Дэлхий нийтээр..
Люксембургийн төлөөлөгчид Зүрх судасны Үндэсний төв байгуулах төслийн явцтай танилцлаа
УИХ-ын Аюулгүй байдал, гадаад бодлогын байнгын хорооны дарга Г.Тэмүүлэнгийн урилгаар Монгол Улсад айлчилж буй Люксембургийн Их Гүнт Улсын парламентын Төлөөлөгчдийн танхимын гишүүн, Гадаад бодлогын байнгын хорооны дарга Гүсти Граас тэргүүтэй төлөөлөгчид 2026 оны гуравдугаар сарын 26-ны өдөр Улсын гуравдугаар төв эмнэлэгт зочилж, “Зүрх судасны Үндэсний төв” байгуулах төслийн явцтай танилцлаа.
Төлөөлөгчдийг Улсын гуравдугаар төв эмнэлгийн удирдлага хүлээн авч, эмнэлгийн үйл ажиллагаа болон төслийн хэрэгжилтийн талаар мэдээлэл өгсөн юм. Уг төсөл нь Люксембургийн Их Гүнт Улсын буцалтгүй тусламжаар 2001 оноос эхэлсэн зүрх судасны тусламж үйлчилгээг сайжруулах таван үе шаттай хөтөлбөрийн үргэлжлэл бөгөөд 25 дахь жилдээ хэрэгжиж байна.
П.Н.Шастины нэрэмжит Улсын гуравдугаар төв эмнэлгийн захирал Ц.Төмөр-Очир Монгол Улсад зүрх судасны өвчлөл нас баралтын тэргүүлэх шалтгааны нэг болдгийг онцлоод, Монгол Улс, Люксембургийн хамтын ажиллагааны хүрээнд зүрх судасны тусламж үйлчилгээг эх орондоо өндөр түвшинд үзүүлэх боломж бүрдсэн талаар танилцууллаа. Мөн эмч, мэргэжилтнүүдийг олон улсын түвшинд чадавхжуулах, шинэ технологи нэвтрүүлэхэд уг хамтын ажиллагаа чухал нөлөө үзүүлж байгааг тэмдэглэв.
Сүүлийн таван жилийн хугацаанд тус эмнэлэг зүрх судасны 6500 гаруй хагалгааг дотооддоо хийснээр 39 тэрбум төгрөгийн валютын урсгалыг эх орондоо үлдээсэн байна. Энэ нь Люксембургийн хөгжлийн хамтын ажиллагааны агентлаг болон Францын Страсбургийн их сургуулийн урт хугацааны дэмжлэгийн үр дүн гэдгийг онцолж байв.
Төслийн тав дахь шат болох “Зүрх судасны Үндэсний төв” байгуулах ажлыг 2025-2029 онд хэрэгжүүлэхээр төлөвлөсөн байна. Төслийг Европын сэргээн босголт, хөгжлийн банкны 34.9 сая ам.долларын зээл, Люксембургийн Их Гүнт Улсын 22.5 сая еврогийн буцалтгүй тусламжаар санхүүжүүлэх бөгөөд 120 ортой эмнэлэг байгуулах юм.
Шинэ төв ашиглалтад орсноор зүрх судасны мэс засал, оношилгоо, яаралтай тусламж, сэргээн засах эмчилгээ зэрэг иж бүрэн үйлчилгээ үзүүлэх боломж бүрдэж, тусламж үйлчилгээний чанар, хүртээмж нэмэгдэхээс гадна зүрх судасны өвчлөл буурахад чухал хувь нэмэр оруулах юм.
Люксембургийн парламентын Төлөөлөгчдийн танхимын гишүүн, Гадаад бодлогын байнгын хорооны дарга Гүсти Граас уг төсөл нь хоёр орны хамтын ажиллагааны чухал хэсэг болохыг онцолж, цаашид дэмжиж ажиллахаа илэрхийллээ.
Уулзалтад Улсын Их Хурлын гишүүн, Монгол-Люксембургийн парламентын бүлгийн дарга Б.Мөнхсоёл, Люксембургийн парламентын гишүүд, хоёр улсын Элчин сайд болон холбогдох албаны хүмүүс оролцлоо.
Дэлхий нийтээр..
Пакистан: Афганы хил орчимд явуулсан ажиллагаагаар 29 зэвсэгт этгээдийг устгасан гэж мэдэгдэв
Пакистаны аюулгүй байдлын хүчнийхэн Афганистантай залгаа хилийн бүсэд явуулсан хуурай замын ажиллагаа болон дараах агаарын цохилтын үеэр 29 зэвсэгт этгээдийг устгасан гэж тус улсын эрх баригчид мэдэгдлээ.
Пакистаны Мэдээллийн сайд Аттаулла Тарарын мэдээлснээр, уг ажиллагааг сүүлийн үед тус улсын нутаг дэвсгэрт гарсан хэд хэдэн зэвсэгт халдлагын хариу арга хэмжээ болгон зохион байгуулжээ. Тэрбээр ажиллагааны үеэр зэвсэгт бүлэглэлүүдийн байрлаж байсан нуугдах газар, баазуудад чиглэсэн цохилт өгсөн гэж мэдэгдсэн байна.
Энэхүү ажиллагаа нь Карачи хот дахь Пакистаны хилийн цэргийн төв байр руу зэвсэгт халдлага үйлдэгдсэний дараахан болсон юм. Уг халдлагын улмаас гурван цэргийн алба хаагч амь үрэгдэж, хэд хэдэн хүн шархадсан бөгөөд халдлагын хариуцлагыг Пакистаны Талибантай холбоотой Жамаат-ул-Ахрар бүлэглэл хүлээжээ.
Сүүлийн жилүүдэд Пакистаны баруун хойд бүсэд зэвсэгт халдлагын тоо эрс нэмэгдэж, тус улсын эрх баригчид ихэнх халдлагыг Пакистаны Талибан (TTP) болон түүнтэй холбоотой бүлэглэлүүдтэй холбон тайлбарлаж ирсэн. Харин Афганы эрх баригчид өөрийн нутаг дэвсгэрийг ийм зорилгоор ашиглуулахгүй гэсэн байр сууриа удаа дараа илэрхийлж байгаа юм.
Дэлхий нийтээр..
Трамп дижитал үйлчилгээний татвар ногдуулсан орнуудад 100 хувийн импортын татвар ногдуулна гэж мэдэгдэв
АНУ-ын Ерөнхийлөгч Дональд Трамп зургаадугаар сарын 26-ны өдөр өөрийн олон нийтийн сүлжээнд нийтэлсэн мэдэгдэлдээ, Америкийн технологийн компаниудад дижитал үйлчилгээний татвар ногдуулсан улс орнуудаас импортлох бүх бараанд 100 хувийн татвар ногдуулна хэмээн анхаарууллаа.
Тэрбээр Европын хэд хэдэн улс Америкийн технологийн компаниудад дижитал үйлчилгээний татвар ногдуулах асуудлыг хэлэлцэж байгаа бөгөөд зарим нь уг татварыг ойрын хугацаанд хэрэгжүүлж магадгүй байгааг онцолжээ.
Трампын мэдэгдэлд, ийм төрлийн татвар ногдуулсан аливаа улс АНУ-д экспортлох бүх бараандаа 100 хувийн импортын татвар төлөх бөгөөд энэхүү арга хэмжээ нь тухайн улстай байгуулсан худалдааны хэлэлцээрээс үл хамааран хэрэгжинэ гэж дурдсан байна.
Гэхдээ тэрээр дээрх шийдвэрийг ямар хууль, эрх зүйн үндэслэлээр хэрэгжүүлэх талаар тодорхой тайлбар өгөөгүй байна.
Сүүлийн жилүүдэд Франц, Их Британи, Испани, Итали зэрэг Европын хэд хэдэн улс Google, Amazon, Apple, Meta зэрэг Америкийн томоохон технологийн компаниудаас дижитал үйлчилгээний татвар авах бодлого хэрэгжүүлж эхэлсэн. АНУ эдгээр татварыг Америкийн компаниудыг ялгаварлан гадуурхсан арга хэмжээ гэж үзэн эсэргүүцсээр иржээ.
Харин Трампын мэдэгдлийн дараа Европын Комисс Европын Холбоо татварын бодлогоо бие даан тодорхойлох бүрэн эрхтэй бөгөөд нэг талын худалдааны аливаа арга хэмжээний хариуд шаардлагатай тохиолдолд зохих хариу арга хэмжээ авахад бэлэн байгаагаа мэдэгдсэн байна.
Үүнээс өмнө Дональд Трамп Франц, Их Британийн дижитал үйлчилгээний татвартай холбогдуулан хэд хэдэн удаа худалдааны хариу арга хэмжээ авахаар анхааруулж байсан юм. Харин Францын Ерөнхийлөгч Эммануэль Макрон АНУ-ын дарамтад автахгүй бөгөөд Франц улс дижитал үйлчилгээний татварын бодлогоо үргэлжлүүлэн хэрэгжүүлнэ гэдгээ өмнө нь мэдэгдэж байжээ.
Дэлхий нийтээр..
Трампын мэдэгдлийн дараа Ираны төлөөлөгчид хэлэлцээг түр зогсоов
-
Дэлхий нийтээр..2025/10/17
Туулах чадвар сайтай автомашин, техник хэрэгслийг хүлээлгэн өгөв
-
Чөлөөт бүс2025/07/03
“Улаанбаатарын үдэш 2025” шоу тоглолт долоодугаар сарын 11-нД болно
-
Үйл явдал2019/11/05
Ардчилсан хувьсгалын 30 жилийн ойн медаль бий болгох тухай Тогтоолын төсөл өргөн...
-
Дэлхий нийтээр..2022/07/22
Газрын тос боловсруулах үйлдвэрийн EPC-1 төслийн явц 63 хувийн гүйцэтгэлтэй байн...