Тод мэдээ
Иргэний нийгэм, мэргэжлийн холбоодын төлөөлөлтэй санамж бичигт гарын үсэг зурав
Иргэний нийгмийн байгууллагууд, мэргэжлийн холбоод, Төрийн бус байгууллагуудын төлөөлөл Монгол Ардын намтай хамтын ажиллагааны санамж бичигт өнөөдөр /2024-06-18/ гарын үсэг зурав. Монгол Ардын нам УИХ-ын 2024 оны ээлжит сонгуульд “Шинэ сэргэлтийн бодлого-Бүсчилсэн хөгжлийн реформ” нэртэй мөрийн хөтөлбөр дэвшүүлсэн. Энэхүү мөрийн хөтөлбөрийг дэмжин иргэний нийгмийн байгууллагуудын төлөөлөл Монгол Ардын намын Ерөнхий нарийн бичгийн дарга Д.Амарбаясгалантай санамж бичигт гарын үсэг зурсан юм.
Тодруулбал, эрчим хүч, хүнс, хөдөө, аж ахуй, зам тээвэр, эрүүл мэнд, эдийн засаг, боловсрол, соёл урлаг, уул уурхай, хөдөлмөр, нийгмийн хамгаалал, цахим хөгжил, барилга, хот байгуулалт, байгаль орчин, спорт, гадаад харилцаа зэрэг бүхий л салбарт ажилладаг мэргэжлийн холбоод, төрийн бус байгууллагуудын төлөөлөл оролцов. Энэхүү арга хэмжээг нээж Монгол Ардын намын Ерөнхий нарийн бичгийн дарга Д.Амарбаясгалан үг хэлэв.
Тэрээр:
-Монгол Ардын нам улс төр болоод Засгийн газрын үйл ажиллагаа, УИХ-аас баталсан хууль тогтоомж гээд олон асуудалд иргэний нийгмийн байгууллагуудын дуу хоолойг тусгаж, хамтарч ажиллахыг цаг үргэлж зорьж ажиллаж ирсэн. Үүндээ сонгуулийн жилд тодотгол хийж, үр дүнгээ тооцож, цаашид хэрэгжүүлэх ажил дээрээ санал бодлоо нэгтгэдэг онцлогтой. Өнгөрсөн хугацаанд мөрийн хөтөлбөр боловсруулахдаа та бүхний саналыг авч бодлогодоо тусгаж ирсэн туршлага байна. Мөн энэ сонгуулийн мөрийн хөтөлбөрийг боловсруулахдаа ч та бүхний саналыг авсан. Энэ жилийн сонгууль Үндсэн хуулийн өөрчлөлтөд орсон үзэл баримтлалын дагуу ихээхэн онцлогтой болно. Нийгмийн олон талын төлөөлөл намын жагсаалтад орж нэр дэвших боломжтой болсон. Салбар бүрийн төлөөлөл шийдвэр гаргах төвшинд орж ажиллах боломжийг Монгол Ардын нам илүүд үзэж намын нэрийн жагсаалтын 48 нэр дэвшигчдэдээ ихээхэн анхаарсан. ШУА, МҮХАҮТ, МҮЭХ-ны тэргүүн болон гадаад, дотоодод боловсрол эзэмшсэн хуульч, инженер, анагаахын мэргэжилтнүүдийг оруулж чадсан. Цаашид төрийн олон үйлчилгээг хувийн хэвшил, иргэний нийгмийн байгууллагууд, мэргэжлийн холбоодоор хийлгүүлэх бодлогыг түлхүү барина.
Мөн Монгол Ардын намын УИХ-ын 2024 оны ээлжит сонгуульд дэвшүүлсэн “Шинэ сэргэлтийн бодлого-Бүсчилсэн хөгжлийн реформ” мөрийн хөтөлбөрийг боловсруулах ажлын хэсгийн зарим төлөөлөл мөрийн хөтөлбөрийн талаар товч танилцуулав.
Монгол Ардын Намын дэргэдэх Стратеги академийн захирал Д.Бумдарь:
-Мөрийн хөтөлбөрийнхөө дөрөв, тавдугаар бүлэгт иргэний нийгмийн байгууллагуудын оролцоог тусгасан учраас та бүхэн энэ бүлгийг сайн судлаарай. Нийслэл, хөдөө орон нутаг ихээхэн ялгаатай болсон. Их дээд сургуулийн 84 хувь нь нийслэлд, орон нутагт 16 хувь нь байдаг. Бүгд хотод сурч, хөгжих гэж ирдэг. Иймд бүсчилсэн хөгжлийн бодлогыг бүх салбарт тэргүүлэх чиглэлээр хөгжүүлэхээр мөрийн хөтөлбөрт тусгасан. Бүс бүр онцлогтоо тулгуурлан хөгжих боломжтой болох юм. Тухайлбал, говийн бүс байгалийн баялагтаа тулгуурлана. Төвийн бүс эрчимжсэн мал аж ахуй, зүүн бүс эдийн засгийн коридорыг бий болгох, хангайн бүс хөдөө аж ахуй хөнгөн хүнсний үйлдвэрлэлийг бий болгоно. Баруун бүс эко үйлдвэрлэл, эко эдийн засаг, хойд бүс аж үйлдвэр, аялал жуулчлалд тулгуурлана гэх мэтээр бүсчилэн хөгжүүлснээр ялгаатай хэв маягтай амьдралаас болж хөгжлөөс хоцрохгүйгээр тэгш боломжтой болох юм. Мөн нийслэлийг 20 минутын хот болгон хөгжүүлнэ гэж зорьсон. Сургууль, цэцэрлэг гээд 20 минутын дотор бүх үйлчилгээг авдаг болгон хөгжүүлэх боломжийг судалгаанд суурилж тусгасан.
Монгол Ардын Намын Хэвлэл мэдээллийн газрын дарга Г.Баярхүү:
-Монгол Ардын намын мөрийн хөтөлбөрт тэрбум ам.долларын дөрвөн салбарыг онцгойлон авч үзнэ гэсэн бодлогыг барьж байгаа. Нэгдүгээрт соёл, аялал жуулчлалын салбар бий. Ковидын дараа дэлхий нийтээр хямралтай байгаа үед “Welcome to Mongolia” гэх энгийн уриагаар аялал жуулчлалын салбарын сэргэлтийг эхлүүлсэн. Үүний дараагаар өөдөө тэмүүлэх буюу “Go Mongolia” гэсэн шинэчилсэн уриаг дэлхийд гаргаж сурталчилсан. Олон улсын олон байгууллагатай хамтарч ажилласан. Гол нь ирсэн жуулчдыг юугаар татах вэ гэдэгт нэлээд төвлөрсөн тул үр дүнд хүрч өнгөрсөн жил анх удаа 650 мянга гаруй жуулчин ирж, 1.4 тэрбум ам.долларын орлого олсон салбар болсон. Цаашид илүү хөгжүүлэх талаар мөрийн хөтөлбөрт тодорхой зүйлүүд тусгасан. Жилд хоёр сая хүртэлх тооны жуулчин авна, ингэхийн тулд агаарын тээвэр, дэд бүтцээ сайжруулах заалтууд мөрийн хөтөлбөрт орсон. Чөлөөт бүсүүдийг байгуулах, дөрвөн улирлын аялал жуулчлалтай болох бодлогыг нэлээд түлхүү баримталж байна. Ажил хэргийн аялал жуулчлал шинэ тутамд хөгжиж байна. Мөн байгалийн аялал жуулчлал ч бий. Контентын буюу соёлын аялал жуулчлалыг хэрэгжүүлээд хоёр жил дараалан нүүдэлчин Монгол наадам хэмээх томоохон наадмыг зохион байгуулсан.
Дараагийн тэрбум долларын салбар бол мал аж ахуй, хөдөө аж ахуй юм. Энэ салбарт “Шинэ хоршоо” хэмээх том хөдөлгөөнийг өрнүүлж эхлээд байна. Хамгийн сүүлийн мэдээгээр улсын хэмжээнд 2330 хоршоо 80 гаруй тэрбумын хөрөнгө оруулалтын зээлээ аваад үйл ажиллагаандаа орсон байна. Хамгийн гол нь энэ салбараас эцсийн бүтээгдэхүүн гарах нь чухал байгаа юм.
Монгол Ардын намын дэргэдэх Хүний эрх дэвшилтэт бодлогын хүрээлэнгийн захирал Х.Баасанжаргал:
-Энэ удаагийн мөрийн хөтөлбөрийн хамгийн амбицтай заалт нь Монгол Улс Ази тивдээ хүний эрхийн төв болж ийм төвийг байгуулна гэсэн байгаа. Үүнд олон улсын байгууллагуудын дэмжлэг, түүнээс гадна манай иргэний нийгмийн байгууллагууд, хүний эрхийн салбарт ажилладаг мянга, мянган сайн дурын идэвхтэн та бүхний маань хамтын ажиллагаа дэмжлэг үзүүлнэ гэж хүсэж байна. Хөгжлийн бэрхшээлтэй иргэдийн асуудал нэлээд тусгагдсан. Хөгжлийн бэрхшээлтэй хүнээ, хүүхдээ харж байгаа байнгын асаргаа, тэтгэвэр, тэтгэмжийн нэмэгдэл үе шаттай явсаар ирсэн. Мөн хөгжлийн бэрхшээлтэй иргэнтэй холбоотой хүртээмжийн тухай хуулийн төслийг үндсэнд нь боловсруулаад дууссан. Үүнийг батлах том үүргийг дараагийн парламент хүлээнэ. Хөгжлийн бэрхшээлтэй иргэдийн байнгын асрамжийн төвийг байгуулна, энэ төв цэвэр төрийн санхүүжилт биш төр хувийн хэвшлийн хамтарсан ямар загвар байж болохыг гаргаж хэрэгжүүлнэ. Энэ талаарх хэвшмэл ойлголтуудыг засах, хандлагыг өөрчлөхийг зорино. Хөгжлийн бэрхшээлтэй иргэд хөдөлмөр эрхэлж болно, бодлого тодорхойлох үйл явцад оролцож болно, чадна гэдгийг нийгэмд ойлгуулах томоохон ажлыг хийхийг зорьж байна.
Тод мэдээ
Төрийн албан хаагчийн ёс зүйн сургалтад 300 албан хаагч оролцож байна
Төрийн албан хаагчийг ёс зүйн зөрчлөөс урьдчилан сэргийлэх, соён гэгээрүүлэх, холбогдох хууль тогтоомжийг мөрдүүлэх үндэсний хөтөлбөр хэрэгжиж байна.
Энэ хүрээнд төрийн албан хаагчийн ёс зүй, авлига, ашиг сонирхлын зөрчлөөс урьдчилан сэргийлэх зорилгоор нийслэлийн нутгийн захиргааны байгууллагын удирдах албан тушаалтнуудад зориулсан сургалт өнөөдөр нийслэлийн нутгийн захиргааны цогцолбор байранд болж байна.
Сургалтад нийслэл, дүүргийн Засаг даргын Тамгын газар болон нийслэлийн харьяа байгууллагын удирдах албан тушаалын 300 албан хаагч оролцож байгаа бөгөөд НЗДТГ-ын дарга П.Хадбаатар нээж, үг хэллээ.
Ёс зүйн хорооны дарга, Төрийн албаны зөвлөлийн гишүүн Ц.Амартөгс “Төрийн албан хаагчийн ёс зүй”, АТГ-ын Урьдчилан сэргийлэх, соён гэгээрүүлэх хэлтсийн ахлах ажилтан, ахлах комиссар Б.Тэрбиш “Авлига, ашиг сонирхлын зөрчлөөс урьдчилан сэргийлэх”, Удирдлагын академийн Эрх зүйн тэнхимийн эрхлэгч, доктор А.Алтанзул “Ёс зүйн зөрчил, эрх зүйн үндэслэл, хариуцлага” сэдвээр илтгэл хэлэлцүүлж байна.
Ёс зүйн хорооны дарга, Төрийн албаны зөвлөлийн гишүүн Ц.Амартөгс “Төрийн албан хаагчийн ёс зүйн тухай хууль 2023 онд батлагдсан. Тус хуулиар төрийн албан хаагчийн ёс зүйн хэм хэмжээ, нийтлэг үүрэг, хариуцлагыг тогтоож өгсөн. Тухайлбал, төрийн албан хаагч иргэдийн асуудлыг анхааралтай сонсож, хууль тогтоомжоор олгосон үйл ажиллагааны хүрээнд хариу өгдөг байх ёстой. Тиймээс төрийн албан хаагч мэргэжил болон харилцаа хандлагын хувьд ямар үүрэг хүлээж байна вэ гэдгийг сургалтаар хэлэлцэн таниулж байна. Мөн албан хаагч алдаа гаргах нөхцөл байдал хэрхэн үүсэж байна вэ гэдгийг тодорхойлж, алдаа, зөрчил гаргахгүй байлгахад сургалт чиглэлээ. Өнөөдрийн сургалтад оролцож байгаа нийслэл болон нийслэлийн харьяа байгууллагын удирдах албан тушаалтнууд эдгээр хэм хэмжээ, үүрэг, зарчмыг манлайлан мөрдүүлэхэд анхаарч байна” гэлээ.
Төрийн албан хаагчийн ёс зүйн тухай хуульд “Төрийн албан хаагч хүнлэг, энэрэнгүй байх, үнэнч, шударга байх, хариуцлагатай байх, манлайлах, хамтач байх ёс зүйн зарчмыг баримтална” хэмээн заажээ. Төрийн албан хаагчийн ёс зүй, байгууллагын соёлыг өдөр тутмын энгийн үйлдлээс эхэлж сайжруулдаг. Албан хаагч хувийн харилцаа, хандлага болон иргэдийн хүсэлтийг шийдэхэд сэтгэл гаргаж ажилладаг байх тал дээр анхаарах хэрэгтэйг сургалтын үеэр онцоллоо.
Төрийн албан хаагч ард түмэндээ чин сэтгэлээсээ үйлчилж, төрийн албаны нэр хүндийг эрхэмлэх, зан харилцаа, үг, үйлдлээрээ хүний эрх, эрх чөлөө, нэр төр, алдар хүнд, хууль ёсны ашиг сонирхлыг хүндэтгэх, албан үүргээ гүйцэтгэхдээ бусдад аливаа хэлбэрээр дарамт үзүүлэхгүй байх, ялгаварлан гадуурхахгүй байх зэрэг ёс зүйн нийтлэг хэм хэмжээг сахин мөрдөх үүрэгтэй. Эдгээр үүрэг, хэм хэмжээг өдөр тутмын үйл ажиллагаа, төрийн албан хаагчийн ёс зүйн хүрээнд байнгын мөрдөж занших ёстойг сургалтаар танилцуулж байна.
Тод мэдээ
Их, дээд сургуулиудын академик эрх чөлөөг хангаж, өмчийн хэлбэр харгалзалгүйгээр дэмжин ажиллана
Өнгөрсөн наймдугаар сард Боловсролын сайд П.Наранбаяр Монголын хувийн их дээд сургуулиудын холбооны төлөөлөлтэй уулзах үеэр ярилцсаны дагуу нэгдсэн байдлаар бүх хувийн их, дээд сургуулийн удирдлагуудтай уулзлаа.
Хувийн их, дээд сургуулийн удирдлагууд тулгамдаж буй асуудлуудаа хэлэлцэн нэгтгэж, төрийн дээд боловсролын салбар дахь оролцоо дэмжлэг болон эрх зүйн орчин, элсэлтийн босго, дээд боловсролын байгууллагуудын эрэмбэ, багшийн хөгжил болон нийгмийн баталгаа гэсэн чиглэлүүдээр санал хүсэлтээ илэрхийлэв. Тухайлбал, их, дээд сургуулийн онцлогийг харгалзаж үнэлэх замаар эрэмбэ тогтоох, төрийн зүгээс өмчийн хэлбэрийг ялгахгүйгээр адил тэгш бодлого хэрэгжүүлэх, салбарт хэрэгжиж буй хуулиудад өөрчлөлт оруулах шаардлагатай гэлээ.
Боловсролын сайд П.Наранбаяр их, дээд сургуулиудын академик эрх чөлөөг хангаж, өмчийн хэлбэр харгалзалгүйгээр дэмжин ажиллахаа онцолж, дээд боловсролын байгууллагуудын онцлог, чиглэлийг харгалзан ангилах байдлаар хөндлөнгийн байгууллагаар эрэмбэ тогтоолгох, элсэлтийн босгыг үе шаттайгаар өсгөн элсэгчдийг чанаржуулах бодлого баримтална хэмээв. Мөн бүх санал хүсэлтэд хариу өгч, нэгтгэж эрэмбэлэн үе шаттайгаар шийдвэрлэхээ хэллээ гэж Боловсролын яамнаас мэдээллээ.
Тод мэдээ
Эдийн засагч, эрдэмтдээс бүрдсэн баг Нийгмийн даатгалын санд хяналт тавина
Нийгмийн даатгалын үндэсний зөвлөлийн дэргэд Олон нийтийн хяналтын зөвлөл болон Орон тооны бус мэргэжлийн хороог байгуулж, Гэр бүл, хөдөлмөр, нийгмийн хамгааллын сайд Л.Энх-Амгалан гишүүдийг хүлээн авч уулзлаа.
Сонгон шалгаруулалтыг нээлттэй зарлаж, Олон нийтийн хяналтын зөвлөлд төрийн болон төрийн бус байгууллагын төлөөллөөс гадна хөрөнгө оруулалт, даатгуулагчийг төлөөлсөн долоон гишүүн сонгогдсон.
Мөн Орон тооны бус мэргэжлийн хороонд эрсдэл,тооцоолол, хөрөнгө оруулалт, аудит хариуцсан есөн гишүүн сонгогдсон юм.
Нийгмийн даатгалын үндэсний зөвлөлд Нийгмийн даатгалын сангийн чөлөөт үлдэгдэл мөнгөн хөрөнгийг өсгөж арвижуулах үүргийг хүлээдэг.
Үүнд мэргэжлийн хорооны гишүүд судалгаа, баримтуудыг гаргаж мэргэжлийн зөвлөгөө, мэдээллээр хангаж ажиллана.
Хяналтын зөвлөлийн гишүүд Нийгмийн даатгалын үндэсний зөвлөлийн гаргасан шийдвэр, хэрэгжилтэд хяналт тавина.
Нийгмийн даатгалын чөлөөт үлдэгдэл болох мөнгөн хөрөнгийг дөрвөн зүйлд зарцуулахаар хуульд заасан байдаг.
Засгийн газраас гаргасан бонд болон Монголбанкны үнэт цаас худалдаж авч болно. Мөн Төрийн сангийн нэгдсэн сан болон арилжааны банканд хадгалж болох зохицуулалтыг хийсэн.
Цаашид Нийгмийн даатгалын үндэсний зөвлөлийн дэргэдэх Олон нийтийн хяналтын зөвлөл, орон тооны бус мэргэжлийн хороод нь сангийн хөрөнгийг эрсдэлээс хамгаалах чиг үүрэгтэй ажиллана гэж Гэр бүл, хөдөлмөр, нийгмийн хамгааллын яамнаас мэдээллээ.
