Тод мэдээ
Ерөнхийлөгч Х.Баттулга зарим анги, байгууллага болон энхийг сахиулагчдад төрийн одон, медаль гардууллаа

Монгол Улсад орчин цагийн Зэвсэгт хүчин үүсэж хөгжсөний түүхт 100 жилийн ой, Монгол цэргийн өдрийг тохиолдуулан Монгол Улсын Ерөнхийлөгч, Зэвсэгт хүчний Ерөнхий командлагч Халтмаагийн Баттулга 2021 оны гуравдугаар сарын 18-ны өдөр зарим анги, байгууллагыг төрийн дээд одон, медалиар шагнах тухай зарлиг гаргасан. Мөн 2021 оны гуравдугаар сарын 15-ны өдөр “Энхийг сахиулагчдыг Төрийн одон, медалиар шагнах тухай” зарлиг гаргасан.
Монгол Улсын Ерөнхийлөгчийн зарлигийн дагуу шагнал гардуулах ёслолын үйл ажиллагаа 2021 оны тавдугаар сарын 09-ний өдөр Тавантолгой дахь Зэвсэгт хүчний Сургалтын нэгдсэн төвд болж, шагналыг Монгол Улсын Ерөнхийлөгч, Зэвсэгт хүчний Ерөнхий командлагч Халтмаагийн Баттулга гардууллаа.
Цэргийн гавьяаны улаан тугийн одонгоор шагнах тухай Монгол Улсын Ерөнхийлөгчийн зарлигт:
“…Монгол Улсад орчин цагийн Зэвсэгт хүчин үүсэж хөгжсөний 100 жилийн ой, Цэргийн тагнуулын газрын түүхт 100 жилийн ой, Монгол цэргийн өдрийг тохиолдуулан Монгол Улсын тусгаар тогтнол, үндэсний аюулгүй байдлыг амь биеэ үл хайрлан батлан сахиж, эх орон, төр ард түмнийхээ өмнө өргөсөн тангарагтаа үнэнчээр зүтгэсэн тус газрын үе үеийн ажилтан албан хаагч, цэрэг офицер ахлагчдын гавьяа зүтгэлийг өндрөөр үнэлж, Тагнуулын ерөнхий газрын харьяа Цэргийн тагнуулын газрыг Цэргийн гавьяаны улаан тугийн одонгоор шагнасугай” гэжээ.
Цэргийн гавьяаны одонгоор шагнах тухай Монгол Улсын Ерөнхийлөгчийн зарлигт:
“…Монгол Улсад орчин цагийн Зэвсэгт хүчин үүсэж хөгжсөний 100 жилийн ой, Монгол цэргийн өдрийг тохиолдуулан Монгол Улсын тусгаар тогтнол, газар нутгийн халдашгүй дархан байдлыг батлан хамгаалж, эх орон, төр, ард түмнийхээ өмнө өргөсөн тангарагтаа үнэнчээр зүтгэж, зэвсэгт хүчний тасралтгүй үйл ажиллагааг хангах үйлсэд оруулсан өндөр хувь нэмрийг үнэлж Зэвсэгт хүчний 234, 065, 303, 337 дугаар ангийг Цэргийн гавьяаны одонгоор шагнасугай” гэжээ.
Цэргийн гавьяаны одонгоор шагнах тухай Монгол Улсын Ерөнхийлөгчийн зарлигт:
“…Монгол Улсад орчин цагийн зэвсэгт хүчин үүсэж хөгжсөний 100 жилийн ой, Монгол цэргийн өдрийг тохиолдуулан гамшиг ослоос иргэдийн амь нас, эд хөрөнгийг авран хамгаалах, бүх төрлийн гамшиг ослоос урьдчилан сэргийлэх үйлсэд онцгой гавьяа байгуулж, эх орон, төр, ард түмнийхээ өмнө өргөсөн тангарагтаа үнэнчээр зүтгэсэн тус байгууллагын үе үеийн ажилтан албан хаагч, офицер ахлагчдын гавьяа зүтгэлийг үнэлж Архангай аймгийн Онцгой байдлын газрыг Цэргийн гавьяаны одонгоор шагнасугай” гэжээ.
Энхийг сахиулагчдыг Монгол Улсын төрийн одон, медалиар шагнах тухай Монгол Улсын Ерөнхийлөгчийн зарлигт:
“Бүгд Найрамдах Өмнөд Судан Улсад явагдаж буй Нэгдсэн Үндэстний Байгууллагын мандаттай UNMISS энхийг сахиулах ажиллагаа, Исламын Бүгд Найрамдах Афганистан Улсад явагдаж буй Умард Атлантын гэрээний байгууллагын цэргийн хүчний тэргүүлсэн Шийдвэртэй дэмжлэг олон улсын ажиллагаанд үүрэг гүйцэтгэсэн хамгаалалтын ротын цэргийн багийн бие бүрэлдэхүүн, НҮБ-ын энхийг сахиулах ажиллагаанд үүрэг гүйцэтгэсэн алба хаагчдыг төрийн дээд одон, медалиар шагнасугай” гэжээ.
Монгол Улсын Ерөнхийлөгч, Зэвсэгт хүчний Ерөнхий командлагч Халтмаагийн Баттулга шагнал гардуулсныхаа дараа:
“Эрхэм генерал, офицер, ахлагч нар аа!
Энхийг сахиулагчид аа!
Мянга мянган жилийн баатарлаг түүхтэй өвөг дээдсийнхээ дайчин уламжлалыг омог төгөлдөр, нэр төртэйгөөр залгамжилж яваа монгол цэргүүд Та бүхэнд орчин цагийн Зэвсэгт хүчин үүсэж хөгжсөний 100 жилийн ойн халуун мэндийг дэвшүүлье. Түүнчлэн Монголын ард түмний үнэтэй хувь нэмэр оруулсан Аугаа эх орны дайны Ялалтын баярын мэндийг давхар хүргэе!
Монгол цэрэг бол бүрэн итгэл даах чадварлаг дайчид гэдгийг үйл хэргээрээ олон улсад нотлон харуулж, зэвсэгт мөргөлдөөн, иргэний дайны хөлд үрэгдэж яваа үндэстнүүдэд энх тайван, аюулгүй байдлыг авчрах, сахин хамгаалах үйл хэрэгт бодитой хувь нэмэр оруулж, төр засаг, цэргийн дээд удирдлагаас даалгасан үүргийг цэргийн ёсоор, тангаргаа сахин биелүүлсэн энхийг сахиулагч дайчид Та бүхэнд иргэдийнхээ өмнөөс болон хувиасаа чин сэтгэлийн талархал илэрхийлье.
Дэлхийн зарим бүс нутагт овог аймаг, шашин хоорондын сөргөлдөөн, үймээн самуун гарсаар байгаа нь энэ гараг дээр амьдарч буй хүн бүрийн сэтгэлийг түгшээсэн ээдрээтэй асуудал болсоор байна. Монгол Улс дэлхийн хамтын нийгэмлэгийн бүрэн эрхт гишүүний хувиар энх тайвныг сахиулах, аюулгүй байдлыг бэхжүүлэх үйлсэд үүрэг хүлээж, хувь нэмрээ оруулах хариуцлагаа Та бүхнээр дамжуулан гүйцэтгэж байгаа юм.
Бүгд Найрамдах Өмнөд Судан Улс дахь НҮБ-ын энхийг дэмжих ажиллагаанд, мөн Исламын Бүгд Найрамдах Афганистан Улс дахь “Шийдвэртэй дэмжлэг” ажиллагаанд Монголын Энхийг сахиулагчид голлох үүрэгтэй оролцож, бэлэн байдал, үүрэг гүйцэтгэлт, сахилга зохион байгуулалтаараа ижил түвшний цэргийн багуудад үлгэр дуурайл болж, НҮБ-ын Ерөнхий нарийн бичгийн даргын тусгай төлөөлөгч болон Цэргийн хүчний командлалаас сайшаагдсан тухай мэдээг удаа дараа хүлээн авахдаа үргэлж Та бүхнээр бахдан омогшиж байснаа энд зориуд онцлон тэмдэглэе.
Монголын ард түмэн 1921 оны Ардын хувьсгалын ялалтаар эрх чөлөө, тусгаар тогтнолоо байлдан олж, энх цагтай учран золгосон түүхт 100 жилийн ойгоо тэмдэглэж байгаа энэ цаг үед эх орноо батлан хамгаалах, хилийн халдашгүй дархан байдлыг сахин хамгаалах, үндэсний аюулгүй байдлыг хангах, гамшиг ослоос иргэдээ авран хамгаалах, урьдчилан сэргийлэх үүргээ нэр төртэй биелүүлж, амжилт бүтээл, алдар гавьяагаа төр засгаараа үнэлүүлэн шагнагдсан Тагнуулын ерөнхий газрын харьяа Цэргийн тагнуулын газар, Зэвсэгт хүчний 065, 234, 303, 337 дугаар ангиуд, Архангай аймгийн Онцгой байдлын газрын хамт олонд халуун баяр хүргэж, гүн талархал илэрхийлж байна.
Орчин цагийн Зэвсэгт хүчин үүсэж хөгжсөний 100 жилийн ойн баярт жигдрэн жагсаж, цар тахлын хүндрэлтэй нөхцөлд ч эх орныхоо үүрэг даалгаврыг цэргийн ёсоор чанд биелүүлж, төрийн одон, медалиар шагнагдаж байгаа энхийг сахиулагч залуус, анги байгууллагууд, тэдгээрийн албан хаагчдад дахин халуун баяр хүргэе.
Эзэн Богд Чингис хааны туг дор эвлэлдэн нэгдэж, ялан дийлж явсан их өвгөдийн нэр төр, дайчин түүх, ялгуусан уламжлалыг Та бүхэн нэр төртэйгөөр залгамжилж, өндөрт өргөн явааг бахдан тэмдэглэе.
Мөнх тэнгэрийн хүчин дор Монгол цэргийн хийморь сүлд ямагт бадарч, энхжин мандтугай!” гэлээ.
Тод мэдээ
Ураны төслийг хэрэгжүүлэхэд ОУ-ын итгэмжлэгдсэн лаборатори байгуулж давхар хяналт хийнэ
Монгол-Францын Засгийн газар хоорондын комиссын хуралдаан 11 жилийн дараа Парис хотод болж, дараах асуудлаар харилцан тохиролцоонд хүрлээ. Хуралдаанд Францын талаас Европ, Гадаад хэргийн яамны Ерөнхий нарийн бичгийн дарга, хатагтай Анн-Мари Дэкот, Монголын талаас ЗГХЭГ-ын дарга Н.Учрал нар оролцлоо.
Үүнд:
- Дорноговь аймагт олон улсын итгэмжлэгдсэн лаборатори байгуулж цацраг идэвхит ашигт малтмалын хүн, мал, амьтан, хүрээлэн байгаа орчинд үзүүлэх цацрагийн нөлөөлөлд хийсэн хэмжилт, шинжилгээг давхар хяналтанд оруулах санал гаргалаа. Хөрөнгө оруулагч талын зүгээс итгэмжлэгдсэн лаборатори байгуулахыг дэмжин ажиллах,
- Төслийн дэргэд хараат бус хяналтын зөвлөлийг иргэний нийгмийн байгууллагууд, мэргэжлийн холбоод, орон нутгийн иргэдийн төлөөллийг оролцуулан байгуулж иргэний хяналт тогтоож, ил тод нээлттэй ажиллах нөхцлийг бүрдүүлж, олон нийтийн мэдэх эрхийг хангаж ажиллах,
- Хоёр улс Онцгой байдлын нисдэг тэрэг, техник төхөөрөмжийн туслалцаа, эрчим хүчний эс үүсвэрийг төрөлжүүлэх, боловсрол, соёлын хамтын ажиллагааг өргөжүүлэх,
- Ажлын хэсгийн хуралдааны үеэр Монгол Улсын Иргэний нисэхийн ерөнхий газар, Бүгд Найрамдах Франц Улсын Иргэний нисэхийн ерөнхий газар хоорондын “Иргэний нисэхийн салбарт хамтран ажиллах тухай Техник хамтын ажиллагааны гэрээ”-нд гарын үсэг зурлаа.
Мөн 2026 онд Монгол Улсад зохион байгуулагдах Цөлжилттэй тэмцэх тухай НҮБ-ын суурь конвенцын Талуудын 17 дугаар бага хуралд дэмжин оролцохоор тохиролцлоо.
Сануулахад, энэ онд хоёр улсын хооронд дипломат харилцаа тогтоосны 60 жилийн ой тохиож байна.
Тод мэдээ
Замын-Үүд боомтоор орж ирсэн жимс, хүнсний ногоонд пестицидийн үлдэгдэл илрүүлэх шинжилгээ хийлээ
Монгол Улсын Шадар сайд С.Амарсайханы тушаалаар байгуулагдсан ажлын хэсэг Замын-Үүд боомт, Чөлөөт бүс дэх дэлгүүр болон гаалийн салбар лабораторит хяналт шалгалт хийлээ.
Энэхүү шалгалтын зорилго импортоор орж ирсэн жимс жимсгэнэ, хүнсний ногоонд агуулагдаж болзошгүй пестицидийн үлдэгдлийг илрүүлэх, хүнсний аюулгүй байдлыг хангахад чиглэж байгаа юм.
Шалгалтаар нийт 20 төрлийн жимс, хүнсний ногооноос дээж авч, лабораторийн нарийвчилсэн шинжилгээнд хамрууллаа. Замын-Үүд боомтын гаалийн салбар лабораторид хүнсний бүтээгдэхүүний аюулгүй байдалд хяналт тавих ажлыг эрчимжүүлж байгаа ч зарим хүндрэл, зөрчил илэрч байгаа аж.
Шинжилгээний баг 2024 оны нэгдүгээр сараас эхлэн шинэ тоног төхөөрөмжөөр ажиллаж эхэлсэн бөгөөд одоогоор нийт 16 төрлийн хүнсний ногоо, жимс жимсгэнэд пестицидийн үлдэгдлийг тодорхойлох шинжилгээ хийж байна.
Харьцуулбал, 2023 онд 6,300 дээж шинжилгээнд хамрагдсан бол 2024 онд энэ тоо 9,000 болж өсжээ. Гадаад худалдааны хэмжээ нэмэгдэж байгаатай холбоотойгоор лабораторийн ачаалал эрс нэмэгдсэн ч ердөө 13 хүний бүрэлдэхүүнтэй ажиллаж байна. Хүний нөөцийн хувьд дутагдалтай байгааг лабороторын эрхлэгч, гаалийн улсын ахлах байцаагч дурдлаа.
Мөн хяналт шалгалтын явцад чөлөөт бүсийн худалдааны дэлгүүрүүд зарим стандартын шаардлагыг зөрчиж буй нь илэрсэн юм. Тухайлбал, загварын туршилтад хамрагдаагүй, ашиглахыг зөвшөөрөөгүй, баталгаажуулалтын гэрчилгээгүй электрон жинг ашиглаж байсан зөрчил илэрч, холбогдох арга хэмжээг хуулийн дагуу авахаар болсон байна гэж Стандарт, хэмжил зүйн газраас мэдээллээ.
Тод мэдээ
Өвөр гүнтийн 4.5 км авто замын засвар, шинэчлэлтийн ажил эхэллээ
Жигжидийн уулзвараас Гүнтийн пост хүртэлх Өвөр гүнтийн гэж нэрлэгдэх авто замыг 2015 онд ашиглалтад оруулсан. Үүнээс хойш өнөөдрийг хүртэл уг зам дээр зөвхөн арчлалтын засвар буюу нөхөөс хийж ирсэн. Иргэдийн зүгээс дээрх авто замыг шинэчилж өгөөч гэсэн санал хүсэлт цөөнгүй ирүүлсэн учраас нийслэлийн Замын хөгжлийн газраас Өвөр гүнтийн 4.5 км авто замын засвар, шинэчлэлтийн ажлыг өнөөдрөөс эхлүүлж байна. Тус авто замын ажлын гүйцэтгэгчээр "Фючер Прогресс" ХХК ажиллаж байна.
Авто замын ажлын талаар нийслэлийн Замын хөгжлийн газрын дарга Б.Одбаяр "Замыг засаж, шинэчлэхдээ 30 см цементээр бэхжүүлсэн буталсан чулуун суурь тавьж, 5 см өнгөн хучилт хийнэ. Зорчих хэсгийн баруун талаар дугуйн зам, зүүн талд нь явган зам барина. Ус зайлуулах хоолойг замын налуу хэсгүүд дээр шийднэ. Тиймээс зам засварын ажлыг гурван хэсэгт хувааж, авто замыг хэсэгчлэн хаана. Тодруулбал, цементэн суурь бэхжих 48 цагийн хугацаанд гол замын хөдөлгөөнийг хааж, түр зорчих зам гаргаж зохицуулалт хийнэ. Бидний тооцооллоор хэсэг бүрийг ойролцоогоор дөрвөн өдөр хааж, засвар шинэчлэлтийг хийнэ. Авто зам дээр ус тогтохоос сэргийлж, зургаан байршилд авто замаас доош 10 см орчим хоолой гаргана" гэв.
Авто замын ажлыг гүйцэтгэгч "Фючер Прогресс" ХХК-ийн ерөнхий инженер Б.Батбаяр "Өвөр гүнтийн замын эвдэрсэн хэсгүүдийг шинэчилж, хашлагуудыг солино. Дугуйн зам, явган хүний замыг шинээр барина. Ус зайлуулах хоолойн бөглөрлийг арилгаж, уулын шуудуу гаргана" гэлээ.
О.Энхбаатар: Өвөр гүнтийн замд замбараагүй орц, гарц гаргаж, шуудууг эвдсэнээр ус ихээр тогтдог болсон
НЗХГ-ын Засвар арчлалтын хяналтын хэлтсийн дарга О.Энхбаатар “Өвөр гүнтийн замыг энэ жил ийнхүү шинэчлэхээс гадна 2024 онд тус замын намагтай хоёр хэсэг газарт 1.5-2 метр гүнд суурь сольсон. Тус замын эвдрэлийн гол шалтгаан нь орц, гарц замбараагүй гаргаж, шуудууг нь эвдсэн учраас ус тогтдог болсон байсан. Тиймээс бид одоо эхэлж буй засвар шинэчлэлтийн ажлын хүрээнд 7 метр замыг цементээр бэхжүүлж, хоёр талын явган хүний болон дугуйн замыг 1.5 метр асфальт бетоноор хучна. Мөн шуудууг дахин шинээр барьж, орц, гарц бүр дээр 500-700 метр ус зайлуулах хоолойг хийхээр төлөвлөөд байна" хэмээн тодотгов.
Нийслэлийн хэмжээнд энэ онд 41 байршилд авто замын засвар, шинэчлэлтийн ажлыг нийслэлийн Замын хөгжлийн газраас хийж байна. Үүнээс 33 байршилд нь он дамжих зам засварын ажил, 8 байршилд нь шинээр зам барьж байна.
Өнгөрсөн долоо хоногт Гранд плазагийн уулзвараас 25 дугаар эмийн сангийн зам засварын ажил дууссан. Үргэлжлүүлэн энэ жишгээр Гранд Плазагийн уулзвараас Баруун 4 зам хүртэлх зам засвар, Денверийн гудамж, Чингисийн өргөн чөлөө, Их тойруу зэрэг байршилд зам засварын ажлыг хэсэгчлэн гүйцэтгэнэ. Зам засварын ажил нь улирлаас шалтгаалж богино хугацаанд явагддаг тул зайлшгүй нөхцөлд ажлын өдрөөр хэсэгчлэн хааж, ажил гүйцэтгэх шаардлагатай байдаг тул иргэдийг хүлээцтэй хандаж, засвар, шинэчлэлтийн талаарх мэдээлэлд ойр байхыг нийслэлийн Замын хөгжлийн газрын дарга Б.Одбаяр онцолж хэллээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
-
Тод мэдээ2021/09/11
ОХУ-д суралцагчдын анхааралд...
-
Тод мэдээ2023/08/18
МИК: 2021-2023 онуудад нийт 2 их наяд төгрөгийн эх үүсвэрээр орон сууцны хөтөлбө...
-
Тод мэдээ2022/01/31
Сар шинийн барилдааныг үзэгчдийн анхааралд!
-
Тод мэдээ2020/12/02
Бичил бизнес эрхлэгчдэд жилийн 11 хувийн хүүтэй, хөнгөлөлттэй зээлийг 24 хүртэл ...