮТ-ийг анх Улаанбаатар хотыг 500 мянган хүн амтай байхад байгуулж байсан бол өдгөө нийслэл хотод 1.8 сая хүн амьдарч, ажиллаж байна. Хавдрын тусламж үйлчилгээг хүртээмжтэй үзүүлэхэд одоо байгаа эмнэлгийн ачаалал хүрэлцэхгүй байгаа. Тиймээс хавдрын эрт үед илрүүлэг, үзлэг оношилгоо, эмчилгээ, судалгаа шинжилгээ явуулах эрүүл мэндийн цогцолбор төвийг барихад шаардлагатай газрыг шийдвэрлээд байна. Тодруулбал, СХД-ийн 34 дүгээр хороо, Баянголын аманд инженерийн дэд бүтцэд бүрэн холбогдсон 15 га газрыг шийдвэрлэсэн. Тус төвийн бүтээн байгуулалтын ажил ирэх зургаадугаар сард эхэлнэ. Үүнтэй зэрэгцээд нийслэлээс эмнэлгийн гадна тохижилтын ажил болон эмнэлэг хүртэлх авто замыг өргөсгөх ажлуудыг хийнэ” гэдгийг онцлов.
Хавдар судлалын үндэсний хоёрдугаар төв ашиглалтад орсноор одоо байгаа төвийн ачаалал буурч, эрүүл мэндийн тусламж үйлчилгээ 3-4 дахин нэмэгдэх боломжтой болох юм. Тус төв нь дөрвөн блок бүхий долоон давхар барилгаас бүрдэх бөгөөд нийт 600 ортой байх юм.
Энэ үеэр Монгол Улсын Ерөнхийлөгч У.Хүрэлсүх “Хавдрын урьдчилан сэргийлэх, оношилгоо эмчилгээ, сургалт, эрдэм шинжилгээний цогцолбороо илүү орчин үеийн өргөн цар хүрээтэй дэлхийн жишигт нийцсэнээр нь маш яаралтай барьж, байгуулах хэрэгтэй. Манай улсын гадаад харилцаа өргөжиж байгаа. Иймээс зөвхөн улсын төсөв гэлтгүй гадаад харилцааг ашиглан энэхүү төслийг урагшлуулах бодолтой байна” гэдгийг хэлж байв.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Тод мэдээ
Орон сууцжуулалтын ногоон санхүүжилтийн тогтолцоог бүрдүүлэх ажлын хэсэг тав дахь хурлаа хийлээ
Ажлын хэсгийн ахлагч, Улсын Их Хурлын гишүүн Г.Лувсанжамц өмнөх хуралдаануудаар хэлэлцсэн асуудал, сонсож танилцсан мэдээллийг нэгтгэн, ногоон санхүүжилтийн эрэлт, нийлүүлэлт, чанар, стандартыг дэмжих бодлогын талаар өнөөдрийн хуралдаанд танилцуулсан юм. Тэрбээр ногоон санхүүжилтийн эрэлт хангалттай байна гэсэн дүгнэлтийг хийж, харин нийлүүлэлт болон чанарын асуудлыг шийдвэрлэх шаардлагатай гэж үзсэнээ танилцуулсан юм. Мөн тэрбээр нийлүүлэлтийг дэмжих 10, эрэлтийг дэмжих дөрөв, чанарыг дэмжих хоёр, эрэл болон нийлүүлэлтийг дэмжих гурав, гурвалсан буюу эдгээрийг гурвууланг дэмжих гурав, нийт 22 бодлогын чиглэлийг тодорхойлсон байна.
Улсын Их Хурлын гишүүн А.Ундраа, Л.Соронзонболд, С.Ганбаатар, Х.Жангабыл, Б.Найдалаа, Г.Очирбат нар ногоон санхүүжилтийн эрэлт, нийлүүлэлт болон чанарын шалгуур, шаардлагын талаар үг хэлж, байр сууриа илэрхийлэв. Улсын Их Хурлын гишүүн А.Ундраа барилга, байгууламжид тавих чанарын хяналт, үнэлгээ хангалтгүй байгааг онцолж, арилжааны банкууд үүнд төдий л анхаарал тавьдаггүй бөгөөд эрчим хүчний хэмнэлтийн хувийг алдаг оног тооцож буйг шүүмжлэв.Барилгын салбарт хэрэгжиж байгаа норм нормативыг шинэчлэхэд хамгийн хурдтайгаар ажиллахад 10 жил шаардлагатайг тэрбээр хэлж, энэ талаар ямар ч алхам хийгдэхгүй явж ирсэнд харамсаж байна гэсэн юм. Улсын Их Хурлын гишүүн Л.Соронзонболд олон улсад үнэлэгдэж байгаа ногоон санхүүжилтийн тэргүүлэх туршлагыг судлах, эрчим хүч, дэд бүтцийн бие даасан шийдэлтэй барилгын стандартыг батлах, ногоон зээл авах боломжтой давхаргыг тодорхойлж түүнд чиглэсэн бодлого хэрэгжүүлэх зэрэг асуудлыг хөндсөн бол Улсын Их Хурлын гишүүн С.Ганбаатар чанарын асуудалд илүүтэй анхаарал хандуулж, эрсдлээс сэргийлэх, чанар, стандартад тавих хяналтыг эзэнтэй болгох шаардлагатайг онцлов. Улсын Их Хурлын гишүүн Х.Жангабыл одоо мөрдөгдөж байгаа стандартуудыг сайжруулж, боловсронгуй болгож явах нь зүйтэй гэсэн бол Улсын Их Хурлын гишүүн Б.Найдалаа ногоон санхүүжилтэд тавигддаг олон улсын шалгуур нөхцлүүд түвэгтэй тул эх үүсвэр татахад бэрхшээлтэй.
Ус, орлого зэрэг олон асуудал дээр тулаад гацдаг. Худалдан авах боломжтой давхаргад зориулсан хэрэгжихүйц шийдлүүдийг эрэмбэлж, боломжтойгоос нь хэрэгжүүлээд явах хэрэгтэй гэлээ. Тархмал дэд бүтэц л гол шийдэл тул үнэтэй ч байслаа гэсэн хийх ёстой гэж үзэж байгаагаа тэрбээр илэрхийлэв. Улсын Их Хурлын гишүүн Г.Очирбат дэлхий дахинд сэргээгдэх эрчим хүчний өртөг ихээхэн буурч, хүчин чадал нь нэмэгдээд байгааг дурдаж, энэ талаар ажил, алхам хийж байгаа зарим иргэд, аж ахуйн нэгжийн туршлагыг дэмжиж байгаа тухайгаа танилцуулав.
Ажлын хэсэг дараагийн хуралдаанаараа банк, санхүүгийн салбарын мэдээллийг сонсохоор тогтлоо гэж Улсын Их Хурлын Хэвлэл, мэдээллийн газраас мэдээлэв.
Тод мэдээ
Хархорум хотын бүтээн байгуулалт, хөгжлийг дэмжих тухай хуулийн төслийг хэлэлцүүлэгт бэлтгэх үүрэг бүхий ажлын хэсэг хуралдав
Тус ажлын хэсгийг УИХ-ын гишүүн Г.Тэмүүлэн ахалж буй бөгөөд бүрэлдэхүүнд нь УИХ-ын 21 гишүүн ажиллаж байгаа юм.
Ажлын хэсгийн энэ өдрийн хуралдаанаар дээрх хуулийн төсөл болон холбогдох хууль, тогтоолын төслүүдийн талаар УИХ-ын Тамгын газраас гаргасан хууль зүйн дүгнэлттэй танилцан, хуулийн төслийг өргөн мэдүүлсэн Засгийн газрын холбогдох албан тушаалтнуудын мэдээллийг сонсов.
Хэлэлцэж буй асуудалтай холбогдуулан ажлын хэсгийн гишүүд асуулт асууж, хариулт авсан бөгөөд хууль зүйн дүгнэлтэд тусгасны дагуу хууль, тогтоолын төслүүдийг холбогдох хууль тогтоомжтой нийцүүлж, илүү боловсронгуй болгох асуудлыг хөндөн ярилцав.Хуралдааны үеэр ажлын хэсгийн ахлагч Г.Тэмүүлэн ажлын хэсгийн гишүүдэд хуулийн төсөлтэй холбоотой саналаа томьёолон ажлын хэсэгт ирүүлэхийг үүрэг болголоо хэмээн Улсын Их Хурлын Хэвлэл мэдээллийн газраас мэдээллээ.
-
Тод мэдээ2023/05/17
Гадаад харилцааны сайд Б.Батцэцэг Словени Улсын Ерөнхийлөгч Наташа Пирц Мусарт б...
-
Тод мэдээ2024/08/26
УИХ: НҮБ-ын Хөгжлийн хөтөлбөрийн Ази, Номхон далайн бүсийн захирлыг хүлээн авч у...
-
Тод мэдээ2022/04/05
ЗГ: Хуулийн төслийг УИХ-д өргөн барина
-
Өнөөдөр2020/05/28
Үндэсний цэцэрлэгт хүрээлэнгийн захирлыг үүрэгт ажлаас нь чөлөөллөө