Тод мэдээ
Телевизийн арга хэмжээг хамтран зохион байгуулах нь нэн чухал болохыг онцлов
Биеийн тамир, спортын улсын хорооны дарга Д.Жаргалсайхан МҮОНРТ-ийн Ерөнхий захирал А.Бүрэнбаатартай уулзаж, хамтын ажиллагааг идэвхжүүлэх талаар ярилцлаа. Уулзалтад Биеийн тамир, спортын улсын хорооны Биеийн тамирын бодлогын хэрэгжилтийн дарга О.Баасан, ахлах мэргэжилтэн М.Мэнджаргал, мэргэжилтэн Д.Соёлмаа, МҮОНРТ-ийн “MNB Спорт” сувгийн захирал П.Отгонтуяа, ерөнхий продюсер Г.Отгонжаргал нар байлцав.
Энэ үеэр Биеийн тамир, спортын улсын хорооны дарга Д.Жаргалсайхан хүн амын бие бялдрын хөгжлийн түвшин, илүүдэл жин, таргалалт, биеийн жингийн индекс, хөдөлгөөний хомсдолоос шалтгаалсан өвчлөл, халдварт бус өвчин нэмэгдэж байна. Иймээс цэцэрлэг, ерөнхий боловсролын сургууль, их, дээд сургууль болон насанд хүрэгчид, ахмадууд руу чиглэсэн телевизийн арга хэмжээг хамтран зохион байгуулах нь нэн чухал болохыг онцлов.
МҮОНРТ-ийн зүгээс нийтийн биеийн тамирыг хөгжүүлэхэд хамтран ажиллахаа илэрхийлж, ажлын байрны дасгал, хичээлийн завсарлагааны дасгалыг хийх цагийг эргэн сэргээн тогтмолжуулах хэрэгтэйг дурдаж, өнгөрсөн хугацаанд хийж гүйцэтгэсэн ажлууд, ирэх жилүүдэд олон нийтийг хамарсан томоохон контентыг бэлтгэн хүргэх, цаашид хийхээр төлөвлөсөн ажлаа танилцуулав.
Талууд уулзалтаар салбар дундын уялдааг хангах зорилгоор сургуулийн өмнөх болон ерөнхий боловсролын сургууль, их дээд сургуулийн оюутан, залуучуудын бие бялдрыг хөгжүүлэх, эрүүл зөв амьдралын дадал хэвшилтэй иргэдийг бий болгох, монгол хүний нас, биеийн онцлогт тохирсон “Үндэсний дасгал”-ын зохиомж бэлтгэх, түгээх ажлыг хамтран хийх тал дээр санал нэгдэв.
Биеийн тамир, спортын улсын хороо
Тод мэдээ
Зэсийн баяжмалын арилжаа зохион байгуулна
Монгол Улсын Засгийн газрын 2024 оны 73 дугаар тогтоолоор зэсийн баяжмалыг биржээр дамжуулан арилжаалах шийдвэр гарч, тус тогтоолын дагуу “Монголын хөрөнгийн бирж” ХК (МХБ) нь 2024 оны 4 дүгээр сарын 29-ний өдрийн 16:00 цагт зэсийн баяжмалын анхны арилжааг зохион байгуулахаар боллоо.
Эхний арилжаагаар 22.35%-ийн зэсийн агуулгатай нийт 3000 нойтон метр тонн зэсийн баяжмалыг тонн тутмыг 2141.83 ам.доллараас эхлэн дуудаж, арилжааг зохион байгуулах бөгөөд арилжигдсан зэсийн баяжмалыг БНХАУ-ын Эрээн боомтод хүргэж өгөх нөхцөлтэй.
Уул уурхайн бүтээгдэхүүний биржээр арилжаалах зэсийн баяжмалын арилжааг зохион байгуулах, бэлтгэл ажлыг хангах хүрээнд МХБ нь уул уухайн бүтээгдэхүүний арилжаа, холбогдох журам, арилжааны системийг танилцуулах сургалтыг хоёр удаа зохион байгуулж, 100 гаруй худалдан авагчийг хамруулсан.
2023 оны 4 дүгээр сарын 29-ний өдрийн арилжааны дэлгэрэнгүй мэдээллийг энд дарж үзэж болон хэмээн Монголын хөрөнгийн биржээс мэдээллээ.
Тод мэдээ
Тэмбүүгийн өвчлөл 154 тохиолдлоор өсжээ
2023 оны жилийн эцсийн байдлаар Монгол Улсын хэмжээнд бэлгийн замаар дамжих халдварт өвчний 10245 тохиолдол бүртгэгдсэн нь нийт халдварт өвчний 25 хувийг эзэлж байна.
Бэлгийн замаар дамжих халдварт өвчний 4206 /41.1 хувь/ тохиолдлыг тэмбүү, 3579 /34.9 хувь/ тохиолдлыг заг хүйтэн, 2437 /23.8 хувь/ тохиолдлыг трихомониаз эзэлж байна.
Өнгөрсөн оны мөн үетэй харьцуулахад тэмбүүгийн өвчлөл 154 тохиолдлоор өссөн байна гэж Нийгмийн эрүүл мэндийн үндэсний төвөөс мэдээллээ.
Тод мэдээ
Сонсголонгийн гүүрийн нэг талын чиглэлийн тээврийн хэрэгслийн зорчих хэсгийн хөдөлгөөнийг хаана
Хан-Уул дүүргийн 8, 9-р хороо Сонсголонгийн 289.4 У/М гүүрийн засвар, арчлалтын ажлын хүрээнд тус гүүрийн зорчих хэсгийн зүүн талын /хойш/ чиглэлийн эгнээг хааж тээврийн хэрэгслийн хөдөлгөөнийг баруун талын /урагш/ чиглэлийн эгнээгээр түр зорчих тээврийн хэрэгслийн хөдөлгөөнийг зохион байгуулж байна.
Тус ажлын хүрээнд Сонсголонгийн 289.4 У/М гүүрийн орох хэсгийн дамжих хавтан болон 2, 4, 6, 7 дугаар алгаслал хооронд зорчих хэсгийн хүчитгэж асфальтбетон хучилтын ажил хийгдэнэ.
Гүүрийн засварын ажил 2024 оны 04 дүгээр сарын 25-ны 23 цагт эхэлж, 04 дүгээр сарын 26-нд дуусахаар төлөвлөж байна.
Иймд иргэд, жолооч та бүхэн дээрх хугацаанд түр замын хөдөлгөөний зураглалын дагуу хөдөлгөөнд оролцоно уу хэмээн Нийслэлийн Замын хөгжлийн газраас мэдээллээ.
Сэтгэгдэл