Хэн юу хэлэв...
Д.Амарбаясгалан: Төрийн өмчит компаниудад нээлттэй сонгон шалгаруулалтаар ажилд ордог жишиг бий болж байна
Монгол Улсын Засгийн газраас төрийн өмчит компаниудын менежментийг сайжруулах, сайн засаглалыг бэхжүүлэх, ил тод болгох ажлын хүрээнд “Эрдэнэс Монгол” ХХК-д ажлын байрны нээлттэй сонгон шалгаруулалт зарласан бөгөөд нийт 71 ажлын байранд давхардалгүй тоогоор 2,955 иргэн анкетаа ирүүлсэн.
Өнөөдөр буюу нэгдүгээр сарын 26-ны өдрөөс эхлэн тухайн ажлын байранд тавигдах шаардлага хангасан 2,407 иргэн сорилын шалгалт өгч байна. Шалгалт хоёр өдөр үргэлжилж, ажлын байр тус бүрд тестийн шалгалтаас хамгийн өндөр оноо авсан тав хүртэлх хүнээс ярилцлага авах юм.
Монгол Улсын сайд, Засгийн газрын Хэрэг эрхлэх газрын дарга Д.Амарбаясгалан “Засгийн газраас хэрэгжүүлж буй “Шинэ сэргэлтийн бодлого”-ын хүрээнд төрийн өмчит компаниудыг мэргэшсэн хүний нөөцөөр хангах, чадварлаг баг бүрдүүлэхэд анхаарч байна. “Эрдэнэс Монгол” ХХК-иас эхлэн шинэ жишиг тогтоож, ажлын байруудад нээлттэй сонгон шалгаруулалт хийх боломж бүрдүүллээ. Цаашид төрийн өмчит компаниудад ямар нэг хүнд суртал, улс төрийн нөлөөллөөр ажилд ордог биш шударга, ил тод сонгон шалгаруулалт явуулдаг журам гаргах болно” гэдгийг онцлон хэллээ.
Тестийн шалгалтыг Төрийн албаны зөвлөлийн шалгалтын системээр зохион байгуулж буй бөгөөд тус систем нь Тагнуулын Ерөнхий газар болон бусад холбогдох байгууллагаар баталгаажжээ.
“Эрдэнэс Монгол” ХХК-ийн харьяанд Монгол Улсад үйл ажиллагаа явуулж буй төрийн өмчит 34 аж ахуйн нэгж харьяалагддаг. Иймд компанийг группийн зохион байгуулалтаар ажиллах боломжийг нээж, цаашид томоохон төслүүд хэрэгжүүлэх, хөрөнгийн зах зээл дээр IPO гаргах, охин компаниудын засаглал, менежментийг сайжруулж, хүний нөөц, худалдан авалтын бодлогыг нэгдсэн байдлаар явуулахыг зорьж байна.
Хэн юу хэлэв...
Шатахууныг наймдугаар сарын 15 хүртэл тэгш, сондгой дугаараар олгоно
Аж үйлдвэр, эрдэс баялгийн сайд Г.Дамдинням шатахууны хангамжтай холбоотой цаг үеийн асуудлаар мэдээлэл хийж, шатахууны нөөц бүрдүүлэлт, импортын нийлүүлэлт болон түр хугацаанд хэрэгжүүлэх зохицуулалтын талаар танилцууллаа.
Тэрбээр өнөө шөнийн 00:00 цагаас эхлэн шатахууныг автомашины улсын дугаарын тэгш, сондгойгоор олгож, нэг удаагийн цэнэглэлтийг 50 мянган төгрөгөөр хязгаарлах зохицуулалт хэрэгжиж эхлэхийг мэдэгдэв. Энэхүү зохицуулалт наймдугаар сарын 15-ны өдрийг хүртэл үргэлжлэх бөгөөд шатахууны нөөцийг жигд хуваарилах зорилготой гэж тайлбарлалаа.
Мөн БНСУ-аас 20 мянган тонн дизель түлш, 20 мянган тонн автобензин, зургаан мянган тонн онгоцны түлш импортлох тохиролцоонд хүрсэн бөгөөд хувийн хэвшлийн аж ахуйн нэгжүүд нийлүүлэлтийн гэрээгээ үргэлжлүүлэн байгуулж байгаа аж.
Г.Дамдиннямын мэдээлснээр, Монгол Улс одоогоор нэг сарын хэрэглээтэй тэнцэх хэмжээний шатахуун нөөцлөх хүчин чадалтай боловч шатахууны хэрэглээ жил бүр дунджаар 14 хувиар өсөж байна. Иймээс Засгийн газар шатахуун хадгалах 22 сав, агуулах барих ажлыг эхлүүлээд байгаа юм.
Тэрбээр өмнөх жилүүдэд гурваас зургаан сарын шатахууны нөөц бүрдүүлэх зорилтыг мөрийн хөтөлбөрт тусгаж байсан ч хэрэгжүүлж чадаагүйг онцолж, энэ удаад шатахууны тухай тусгай хуулийг баталснаар эрх зүйн орчин бүрдэж, нөөцийн байгууламжуудын бүтээн байгуулалт эхэлснийг дурдав.
Төлөвлөгөөний дагуу энэ онд нэмэлт 15 хоногийн, 2027 онд нэг сарын, 2028 онд гурван сарын хэрэглээтэй тэнцэх шатахууны нөөц хадгалах хүчин чадал бий болгож, цаашид нийт зургаан сарын нөөцтэй болох зорилт тавьжээ. Ингэснээр гадаад зах зээл болон нийлүүлэлтийн эрсдэл үүссэн үед ч шатахуун, түлшний хангамж тасалдахгүй байх нөхцөл бүрдэнэ гэж Аж үйлдвэр, эрдэс баялгийн сайд Г.Дамдинням мэдэгдлээ.
Хэн юу хэлэв...
Шатахууны нийлүүлэлтийг тасалдуулахгүй байх арга хэмжээг эрчимжүүлж байна
Шатахууны хангамжтай холбоотой асуудлаар Ерөнхий сайдын захирамжаар байгуулсан Шуурхай штаб өнөөдөр хуралдаж, шатахууны нөөц бүрдүүлэлт, нийлүүлэлтийн зохион байгуулалтын талаар хэлэлцэн шийдвэр гаргаж, олон нийтэд танилцуулахаар болжээ.
Аж үйлдвэр, эрдэс баялгийн сайд Г.Дамдиннямын мэдээлснээр, Монгол Улсын АИ-92 автобензиний сарын хэрэглээ оргил үедээ 70 мянган тонн-д хүрдэг байна.
Наймдугаар сарын нийлүүлэлтийн хүрээнд ОХУ-ын "Роснефть" компаниас 50 мянган тонн, бусад нийлүүлэгчдээс 10 мянган тонн, БНХАУ-аас зургаан мянган тонн буюу нийт 66 мянган тонн АИ-92 автобензин нийлүүлэх захиалгыг баталгаажуулаад байгаа аж.
Мөн БНСУ-аас 20 мянган тонн АИ-92 автобензин худалдан авахаар төлөвлөсөн нь шатахууны нөөцийг нэмэгдүүлэх, нийлүүлэлтийн эрсдэлийг бууруулах, импортын эх үүсвэрийг төрөлжүүлэх зорилготой гэж тайлбарлажээ.
Түүнчлэн Засгийн газар импортын татан авалт, гаалийн бүрдүүлэлт, тээвэрлэлт, агуулах, түгээлтийн ажлыг уялдуулан зохион байгуулж, шатахууны нийлүүлэлтийг тасалдуулахгүй байх чиглэлээр 24 цагаар шуурхай ажиллаж байгаа бөгөөд нийлүүлэлт, түгээлтийн явцын мэдээллийг тогтмол, ил тод мэдээлж ажиллах үүргийг холбогдох байгууллагуудад өгсөн байна.
Хэн юу хэлэв...
Ерөнхийлөгч У.Хүрэлсүх Хөвсгөл нуурын их цэвэрлэгээнд оролцогчидтой уулзлаа
Монгол Улсын Ерөнхийлөгч Ухнаагийн Хүрэлсүх Хөвсгөл нуурын их цэвэрлэгээний ажилд оролцож буй иргэд, байгаль хамгаалагчидтай уулзаж, аянд оролцсон байгууллага, сайн дурынханд талархал илэрхийллээ.
Ерөнхийлөгчийн санаачилгаар зохион байгуулж буй Хөвсгөл нуур-Эгийн голын усны сан бүхий газрын хамгаалалтын бүсийн их цэвэрлэгээний аян энэ оны зургаадугаар сарын 22-ноос наймдугаар сарын 13-ныг хүртэл үргэлжилж байна.
Аяны эхний шатанд Ренчинлхүмбэ, Ханх, Хатгал, Алаг-Эрдэнэ, Чандмань-Өндөр, Түнэл, Эрдэнэбулган, Цагаан-Үүр зэрэг сумын нийт 866 км газрыг цэвэрлэж, төрийн болон төрийн бус байгууллага, аж ахуйн нэгж, нутгийн иргэд, сайн дурынхны оролцоотойгоор 213 тонн хог хаягдлыг цуглуулан устгалд оруулжээ.
Хоёрдугаар шатны цэвэрлэгээг долоодугаар сарын 25-30-ны өдрүүдэд Ханх, Хатгал, Чандмань-Өндөр сумын аялал жуулчлалын ачаалал ихтэй нийт 376 км газарт зохион байгуулж, өнөөдрийн байдлаар 88 тонн хог хаягдал төвлөрүүлээд байна.
Уулзалтын үеэр Ерөнхийлөгч Хөвсгөл нуур Монгол орны газрын гадаргын усны 75 орчим хувийг бүрдүүлдэг стратегийн чухал экосистем болохыг онцолж, хамгааллын ажлыг шинжлэх ухаанд тулгуурлан үргэлжлүүлэх шаардлагатайг тэмдэглэлээ.
Мөн түүний санаачилгаар байгуулж буй Хөвсгөл нуурын судалгааны олон улсын төв нь нуурын усны чанар, экосистемийн өөрчлөлтийг судалж, хамгааллын бодлогыг шинжлэх ухааны үндэслэлтэй боловсруулахад чиглэж байгааг дурдав.
Цаашид Хөвсгөл нуурыг тойрсон сумдын хөгжлийн ерөнхий болон урт хугацааны төлөвлөгөөг судалгааны үр дүнтэй уялдуулан боловсруулснаар газар ашиглалт, дэд бүтэц, бүтээн байгуулалтыг нэгдсэн төлөвлөлтийн хүрээнд хэрэгжүүлэх эрх зүйн үндэс бүрдэхийг онцоллоо.
Ерөнхийлөгчийн санаачилгаар сүүлийн жилүүдэд Хөвсгөл нуурыг хамгаалах үндэсний чуулган зохион байгуулах, нуурын ёроолоос живсэн автомашин, техникийг татан гаргах, Хөвсгөл нуурыг төрийн тахилгат болгох, ой хамгаалах, нөхөн сэргээх зэрэг цогц арга хэмжээг үе шаттай хэрэгжүүлж байна.
Хөвсгөл нуурын их цэвэрлэгээний аяны гуравдугаар шатыг төрийн тахилгын дараа буюу наймдугаар сарын 3-9-ний өдрүүдэд Ханх, Хатгал сумдын нутагт зохион байгуулахаар төлөвлөжээ.
-
Үйл явдал2022/02/16
Дархлаажуулалтын цэгийг дүүрэг тус бүрээр танилцуулж байна
-
Дэлхий нийтээр..2024/06/18
Фижи улсын Ерөнхий сайд асан Фрэнк Байнимарама нэг жил шоронд хоригдоно
-
Дэлхий нийтээр..2024/02/26
“Цэргийн археологи” төслийг хэрэгжүүлнэ
-
Хэн юу хэлэв...2020/08/25
З.Болормаа: Хайр гэж тэгвэл яг юу юм бэ нэг их хийсвэр ойлголт л яваад байдаг