Тод мэдээ
МАН-ын дарга, Ерөнхий сайд Л.Оюун-Эрдэнэ “Багш-Ирээдүй-Хөгжил” уулзалтад оролцлоо
Монгол Ардын Намын дарга, Монгол Улсын Ерөнхий сайд Л.Оюун-Эрдэнэ боловсролын салбарынхантай уулзлаа. “Багш-Ирээдүй-Хөгжил” уулзалтад ерөнхий боловсролын сургууль болон сургуулийн өмнөх боловсролын салбарын 700 гаруй төлөөлөл оролцлоо. Уулзалтад оролцсон сургууль, цэцэрлэгийн багш нар салбарынхаа шинэчлэл, цаашдын зорилго зорилтын талаар санал бодлоо солилцлоо.
Мөн “Багш-Ирээдүй-Хөгжил” уулзалтад Монгол Ардын Намын жагсаалтаар нэр дэвшигч Монголын Үйлдвэрчний Эвлэлийн Холбооны ерөнхийлөгч С.Эрдэнэбат, Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч О.Номинчимэг нар оролцов.
Боловсролын багц хуулийг өнгөрсөн оны долдугаар сард баталж, түүний хүрээнд санхүүжилт, хөтөлбөр агуулга, удирдлага менежментийн шинэчлэл, үнэлгээ болон багшийн хөгжил, цахимжуулах зэрэг чиглэлд өөрчлөлт шинэчлэлт хийж эхэлжээ. Мөн Ерөнхий сайдын санаачилгаар “Багшийн хөгжлийн гурван тулгуурт бодлого”-ыг хэрэгжүүлж буй.
Монгол Ардын Намын дарга, Монгол Улсын Ерөнхий сайд Л.Оюун-Эрдэнэ хэлэхдээ “Боловсрол, соёл бол аль ч улс орны хөгжлийн цөм байдаг. Боловсрол бол ганцхан тухайн салбарт хамаатай асуудал биш. Боловсрол бол эх оронч үзэл баримтлалыг хэвшүүлэх батлан хамгаалахын салбар, боловсрол бол ногоон байгууламжийг устгахгүй байх ирээдүйн иргэдийг бий болгох салбар, боловсрол бол хөдөлмөрийн зах зээлтэй уялдах эдийн засгийн асуудал” гэв.
Мөн тэрбээр “Эдийн засгийн төлөө хүн байдаг юм биш, хүний аз жаргалтай амьдралын төлөө эдийн засаг байдаг гэдгийг улс төрийн тогтолцоонд ойлгуулах ёстой. Ногоон хөгжлийн үзэл санааг бий болгох боловсон хүчнийг цэцэрлэгээс нь бэлдэх учиртай. Монголын ирээдүйг бэлдэж буй багш нарынхаа орон сууц, нийгмийн асуудлыг хамгийн өндөр түвшинд хүргэх ёстой. Тийм ч учраас бид Үндэсний баялгийн сангаар дамжуулж ипотекийн зээлийн хүртээмжийг нэмэгдүүлж байгаа. Багш хүн ирээдүйн иргэнийг гэр бүлтэй нь хамт бүтээлцэж байдаг” хэмээв. Монгол Ардын Нам нэр дэвшигчдийн жагсаалтдаа боловсролын салбар, ялангуяа багш нарын хүчтэй дуу хоолой болж, тэднийг бүрэн дүүрэн төлөөлөх мэдлэг боловсролтой хүмүүсийг багтаасан гэдгийг Монгол Ардын Намын дарга Л.Оюун-Эрдэнэ тодотголоо.
Монгол Ардын Нам шинэ 30 жилийн түүхийг зөв эхлүүлэхийн тулд мөн бусад улс төрийн намд үлгэр дууриал үзүүлж, тухайн нутаг дэвсгэрийг төлөөлөх хэмжээний улстөрчдийг тойрогт, нийгмийн салбар бүрийн төлөөлөл, ард түмний дуу хоолой болж чадах мэргэжлийн экспертүүдийг жагсаалтаар нэр дэвшүүлсэн. Ингэж Монгол Улсын их, дээд сургууль, ерөнхий боловсролын сургуулийн багш нар парламентад өөрсдийн дуу хоолойтой буюу квоттой болох боломжийг бүрдүүлсэн гэдгийг Монгол Ардын Намын дарга, Монгол Улсын Ерөнхий сайд Л.Оюун-Эрдэнэ онцоллоо.
Жагсаалтаар нэр дэвшиж буй багш нарын төлөөллийн нэг, Монгол Улсын Ардын багш, хэл бичгийн шинжлэх ухааны доктор, шинжлэх ухааны гавьяат зүтгэлтэн С.Дуламын хүү Д.Бум-Очир доктор үг хэллээ.
Тэрбээр “Миний аав, ээж хоёр хоёулаа багш. Би өөрөө багш. Тиймээс би багш нарынхаа жаргал зовлонг сайн мэднэ. Монгол Ардын Намын баримталж буй бодлого бол боловсролын салбар дахь хөрөнгө оруулалт, багш нарын цалин урамшууллыг нэмэгдүүлэх, нийгмийн асуудлыг шийдвэрлэхэд чиглэж байна. Энэ бол хоосон амлалт биш гэдгийг өнгөрсөн хугацаанд гаргасан шийдвэр, үр дүн харуулж байгаа. 2021 онд боловсролын салбарт ДНБ-ий 1.7 их наяд төгрөгийг зарцуулсан байсан бол 2024 оны байдлаар энэ тоо 4.2 их наяд болж нэмэгдсэн. Ерөнхий сайд Л.Оюун-Эрдэнийн Засгийн газар боловсролын салбарын хөрөнгө оруулалтыг түүхэнд байгаагүй хэмжээгээр нэмэгдүүлсэн” гэв.
Мөн Монгол Ардын Намын жагсаалтын дөрөвдүгээрт нэр дэвшсэн, АШУҮИС-ийн Нийгмийн эрүүл мэндийн сургуулийн багш О.Саранчулуун энэхүү уулзалтад оролцож саналаа хэлэв. Тэрбээр “Би АШУҮИС-д 2007 оноос хойш багшилж байгаа. Бид зөвхөн багш бус түүнтэй хамтран ажилладаг бүх хүнийг авч үзэх хэрэгтэй. Нийгмийн ажилтны эрх зүйн байдлын тухай хуулийн асуудал шийдвэрлэгдээгүй л байна. Тиймээс би парламентад хөгжлийн бэрхшээлтэй иргэдийнхээ, мөн багш нарынхаа, нийгмийн ажилтнуудынхаа төлөөлөл, дуу хоолой болж ажиллахаар нэр дэвшиж байгаа. Та бүхэн маань дэмжээрэй” хэмээн уриалахад уулзалтад оролцогчид алга ташин уухайлав.
Тус уулзалтад оролцож буй багш нар QR код ашиглан цахимаар асуулт асууж, саналаа илэрхийлсэн бөгөөд дийлэнх нь багш нарын цалин урамшуулал, нийгмийн асуудал, багш бэлтгэх тогтолцоо зэрэгтэй холбоотой байлаа.
Тухайлбал, нийслэлийн ерөнхий боловсролын 52 дугаар сургуулийн Бага боловсрол хариуцсан сургалтын менежер Б.Адъяасүрэн “Би долоон жил бага ангийн багшаар ажилласан. Намайг анх 2016 онд багшаар ажиллаж эхлэхэд цалин урамшуулал маш бага байдаг байсан. Тухайн үед 560 мянган төгрөгийн цалин авдаг байлаа. Одоо бол цалин хэд дахин нэмэгдсэн. Бага ангийн багшаар ажиллаж байх үед нэг анги дунджаар 60 хүүхэдтэй байдаг байлаа. Харин одоо хамгийн олон нь 45 хүүхэдтэй байна. Мөн гурван ээлжээр хичээллэдэг байсан асуудал шийдэгдсэн. Энэ мэтчилэн ерөнхий боловсролын сургуульд тулгамддаг олон асуудал шийдэгдэж буйд баяртай байгаа” гээд цаашид хүн амын өсөлт, суурьшилтай холбоотойгоор шинээр сургууль барих, өргөтгөх чиглэлд анхаарч ажиллахыг хүсэж буйгаа илэрхийлэв.
Тод мэдээ
ЗГ: Нүүрстэй холбогдох гэрээ хэлэлцээ, бусад баримт бичгийг ил болголоо
Засгийн газрын ээлжит хуралдаан 2025 оны аравдугаар сарын 8-нд болж дараах асуудлыг хэлэлцэн шийдвэрлэлээ.
“Төрийн нууцад хамаарах мэдээллийг ил болгох тухай” Засгийн газрын тогтоолын төслийг баталлаа. Тус тогтоолоор, Зам, тээврийн хөгжлийн яамнаас Засгийн газрын 2022 оны тавдугаар сарын 11-ний хуралдаанд танилцуулсан Гашуунсухайт-Ганцмод хилийн төмөр замын талаарх танилцуулга, Засгийн газрын хуралдааны тэмдэглэл, тэмдэглэлийн төсөл, холбогдох бусад баримт бичиг, мөн Засгийн газрын 2022 оны наймдугаар сарын 3-ны өдрийн хуралдаанд танилцуулсан “Монгол Улс, Бүгд Найрамдах Хятад Ард Улсын Гашуунсухайт-Ганцмод боомтын хил дамнасан төмөр замын бүтээн байгуулалт барих болон нүүрс худалдах, худалдан авах гэрээ байгуулах талаар хамтран ажиллах ерөнхий хэлэлцээр”-ийн төслийн танилцуулга, Засгийн газрын хуралдааны тэмдэглэл, тэмдэглэлийн төсөл, холбогдох бусад баримт бичгийг ил болгов.
Монгол Улс, Бүгд Найрамдах Хятад Ард Улсын Гашуунсухайт-Ганцмод боомтын хил дамнасан төмөр зам барих болон нүүрс худалдах, худалдан авах урт хугацааны гэрээний төсөл, ерөнхий нөхцөлийн талаар болон уг асуудлаар “Эрдэнэс Тавантолгой” ХК, “Тавантолгой төмөр зам” ХХК, БНХАУ-ын “Чайна Энержи” компани хооронд хийсэн яриа хэлэлцээтэй холбогдох албаны нууцад хамаарах баримт бичгийг ил болгох асуудлыг хууль тогтоомжид заасны дагуу зохион байгуулж ажиллахыг Монгол Улсын сайд, Засгийн газрын Хэрэг эрхлэх газрын дарга С.Бямбацогт, Сангийн сайд Б.Жавхлан, Зам, тээврийн сайд Б.Дэлгэрсайхан, “Эрдэнэс Тавантолгой” ХК дахь Засгийн газрын Онцгой бүрэн эрхт төлөөлөгчийн багийн ахлагч У.Бямбасүрэн нарт тус тус даалгалаа.
Мөн “Эрдэнэс Тавантолгой” ХК-иас бусад хуулийн этгээдтэй 2020-2022 онд “Нүүрс нийлүүлэх гэрээ”-ний хүрээнд байгуулсан нийт 32 гэрээ, тэдгээрт холбогдох мэдээллийг компанийн цахим хуудаст нээлттэй байршуулж, иргэд, олон нийтэд танилцуулах, цаашид байгалийн баялаг, бүтээн байгуулалттай холбоотой гэрээ хэлэлцээрийг ард түмний хяналтад ил тод, нээлттэй зохион байгуулж байхыг холбогдох албан тушаалтнуудад Ерөнхий сайд Г.Занданшатар үүрэг болголоо.
Тод мэдээ
Д.Амгалан: Хориглосон бүсэд мал бэлчээсэн иргэнийг нэг сая төгрөг, хуулийн этгээдийг 10 сая төгрөгөөр торгох хуультай
Нийслэлийн мал аж ахуй эрхлэхийг хориглосон бүсээс мал гаргах ажлыг арваннэгдүгээр сарын 1-нээс зохион байгуулна.
Тодруулбал, Монгол Улсын Засаг захиргаа нутаг дэвсгэрийн нэгж, түүний удирдлагын тухай хууль, Монгол Улсын нийслэл Улаанбаатар хотын эрх зүйн байдлын тухай хуулиар нийслэл Улаанбаатар хотод мал аж ахуй эрхлэх бүсийг НИТХ-аар тогтооно гэж заасан. Үүний дагуу НИТХ-ын 2024 оны 09 дүгээр тогтоолоор мал аж ахуй эрхлэхийг хориглосон бүсийг тогтоосон. Нийслэлийн төвийн зургаан дүүрэг, Багахангай, Багануур, Налайх дүүргийн суурьшлын бүсээр хориглосон бүсүүдийг тогтоож, журамласан. Мөн дүүргийн Засаг дарга нар хориглосон бүсэд нэвтэрсэн малыг тус бүсээс гаргах, стандарт зохих шаардлага хангасан хашаанд байршуулах, байршуулсан зардал болох мал эмнэлгийн үйлчилгээ, тэжээл, тээвэрлэлтийн зардал зэргийг малын эзнээс гаргуулах хууль эрх зүйн зохицуулалт үйлчилдэг байна.
Энэ талаар НЗДТГ-ын дарга Д.Амгалангаас тодруулахад “Нийслэлийн Засаг даргаас холбогдох байгууллага, дүүргүүдэд дээрх хууль журмыг хэрэгжүүлэх үүргийг өгсөн. Мөн Зөрчлийн тухай хуулийн 6.30 дугаар зүйлд мал аж ахуй эрхлэхийг хориглосон бүсэд мал бэлчээсэн тохиолдолд иргэнийг 1000 нэгжтэй тэнцэх хэмжээний төгрөгөөр, ААН, хуулийн этгээдийг 10 мянган нэгжтэй тэнцэх хэмжээний төгрөгөөр торгох зохицуулалт үйлчилдэг. Нэг нэгж 1000 төгрөгөөр тооцогддог учраас мал аж ахуй эрхлэхийг хориглох бүсэд малаа нэвтрүүлсэн иргэн нэг сая төгрөг, хуулийн этгээд 10 сая төгрөгийн торгуультай. Хуулийг иргэд, төрийн захиргааны байгууллага аль аль талаасаа хэрэгжүүлэх үүрэгтэй. Хотын төвийн зургаан дүүрэг, ялангуяа Богдхан уул, Үндэсний цэцэрлэгт хүрээлэнд мал нэвтэрсэн зөрчлүүд гараад байгаа. Хуулиар хүлээсэн үүргээ дүүргийн Засаг дарга нар болон нийслэлийн харьяа газар, агентлагууд хэрэгжүүлэх нь зүйтэй байна” гэв.
Мал аж ахуй эрхлэхийг хориглосон бүсэд малаа нэвтрүүлж байгаа нь хотын эко систем, ногоон байгууламжийг сүйтгээд зогсохгүй мал амьтны гоц халдварт өвчин үүсгэх, олон нийтийг хамарсан өвчлөл тараах эрсдэл ихтэй. Жишээлбэл, өнгөрсөн долоодугаар сард Баянзүрх дүүргийн 33 дугаар хорооны Шар хоолойн ам Дунд төгөл гэх газарт шүлхий өвчин гарч, долоодугаар сарын 10-наас наймдугаар сарын 8-ныг хүртэл нэг сарын хугацаанд хорио цээрийн дэглэм тогтоосон. Гоц халдварт өвчин гарсан тухайн хэсэг нь мал аж ахуй эрхлэхийг хориглосон бүс байсан. Гэтэл хуулийн хэрэгжилт сул, хууль журмыг мөрдөөгүйн улмаас өвчлөл гарч, хязгаарлалт тогтоож, тухайн бүсэд оршин сууж байгаа 500 гаруй иргэний эрх ашиг зөрчигдсөн. Эдийн засгийн хувьд ч хохиролтой. Тухайлбал, Шар хоолойн аманд шүлхий өвчин гарч, хорио цээрийн дэглэм тогтоосноор Баянзүрх дүүргийн Засаг даргын нөөц хөрөнгөөс 165,057,190.0 төгрөгийн хөрөнгө гарган хариу арга хэмжээг хэрэгжүүлэн ажиллажээ.
Тод мэдээ
Ерөнхийлөгч У.Хүрэлсүх энхийг сахиулагчдад төрийн одон, медаль гардууллаа
Монгол Улсын Ерөнхийлөгч Ухнаагийн Хүрэлсүх зарлиг гаргаж, Бүгд Найрамдах Өмнөд Судан Улсад Энхийг сахиулах ажиллагаанд үүрэг гүйцэтгэсэн 14 дүгээр ээлжийн цэргийн багийн бие бүрэлдэхүүнийг төрийн одон, медалиар шагналаа.
Өргөсөн тангарагтаа үнэнч байж, даян дэлхийн энх амгалан, аюулгүй байдлын төлөө эр зориг, тэсвэр хатуужил, авхаалж самбаа, ур чадвараа дайчлан, хүлээсэн үүргээ нэр төртэй биелүүлсэн энхийг сахиулагчдад Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх төр, ард түмний нэрийн өмнөөс талархал илэрхийллээ.
Алба хаагчид өнгөрсөн нэг жилийн хугацаанд Бүгд Найрамдах Өмнөд Судан Улсын энгийн иргэдийг хамгаалах, НҮБ-ын бааз, ажилчдын аюулгүй байдлыг хангах, хүмүүнлэгийн байгууллагын үйл ажиллагаанд дэмжлэг үзүүлэх зэрэг үүргээ цагийн байдал, цаг агаарын хүнд нөхцөлд амжилттай гүйцэтгэснийг тэмдэглэлээ.
Ялангуяа энэ оны 4, 5 дугаар сард Өмнөд Суданы Юнити мужид болсон зэвсэгт мөргөлдөөний үеэр 1,500 орчим иргэн, НҮБ-ын ажилчдыг бүрэн хамгаалалтад авч, аюулгүй байдлыг нь ханган, 800 орчим дүрвэгч бүхий цувааны хамгаалалтыг өндөр түвшинд зохион байгуулсныг онцоллоо.
“Монгол цэрэг” хэмээх нэрийг дуурсгаж яваа мянга мянган энхийг сахиулагч дайчдын гавьяа зүтгэл нь Монгол Улсын нэр хүндийг олон улсын тавцанд бэхжүүлэх, үндэсний аюулгүй байдлыг хангах бодлого, үйл ажиллагаанд жинтэй хувь нэмэр оруулж байгааг хэллээ.
Мөн энхийг сахиулагчдын бат бэх ар тал нь болж, үр хүүхдээ өсгөн хүмүүжүүлэх, өрх гэрээ авч явах ачааны хүндийг үүрч байдаг гэр бүлд нь талархал илэрхийлж, аз жаргал, амжилт бүтээлийн дээдийг хүсэн ерөөлөө.
Цэргийн гавьяаны улаан тугийн одонгоор:
- Цэргийн багийн ахлагч, Зэвсэгт хүчний 311 дүгээр ангийн Энхийг дэмжих ажиллагааны сургалтын төвийн Энхийг дэмжих ажиллагааны ахлах офицер, хурандаа Дуламжавын Эрдэнэбилэг,
- Зэвсэгт хүчний 284 дүгээр ангийн Дүрэм, заавар боловсруулах судалгааны ахлах офицер, дэд хурандаа Нямсүрэнгийн Шинэбаяр,
Цэргийн гавьяаны одонгоор:
- Зэвсэгт хүчний 119 дүгээр ангийн захирагчийн орлогч, ерөнхий инженер, дэд хурандаа Чантуугийн Батчулуун,
- Зэвсэгт хүчний Тусгай хүчний цэргийн командлалын Ахлагчийн хөгжлийн төвийн дарга, тэргүүн ахлагч Төмөрхуягийн Сандагдорж,
Цэргийн хүндэт медалиар:
- Үндэсний батлан хамгаалах их сургуулийн Батлан хамгаалах удирдлагын академийн цэргийн операци-тактикийн төвийн багш, хошууч Мөнхбаярын Бат-Эрдэнэ,
- Зэвсэгт хүчний 337 дугаар ангийн Нисэхийн тусгай тоноглолтой авто техникийн инженер, ахмад Сүхбатын Баасандорж,
- Зэвсэгт хүчний 331 дүгээр ангийн ангийн тэргүүн ахлагч Батсанаагийн Баднаанямбуу нарын 38 алба хаагчийг,
Энхийн төлөө медалиар:
- Зэвсэгт хүчний 338 дугаар ангийн химич, ариутгагч, дэд ахлагч Сүхбаатарын Баасанхорол,
- Хилийн цэргийн 303 дугаар ангийн холбоочин, ахлагч Баттогтохын Болорчимэг,
- Нийслэлийн Онцгой байдлын ерөнхий газрын аврагч, ахлах ахлагч Дэмбэрэлийн Төрсүлд нарын 437 алба хаагчийг шагналаа.
Одоогоор манай 896 цэнхэр дуулгатан энхийг сахиулж байгаагийн 14.2 хувь нь эмэгтэй бөгөөд энэ үзүүлэлтээрээ НҮБ-д цэрэг хандивлагч 121 орноос 19 дүгээрт эрэмбэлэгдэж байна.
Мөн Бүгд Найрамдах Кипр Улсад явагдаж байгаа НҮБ-ын энхийг сахиулах ажиллагааны Цэргийн хүчний командлагчаар анх удаа монгол генерал томилогдон үүрэг гүйцэтгэж байгаа юм.
Монгол цэргийн нэр хүнд жилээс жилд нэмэгдэж, НҮБ-ын энхийг сахиулах ажиллагааны оролцоо, удирдах албан тушаалтан, эмэгтэй энхийг сахиулагчдын тоог нэмэх бодлогын үр дүн гарсаар байна.
Манай улс 2002 онд Бүгд Найрамдах Ардчилсан Конго Улсад анхны хоёр цэргийн ажиглагчаа илгээсэн бөгөөд өнөөг хүртэл давхардсан тоогоор 22 мянга гаруй цэргийн алба хаагч энхийг сахиулах ажиллагаанд оролцжээ.
