Тод мэдээ
Эрчим хүчний сайдын зөвлөл хуралдлаа
Эрчим хүчний сайдын зөвлөл энэ сарын 10-ны өдөр хуралдаж, Эрчим хүчний салбарт гадаад орон, олон улсын банк, санхүүгийн байгууллагын зээл, тусламж, бондын хөрөнгөөр хэрэгжих төсөл хөтөлбөрүүдэд дотоодын туслан гүйцэтгэгчийн оролцоог хангах журмын төсөл болон төвлөрсөн дулаан хангамжтай аймгийн төв, суурингийн дулаан үйлдвэрлэх, нэгдсэн түгээх, хангах үйл ажиллагаа эрхэлж буй тусгай зөвшөөрөл эзэмшигч компаниуд”-ын төсөв санхүү, эдийн засгийн үр ашгийг дээшлүүлэх, үнэ тарифийг шинэчлэх боломжийг судлах ажлын хэсгийн тайланг хэлэлцлээ.
Сүүлийн жилүүдэд хэрэгжиж буй гадаад эх үүсвэртэй томоохон төслүүдэд хөрөнгө оруулагч орны гүйцэтгэгч гүйцэтгэх шалгууртай байдаг. Иймээс дотоодын ажиллах хүчний хувь хэмжээг нэмэгдүүлэх зорилгоор ажлын хэсэг байгуулагдаж, журмын төслийг боловсруулжээ. Энэхүү журамд олон улсын зээлийн гэрээ, хэлэлцээрт дотоодын ажиллах хүчний хувь хэмжээг зааж өгсөн байх, гүйцэтгэгч тендерт саналаа ирүүлэхдээ дотоодын оролцооны хувь хэмжээг хангаж ажиллах тухайгаа батлах, журамд заасан шалгуур үзүүлэлтийг хангасан туслан гүйцэтгэгчийн мэдээллийг захиалагчид ирүүлж тухай бүр зөвшөөрөл авч байх зэрэг зохицуулалтуудыг тусгажээ. Журмын төслийг хэлэлцээд Эрчим хүчний сайдын зөвлөлийн гишүүдийн саналыг тусган, редакцийн засвар хийж батлах нь зүйтэй гэж үзлээ.
Орон нутгийн дулаан хангамжийг хэвийн байлгах, хэрэглээний бүтэц, санхүү, эдийн засгийн үр ашиг, үнэ тарифийн нөхцөл байдлыг судлан уг асуудлыг анх удаа нэгдсэн бодлоготойгоор авч үзэн хэлэлцэв.
Орон нутгийн дулааны компаниудын авлага өглөгийн бүтцийг авч үзвэл төсөвт байгууллага, аж ахуйн нэгжээс авлага ихтэй байгаа бөгөөд өглөгийн хувьд бүх төрлийн өглөг хуримтлагджээ. Зардлын бүтцийн хувьд төрийн өмчийн компаниудын цалингийн зардал өндөр байдаг бол хувийн компаниудын зардлын хувьд түлшний зардал өндөр байна. Улсын хэмжээнд цахилгаан нэг тарифаар тооцогдож, төлбөр нэхэмжлэгддэг байхад орон нутгийн дулааны үнийн тариф аймаг бүрт харилцан адилгүй байна. Иймээс орон нутгийн дулааны хэрэглэгчийн үнэ тарифийг улсын хэмжээнд ижил хэмжээнд аваачих, хэмжүүржүүлэх ажил хийгдэх шаардлагатай байгааг онцлон хэлэлцлээ. Орон нутгийн дулааны компаниудын удирдлагын томилгоонд мэргэжлийн байх гэдэг шалгуур тавьж хэрэгжүүлэх шаардлагатай байна гэж ажлын хэсэг дүгнэжээ.
Эрчим хүчний сайд Н. Тавинбэх “ Орон нутгийн дулаан хангамжийн асуудал бол Засгийн газрын мөрийн хөтөлбөрт тусгагдсан асуудал боловч хөгжих тухай ярих байтугай өдрөө аргацаах байдалтай явж байна. Эрчим хүчний яам, орон нутгийн удирдлага зэрэг олон талтай энэ үйл ажиллагааг нэгдсэн байдлаар Засгийн газарт танилцуулах нь зүйтэй” гэдгийг тэмдэглэв.
Эх сурвалж: Монгол Улсын Эрчим Хүчний Яам
Тод мэдээ
Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл өргөн мэдүүллээ
Монгол Улсын Их Хурлын дарга Д.Амарбаясгаланд 2025 оны долоодугаар сарын 03-ны өдөр Улсын Их Хурлын гишүүн Д.Рэгдэл, Б.Уянга, Г.Хосбаяр нар Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл өргөн барилаа.
Тус хуулийн нэмэлт, өөрчлөлтөд:
- Төрийн өмчит эрдэм шинжилгээний байгууллага нь тухайн байгууллагын судалгааны үндсэн чиглэлээр Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу зарлагдсан сонгон шалгаруулалтад оролцоход тендерийн болон гүйцэтгэлийн баталгаанаас чөлөөлөх тухай зохицуулалтыг тусгасан.
- Үндэсний эрдэм шинжилгээний бүтээлийн нэгдсэн санг олон улсын жишигт нийцүүлэн хөгжүүлж, мэдлэгийн дата төв байгуулж, ил тод байлгах зохицуулалтыг тусгасан. Үүнийг Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хуулийн 42-р зүйлийн 42.2 буюу захиалагчийн эрх үүрэгт судалгааны ажлыг ил тод байлгах үүргийг тусгах байдлаар, ингэхдээ энэхүү үүргээ ШУТ сангийн цахим хуудаст байршуулах, шинээр MORI платформ үүсгэх, tendergov.mn сайтад байршуулах, эсхүл www.sudalgaa.gov.mn үндэсний судалгааны нэгдсэн платформд байршуулах замаар шилэн болгох зохицуулалтыг тусгажээ.
- Хуулийн 18-р зүйлийн 18.2.2-ийг “Дээд боловсролын тухай хуулийн 4.1.4-т заасан судалгааны их сургууль” гэж өөрчилсөн.
- Хуулийн 32 дугаар зүйлийн 32.2 дахь хэсгээс “Үндэсний хорооны тогтоол, зөвлөмжийг үндэслэн” гэсэн агуулгыг хасах тухай заалтыг оруулсан байна гэж Улсын Их Хурлын Хэвлэл мэдээллийн газраас мэдээллээ.
Тод мэдээ
Унадаг дугуйтай бага насны хүүхэд замын хөдөлгөөнд оролцож байх үедээ ачааны машинд дайруулж, амь насаа алджээ
Унадаг дугуйтай бага насны хүүхэд замын хөдөлгөөнд оролцож байх үедээ ачааны машинд дайруулж, амь насаа алдсан гэх харамсалтай дуудлага мэдээлэл бүртгэгджээ. Тодруулбал, энэ оны зургаадугаар сарын 27-ны өдөр Увс аймгийн цагдаагийн газарт “Гурван замын уулзварт ачааны автомашин унадаг дугуйтай хүүхэд дайрсан байна” гэсэн мэдээллийг ирүүлсэн байна.
Тус аймгийн цагдаагийн газрын жижүүрийн шуурхай бүрэлдэхүүний алба хаагчид шалгалтын ажиллагааг явуулахад урьдчилсан байдлаар иргэн “Б” нь HOWO ZZ3257 маркийн улсын дугаартай автомашиныг жолоодож яваад унадаг дугуй унаж явсан бага насны хүүхдийг дайрч, амь насыг нь хохироосон харамсалтай нөхцөл байдал тогтоогдоод байна.
Сурагчдын зуны амралт эхэлсэн эдгээр өдрүүдэд эцэг эхчүүд та бүхэн хүүхдэд тавих хараа хяналтаа сайжруулах, хүүхдийг унадаг дугуй, суррон, скүүтэртэй Замын хөдөлгөөнд оролцуулахгүй байх, Жолооч та хөдөлгөөний аюулгүй байдлыг сайтар хангаж, анхаарал болгоомжтой зорчихыг сэрэмжлүүлж байна.
Тод мэдээ
Тэтгэврийн зээлд тавьсан хязгаарлалтыг цуцлах асуудлаар санал нэгдлээ
Тэтгэвэр барьцаалсан зээлд тавьсан 5050 өр орлогын харьцааг ахмадууд эсэргүүцэж буйтай холбогдуулан Ерөнхий сайд Г.Занданшатар Монголбанкны Ерөнхийлөгч Б.Лхагвасүрэнтэй уулзаж ярилцлаа.
Улмаар тэтгэврийн зээлд ямар нэг хязгаарлалт тавихгүй байх талаар талууд санал нэгдлээ. Хэрэглээний зээлийн нийтлэг зохицуулалтаас тэтгэврийн зээлийг гаргах замаар ахмадуудын тавьж буй шаардлагын хүрээнд шийдэл гаргах боломжтой гэж талууд үзсэн байна. Иймээс ирэх даваа гарагт Монголбанкны Мөнгөний бодлогын зөвлөл дахин хуралдаж, тэтгэвэр барьцаалсан зээлийн асуудлыг хэлэлцэхээр болжээ.
Мөн Ерөнхий сайд Г.Занданшатар тэтгэврийн зээлийн хүүг бууруулах чиглэлээр Монголбанк Гэр бүл, хөдөлмөр, нийгмийн хамгааллын яамтай хамтарч ажиллахыг хүслээ.
