Тод мэдээ
“Монгол Хьюндай автомотив” ХХК барилгын суурь ухсанаас үүдэж, хажуу талын 20 давхар орон сууцад нуралт ҮҮСЧ, НУРАХ ЭРСДЭЛД оржээ
Тодруулбал, ХУД-ийн нутаг дэвсгэр, Тэмээтэй хөшөөний хажууд байрлах “Режис плэйс” орон сууцанд тулгаж баригдаж буй барилга нь оршин суугчдын эрхийг ноцтой зөрчиж байгаа гэжээ.
Тус барилгын эзэмшигч нь “Монгол Хьюндай автомотив” ХХК бөгөөд гүйцэтгэгчээр Шарк Ц.Батбаатарын компани ажиллаж байгаа аж. Тэд үйлдвэр, үйлчилгээний зориулалтаар барилга барьж байгаа бөгөөд ингэхдээ Барилгын тухай хуулийн 14 дүгээр зүйлийн хэд хэдэн зүйл заалтыг нойцтойгоор зөрчсөн гэж оршин суугчид үзэж байгаа юм байна. Иймд “Режис плэйс” орон сууцны оршин суугчид БХБЯ-нд гомдол гаргажээ.
Гомдолд, “Монгол Хьюндай автомотив” ХХК-ийн барьж буй 20 давхар барилга баригдаж эхэлсэнээсээ хойш их хэмжээний шороо тоос босож, орчныг бохирдуулж, дуу чимээ ихээр гаргаж, хөрсний усыг усны суваг руу урсгах болсон.
Үүний улмаас ойр орчимд оршин суух иргэдийн амгалан тайван байдал алдагдаж, эрүүл мэндэд ноцтой хохирол учрах эрсдэл бий болсон.
Мөн Нийслэлийн Хот байгуулалт, хөгжлийн газраас 2021 онд “Монгол Хьюндай автомотив” ХХК-д Барилгын тухай хууль, Барилга байгууламжийн норм, норматив, дүрэм, стандарт, журмыг ноцтой зөрчин, Архитектур төлөвлөлтийн даалгавар олгосон.
Тэр ч бүү хэл уг барилгыг Хан-Уул дүүргийн 15-р хороонд байрлах “Режис плэйс” орон сууцанд тулгаж барихаар төлөвлөсөн нь Барилгын тухай хуулийн 14 дүгээр зүйлийн хэд хэдэн зүйл заалтыг нойцтойгоор зөрчсөн бөгөөд тус барилгын суурьт суулгалт өгч, нурах эрсдэлийг бий болгосон” гэжээ.
Тэгвэл “Режис плэйс” орон сууц нь газар доор В3 буюу 3 давхар автомашины зогсоолтой ба газрын гүн рүү 20 орчим метрийн суурьтай. Харин “Монгол Хьюндай автомотив” ХХК-ийн барьж буй барилга нь газрын гүн рүү В1 буюу 1 давхар автомашины зогсоолтой байхаар төлөвлөгдсөн нь “Режис плэйс” барилгын суурь сөрөг нөлөө үзүүлэх нөхцөлийг бүрдүүлсэн гэжээ. Тиймээс тус орон сууцад оршин суух иргэд гомдолтой байгаа төдийгүй барилга барих зөвшөөрөл олгохдоо хөрш залгаа иргэд, оршин суугчдаас санал авалгүйгээр барилгын ажил эхлүүлснийг хууль зөрчсөн үйлдэл гэж үзэж байгаа юм байна.
Гэтэл энэ нь дан ганц анхаарал татсан асуудал биш юм. Учир нь, тус барилгын зөвшөөрлийг Туул голын ай савд хамаарах хөрсний ус ихтэй газар олгосон байна
Үүний улмаас барилгын суурийг ухах явцад газар доороос их хэмжээний хөрсний ус гарч, нуур, цөөрмийн хэмжээтэй болж тогтсон ч барилгын ажил үргэлжилсээр байгаад иргэд бухимдалтай байна.
Гэтэл Нийслэлийн Хот байгуулалт, хөгжлийн газраас 2021 онд “Монгол Хьюндай автомотив” ХХК-д Архитектур төлөвлөлтийн даалгаварт хөрсний усны аюулаас сэргийлэх, хамгаалалт хийх талаар огт тусгаагүйн дээр тус компани нь хөрсний усны аюулаас сэргийлэх хамгаалалт, аюулгүй байдлын ямар ч арга хэмжээ авахгүй, их хэмжээний устай ухсан нүх гаргасан байдалтайгаар ажиллаж байгаагаас гадна хөрсний усыг бохирын худаг руу юүлж байгаа нь ойр орчмын барилгын бохир зайлуулах худаг дүүрч бөглөрөх аюулыг бий болгожээ.
Мөн Тус барилгын ажлыг эхлүүлэх, Архитектур төлөвлөлтийн даалгавар олгох, Ерөнхий төлөвлөгөөний зургийг батлахдаа “Гол гудамж замын зорчих хэсгийн ирмэгээс барилгажилтын улаан шугам хүртлэх зай 50 м-ээс багагүй байна” гэж заасныг зөрчсөөр байхад зөвшөөрөл олгосон нь уг зөвшөөрлийг өгсөн эрх бүхий албан тушаалтан, алба хаагчид тус компанид хууль бус давуу байдал бий болгож, албан тушаалын байдлаа урвуулан ашигласан гэж хардах шууд үндэслэлийг бий болгож байгаа аж.
Тиймээс борооны улмаас иргэд эд хөрөнгө, сэтгэл санаагаараа хохирч байгаа энэ цаг үед дахин хохирол учруулахгүйн үүднээс Ерөнхий сайд, Хотын дарга нар шуурхай арга хэмжээ авч ажиллаж байна. Гэтэл дайран дээр давс гэгчээр “Авлига” хороолол гэх “Усан парк”, S outlet зэрэг компаниудын асуудлыг шийдээгүй байтал дахин нэг компани 20 давхар орон сууцны оршин суугчдыг эрсдэлд оруулаад байна. Тиймээс “Монгол Хьюндай Автомотив” ХХК-ийн Архитектур төлөвлөлтийн даалгаврыг хүчингүй болгож, хууль зөрчиж бусдад хууль бус давуу байдал олгосон эрх бүхий албан тушаалтан, алба хаагчдад хариуцлага хүлээлгэж өгөхийг оршин суугчдын зүгээс хүсэж байна.
Эх сурвалж: https://ubn.mn/
Тод мэдээ
К.Комлан: Агаарын бохирдлыг бууруулах, хүүхдийн суралцах орчныг сайжруулахад хамтарч ажиллах хүсэлтэй байна
Нийслэлийн ИТХ-ын дарга А.Баяр “Бүхнийг хүүхдийн төлөө” уриатай Монгол дахь НҮБ-ын Хүүхдийн сангийн Суурин төлөөлөгч Эваристе Коуасси-Комлантай уулзлаа. Нийслэлийн ИТХ-ын дарга А.Баяр “Хүүхдийн эрүүл мэндийн чиглэлээр Монгол Улсын 21 аймаг, 330 суманд хүрч ажилласан эрхэмтэй дахин уулзсандаа баяртай байна гэдгийг тэмдэглээд, Монгол хүүхдүүд эрүүл аюулгүй орчинд амьдарч, сурч хөгжих хууль эрх зүйн орчныг сайжруулахын төлөө хамтран ажиллахад бэлэн байгаагаа илэрхийллээ. Ноён Эваристе Коуасси-Комлан “Монгол Улсад агаар, ус, хөрсний бохирдлын улмаас хүүхдийн эрүүл, аюулгүй орчинд амьдрах эрх байнга зөрчигдөж байгааг онцоллоо. Тэрбээр, Монголд хүүхэд, жирэмсэн эмэгтэйчүүдийн дунд D витамин болон хоол тэжээлийн дутлаас үүдсэн архаг цус багадалт их байгаа нь бусад өвчинд өвчлөмтгий байх суурь нөхцөл болж байна. Мөн сэтгэцийн эрүүл мэндийг сайжруулах чиглэлд ажиллах зайлшгүй шаардлага бий. Тиймээс агаарын бохирдлыг бууруулах, хүүхдийн суралцах болон амьдрах орчныг сайжруулах, эрүүл Монгол хүний төлөө хамтарч ажиллах хүсэлтэйгээ илэрхийллээ.
НҮБ-ын Хүүхдийн Сангийн Суурин төлөөлөгч Эваристе Коуасси-Комлан, монгол хүүхдүүдэд тулгарч буй асуудал, боловсролын тэгш бус хүртээмж, хоол тэжээлийн дутагдал, эрүүл мэндийн тусламж үйлчилгээ, эмийн чанар, хүчирхийлэлгүй, айдасгүй, аюулгүй орчин гэх мэт хот, хөдөөгийн хүүхдүүдийн бодит нөхцөл байдлын талаарх судалгаа, мэдээллийг танилцууллаа.
Нийслэлийн ИТХ-ын дарга А.Баяр “Эрүүл, аюулгүй, хүчирхийлэлгүй өрх айл бол Монголын хамгийн том баялаг. Тиймээс хүүхэд, гэр бүл рүү чиглэсэн хамтын ажиллагаагаа өргөжүүлэх хүсэлтэй байна. Мөн утааг бууруулах богино хугацааны зорилгод 20 мянган айлыг яндангүй болгохоор LPG газ руу шилжүүлэх ажил эхэлсэн. Цаашид яндангүй айлын тоог 50 мянгад хүргэх, 10 мянган өрхийг нарны панелжуулах зэрэг утааг бууруулах, эрчим хүчний олон талт эх үүсвэртэй холбох чиглэлд хамтарч ажиллах хүсэлтэй байгаагаа илэрхийллээ. Суурин төлөөлөгч Эваристе Коуасси-Комлан “Бодлогын төлөөллийн чиглэлээр манлайлж ажиллахыг А.Баяр даргаас хүсээд, хүүхдийн эрхийг хангах, аюулгүй, эрүүл аж төрөх суурь нөхцөл болсон бүхий л санал санаачилга, бодлого ажиллагаанд олон улсын туршлага, техникийн туслалцаа дэмжлэг үзүүлэхэд бэлэн” гэв.
Тод мэдээ
Бог малын мялзан өвчний идэвхгүй тандалт хийлээ
Мал эмнэлгийн газрын даргын тушаалын хэрэгжилт, бог малын мялзан өвчин дамжин тархахаас урьдчилан сэргийлэх, халдварыг эрт илрүүлэх зорилгоор мал эмнэлгийн тасгийн мэргэжилтнүүдтэй хамтран бог малын мялзан өвчний шинж тэмдэгт суурилсан идэвхгүй тандалтыг зохион байгууллаа.
Тандалтад аймгийн хэмжээний нийт малчин өрхийн 23 хувь буюу 18 сумын 1856 малчин өрх хамрагдаж, асуумж судалгаагаар Баян-Уул сумын Баянбогд багийн 1 малчин өрхийн 199 хонь, 170 ямаа, нийт 369 бог малд эмнэл зүйн үзлэг хийхэд шинж тэмдэг илрээгүй гэж Говь-Алтай аймгийн Мал эмнэлгийн газраас мэдээллээ.
Тод мэдээ
“Сар шинэ-2025” үзэсгэлэн худалдаа эхэллээ
Сар шинийн баярыг тохиолдуулан үндэсний үйлдвэрлэлийг дэмжих, гол нэрийн хүнсний бүтээгдэхүүний хангамжийг нэмэгдүүлэх, дундын зуучлалгүйгээр хэрэглэгчдэд хүргэх, өрхийн орлогыг нэмэгдүүлэх зорилгоор Сонгинохайрхан дүүргийн Засаг даргын Тамгын газраас “Сар шинэ-2025” цагаан сарын үзэсгэлэн худалдааг зохион байгуулж байна.
Үзэсгэлэн худалдаанд дүүргийн 75 иргэн аж ахуйн, нэгж байгууллагууд 20 гаруй төрлийн хоол үйлдвэрлэл үйлчилгээ, бэлэн хувцас, үндэсний дээл, бэлэг дурсгалын бараа бүтээгдэхүүнийг худалдан борлуулж байна.
Үзэсгэлэн худалдаа 2 дугаар сарын 25-ны өдрийг дуустал 10:00-21:00 цагийн хооронд Сонгинохайрхан дүүргийн 29 дүгээр хороо NC builing “Та Чи” мартын хоёр давхарт зохион байгуулагдана. “Сар шинэ-2025” үзэсгэлэн худалдааны хамтран зохион байгуулагчаар Хөдөлмөр, халамжийн үйлчилгээний хэлтэс, жижиг дунд үйлдвэрийг дэмжих мэдээлэл сургалтын төв, жаргалант тосгоны Соёлын ордон, тохижилт цэвэрлэгээ үйлчилгээ, орон нутгийн өмчит, аж ахуйн тооцоот үйлдвэрийн газар, “Та Чи” ХК хамтран ажиллаж байна. Иргэд та бүхнийг “Сар шинэ-2025” цагаан үзэсгэлэн худалдаанд өргөнөөр оролцохыг урьж байна.
СОНГИНОХАЙРХАН ДҮҮРГИЙН ЗДТГ
