Дэлхий нийтээр..
Баянхошуу дэд төвд 126 айлын түр суурьшуулах орон сууцыг ашиглалтад орууллаа
Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагын бодлогын баримт бичигт зааснаар Нийслэл Улаанбаатар хотыг нэг төвт хотоос олон төвт хот болгон хөгжүүлэхээр төлөвлөсөн. Үүнтэй холбоотойгоор Улаанбаатарын гэр хорооллыг хөгжүүлэх, хөрөнгө оруулалтыг дэмжих хөтөлбөрийн хүрээнд зургаан дэд төвийг байгуулж буй. Энэ хүрээнд Сонгинохайрхан дүүргийн 6-р хорооны Баянхошуу дэд төвд есөн давхар бүхий хоёр блок, нийт 126 айлын түр суурьшуулах зориулалтын орон сууцыг ашиглалтад орууллаа.
Энэхүү орон сууц нь стандартын дагуу явган хүний болон авто зам, машины зогсоол, хүүхдийн тоглоомын талбайтай бөгөөд ус, дулаан хангамж нь Баянхошуу дэд төвийн дэд бүтэцтэй бүрэн холбогдсон юм.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар:
-Нийслэлд хэрэгжиж буй зургаан дэд төвийн төслийг түшиглэн бүтээн байгуулалтын ажлууд шат дараатайгаар өрнөж буй. Бүтээн байгуулалт нь бүрэн дууссан Баянхошуу болон Сэлбэ дэд төвд нийт 250 өрхийн орон сууц, инженерийн шугам сүлжээ, нийгмийн барилга байгууламж, авто замыг ашиглалтад орууллаа. 2024 он гэхэд Баянхошуу, Шархад дэд төвүүдийг түшиглэн 196 нэгж талбарын 11.1 га газарт төслийн нэгдүгээр үе шатны 750 өрхийн ногоон орон сууцыг ашиглалтад оруулна. Ингэснээр түр суурьшуулах болон түрээслээд өмчлөх орон сууцны сан 750 орон сууцаар нэмэгдэх юм.
Нийслэлийн Засаг дарга бөгөөд Улаанбаатар хотын Захирагчийн Барилга, хот байгуулалт хариуцсан зөвлөх Б.Сүхбаатар:
-Төрийн оролцоогүйгээс үүдэн дахин төлөвлөлтөд өртөж буй айлууд газраа зараад явчихдаг, түүн дээр нь аж ахуйн нэгжүүд сургууль, цэцэрлэг, эмнэлэг барих боломжгүйгээр төлөвлөлт хийдэг байв. Энэ алдааг засахын тулд Нийслэлийн Орон сууцны бодлогын газар, Нийслэлийн Орон сууцны корпораци /НОСК/ ХК хамтран дахин төлөвлөлт гарган, түүний дагуу барилгажуулах бодлого баримталж байна. Тухайлбал, газар чөлөөлөх ажлыг НОСК хариуцан аж ахуйн нэгжүүдэд хүлээлгэн өгч, барилга барих үйл явцад нь хяналт тавих юм. Мөн орон сууцжуулах хөтөлбөрт хамрагдах хүсэлтэй иргэд хоорондоо нэгдэн чөлөөлөх хүсэлтээ өгснөөр хөтөлбөр хэрэгжинэ. Өөрөөр хэлбэл, иргэдийн оролцоог хангаснаар газар чөлөөлөлтийн явц хурдасна гэж үзэж буй гэлээ.
Нийслэлийн Орон сууцны корпораци ХК-ийн гүйцэтгэх захирал М.Говьсайхан:
-Түр суурьшуулах орон сууцанд хамрагдах иргэдийг Нийслэлийн зорилтот бүлгийн иргэдийг түрээсийн орон сууцад хамруулах журмын дагуу сонгон шалгаруулна. Энэ дагуу Сонгинохайрхан дүүргийн 9 дүгээр хороонд газар чөлөөлөлтөд өртөж байгаа иргэдийг хамруулахаар төлөвлөж байна. Дахин төлөвлөлтийн байршлын хүрээнд бид 10 мянган айлын орон сууц барихаар төлөвлөж байгаа. Энэ төлөвлөлтөд хамрагдсан иргэд түр суурьшуулах орон сууцанд байрлан, орон сууц нь ашиглалтад орох үед шилжин суух зарчмаар явах юм. Цаашид энэ зарчмаар түр оршин суух орон сууцууд барин газар чөлөөлөлтийн ажлыг өрнүүлнэ гэсэн юм.
Энэ орон сууцны айл бүрд гал тогооны тавилга угсарч, дагалдуулан өгч буйгаараа онцлог юм.
Орлогод нийцсэн ногоон орон сууцны шав тавилаа
Дээрх зургаан дэд төвийг түшиглэн нийт 31 мянган айлын ногоон орон сууцыг ашиглалтад оруулахаар төлөвлөн ажиллаж буй. Үүний эхлэл болгон өнөөдөр Баянхошуу дэд төвд орлогод нийцсэн, 330 айлын ногоон орон сууцны шавыг тавилаа.
Төслийн хүрээнд 110 айлын дөрвөн блок, олон улсын стандартад нийцсэн орон сууцыг 1.6 га талбайд барих юм.
Нийслэлийн Орон сууцны бодлогын газрын дарга Г.Ганхүү:
-Ирэх оны хоёрдугаар улиралд ашиглалтад оруулахаар төлөвлөсөн энэхүү орон сууц нь олон улсын ногоон барилгын үнэлгээний систем болох “EDGE” стандартыг нэвтрүүлсэн гэдгээрээ онцлог. Тодруулбал, ногоон орон сууц нь дулаан алдагдал багатай, ус ашиглалтыг 20 хувь, эрчим хүчний хэрэглээг 20 хувь бууруулсан хэмээлээ.
Ташрамд, Баянхошуу дэд төв нь нийт 162 га буюу Сонгинохайрхан дүүргийн зургаан хорооны нутаг дэвсгэрийг хамарч байгаа бөгөөд одоогоор 2200 орчим өрхийн 8500 иргэн амьдарч буй. Цаашид дахин төлөвлөлтөөр 6500 орчим айлын орон сууц барьж, 53 мянган иргэн амьдрах нөхцөлийг бүрдүүлнэ. Мөн тус дэд төвийн бүтээн байгуулалтын хүрээнд нийт 5.6 га талбайг чөлөөлж, ногоон орон сууцны төслийг хэрэгжүүлэх юм. Дахин төлөвлөлттэй холбоотойгоор өнгөрсөн хугацаанд нийт 250 орчим түр суурьшуулах орон сууцыг ашиглалтад оруулаад байна.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Дэлхий нийтээр..
БНХАУ-д зорчих иргэдийн анхааралд...
Дэлхий нийтээр..
Ши Жиньпин, Доналд Трамп нар Бээжинд уулзаж, хоёр улсын харилцааны гол асуудлуудыг хэлэлцэж байна
БНХАУ-ын дарга Ши Жиньпин АНУ-ын Ерөнхийлөгч Доналд Трамптай Бээжин хотноо хэлэлцээ хийж байна. Олон улсын хэвлэлүүдийн мэдээлж буйгаар, хоёр улсын төрийн тэргүүн нарын уулзалтаар худалдаа, тариф, Тайванийн асуудал, хиймэл оюун ухаан, мөн Ираны нөхцөл байдал зэрэг олон улсын анхаарал татсан сэдвүүдийг хэлэлцэж байна.
“Reuters” агентлагийн мэдээлснээр, энэ удаагийн уулзалт АНУ, БНХАУ-ын худалдааны түр тохиролцоог баталгаажуулах, хоёр талын эдийн засаг, технологийн салбар дахь маргаантай асуудлуудыг хэлэлцэх өндөр ач холбогдолтой уулзалт болж байна. АНУ-ын тал Хятадтай худалдаа, хиймэл оюун ухаан, чип үйлдвэрлэл, нисэхийн салбар дахь хамтын ажиллагаа болон Америкийн компаниудын Хятадын зах зээлд нэвтрэх боломжийг хөндөж байгаа талаар мэдээлжээ.
Уулзалтын бас нэг гол сэдэв нь Тайванийн асуудал байна. Бээжин АНУ-ын Тайваньд үзүүлж буй дэмжлэг, зэвсгийн худалдаанд эсэргүүцэл илэрхийлсээр байгаа бол Вашингтон Тайванийн асуудлаарх бодлогодоо өөрчлөлт ороогүй гэж өмнө нь мэдэгдсэн байна. Тайвань нь АНУ, БНХАУ-ын харилцааны хамгийн эмзэг сэдвүүдийн нэг хэвээр байгааг ажиглагчид онцолж байна.
Мөн АНУ-ын тал Ираны нөхцөл байдалтай холбоотойгоор Хятад улс Тегеранд үзүүлэх нөлөөгөө ашиглан хурцадмал байдлыг намжаахад дэмжлэг үзүүлэхийг хүсэж байгаа талаар “Reuters” мэдээлэв. Гэхдээ шинжээчид Бээжин Ираны эсрэг хатуу байр суурь баримтлах магадлал бага гэж үзэж байна.
АНУ-ын Ерөнхийлөгч Доналд Трамп уулзалтын эхэнд Ши Жиньпинийг “агуу удирдагч” хэмээн тодорхойлж, энэ уулзалтыг томоохон ач холбогдолтой гэж үнэлсэн талаар олон улсын хэвлэлүүд мэдээлж байна. Харин БНХАУ-ын тал хоёр улсын харилцааны тогтвортой байдал нь дэлхийн эдийн засаг, олон улсын аюулгүй байдалд чухал нөлөөтэйг онцолжээ.
Уулзалтын хүрээнд хоёр талын албан ёсны хэлэлцээ, төрийн хүндэтгэлийн арга хэмжээ болон бизнесийн хүрээний уулзалтууд болох төлөвтэй байна. АНУ-ын төлөөлөгчдийн бүрэлдэхүүнд технологи, санхүү, үйлдвэрлэлийн салбарын томоохон компанийн удирдлагууд багтсан нь энэ удаагийн айлчлал эдийн засаг, технологийн хамтын ажиллагаанд онцгой ач холбогдол өгч байгааг харуулж байна.
Дэлхий нийтээр..
Хятад, АНУ-ын төрийн тэргүүнүүд дахин нүүр тулан уулзана
Хятад улсын дарга Ши Жиньпиний урилгаар АНУ-ын ерөнхийлөгч Дональд Трамп 5-р сарын 13-15-ны хооронд БНХАУ-д төрийн айлчлал хийж байна.
Энэ нь Хятад, АНУ-ын төрийн тэргүүнүүдийн өнгөрсөн оны 10-р сард Пусан хотод уулзсаны дараа хоёр дахь удаагаа нүүр тулан уулзах бөгөөд АНУ-ын Ерөнхийлөгчийн есөн жилийн хугацаанд Хятадад хийсэн анхны айлчлал юм. Хоёр орны тэргүүн Хятад, Америкийн харилцаа, дэлхийн энх тайван, хөгжлийн гол асуудлаар гүнзгий санал солилцох болно.
