Тод индэр
Шаардлага
Охид эмэгтэйчүүдийн эрхийг хамгаалах “Охидын түүх” ТББ, “Хүүхэд эрдэнэ” сан “Нарны охид” төсөл, “Эх үрсийн дуу хоолой” төрийн бус байгууллагуудаас 11-15 насны охидод умайн хүзүүний хорт хавдраас сэргийлэх “Гардасил” вакцины хоёрдугаар тун хийгдээгүйгээс вакцинд хамрагдсан өсвөр насны хүүхдүүд ноцтой эрсдэлд орж болзошгүй байгаа талаар мэдээлж, Монгол Улсын Ерөнхийлөгч У.Хүрэлсүх болон Ерөнхий сайд Л.Оюун-Эрдэнэ, ЗГХЭГ-ын Д.Амабаясгалан нарт хандаж, Эрүүл мэндийн сайд С.Энхболдод асуумж хүргүүлж байна.
Монгол Улсын Эрүүл мэндийн сайдын 2021 оны 06 дугаар сарын 10-ны “Хавдрын эсрэг” арга хэмжээний төлөвлөгөөний тухай А/360 тоот тушаалаар “Хавдрын эсрэг” арга хэмжээг хэрэгжүүлэх 2021-2024 оны үйл ажиллагааны төлөвлөгөөг баталсан. Энэ төлөвлөгөөний хүрээнд Умайн хүзүүний хорт хавдрын хүний папиллома вирусын эсрэг вакциныг үе шаттайгаар нэвтрүүлэх, шаардлагатай зардлыг улсын төсөвт тусгах үйл ажиллагааг зохион байгуулах, дархлаажуулах ажлыг зохион байгуулсан. Улмаар Эрүүл мэндийн яам, Халдварт өвчин судлалын төвтэй хамтран 11-15 насны нийт охидын 10 хувь нь хүний хөхөнцөр вирусын эсрэг вакцинаар дархлаажуулсан байна.
Гэвч уг хоёрдугаар тунгийн татан авалт хийгдээгүйгээс вакцин тариулсан өсвөр насны хүүхдүүдийн дунд хүлээлт, мөн айдас түгшүүр үүсгээд байна. Тиймээс Засгийн газар, Эрүүл мэндийн яамнаас “Гардасил” вакцины нэгдүгээр тунд хичнээн охид хамрагдсан, вакцины хоёрдугаар тунг ямар шалтгааны улмаас татан авалт хийгдээгүй хүлээгдэж байгаа талаар тайлбар хийхийг шаардаж байгаа юм. Мөн вакцины хоёрдугаар тунг хугацаанд нь тариулаагүй тохиолдолд ямар сөрөг нөлөө, үр дагавар үүсэх, вакцины нэгдүгээр тунг тариулж хавдрын вирус тээж яваа хүүхдүүдийн эрүүл мэндэд ямар эрсдэл үүсч байгааг олон нийтэд нээлттэй мэдээлэл өгөхийг тус тус шаардаж байна.
“Гардасил” буюу хүний хөхөнцөр вирусын эсрэг вирусын эсрэг вакцинжуулалтын байдал
Монгол Улсад умайн хүзүүний хорт хавдрын өвчлөл нь эмэгтэйчүүдийн хавдрын хоёрдугаарт, нас баралт нь гуравдугаарт ордог. АНУ-д умайн хүзүүний хорт хавдраас сэргийлэх “Gardasil” вакцинаар дархлаажуулсан 26 сая охидын 15 мянгад нь тариулсан хэсэгт өвдөх, хавдах, толгой өвдөх, халуурах, бөөлжис хүрэх зэрэг вакцины дараах урвал хүндрэл тохиолдсон байна.
Хүний папиллома вирусын янз бүрийн омгууд нь бэлгийн хавьтлаар дамждаг бөгөөд ихэнх тохиолдолд умайн хүзүүний хорт хавдар үүсгэдэг. “Гардасил 9 ” гэдэг хүний хөхөнцөр вирусын эсрэг вакциныг АНУ-ын Хүнс эмийн хяналтын газар зөвшөөрсөн бөгөөд охид хөвгүүдийн аль алинд нь хэрэглэж болно. Энэ вакциныг охид эмэгтэйчүүд вирусээр халдварлахаас өмнө зохих тунгаар хийлгэвэл умайн хүзүүний хорт хавдраас болон бусад эмгэгүүдээсурьдчилан сэргийлэх боломжтой.
Хүний хөхөнцөр вирусын эсрэг вакциныг хэнд хэзээ хийх нь зүйтэй вэ
Хүний хөхөнцөр вирусын эсрэг вакциныг 11-12 насны охид хөвгүүдэд хийхийг зөвлөдөг. Уг вакциныг 9 настайгаас эхлэн хийж болдог байна. АНУ-ын Өвчний хяналт, урьдчилан сэргийлэх төвөөс 11 ба 12 настай бүх хүүхдүүдэд 6 сарын зайтай хүний хөхөнцөр вирусын вакциныг 2 тунгаар хийлгэхийг зөвлөдөг байна. 9-10, 13-14 насны өсвөр насныхан мөн тунгаар хуваарийн дагуу хийлгэж болно. Судалгаанаас харахад 2 тун нь 15-аас доош насны хүүхдэд үр дүнтэй бол түүнээс дээш насныханд (16-26 нас) үр дүнтэй бол 3 тун вакцин хийх хэрэгтэй гэж зөвлөдөг байна.
Тод индэр
Монгол Улсын Ерөнхийлөгч У.Хүрэлсүх Ялалтын баярын ёслолд оролцлоо
Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх ОХУ-ын Ерөнхийлөгч В.В.Путины урилгаар Аугаа их Эх орны дайны ялалтын түүхт 80 жилийн ойн баярын цэргийн хүндэтгэлийн ёслолд оролцлоо.
Ялалтын баярын жагсаалд ОХУ-ын 11 мянга гаруй цэргийн алба хаагч, Монгол Улс, БНХАУ, Азербайжан, Беларусь, Тажикстан, Казахстан, Туркменистан, Кыргызстан, Египет, Узбекистан, Вьетнам, Лаос, Мьянмар зэрэг 13 орны 1,500 гаруй цэргийн алба хаагч оролцлоо.
28 офицер, 50 ахлагч, цэргийн гэрээт хоёр алба хаагчаас бүрдсэн Монгол Улсын Зэвсэгт хүчний бие бүрэлдэхүүний жагсаалыг 032 дугаар ангийн захирагч, дэд хурандаа Э.Билэгсайхан ахаллаа.
Алба хаагчид өнгөрсөн сард ОХУ-ын Батлан хамгаалах яамны харьяа “Звенигородский” цэргийн амралт, сувиллын газар Казахстан, Тажикстан, Туркменистан улсын цэргийн багтай хамтран бэлтгэлээ хийжээ.
Монгол Улс, монголын ард түмэн дайны эхний өдрөөс “Бүхнийг фронтод, бүхнийг ялалтын төлөө” уриан дор хөдөлмөрлөж, Зөвлөлт Холбоот Улс, Улаан армид “Хувьсгалт Монгол” танкийн цуваа, “Монгол ард” нисэх хүчний эскадриль, 500 мянган агт морьдоос гадна зургаан удаа дулаан хувцас, хоол хүнс, бүхий 740 вагон тусламжийн бараа нийлүүлж, ялалтад өөрийн хувь нэмрээ оруулсан юм.
Тод индэр
Н.Мөнхбаяр: Сэлбэ дэд төвийн газар чөлөөлөлтөөс татгалзсан 30 орчим иргэн байна
Сэлбэ дэд төвийн гэр хорооллыг орон сууцжуулах төслийг Чингэлтэй дүүргийн 14, 18 дугаар хороо, Сүхбаатар дүүргийн 14 дүгээр хорооны нутаг дэвсгэрийн 158 га талбайд хэрэгжүүлж буй.
Энэ хүрээнд 2206 нэгж талбарыг чөлөөлөхөөс 1736 иргэнтэй нөхөн олговрын гэрээ байгуулж, нөхөх олговрыг олгоод байна.
Энэ талаар нийслэлийн Газар зохион байгуулалтын албаны Газар чөлөөлөх хэлтсийн дарга Мөнхбаяр “Сэлбэ дэд төвийн 158 га газрын нөлөөлөлд 2206 иргэний газар өртсөн. Өнгөрсөн оны гуравдугаар сарын 18-нд иргэдээс нийгэм, эдийн засгийн судалгаа болон санал асуулга авч, 70-аас дээш хувийн дэмжлэг авсан тул төслийн газар чөлөөлөлтийн ажлыг эхлүүлсэн. Өнөөдрийн байдлаар 1736 иргэнтэй нөхөн олговрын гэрээ байгуулж, иргэдийн мөнгийг дансанд нь шилжүүлсэн. Үүнээс 1562 айл байсан газрыг чөлөөлж цэвэрлээд байна” гэлээ.
Мөн газар чөлөөлөөгүй 280 орчим нэгж талбар үлдсэн бөгөөд үүний 30 орчим нь уг төслийг огт дэмжээгүй байна. Иймээс эдгээр иргэдтэй өдөр бүр уулзаж, сонсох ажиллагаа хийж байгааг хэллээ.
Тод индэр
Я.Чулуунхүү: Эзэнгүй нохой, муурыг барьж, иргэдийн аюулгүй орчинд амьдрах орчныг бүрдүүлж байна
Нийслэлийн иргэдийн эрүүл, аюулгүй орчинд амьдрах нөхцөлийг бүрдүүлэх зорилгоор эзэнгүй нохой, муур, мал амьтныг барьж, асрамжлах газарт байрлуулах ажлыг дөрөвдүгээр сарын 24-28-ны өдрүүдэд зохион байгуулж байна. Энэ талаар УБЗАА-ны Захиргаа, санхүүгийн удирдлагын газрын дарга Н.Отгонбаяраас тодрууллаа.
Тэрбээр “2025 онд НЗДТГ болон Улаанбаатар хотын Захирагчийн ажлын албанд эзэнгүй нохой, мууртай холбоотой гомдол олноороо ирсэн. Тиймээс нийслэлийн Засаг даргын захирамжаар эзэнгүй нохой, муурыг эзэнжүүлэх, түр асрах байранд хүргэх, анхан шатны вакцин хийх, туулга өгөх, үржлийг хязгаарлах үйлчилгээ үзүүлж байна. Нохой, муур барих ажилд нийслэлийн зургаан дүүргийн онцгой, цагдаагийн албан хаагчид болон УБЗАА, нийслэлээс холбогдох албаныхан 1000 гаруй хүн ажиллаж байна. Энэ удаагийн байршил СХД-ийн 20 дугаар хорооноос эхэлж, Туулын бургаснаас хойш самнах ажиллагаа явуулж байна” гэлээ.
Сонгинохайрхан дүүргийн 20 дугаар хорооны Засаг дарга Я.Чулуунхүү “Нийслэлийн Засаг даргын захирамжаар нохой, муур барих, эзэнжүүлэх арга хэмжээ 20 дугаар хороонд хоёр дахь өдрөө үргэлжилж байна. Манай хороо гэр хороолол, байшин хороолол, үйлдвэрлэлийн бүс ихтэй. Үйлдвэрлэлийн бүсэд эзэнгүй нохой, муур олон байдаг. Бага насны хүүхдүүдийг хичээл сургуульдаа явахад айлгадаг. Тиймээс нохой, муур барих ажил иргэдийн аюулгүй орчинд амьдрах нөхцөлийг бүрдүүлэх чухал ач холбогдолтой” гэв.
