Хэн юу хэлэв...
УНТЭ: Эрт илрүүлгийг эрчимжүүлэх эмч нарын багийн түрүүч замд гарлаа
Эрүүл мэндийн сайд С.Чинзориг өнгөрсөн сарын 17-ны А/256 тоот тушаал гаргаж эрт илрүүлэх үзлэг, шинжилгээ, оношлогоог эрчимжүүлэх үүргийг бүх шатны эрүүл мэндийн байгууллагуудын удирдлагуудад өгсөн.
Уг тушаалаар хүн амыг нас, хүйс, эрүүл мэндийн эрсдэлд суурилсан зонхилон тохиолдох халдварт болон халдварт бус өвчнөөс урьдчилан сэргийлэх үзлэг, шинжилгээ, оношлогоонд хамрагдалтыг нэмэгдүүлж, эрүүл мэндийн байгууллагын ачаалал, хүн амын тоо, алслагдсан байдал зэргийг харгалзан эрт илрүүлэг, урьдчилан сэргийлэх үзлэгт иргэдийг хамруулахыг орон нутгийн эрүүл мэндийн салбарынханд үүрэг болгосноос гадна орон нутгийн иргэдийг эрт илрүүлэгт хамруулан, мэргэжлийн арга зүйгээр хангах төрөлжсөн мэргшлийн эмч, эмнэлгийн мэргэжилтний бүрэлдэхүүнтэй явуулын багийг аймгуудад ажиллуулахаар болсон бил. Энэ хүрээнд Улсын нэгдүгээр төв эмнэлгийн эмч нарын эхний баг өнөөдөр орон нутгийг зорилоо.
Тус эмнэлэг Говьсүмбэр, Дархан-Уул, Дорноговь, Дундговь, Өмнөговь, Сэлэнгэ, Төв аймагт ажиллах бөгөөд эхний ээлжийн баг Сэлэнгэ, Дархан-Уулын иргэдэд эрт илрүүлэх үзлэг, шинжилгээ оношлогоо хийх юм. Энэ талаар УНТЭ-ийн ерөнхий захирал Б.Хишигжаргалаас тодрууллаа.
-Эрт илрүүлэг, урьдчилан сэргийлэх үзлэгийг эрчимжүүлэх Эрүүл мэндийн сайдын тушаалыг хэрэгжүүлэх хүрээнд УНТЭ хариуцаж авсан аймгуудынхаа Эрүүл мэндийн газруудтай холбогдож эрт илрүүлэг, урьдчилан сэргийлэх үзлэгийг дэмжиж ажиллахаар эхний багаа өнөөдрөөс замд гаргалаа. Манай эмч нарын явуулын баг энэ удаа Дархан-Уул, Сэлэнгэ аймгийн Сүхбаатар, Мандал сумаар тойрч ажиллах юм. Ирэх есдүгээр сараас өмнө хариуцсан долоон аймгаа бүрэн тойрч орон нутгийн эмнэлгүүдийг хүний нөөц, багаж төхөөрөмжөөр дэмжиж ажиллах төлөвлөгөөтэй байгаа.
-Танай эмнэлэгт эрт илрүүлэг, урьдчилан сэргийлэх үзлэг хэр эрчимтэй явж байгаа вэ?
-Манай эмнэлэгт орон нутгийн болон нийслэлийн Чингэлтэй, Сүхбаатар дүүргийн таван хорооны иргэд эрт илрүүлэгт хамрагдаж байгаа. Хамрагдалт өндөр хувьтай, эрт илрүүлэгт хамрагдая гэсэн байгууллага, хувь хүмүүс олон байна. Үүнийг аль болох дэмжиж урьдчилан сэргийлэх үзлэгт хамруулж байгаа.
-Аль насны хүмүүс эрт илрүүлэгт идэвхтэй хамрагдаж байна?
-Эрт илрүүлэгт өндөр настнууд идэвхтэй хамрагдаж, залуучууд ажлын зав чөлөө болон бусад шалтгаанаар хойрго хандаж байна уу гэж харагдаж байгаа.
-Танайх эрт илрүүлэг, үзлэг, оношлогооны багаж тоног төхөөрөмж, хүний нөөц хэр хангалттай вэ. Иргэдэд хүлээх, цаг олдохгүй байх зэрэг хүндрэл гарч байна уу?
-УНТЭ-ийн хувьд Эрүүл мэндийг дэмжих төв дээрээ эрт илрүүлэг, үзлэгийг зохион байгуулдаг. Хүний нөөц, оношлогоо, шинжилгээний багаж, тоног төхөөрөмж бүрэн хангагдсан. Бид өнгөрсөн оны тавдугаар сарын 1-нээс эхэлсэн эрт илрүүлэгт зориулж ходоодны дуран хоёр ширхэг, ЭХО, зүрхний цахилгаан бичлэгийн аппарат, нэмэлт хэрэгслийг эмнэлгийн нөөц боломжоор худалдаж авснаа ашиглаж байна. Иргэдийг аль болохоор чирэгдүүлэхгүй үйлчлэхэд анхаарч байна.
-Танай эмнэлгийн хариуцах аймгуудад эрт илрүүлэгт шаардлагатай хүн хүч, тоног төхөөрөмж хэр хүрэлцээтэй байдаг гэнэ. Нарийн мэргэжлийн эмч нар очоод ажиллахад боломжтой эсэхийг судалж үзэв үү?
-Орон нутагт улсын эмнэлгүүдтэй харьцуулахад хүний нөөц, тоног төхөөрөмж дутагдалтай байдаг ч өнгөрсөн жил ЭМЯ-аас бүх аймгийг нэгдсэн стандартын дагуу Эрүүл мэндийг дэмжих төвтэй болгосон. Тэдгээр төвүүдэд урьдчилан сэргийлэх эрт илрүүлэг явагдаж байгаа. Орон нутгийн нэг дутагдалтай зүйл нь алслагдсан сум, багийн малчид эрт илрүүлэгтээ муу хамрагдаж байгаа статистик тоо гарсан. Тийм учраас сайд тушаал гаргаад нэгдсэн эмнэлгүүд, аймгууд хүн амыг эрт илрүүлэгт хамрагдахыг дэмжиж ажиллах чиглэл өгсний дагуу бид аймгуудтай холбогдож эмч нараа илгээж байна.
Эрт илрүүлэгт иргэд маш сайн хамрагдах ёстой. Энэ нь Монгол Улсын Засгийн газраас хүн амынхаа эрүүл мэндийг хамгаалахад чиглэсэн бодлогын маш том ажил юм. Өмнө нь бүх хүнийг үзлэгт хамруулж байсан түүх байхгүй. Аливаа өвчнийг хүндрэхээс нь өмнө эрт оношлох, эрүүл мэндийн байдлыг нь үнэлэх, өвчлөлөөс урьдчилан сэргийлэх гэх мэт давуу талтай. Тиймээс иргэд өөрсдийн эрүүл мэндийн төлөө эрт илрүүлэгтээ идэвхтэй хамрагдахыг зөвлөж байна.
Хэн юу хэлэв...
Н.Учрал: Энэ онд нийслэлийн 80 байршилд ногоон өртөө байгуулна
Монгол Улсын Ерөнхий сайд Н.Учрал Түлш, эрчим хүчний хараат байдлыг бууруулах “Ногоон” тогтоолын хэрэгжилтийг эрчимжүүлж, хувийн хэвшил, аж ахуйн нэгжүүдийн дэвшүүлсэн саналыг сонсож зарим асуудлыг шийдвэрлэв.
Улаанбаатар хотын худалдааны танхим цахилгаан автомашины дэд бүтцийг хөгжүүлэх хөтөлбөр танилцууллаа.
Хоёр жилийн хугацаанд Улаанбаатар хот болон орон нутагт 500 орчим цахилгаан машин цэнэглэх ногоон өртөө барих тооцоолол гаргажээ.
COP-17 хурлаас өмнө цэнэглэх 40 станц байгуулна. 2030 он гэхэд Монгол Улсад 50 мянган цахилгаан машины эрэлт бий болно.
Таван жилд 300 сая литр шатахууны хэрэглээг халж, 200 сая ам.доллар хэмнэх тооцоолол гарчээ.
Тиймээс энэ ажлыг ганц компани биш хувийн хэвшлүүд хамтран хэрэгжүүлэх нь чухал. Сонирхсон аж ахуйн нэгж, компаниудад бүрэн нээлттэй. Улаанбаатар хотын худалдааны танхим холбох гүүр, платформ нь болж ажиллана гэж тус танхимын гүйцэтгэх захирал Б.Хаш-Эрдэнэ хэлэв.
Тус хөтөлбөрийн хүрээнд энэ жил Улаанбаатарт 80, орон нутагт 30 байршилд цахилгаан машины цэнэглэх станц суурилуулахаар төлөвлөжээ. Нийслэл болон орон нутагт аль байршлуудад цэнэглэх станцаа суурилуулахаа шийдвэрлэх шаардлагатайг хэллээ.
Цахилгаан машинтай иргэдийн 95 хувь нь гэртээ цэнэглэж байна. Хувийн хэвшлийн хөрөнгө оруулалтаар цэнэглэх 500 станц байгуулчихвал шөнийн цагаар цэнэглэхэд хямд үнэтэй байх ухаалаг төлбөрийн системийг нэвтрүүлэх юм байна. Цахилгаан машинтай жолооч нэг жилд долоон сая орчим төгрөг хэмнэнэ гэсэн тооцоо хийжээ.
Монгол Улсын Ерөнхий сайд Н.Учрал хувийн хэвшлээ дэмжинэ, өвөлжилтийн бэлтгэлийг зундаа хангана гэдгийг онцлоод Сангийн яам татварын нэг хувийн хөнгөлөлтөөр санхүүжилтийг шийдэх, зургаадугаар сарын 5-ны дотор гэрээ байгуулж, барилга угсралтын ажлыг эхлүүлэх, Нийслэл болон Зам, тээврийн яам 80 байршлаа яаралтай тогтоож өгөхийг тус тус үүрэг болгов.
Мөн Замын-Үүд-Улаанбаатар чиглэлд "Ногоон өртөө" буюу цахилгаан машин цэнэглэгч, кофе шоп, хоолны газар, дэлгүүр, 00 зэрэг цогц байгууламжтай байя. Хувийн хэвшлүүд хэрэгжүүлбэл татварын бодлогоор дэмжинэ. Бид газар олгоход бэлэн гэдгийг Ерөнхий сайд онцоллоо.
Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Улаанбаатарт 804 мянган автомашин бүртгэлтэй, 0.2 хувь нь цахилгаан машин. Бид цахилгаан машины тоог нэмэгдүүлэх шаардлагатай. Хувийн хэвшилтэй хамтран ажиллахад баяртай байна, дэмжиж ажиллана. 80 байршлыг Зам, тээврийн яамтай хамтран шуурхай тогтоохоо илэрхийллээ.
Засгийн газраас 2026 оны 4 дүгээр сарын 29-ны өдөр баталсан Түлш, эрчим хүчний хараат байдлыг бууруулах Ногоон тогтоолын хүрээнд мөн таван байршилд батарей хуримтлуур, нарны станц байгуулах ажлыг гүйцэтгэх сонирхлоо 100 гаруй аж ахуйн нэгж илэрхийлжээ.
Хэн юу хэлэв...
“Эрдэнэс Монгол” нэгдлийн харьяа 10 компанийг татан буулгаж, давхардсан орон тоог танаж 67,3 тэрбум төгрөг хэмнэлээ
Засгийн газрын ээлжит хуралдаан 2026 оны тавдугаар сарын 27-нд болж дараах шийдвэрийг гаргалаа. “Эрдэнэс Монгол” нэгдлийг Үндэсний баялгийн сангийн тухай хуульд заасан үндсэн чиг үүрэгт бүрэн шилжүүлэх хүрээнд “Эрдэнэс Монгол” нэгдлийг “Чингис хаан Үндэсний баялгийн сан корпораци” болгон өөрчлөн зохион байгуулах шийдвэрийг Засгийн газрын хуралдаанаас гаргалаа.
Энэ хүрээнд тус нэгдлийг уул уурхайн салбарын хяналт, удирдлагын уламжлалт бүтэцтэй байгууллагаас төрийн өмчийн хөрөнгийн удирдлага, хөрөнгө оруулалт, баялгийн сангийн менежмент, IPO болон хувьчлал хариуцсан олон улсын жишигт нийцсэн санхүүгийн мэргэжлийн институт болгон үе шаттайгаар шинэчилнэ.
Ингэснээр төрийн өмчит уул уурхайн компаниудын хөрөнгийн удирдлага сайжирч, байгалийн баялгийн өгөөжийг иргэдэд илүү хүртээмжтэй, урт хугацааны өгөөжтэй байдлаар хүргэх нөхцөл бүрдэнэ.
Мөн “Эрдэнэс Монгол” нэгдлийн харьяанд үйл ажиллагааны чиг үүрэг нь давхардсан, үр ашиг багатай 10 хүртэл компанийг нэгтгэх, татан буулгах, харин олборлолт эрхэлдэг, ашигтай ажилладаг, олон улсын гэрээ, стратегийн ач холбогдол бүхий компаниудын үйл ажиллагааг хэвийн үргэлжлүүлэх үүрэг чиглэлийг Ерөнхий сайд Н.Учрал “Эрдэнэс Монгол” нэгдлийн удирдлагад өглөө.
Урьдчилсан тооцоогоор энэхүү шинэчлэлийн үр дүнд:
•260 орчим орон тоог оновчтой болгож,
•захиргааны зардлыг 10 хувь,
•түрээсийн зардлыг 30 хувь бууруулж,
•нийт 67.3 тэрбум төгрөгийн зардлын хэмнэлт гаргахаар тооцоолж байна.
Засгийн газрын хуралдаанаас дээрх шинэчлэлтэй холбоотой шийдвэр, тогтоолуудыг ирэх сарын 15-ны дотор эцэслэн боловсруулж, баталгаажуулах үүрэг чиглэл өглөө.
Түүнчлэн “Эрдэнэс Монгол” нэгдлийн удирдлагын зүгээс төрийн өмчит уул уурхайн компаниуд өндөр үнэтэй шилэн оффисуудад өндөр түрээс төлөх бус, төрийн ашиглалт багатай үл хөдлөх хөрөнгө, оффисын нөөцийг илүү үр ашигтай, хэмнэлттэй ашиглах зарчмыг хатуу баримталж ажиллаж байгаагаа илэрхийллээ.
Хэн юу хэлэв...
Монгол Улсын Үндсэн хуулийн цэцийн их суудлын хуралдаан болов
Монгол Улсын Үндсэн хуулийн цэцийн их суудлын хуралдаан болов. Монгол Улсын Үндсэн хуулийн цэцийн 2026 оны 05 дугаар сарын 27-ны өдрийн их суудлын хуралдаанаар Улсын Их Хурлаас 2021 оны 01 дүгээр сарын 15-ны өдөр баталсан Монгол Улсын шүүхийн тухай хуулийн 36 дугаар зүйлийн 36.7 дахь хэсгийн “Улсын дээд шүүхийн Ерөнхий шүүгчийг Улсын дээд шүүх санал болгосноос хойш Ерөнхийлөгч 14 хоногийн дотор зургаан жилийн хугацаагаар, зөвхөн нэг удаа томилно.” гэсэн заалтын “… зөвхөн нэг удаа …” гэсэн хэсэг нь Монгол Улсын Үндсэн хуулийн цэцийн 2016 оны 12 дугаар дүгнэлтийн дагуу хүчингүй болсон зохицуулалтыг агуулгаар нь дахин сэргээсэн гэж үзэн Монгол Улсын шүүхийн тухай хуулийн 36 дугаар зүйлийн 36.7 дахь хэсгийн “… зөвхөн нэг удаа …” гэсэн хэсгийг хүчингүй болгон шийдвэрлэж, Үндсэн хуулийн цэцийн 2026 оны 03 дугаар тогтоол гаргалаа гэж Монгол Улсын Үндсэн хуулийн цэцээс мэдээллээ.
