Тод мэдээ
Ерөнхийлөгч Х.Баттулга Хэнтий аймагт ажиллаж байна
Монгол Улсын Ерөнхийлөгч Халтмаагийн Баттулга өнөөдөр Хэнтий аймагт ажиллаж байна.
Энэ үеэрээ Хөдөлмөр, нийгмийн хамгааллын яамны харьяа Хэнтий аймаг дахь Политехник коллежоор зочилж, үйл ажиллагаатай нь танилцлаа.
50 жилийн түүхтэй Хэнтий аймаг дахь Мэргэжлийн сургалт, үйлдвэрлэлийн төв 2019 онд магадлан итгэмжлэгдэж, политехник коллеж болон өргөжсөн байна. 2020-2021 оны хичээлийн жилд тус коллеж нь нийт 460 гаруй суралцагч, 75 багш ажилтантайгаар сургалтын үйл ажиллагаа явуулж буй бөгөөд төгсөгчдийн 40 хувь нь ажлын байртай болж байгаа хэмээн Монгол Улсын Ерөнхийлөгчид танилцууллаа.
Тухайлбал, өнгөрсөн хугацаанд тус коллеж нь талх, нарийн боов үйлдвэрлэлийн технологийн ажилтан, тогооч, оёмол бүтээгдэхүүний оёдолчин, бэлэг дурсгалын зүйл урлаач, үсчин, нарийн бичгийн дарга-албан хэргийн ажилтан, хэвлэлийн график дизайнч, ойжуулагч, барилгын засал-чимэглэлчин, бетон арматурчин, гагнуурчин, автомашины засварчин, хүлэмжийн аж ахуйн фермер, хоол үйлдвэрлэл, үйлчилгээний техник-технологич, аюулгүй ажиллагааны техникч зэрэг 15 чиглэлээр 11 мянга гаруй суралцагчдад мэргэжлийн боловсрол эзэмшүүлжээ.
Монгол Улсын Ерөнхийлөгч Халтмаагийн Баттулга тус коллежийн оёмол бүтээгдэхүүний оёдолчин, барилгын мужаан, барилгын засал чимэглэлчин, гагнуурчин, барилгын сантехник зэрэг мэргэжлийн дадлагын газруудаар зочилж, сургалтын явцтай танилцлаа.
Тухайлбал, Монгол Улсын Ерөнхийлөгчийг гагнуурчин мэргэжлийн дадлагын газраар зочлох үеэр багш Б.Батсайхан гагнуурын кабинетаа танилцуулав. Тус нарийн мэргэшлээр 23 оюутан суралцаж байна. Хоёр эмэгтэй оюутан суралцаж байгаагийн нэг нь 15 настай н.Мандахтуяа юм.
Монгол Улсын Ерөнхийлөгч Халтмаагийн Баттулга 15, 16 настай хүүхдүүд хөдөлмөрийн үнэ цэнийг ойлгож, чадварлаг, мэргэжлийн боловсон хүчнийг бүрдүүлэхийн төлөө идэвхийлэн суралцаж байгааг сайшааж, цаашид хичээлдээ цахим контент, технологийн дэвшлийг сайтар ашиглан шинэлэг хэлбэрээр суралцаж, багш нарынхаа эрдэм чадварыг сайтар эзэмшихийн төлөө хичээхийг захилаа. Түүнчлэн суралцагчдын бүтээл, бүтээгдэхүүнийг борлуулалттай холбож, хөдөлмөрийн үр шимээ мэдрэх боломж олгохын тулд идэвх санаачилгатай ажиллахыг коллежийн удирдлагаас хүслээ.
Хэнтий аймгийн дөрвөн ээж төрсөн өдрөөрөө “Эхийн алдар” одон хүртлээ
Монгол Улсын Ерөнхийлөгч Халтмаагийн Баттулга өнөөдөр Хэнтий аймагт ажиллах үеэрээ тус аймагт амьдардаг ээжүүдэд “Эхийн алдар” одон гардууллаа.
Хэнтий аймаг 77 мянган хүнтэй бөгөөд тус аймгаас энэ жил 292 ээж, үүнээс “Эхийн алдар” Нэгдүгээр зэргийн одонг 20, Хоёрдугаар зэргийн одонг 272 ээж тус тус хүртсэн юм.
Эдгээр ээжүүдийн дотор энэ жил “Эхийн алдар” одонгоо зэрэг гардан авч байгаа 33 настай ихрүүдийн нэг, Баянхутаг сумын иргэн Маамаа-Аюурын Мөнхсувд байгаа юм.
Түүнчлэн өнөөдөр төрсөн өдөр нь тохиож байгаа Батширээт сумын иргэн Болдбаатарын Банзрагч, Хэрлэн сумын иргэн Баатарзоригийн Нарантуяа, Баянмөнх сумын иргэн Маналжавын Гэрэлмаа, Норовлин сумын иргэн Самбуугийн Анхзаяа нар Монгол Улсын Ерөнхийлөгчөөс “Эхийн алдар” одонгоо гардан авлаа.
Монгол Улсын Ерөнхийлөгч Халтмаагийн Баттулга одон гардуулсныхаа дараа ээжүүдэд хандан:
“Элбэрэлт эхчүүд ээ, Монголын сайхан ээжүүд ээ,
Та бүхэнд энэ өдрийн мэндийг дэвшүүлж, монголын ирээдүй хойч үе болох хүүхэд, багачуудыг халамж хайрандаа өлгийдөн өсгөн торниулж байгаад тань халуун талархал илэрхийлье.
Ээж хүний үрдээ өгч буй хайр, энэрлийг юугаар ч орлуулж болдоггүйн адил ээжийгээ гэсэн үрийн сэтгэлийг ямар ч сайхан, уран үгээр гүйцэд илэрхийлэхэд хэцүү. Гэхдээ хүн бүрийн ээждээ хэлж амжаагүй үг, илэрхийлж чадаагүй сэтгэлийг эвлүүлэн нэгтгэж, 6 ба 4 хүүхэд төрүүлж өсгөсөн ээжүүдэд Монгол Улсын Ерөнхийлөгчийн зарлигаар Нэг, Хоёрдугаар зэргийн “Эхийн алдар” одон гардуулж, хүндэтгэл үзүүлдэг сайхан уламжлалтай билээ.
Энэ сайхан уламжлалыг үргэлжлүүлж, 2020 онд улсын хэмжээнд 10,677 ээжид “Эхийн алдар” одон хүртээх Монгол Улсын Ерөнхийлөгчийн зарлиг цаг хугацаандаа гарсан хэдий ч дэлхий дахинд тархсан цар тахлын улмаас хойшлогдож, сарын өмнөөс үе шаттайгаар гардуулж байна.
Эзэн Чингис хааны минь өлгий нутаг Хэнтий аймгаас энэ жил нийт 292, үүнээс “Эхийн алдар” Нэгдүгээр зэргийн одонг 20, “Эхийн алдар” Хоёрдугаар зэргийн одонг 272 ээж гардан авлаа.
Өнөөдөр одонгоо гардан авсан ээжүүдийн дотроос “Эхийн алдар” одонгоо энэ жил зэрэг гардан авч байгаа ихрүүдийн нэг, Баянхутаг сумын иргэн Маамаа-Аюурын Мөнхсувдыг энд онцлон тэмдэглэхийг хүсэж байна. Түүний ихэр Маамаа-Аюурын Мөнгөнсувд нийслэлийн Чингэлтэй дүүргийн ээжүүдийн хамт одонгоо гардан авсан юм. Мөн одоо одонгоо зүүж байгаа Батширээт сумын иргэн Болдбаатарын Банзрагч, Хэрлэн сумын иргэн Баатарзоригийн Нарантуяа, Баянмөнх сумын иргэн Маналжавын Гэрэлмаа, Норовлин сумын иргэн Самбуугийн Анхзаяа нарт төрсөн өдрийн мэнд хүргэж, аз жаргал, эрүүл энхийг хүсэн ерөөе!
Хэзээнээс хүн ам цөөтэй явж ирсэн Монгол Улс хүн амаа өсгөх бодлогоо тууштай баримталж, үүндээ хүүхэд хамгааллын асуудлыг нэн тэргүүний зорилт болгон хэрэгжүүлэх ёстой. Нийгмийн үнэт баялаг болсон хүүхдүүдийг эрүүл, аюулгүй орчинд өсгөн бойжуулж, боловсролтой, зөв хандлагатай монгол хүн болгон хүмүүжүүлэхэд нь монголын төр эхчүүдэд бүх боломжоороо туслах учиртай. Эхчүүдийг дэмжинэ гэдэг монголын ирээдүйг хамгаалж байгаа хэрэг юм. Миний бие энэ чиглэлд хийж хэрэгжүүлсэн ажлаа үргэлжлүүлж, Улсын Их Хурал, Засгийн газрыг шахаж шаардаж ажиллах болно.
Өнөөдөр одонгоо гардсан Та бүхэнд болон Хан Хэнтий аймгийн бүх эхчүүд, бүсгүйчүүддээ төрийн нэрийн өмнөөс болон хувиасаа дахин халуун баяр хүргэж, эрүүл саруул, эрч хүчтэй байхын өлзийт ерөөлийг өргөн барья.
Монголын үрс маш олон болтугай!” гэв.
Олон хүүхэд төрүүлж өсгөсөн эхчүүдэд “Эхийн алдар” одон гардуулах тухай Монгол Улсын Ерөнхийлөгчийн зарлиг 2020 оны тавдугаар сарын 29-ний өдөр гарсан ч дэлхий даяар тархсан коронавируст цар тахлын нөхцөл байдлын улмаас одон гардуулах үйл ажиллагааг хойшлуулаад байсан билээ.
Улмаар одон гардуулах ёслолын үйл ажиллагааг коронавируст цар тахлын халдвараас урьдчилан сэргийлэх ариутгал, халдваргүйжүүлэлтийн дэглэмийн дагуу үе шаттайгаар зохион байгуулах шийдвэр гарсны дагуу Монгол Улсын Ерөнхийлөгч Халтмаагийн Баттулгыг орон нутагт ажиллах үеэр ийнхүү зохион байгуулж байна.
Монгол Улсын Ерөнхийлөгчийн Хэнтий аймаг дахь томилолт үргэлжилж байна.
Тод мэдээ
Т.Даваадалай: Улаанбаатар хотыг нэгдсэн стандарттай, хүртээмжтэй хот болгоход анхаарч ажиллаж байна
Хөгжлийн бэрхшээлтэй иргэдийн орчны хүртээмжийг нэмэгдүүлэх зорилгоор “Гэрээсээ гарцгаая” аяны хүрээнд УИХ-ын гишүүн О.Саранчулуун, нийслэлийн Засаг даргын нэгдүгээр орлогч Т.Даваадалай болон холбогдох албаныхан, хөгжлийн бэрхшээлтэй иргэдийн төлөөлөл Улаанбаатар хотын гудамж, замын нөхцөл байдлыг үнэлж, үйлчилгээний газрууд, нийтийн тээврээр үйлчлүүллээ. Энэ үеэр хөгжлийн бэрхшээлтэй иргэн Улаанбаатар хотод амьдрахад ямар бэрхшээл тулгардаг, тэдгээрийг хэрхэн шийдвэрлэх талаар хэлэлцэж, гаргалгааг ярилцлаа.
“Гэрээсээ гарцгаая” аяны хүрээнд 2.5 км замыг туулахдаа эхлээд үйлчилгээний байгууллагын нөхцөл байдалтай танилцлаа. Хөгжлийн бэрхшээлтэй иргэн, тэр дундаа тэргэнцэртэй иргэн дэлгүүр, хоолны газар зэрэг үйлчилгээний байгууллагаар үйлчлүүлэхэд орц, гарцын асуудал хамгийн их саад болдог. Ихэвчлэн налуу зам байдаггүй. Ороход хаалганы хөндлөвч төмөртэй хэсгүүд саад учруулж байлаа.
Үүний дараа Улаанбаатар хотын төвийн гудамжаар явган замын нөхцөл байдалтай танилцлаа. Улаанбаатар хотоос төвийн бүсийн гол, гудамж замын 15 байршилд 59.6 км явган замыг байгалийн чулуугаар жигдэлж, нэг стандарттай болгож байгаа нь бүх иргэнд ээлтэй, хүртээмжтэй байдлыг бий болгох зорилготой. УИХ-ын гишүүн О.Саранчулуун, нийслэлийн Засаг даргын нэгдүгээр орлогч Т.Даваадалай, хөгжлийн бэрхшээлтэй иргэдийн төлөөлөл хуучин явган замтай хэсгээр явахад эвдрэл, гэмтэл, доголтой хэсгүүд таарч байв. Хуучин явган замын хээтэй болон хөндлөн хийцүүд, эвдрэл нь хөгжлийн бэрхшээлтэй иргэн явах саад учруулдаг. Ийм замаар тэргэнцэртэй хүн удаан явахад бөөр өвддөг гэдгийг тэргэнцэртэй иргэд хэлж байв. Хүүхдийн тэрэгтэй явахад ч гэсэн хүндрэлтэй, донсолгоотой байдаг гэнэ. Харин байгалийн чулуугаар шинэчилж байгаа явган замууд нэг жигд учраас бэрхшээл байхгүй гэсэн юм.
УИХ-ын гишүүн О.Саранчулуун “Монголд хөгжлийн бэрхшээлтэй 10 хүн тутмын 6 нь олдмол бэрхшээлтэй байдаг. Хамгийн энгийн жишээг та бүхэн сая харлаа. Тэргэнцэртэй хүн үйлчилгээний газрууд руу ороход налуу зам байдаггүй. Хотын явган хүний зам нэгдсэн стандартгүй байгаа нь зорчиход хүндрэл үүсгэдэг. Бид Хөгжлийн бэрхшээлтэй хүний эрхийн тухай конвенцын хүрээнд хөгжлийн бэрхшээлтэй иргэдийн оролцоог дэмжиж ажиллах үүрэгтэй. Үүний нэг жишээ болгож “Гэрээсээ гарцгаая” аяныг хэрэгжүүлж байна. Биет байдлаар орчны хүртээмжийг хэрхэн сайжруулах вэ гэдэгт шалгуур үзүүлэлтүүдийг ийнхүү туршиж байна. Хөгжлийн бэрхшээлтэй хүний эрхийг хангах, амьдрах орчныг дээшлүүлэх зорилгоор нутгийн удирдлагын байгууллагуудын оролцоог сайжруулахын тулд 32 шалгуур үзүүлэлт бүхий 13 бүлэг төлөвлөгөөг тусгасан гарын авлагыг мөн боловсруулсан” гэдгийг хэллээ.
Нийслэлийн Засаг даргын нэгдүгээр орлогч Т.Даваадалай “Гэрээсээ гарцгаая” аяныг дэмжиж, 2.5 км газарт явган зам, үйлчилгээний байгууллагууд, нийтийн тээврээр зорчлоо. Хот гэдэг бол ганцхан хүнд зориулагдаагүй. Хот бүх хүнд тэгш, хүртээмжтэй орчин нөхцөлтэй байх ёстой. Улаанбаатар хотод хөгжлийн бэрхшээлтэй иргэдийн орчны хүртээмжийг сайжруулахад дутагдалтай зүйлс нэлээд ажиглагдлаа. Үйлчилгээний газрууд налуу замаа шийдэж өгөх хэрэгтэй. Нийтийн тээврийн жолооч нар хөгжлийн бэрхшээлтэй иргэнтэй хэрхэн харьцах, тэдэнд хэрхэн туслахад суралцмаар байна. Явган хүний замыг нэгдсэн стандартаар шинэчлэх нь чухал байна. Улаанбаатар хотын зүгээс нэгдсэн стандарттай, хүртээмжтэй хотыг бий болгоход уялдаа холбоотой ажиллана” гэдгийг тодотгов.
“Гэрээсээ гарцгаая” аяны хүрээнд дараагийн зогсоол нийтийн тээврээр үйлчлүүлэх байв. Тэргэнцэртэй иргэн нийтийн тээврээр үйлчлүүлэхэд орц, гарцын асуудал мөн хүндрэлтэй байдаг. Хөгжлийн бэрхшээлтэй иргэнд зориулсан буух товчлуурыг ашиглаж сурах, бууж, суух налуу замыг ашиглаж сурах хэрэгтэй. Үүний тулд нийтийн тээврийн жолооч нарыг сургалтад хамруулах ажлыг зохион байгуулах талаар аянд оролцогсод хэлэлцэв. Хөгжлийн бэрхшээлтэй иргэдийн хөдөлмөр эрхлэлтийг дэмжих төвийн гаднаас аяны маршрут өндөрлөж, хөгжлийн бэрхшээлтэй иргэдийн төлөөлөл санал бодлоо хуваалцаж, нийслэлийн Засаг даргын орлогч Т.Даваадалай, УИХ-ын гишүүн О.Саранчулуун нар санал хүсэлтүүдийг бодит ажил хэрэг болгоход гар бие оролцохоо илэрхийллээ.
Тод мэдээ
Зөвшөөрөлгүй ногоон байгууламжийг устгасан болон эзэмшил бүхий газраасаа хэтрүүлэн хашаа барьсан зөрчлийг арилгуулж байна
Нийслэлийн хэмжээнд нийтийн эзэмшлийн зам, талбайг зөвшөөрөлгүй сэтлэх, ногоон байгууламжийг устгах, эзэмшил бүхий газраасаа хэтрүүлэн хашаа барих зэрэг зөрчил илэрсээр байна. Тодруулбал, Хүннү 2222 хорооллын автобусны буудлын баруун талд “Хангилцаг” ХХК дулааны шугамын ажил гүйцэтгэхдээ ногоон байгууламжийг зөвшөөрөлгүй тайрч устгасан бол “Номин Реалтор” ХХК эзэмшил бүхий газраасаа хэтрүүлэн хашаа барьсан. Уг асуудалтай холбогдуулан нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалай болон холбогдох албаныхан тус байршилд ажиллалаа.
Монгол Улсын Засгийн газар, Дэлхийн банкны Олон улсын хөгжлийн ассоциацийн хамтарсан “Улаанбаатар хотын дулаан хангамжийн үр ашгийг нэмэгдүүлэх төсөл”-ийн хүрээнд Хан-Уул дүүргийн 18 дугаар хороо, Удирдлагын академийн гудамж “Хүннү 2222” хотхоны замын хойд талд “Хангилцаг” ХХК дулааны магистраль шугамын барилга угсралтын ажил гүйцэтгэж буй. Гэвч ажил гүйцэтгэх үеэрээ Хүннү 2222 хорооллын автобусны буудлаас баруун тийш 320 метр орчим урт зайд авто замын хажуугийн шар хуайс моддыг сүйтгэсэн. Тиймээс өнгөрсөн долоодугаар сарын 31-нд НХШГ-аас ногоон байгууламжийг зөвшөөрөлгүй тайрч устгасан “Хангилцаг” ХХК-д зөрчлийг арилгах хугацаатай мэдэгдлийг хүргүүлсэн. Ийнхүү өнөөдөр давтан хяналт шалгалт хийхэд тус аж ахуйн нэгжийн зүгээс ногоон байгууламжийн нөхөн сэргээлтийг хийж эхлүүлсэн бөгөөд ирэх аравдугаар сарын 1-нд мод тарина гэлээ.
Харин “Номин Реалтор” ХХК-ийн хувьд Хүннү 2222 хорооллын автобусны буудлын урд талд өөрийн эзэмшлийн газраасаа 2-3 метр зайд хашаагаа сунгаж, хэтрүүлэн барьсан. Иймээс нийслэлийн Газар зохион байгуулалтын албанаас зохих зөвшөөрөлгүй илүү талбай ашиглан, нийтийн эзэмшлийн зам, талбайд барьсан хашааг чөлөөлж, зөрчлөө арилгах хугацаатай мэдэгдлийг хүргүүлсэн юм. Гэвч мэдэгдэлд заасан хугацаанд зөрчлөө арилгаагүй юм.
Энэ талаар нийслэлийн Засаг даргын нэгдүгээр орлогч Т.Даваадалай “Хувийн аж ахуйн нэгжүүд кадастрынхаа дагуу барилгын ажлаа гүйцэтгэх хэрэгтэй. Өөрөөр хэлбэл нийтийн эзэмшлийн зам талбайг хумьж, явган хүн зорчиход хүндрэлтэй болгож болохгүй. Иймд “Номин Реалтор” ХХК нь мэдэгдэлд заасан хугацаанд газар чөлөөлөөгүй тохиолдолд Газрын тухай хуулийн 57 дугаар зүйлийн 57.4-т заасны дагуу газар албадан чөлөөлөх арга хэмжээ авч, холбогдох зардлыг гаргуулна. Мөн Газрын тухай хуулийн 40 дүгээр зүйлийн 40.1.1-т заасны дагуу газар эзэмших эрх, эрхийн гэрчилгээг хүчингүй болгох хүртэл арга хэмжээ авна” гэдгийг мэдэгдлээ.
Тод мэдээ
Нийслэлийн цэцэрлэгийн цахим бүртгэл өнөөдөр дуусна
Нийслэлийн хүүхдийн цэцэрлэгийн цахим бүртгэл үргэлжилж байна. 2025-2026 оны хичээлийн жилд улсын хэмжээнд 278,290 хүүхдийг сургуулийн өмнөх боловсролд хамруулах хэрэгцээ үүснэ. Үүний 135,582 хүүхэд нь нийслэлд хамаарна.
Нийслэлийн хүүхдийн цэцэрлэгийн бүртгэлийн системд наймдугаар сарын 15-ны байдлаар 104,031 хүүхдийн бүртгэлийг баталгаажуулжээ. Нийт хамрагдах хүүхдийн 76,7 хувь цахим бүртгэлээ баталгаажуулсан байна.
- Хоёр настай хүүхэд -22.762
- Гурван настай хүүхэд -24.693
- Дөрвөн настай хүүхэд -27.563
- Тав настай хүүхэд -29.031 бүртгүүлсэн байна. Цэцэрлэгийн цахим бүртгэл өнөөдөр дуусна.
Иргэд хүүхдээ цэцэрлэгт хамруулах үйлчилгээг авахдаа дараах зүйлсийг анхаарна уу.
- Өөрийн болон хүүхдийнхээ хаягийн бүртгэл, мэдээллийг нягталж, баталгаажуулсан байх;
- Таны хүүхэд өнгөрсөн жил цэцэрлэгт хамрагдсан бол тухайн цэцэрлэгтээ “Үргэлжлүүлж явах” эсэх сонголтыг хийх;
- Хэрвээ шилжилт хөдөлгөөнийг энэ хугацаанд хийх бол 2025 оны наймдугаар сарын 15-ны өдрөөс өмнө баталгаажуулсан байх ёстой аж.
-
Тод мэдээ2025/01/14
Уулзваруудын нэвтрэх чадварыг сайжруулах төслийн хүрээнд 13 байршлын уулзварыг ө...
-
Өнөөдөр2021/02/25
Истанбул-Улаанбаатар чиглэлийн нислэгээр 254 иргэн эх орондоо ирнэ
-
Тод мэдээ2024/03/05
“Улаанбаатар-Бүсчилсэн хөгжил” форум энэ сарын 14-нд болно
-
Тод зураг2020/11/12
Нийслэлийн Онцгой комисс хуралдаж, шийдвэрээ гаргалаа