Дэлхий нийтээр..
Ойрхи Дорнодод нөхцөл байдал хурц хэвээр үргэлжилж байна
Ойрхи Дорнодод сүүлийн цагуудад цэрэг, дипломат, эдийн засгийн чиглэлд зэрэг шахам өрнөсөн үйл явдлууд бүс нутгийн нөхцөл байдлыг улам хурцатгалаа.
Израиль, Ираны хооронд харилцан довтолгоо үргэлжилж, хоёр тал пуужин болон нисгэгчгүй төхөөрөмж ашигласан цохилтууд хийсэн талаар олон улсын хэвлэлүүд мэдээлэв. Израилийн тал Ираны цэргийн байгууламж болон зэвсгийн агуулахтай холбоотой байршлуудад цохилт өгсөн гэж мэдэгдсэн бол Иран Израилийн чиглэлд хэд хэдэн удаагийн пуужингийн довтолгоо хийжээ. Зарим пуужинг Израилийн агаарын довтолгооноос хамгаалах систем замд нь устгасан тухай мэдээлэв.
АНУ бүс нутаг дахь цэргийн бэлэн байдлаа нэмэгдүүлж, тэнгисийн цэргийн хүчээ Персийн булан болон Газар дундын тэнгис орчимд төвлөрүүлсэн тухай мэдээлэл гарлаа. Мөн агаарын довтолгооноос хамгаалах нэмэлт системүүдийг холбоотон орнуудад байршуулсан талаар мэдээлжээ.
Үүнтэй зэрэгцэн Персийн булангийн хэд хэдэн улс аюулгүй байдлын бэлэн байдлаа нэмэгдүүлэв. Зарим нислэгийн чиглэл өөрчлөгдөж, бүс нутгийн хэд хэдэн орон иргэддээ анхааруулга гаргажээ. Дипломат төлөөлөгчийн газрууд хамгаалалтын дэглэмээ чангаруулсан тухай мэдээлэл мөн гарсан.
Дипломат түвшинд Хятад, Европын хэд хэдэн улс талуудыг яриа хэлэлцээ эхлүүлэхийг уриалсан мэдэгдэл хийв. Мөргөлдөөнийг өргөжүүлэхгүй байх шаардлагатай гэсэн байр суурь илэрхийлж, гал зогсоох боломжийг эрэлхийлэх оролдлого нэмэгдэж эхэлжээ.
Газрын тосны зах зээлд нөлөө илэрч эхэлж, Ормузын хоолойн аюулгүй байдалд болгоомжлол нэмэгдэв. Дэлхийн газрын тосны нийлүүлэлтийн ойролцоогоор тавны нэг нь уг хоолойгоор дамждаг тул бүс нутгийн хурцадмал байдал эрчим хүчний зах зээлд нөлөөлөх эрсдэл нэмэгдэж байна.
Үүний зэрэгцээ Европын хэд хэдэн улс АНУ-ын цэргийн ажиллагаанд болгоомжтой хандаж, дипломат гарц эрэлхийлэх байр суурь илэрхийлсэн нь барууны орнуудын дунд байр суурийн ялгаа тодорч эхэлснийг харууллаа.
Ийнхүү Ойрхи Дорнодод цэргийн ажиллагаа үргэлжилж, дипломат идэвхжил нэмэгдэж, дэлхийн эрчим хүчний зах зээлд нөлөө үзүүлж эхэлсэн нь бүс нутгийн нөхцөл байдал ойрын хугацаанд тогтворжих төлөв хараахан тодорхойгүй байгааг харуулж байна.
Дэлхий нийтээр..
Ши Жиньпин, Доналд Трамп нар Бээжинд уулзаж, хоёр улсын харилцааны гол асуудлуудыг хэлэлцэж байна
БНХАУ-ын дарга Ши Жиньпин АНУ-ын Ерөнхийлөгч Доналд Трамптай Бээжин хотноо хэлэлцээ хийж байна. Олон улсын хэвлэлүүдийн мэдээлж буйгаар, хоёр улсын төрийн тэргүүн нарын уулзалтаар худалдаа, тариф, Тайванийн асуудал, хиймэл оюун ухаан, мөн Ираны нөхцөл байдал зэрэг олон улсын анхаарал татсан сэдвүүдийг хэлэлцэж байна.
“Reuters” агентлагийн мэдээлснээр, энэ удаагийн уулзалт АНУ, БНХАУ-ын худалдааны түр тохиролцоог баталгаажуулах, хоёр талын эдийн засаг, технологийн салбар дахь маргаантай асуудлуудыг хэлэлцэх өндөр ач холбогдолтой уулзалт болж байна. АНУ-ын тал Хятадтай худалдаа, хиймэл оюун ухаан, чип үйлдвэрлэл, нисэхийн салбар дахь хамтын ажиллагаа болон Америкийн компаниудын Хятадын зах зээлд нэвтрэх боломжийг хөндөж байгаа талаар мэдээлжээ.
Уулзалтын бас нэг гол сэдэв нь Тайванийн асуудал байна. Бээжин АНУ-ын Тайваньд үзүүлж буй дэмжлэг, зэвсгийн худалдаанд эсэргүүцэл илэрхийлсээр байгаа бол Вашингтон Тайванийн асуудлаарх бодлогодоо өөрчлөлт ороогүй гэж өмнө нь мэдэгдсэн байна. Тайвань нь АНУ, БНХАУ-ын харилцааны хамгийн эмзэг сэдвүүдийн нэг хэвээр байгааг ажиглагчид онцолж байна.
Мөн АНУ-ын тал Ираны нөхцөл байдалтай холбоотойгоор Хятад улс Тегеранд үзүүлэх нөлөөгөө ашиглан хурцадмал байдлыг намжаахад дэмжлэг үзүүлэхийг хүсэж байгаа талаар “Reuters” мэдээлэв. Гэхдээ шинжээчид Бээжин Ираны эсрэг хатуу байр суурь баримтлах магадлал бага гэж үзэж байна.
АНУ-ын Ерөнхийлөгч Доналд Трамп уулзалтын эхэнд Ши Жиньпинийг “агуу удирдагч” хэмээн тодорхойлж, энэ уулзалтыг томоохон ач холбогдолтой гэж үнэлсэн талаар олон улсын хэвлэлүүд мэдээлж байна. Харин БНХАУ-ын тал хоёр улсын харилцааны тогтвортой байдал нь дэлхийн эдийн засаг, олон улсын аюулгүй байдалд чухал нөлөөтэйг онцолжээ.
Уулзалтын хүрээнд хоёр талын албан ёсны хэлэлцээ, төрийн хүндэтгэлийн арга хэмжээ болон бизнесийн хүрээний уулзалтууд болох төлөвтэй байна. АНУ-ын төлөөлөгчдийн бүрэлдэхүүнд технологи, санхүү, үйлдвэрлэлийн салбарын томоохон компанийн удирдлагууд багтсан нь энэ удаагийн айлчлал эдийн засаг, технологийн хамтын ажиллагаанд онцгой ач холбогдол өгч байгааг харуулж байна.
Дэлхий нийтээр..
Хятад, АНУ-ын төрийн тэргүүнүүд дахин нүүр тулан уулзана
Хятад улсын дарга Ши Жиньпиний урилгаар АНУ-ын ерөнхийлөгч Дональд Трамп 5-р сарын 13-15-ны хооронд БНХАУ-д төрийн айлчлал хийж байна.
Энэ нь Хятад, АНУ-ын төрийн тэргүүнүүдийн өнгөрсөн оны 10-р сард Пусан хотод уулзсаны дараа хоёр дахь удаагаа нүүр тулан уулзах бөгөөд АНУ-ын Ерөнхийлөгчийн есөн жилийн хугацаанд Хятадад хийсэн анхны айлчлал юм. Хоёр орны тэргүүн Хятад, Америкийн харилцаа, дэлхийн энх тайван, хөгжлийн гол асуудлаар гүнзгий санал солилцох болно.
Дэлхий нийтээр..
Украйн: Батлан хамгаалахын салбарын албан хаагчид 9 жилийн хорих ял оноов
Украин улсын Авлигын эсрэг дээд шүүх “Красиловын агрегатын үйлдвэр” төрийн өмчит компанийн үйлдвэрийн хэлтсийн даргыг хахууль авсан хэрэгт буруутай гэж үзэн 9 жилийн хорих ял оноосон байна.
Уг этгээд нь бизнес эрхлэгчээс 1,990,840 гривень (161,8 сая төгрөг)-тэй тэнцэх хэмжээний хахууль авсан нь мөрдөн шалгах ажиллагаагаар тогтоогджээ. Үүний хариуд бүтээгдэхүүн нийлүүлэх гэрээ байгуулах болон хүлээн авах явцад саад учруулахгүй байх, төлбөрийг баталгаажуулах, цаашдын хамтын ажиллагааг дэмжих талаар амлалт өгсөн байв.
Авлигын эсрэг дээд шүүхээс түүнийг Украины Эрүүгийн хуулийн 368 дугаар зүйлийн 4 дэх хэсэгт заасны дагуу хорих ялаас гадна өмчийн тодорхой хэсгийг хураах, удирдах албан тушаал эрхлэх эрхийг 3 жилийн хугацаагаар хасах шийдвэр гаргасан байна. Мөн шүүхээс гарсан шийдвэрийг 30 хоногийн дотор давж заалдах боломжтой талаар мэдэгджээ.
