Дэлхий нийтээр..
Г.Батзориг: Нийслэлээс тохижилт, үйлчилгээний ААН-үүдийн машин, техникийг үе шаттай шинэчилж байна
Нийслэлийн хэмжээнд хот, нийтийн аж ахуйн салбарт 46 ААН байгууллага үйл ажиллагаа явуулж байна. Үүний 35 нь хувийн хэвшлийн, 11 нь орон нутгийн өмчит компани юм. Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг Сонгинохайрхан дүүргийн “Тохижилт цэвэрлэгээ үйлчилгээ” ОНӨААТҮГ болон тохижилт, үйлчилгээний чиглэлээр үйл ажиллагаа явуулдаг “Охь мандал” ХХК-д ажиллаж, нөхцөл байдалтай танилцлаа.
Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг “Нийслэлээс тохижилт, үйлчилгээний газар, аж ахуйн нэгжүүдийн тоног төхөөрөмжийг шинэчилж, цалин хангамжийг нэмэгдүүлсэн. Өнөөдөр нөхцөл байдалтай танилцаж, нийтийн эзэмшлийн зам талбайн цэвэрлэгээ, техник, тоног төхөөрөмжийн хангамж, цаашид авч хэрэгжүүлэх арга хэмжээний талаар ярилцлаа” гэв.
Сонгинохайрхан дүүргийн “Тохижилт цэвэрлэгээ үйлчилгээ” ОНӨААТҮГ-ын дарга О.Буянгэрэл “Бид техник, тоног төхөөрөмжийнхөө бэлэн байдлыг ханган ажиллаж байна. 2025 онд нийслэлээс шинэ тоног төхөөрөмжийг олноор нийлүүлж, давс, бодисын чанар, хүртээмжийг сайжруулсан. Сонгинохайрхан дүүрэгт 150 зам талбайн үйлчлэгч, харин жолооч, ачигч 117 хүний бүрэлдэхүүнтэй нийтийн эзэмшлийн 1.7 сая ам.метр талбайн тохижилт үйлчилгээг хариуцан ажиллаж байна” гэв.
Сонгинохайрхан дүүргийн “Тохижилт цэвэрлэгээ үйлчилгээ” ОНӨААТҮГ-ын ерөнхий менежер Ш.Энхтайван “Сонгинохайрхан дүүрэг 23 хорооны 1870 гэрээт аж ахуйн нэгжийн хогийг тээвэрлэдэг. 1.7 сая ам.метр талбайн цэвэрлэгээ үйлчилгээг хариуцдаг. Нийт зам талбайн 70 хувь нь гэр хорооллын дундах өгсүүр, уруу зам байдаг. Бүх ажилчдад хөдөлмөр аюулгүй байдлын сургалтад хамрагдаж, хог тээврийг хувиараас өмнө ачиж дадсан. Зам талбайн үйлчлэгчдийн цалин нэмэгдсэн учраас урам зоригтой ажлаа хийж, илүү хариуцлагатай болсон. Нийслэл, дүүргээс 2025 онд 42 машин, техникээр парк шинэчлэл хийсэн. Энэ нь зам талбайн ажилчдын ажлыг хөнгөвчилсөн. Хог тээврийн машинууд насжилт хэтэрсэн байсныг шинэчилсэн. 2025 онд хог тээврийн 18 машинаар парк шинэчлэл хийсэн. Энэ нь шатахуун, сэлбэгийн зардалд ч хэмнэлтэй байна” гэсэн юм.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Дэлхий нийтээр..
“Al Jazeera”-гийн сэтгүүлч амь үрэгдсэнд эмгэнэл илэрхийллээ
Газын зурваст ажиллаж байсан Al Jazeera телевизийн сэтгүүлч Вишах Израилын цохилтын үеэр амь үрэгдсэн талаар олон улсын хэвлэлүүд мэдээлж байна. Мэдээллээр, сэтгүүлч Вишах Газын зурваст болж буй үйл явдлыг сурвалжилж байх үед цохилтод өртсөн бөгөөд хамт ажиллаж байсан хэвлэл мэдээллийн ажилтнууд түүнийг эмгэнэн хүндэтгэл үзүүлжээ.
Газын сэтгүүлчид болон хэвлэл мэдээллийн байгууллагууд:
- Сэтгүүлчдийн аюулгүй байдлыг хангахыг
- Сурвалжлагчдыг онилохгүй байхыг
- Олон улсын байгууллагууд анхаарал хандуулахыг уриалсан байна.
Al Jazeera телевизийн зүгээс сэтгүүлчийн амь үрэгдсэнд эмгэнэл илэрхийлж, мөргөлдөөний бүсэд ажиллаж буй сэтгүүлчдийн аюулгүй байдлын асуудал улам ноцтой болж байгааг онцолжээ.
Сүүлийн саруудад Газын зурваст хэд хэдэн сэтгүүлч амь үрэгдсэн талаар олон улсын байгууллагууд анхааруулж байгаа бөгөөд хэвлэл мэдээллийн ажилтнууд мөргөлдөөний бүсэд хамгийн өндөр эрсдэлтэй нөхцөлд ажиллаж буйг тэмдэглэж байна.
Ойрхи Дорнодын нөхцөл байдал хурц хэвээр байгаа бөгөөд Газын зурваст агаарын цохилт, хуурай замын ажиллагаа үргэлжилсээр байна.
Дэлхий нийтээр..
НҮБ-ын төлөөлөгч Тегеранд очиж хохирлын нөхцөл байдалтай танилцлаа
НҮБ-ын тусгай төлөөлөгч Тегеран хотод ажиллаж, агаарын довтолгоонд өртсөн гэх иргэний байгууламжуудтай газар дээр нь танилцсан талаар олон улсын хэвлэлүүд мэдээлж байна.
Мэдээллээр НҮБ-ын төлөөлөгч Тегеран хотын хэд хэдэн дүүрэгт очиж, орон сууцны барилга, иргэний дэд бүтэц, боловсролын байгууллагуудад учирсан хохирлын талаар холбогдох албаныхнаас тодруулга авчээ. Зарим бүсэд дэлбэрэлтийн улмаас барилгын цонх хагарч, ойр орчмын байгууламжууд гэмтсэн гэх мэдээлэл гарсан байна.
НҮБ-ын төлөөлөгчийн энэ айлчлал нь агаарын довтолгооны үеэр иргэний байгууламжууд онилогдсон эсэхийг тодруулах, олон улсын хүмүүнлэгийн эрх зөрчигдсөн эсэхийг шалгах зорилготой гэж эх сурвалжууд мэдээлжээ.
Үүнтэй холбоотойгоор НҮБ нөхцөл байдлыг анхааралтай ажиглаж байгаа бөгөөд шаардлагатай тохиолдолд Аюулгүйн зөвлөлийн түвшинд асуудлыг хэлэлцэх боломжтой гэж үзэж байна.
Сүүлийн 12 цагийн хугацаанд Ираны хэд хэдэн хотод дэлбэрэлт болсон гэх мэдээлэл гарч, Тегеран хотын зарим дүүрэгт агаарын хамгаалалтын систем ажилласан тухай мэдээлэл мөн гарсан юм. Энэ нөхцөл байдалтай зэрэгцэн НҮБ-ын төлөөлөгч газар дээр нь ажилласан нь Ойрхи Дорнодын нөхцөл байдал шинэ шатанд шилжиж байгааг ажиглагчид онцолж байна.
Одоогоор Ираны тал хохирлын талаар дэлгэрэнгүй албан ёсны мэдээлэл гаргаагүй байгаа бөгөөд нөхцөл байдлыг олон улсын байгууллагууд үргэлжлүүлэн ажиглаж байна.
Дэлхий нийтээр..
Путин, Саудын Арабын хунтайж нар Ойрхи Дорнодод гал зогсоохыг уриалав
Владимир Путин болон Мухаммед бен Салман нар дөрөвдүгээр сарын 2-нд утсаар ярьж, Ойрхи Дорнодод үргэлжилж буй мөргөлдөөн, бүс нутгийн нөхцөл байдлын талаар хэлэлцжээ. Кремлийн мэдээлснээр хоёр тал гал зогсоох яаралтай шаардлагатай байгааг онцолж, мөргөлдөөнийг дипломат аргаар шийдвэрлэхийг уриалсан байна.
Ярианы үеэр, Ойрхи Дорнодын нөхцөл байдал дордож буй, болон энгийн иргэдийн хохирол нэмэгдэж, стратегийн дэд бүтцэд хохирол учирч байгаа асуудалд ноцтой санаа зовниж байгаагаа илэрхийлжээ.
Мөн бүх талын хууль ёсны ашиг сонирхлыг харгалзан үзэж, улс төр, дипломат хүчин чармайлтыг эрчимжүүлэх шаардлагатайг онцолсон байна. Түүнчлэн мөргөлдөөний улмаас:
- Эрчим хүчний үйлдвэрлэл
- Газрын тосны тээвэрлэлтийн аюулгүй байдал
- Дэлхийн эрчим хүчний зах зээл сөргөөр нөлөөлж болзошгүйг тэмдэглэжээ.
Ийм нөхцөлд ОПЕК+ хүрээнд Орос болон Саудын Араб-ын хамтын ажиллагаа дэлхийн газрын тосны зах зээлийг тогтворжуулахад чухал ач холбогдолтой гэж хоёр тал үзсэн байна. Ийнхүү Орос болон Саудын Арабын удирдагчид Ойрхи Дорнодын хурцадмал байдлыг намжаах, эрчим хүчний зах зээлийг тогтворжуулах чиглэлд хамтран ажиллах байр сууриа илэрхийллээ.
-
Дэлхий нийтээр..2022/11/30
Монгол Улс БНСУ-тай хамтран нисэхийн сургууль байгуулна
-
Дэлхий нийтээр..2023/04/28
ГЕГ: Ази, Номхон Далайн Бүс Нутгийн 18 улсын гаалийн байгууллагууд хамтран ажилл...
-
Үйл явдал2021/06/30
Өнөөдөр Улаанбаатарт ажиллах дархлаажуулалтын цэгүүд
-
Дэлхий нийтээр..2023/05/04
Түрүү булчирхайн өвчлөлийн оношилгоо, эмчилгээг шинэ түвшинд гаргах боломж бүрдл...