Үйл явдал
Цаг агаарын аюултай үзэгдлээс сэрэмжлүүлж байна!
Дохио!!! Цаг агаарын аюултай үзэгдлээс сэрэмжлүүлэх мэдээ: Өнөөдөр Сэлэнгийн нутаг, Төв, Хэнтийн хойд хэсгээр их хэмжээний бороо орно.
Малчид, иргэд, тээвэрчдийн анхааралд: Ойрын 3 хоногтоо ихэнх нутгаар бороо, нутгийн зүүн хагаст үргэлжилсэн бороо орох тул болзошгүй үер усны аюулаас сэрэмжтэй байхыг онцгойлон анхааруулж байна.
2023 оны долоодугаар сарын 04-ний 08 цагаас 20 цаг хүртэл: Ихэнх нутгаар үүлэрхэг. Төв болон зүүн аймгуудын ихэнх нутаг, баруун аймгуудын нутгийн хойд хэсэг, говийн аймгуудын нутгийн зүүн хойд хэсгээр бороо орно. Салхи нутгийн зүүн хэсгээр баруун өмнөөс баруун хойш эргэж, бусад нутгаар баруун хойноос секундэд 5-10 метр, нутгийн зарим газраар борооны өмнө түр зуур ширүүснэ. Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Туул, Тэрэлж голын хөндийгөөр 10-15 хэм, Алтайн өвөр говиор 27-32 хэм, говийн бүс нутгийн зүүн өмнөд хэсэг, Дорнод-Монголын тал нутаг, Халх голын сав газраар 21-26 хэм, бусад нутгаар 15-20 хэм дулаан байна.
УЛААНБААТАР ХОТ ОРЧМООР: Үүлэрхэг. Бороо орно. Салхи баруун хойноос секундэд 5-10 метр. 12-14 хэм дулаан байна.
БАГАНУУР ОРЧМООР: Үүлэрхэг. Бороо орно. Салхи баруун хойноос секундэд 5-10 метр. 12-14 хэм дулаан байна.
ТЭРЭЛЖ ОРЧМООР: Үүлэрхэг. Бороо орно. Салхи баруун хойноос секундэд 5-10 метр. 11-13 хэм дулаан байна.
2023 оны долоодугаар сарын 05-наас долоодугаар сарын 09-нийг
хүртэлх цаг агаарын урьдчилсан төлөв
5, 6-нд баруун аймгуудын нутгийн зарим газар, төв, зүүн аймгуудын ихэнх нутаг, говийн аймгуудын нутгийн хойд болон зүүн хэсгээр, 7-нд баруун аймгуудын нутгийн хойд хэсэг, төв болон зүүн аймгуудын нутгийн зарим газраар, 8-нд баруун аймгуудын нутгийн хойд хэсэг, зүүн аймгуудын нутгийн зарим газраар бороо, дуу цахилгаантай аадар бороо орно. Салхи ихэнх хугацаанд секундэд 6-11 метр, нутгийн зарим газраар борооны өмнө түр зуур ширүүснэ. Монгол-Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Тэрэлж голын хөндийгөөр шөнөдөө 2-7 хэм, өдөртөө 11-16 хэм, говийн бүс нутгийн хойд хэсгээр шөнөдөө 9-14 хэм, өдөртөө +21-26 хэм, говийн бүс нутгийн өмнөд хэсгээр шөнөдөө 14-19 хэм, өдөртөө 27-32 хэм, бусад нутгаар шөнөдөө 6-11 хэм, өдөртөө 15-20 хэм дулаан байна. 7, 8-нд нутгийн баруун хагаст дулаарна.
Үйл явдал
Японд ойн түймрийн улмаас 3 мянга гаруй хүнийг нүүлгэн шилжүүлжээ
Японы хойд нутагт дэгдсэн ой хээрийн хоёр томоохон түймрийг унтраахаар 1000 гаруй гал сөнөөгч дөрөв дэх өдрөө ажиллаж байна. Бямба гарагийн байдлаар гал түймэр суурьшлын бүсэд ойртсон тул 3000 гаруй оршин суугчийг яаралтай нүүлгэн шилжүүлжээ. Энэ удаагийн гал түймэр нь цар хүрээгээрээ Японы түүхэнд бүртгэгдсэн гурав дахь томоохон тохиолдол болж байна. Сүүлийн жилүүдэд тус улсад ойн түймэр олонтоо гарах болсон юм.
Эхний түймэр өнгөрсөн лхагва гарагт уулархаг бүсэд гарсан бол удалгүй Иватэ мужийн Оцүчи хотын суурьшлын бүсийн ойролцоо хоёр дахь голомт үүсжээ. Саад бартаа ихтэй уулархаг газар нутаг, хуурай цаг агаар болон хүчтэй салхины улмаас түймрийг цурманд оруулахад хүндрэлтэй байна. Бямба гарагийн байдлаар гал түймэрт 730 орчим га талбай өртөж, 1541 өрхийн 3233 иргэнийг нүүлгэн шилжүүлэх шийдвэр гаргажээ.
Одоогийн байдлаар найман барилга байгууламж, тэдгээрийн дотор нэг орон сууц галд өртөж сүйдсэн бөгөөд хүний амь нас эрсэдсэн, гэмтэж бэртсэн тохиолдлууд бүртгэгдээгүй байна.
Үйл явдал
Сэжигтэн этгээдийн зорилго, сэдэл тодорхойгүй хэвээр байна
Вашингтон хотноо болсон Цагаан ордны сэтгүүлчдийн уламжлалт оройн зоогын үеэр буун дуу гарсан хэрэгтэй холбогдуулан саатуулагдсан сэжигтэн этгээдийн талаар шинэ мэдээлэл гарчээ.
Албаныхны мэдээлснээр уг хэрэгт холбогдуулан 31 настай Коле Томас Аллен гэгчийг баривчилсан байна. Тэрбээр Калифорни мужийн Торранс хотоос ирсэн бөгөөд хэрэг гарсан газар буюу Вашингтон Хилтон зочид буудал орчимд саатуулагджээ.
Мөрдөн шалгах байгууллагуудын урьдчилсан дүгнэлтээр сэжигтэн этгээдийг ганцаараа үйлдэл хийсэн байж болзошгүй гэж үзэж байгаа бөгөөд өөр хамсаатан илрээгүй байна. Тэрбээр шалган нэвтрүүлэх бүсийг зөрчихийг оролдсон бөгөөд тухайн үед олон төрлийн зэвсэг биедээ авч явсан тухай мэдээлжээ.
Одоогоор хэрэг явдлын зорилго, сэдэл тодорхойгүй хэвээр байгаа бөгөөд холбогдох байгууллагууд мөрдөн шалгах ажиллагааг үргэлжлүүлж байна.
Энэхүү хэрэг нь Цагаан ордны сурвалжлагчдын оройн зоогийн арга хэмжээний үеэр гарсан бөгөөд хамгаалалтын алба шуурхай арга хэмжээ авч, сэжигтнийг газар дээр нь баривчилсан юм.
Үйл явдал
COP17 зохион байгуулах талбай дээр холбогдох салбарын төлөөллүүд ажиллалаа
Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг зохион байгуулах Үндэсний хорооны Ажлын алба, Зам тээврийн яам, Улаанбаатар хотын Захирагчийн ажлын алба болон холбогдох байгууллагын төлөөллүүд 04 дүгээр сарын 25-ны өдөр COP17 зохион байгуулах талбайн төслийн ажлын явцтай танилцлаа.
Тус ажлын хүрээнд хөрөнгө оруулалт, бүтээн байгуулалтын газраас гүйцэтгэж буй түр барилга байгууламжийн барилгын ажлын явцын талаар холбогдох мэдээллийг солилцов.
Мөн COP17 бага хуралд оролцох зочид төлөөлөгч, оролцогчдыг тээвэрлэх автобус, автомашины орох гарах гарц ямар зохион байгуулалттайгаар хийгдсэн, мөн хөдөлгөөний аюулгүй байдал хэрхэн хангагдсаныг газар дээр нь шалгаж, танилцсан байна.
Мөн Ажлын албаныхан, холбогдох салбарын төлөөллүүд энэ өдөр Улаанбаатар хотын нэг цэгээс COP17 хурал зохион байгуулах байршил хүртэлх маршрутын дагуу автобусаар явж, замын нөхцөл байдал, хөдөлгөөний аюулгүй байдал, зарцуулах хугацаа зэргийг тогтоох туршилт хийснээр өнөөдрийн нөхцөлд бодит үнэлгээ дүгнэлт өгч, цаашид анхаарвал зохих асуудлаа тодорхойллоо.
Цаашид холбогдох байгууллагууд уялдаа холбоогоо ханган, зам, тээвэр, логистик болон аюулгүй байдлын зохион байгуулалтын асуудлыг нарийвчлан боловсруулж, бэлтгэл ажлыг шуурхай үргэлжлүүлэхээр зөвшилцөв.
