Тод мэдээ
НҮБ-ын Хөгжлийн хөтөлбөртэй хамтран ажиллах санамж бичиг байгууллаа
Монгол Улсын Ерөнхийлөгч санаачилгаар Улсын Их Хурлын 2024 оны 63 дугаар тогтоолоор батлагдсан “Цагаан алт” үндэсний хөдөлгөөнийг өрнүүлж, дэлхийн зах зээлийн өсөн нэмэгдэж буй хэрэгцээ шаардлага, түүхий эдийн нөөцөд тулгуурлан “Цагаан алт” болсон малын гаралтай түүхий эдээ бүрэн ашиглаж, үнэ цэн шингэсэн бүтээгдэхүүн болгох, дотооддоо нэмүү өртөг бүтээхээр зорин ажиллаж байна.
Энэ хүрээнд “Цагаан алт” хөдөлгөөнийг өрнүүлэхэд хууль эрх зүй, бодлого боловсруулах орчныг бий болгох, төр болон хувийн санхүүжилтийг нэмэгдүүлэх, мал аж ахуйн тогтвортой менежментийг өргөжүүлэх, уур амьсгалын өөрчлөлтөд өртөж буй иргэдийн чадавхыг бэхжүүлэх, олон талт оролцогч талуудын платформыг ажиллагаанд оруулах чиглэлээр хамтран ажиллахаар Хүнс, хөдөө аж ахуй, хөнгөн үйлдвэрийн яам, НҮБ-ын Хөгжлийн хөтөлбөр хоорондын харилцан ойлголцлын санамж бичиг байгууллаа.
Хүнс, хөдөө ахуй, хөнгөн үйлдвэрийн Сайд Ж.Энхбаяр “Энэхүү хамтын ажиллагаа нь Монгол Улсын хөдөө аж ахуй, хөнгөн үйлдвэрийн салбарыг илүү тогтвортой, эрсдэл даах чадвартай болгоход чухал ач холбогдолтой. Бид НҮБХХ-тэй хамтран 21 дүгээр зуунд нийцсэн хөдөө аж ахуйн үндэсний бодлогыг боловсруулах замаар уур амьсгалын өөрчлөлтийг сааруулж, дасан зохицох чадварыг нэмэгдүүлэн, ард иргэдийн амьжиргааг дээшлүүлэхэд анхааран ажиллах болно. Хамтын хичээл зүтгэлийн үр дүнд орчин цаг үеийн сорилтуудыг даван туулах чадвартай, тогтвортой хөгжил, ногоон эдийн засгийн өсөлтөд чиглэсэн хөдөө аж ахуйн салбарыг бий болгохоор зорьж байгаа” хэмээн мэдэгдлээ.
Монгол дахь НҮБХХ-ийн Суурин төлөөлөгч Матилда Димовска “Энэхүү хамтын ажиллагаа нь Монгол Улсад тогтвортой, эрсдэл даах чадвартай ирээдүйг бий болгоход чиглэсэн бидний хүчин чармайлтын нэгэн хэсэг. Хөдөө аж ахуй, мал ахуйн салбар нь Монгол Улсын эдийн засагт амин чухал үүрэг гүйцэтгэдэг ба Монгол түмний түүх, соёл уламжлалын салшгүй нэгэн хэсэг мөн. Уур амьсгалын өөрчлөлтийг сааруулах арга хэмжээг үндэсний бодлогод тусгаж, дасан зохицох чадварыг нэмэгдүүлж, тогтвортой арга барилыг дэмжих замаар бид Монгол Улсад тулгамдаад буй байгаль орчны сорилтуудыг шийдвэрлэх хүрээнд нягт хамтран ажиллах болно” гэдгийг онцоллоо гэж ХХААХҮЯ-наас мэдээллээ.
Тод мэдээ
Хот, нийтийн аж ахуйн салбарын парк шинэчлэл үргэлжилж байна
Хот, нийтийн аж ахуйн салбарын парк шинэчлэл үргэлжилж байна. Энэ удаа үерийн хамгаалалтын далан суваг, халиа тошингийн үед ашиглах зориулалтаар хот нийтийн аж ахуйн машин техникийг шинэчиллээ.
Тодруулбал, БНХАУ-ын “Sany” үйлдвэрээс жижиг оврын экскаватор зургаа, дэлхийн шилдэг “Cat” брэндийн Монгол дахь албан ёсны төлөөлөгч “Barlo world” ХХК-иас том оврын 1.9 шоо метр шанагатай “Cаt330” загварын нэг экскаваторыг нийлүүллээ.
Эдгээр машин, техникийг ГУББГ, ОСНААУГ болон дүүргүүдэд хүлээлгэн өгнө.
Ташрамд, 2024 оны аравдугаар сард нийслэлийн төсвийн хөрөнгө оруулалтаар зам цэвэрлэгээний таван төрлийн 33 машин техникийг нийлүүлсэн. Тодруулбал, цас цэвэрлэгээ, түрэх, давс цацах 10 машин, 8 шүүрт машин, бага оврын цас цэвэрлэгч 10 машин нийлүүлсэн. Мөн оны хавар нь модны навч зэрэг хөнгөн юмсыг соруулах зориулалттай 46 шинэ тоног төхөөрөмжийг оруулж ирсэн. Улмаар 2024 онд хот, нийтийн аж ахуйн салбарт 80 гаруй машин, техникийн шинэчлэлт хийсэн билээ.
Тод мэдээ
Монгол, Киргизийн Засгийн газар хоорондын комиссын V дугаар хуралдаан болно
Монгол Улсын Шадар сайд С.Амарсайхан 2025 оны дөрөвдүгээр сарын 17-ны өдөр Бүгд Найрамдах Киргиз Улсаас Монгол Улсад Суугаа Онц бөгөөд бүрэн эрхт элчин сайд Айбек Артыкбаевыг хүлээн авч уулзан, хоёр орны найрамдалт харилцаа, хамтын ажиллагааны талаар санал солилцлоо.
Уулзалтын хүрээнд Худалдаа, эдийн засаг, шинжлэх ухаан, техник, соёлын хамтын ажиллагааны Монгол, Киргизийн Засгийн газар хоорондын комиссын V дугаар хуралдааныг зохион байгуулах талаар ярилцаж, комиссын хуралдааны үеэр хэлэлцэх зарим асуудлыг тогтлоо.
Монгол Улсын Шадар сайд, Монгол, Киргизийн Засгийн газар хоорондын комиссын Монголын хэсгийн дарга С.Амарсайхан хоёр орны найрамдалт харилцааг шинэ шатанд хөгжүүлж, худалдааны эргэлтийг нэмэгдүүлж, хүнс, хөдөө аж ахуйн салбарт илүү идэвхтэй хамтран ажиллах хүсэлтэй байгаагаа илэрхийллээ.
Бүгд Найрамдах Киргиз Улсаас Монгол Улсад Суугаа Онц бөгөөд бүрэн эрхт элчин сайд Айбек Артыкбаев хоёр орны худалдааны эргэлт 2023 онд 2.3 сая ам.доллар байсан бол энэ оны 10 дугаар сарын байдлаар 4 дахин өссөн үзүүлэлттэй байгааг цохон тэмдэглэв. Түүнчлэн Евроазийн чөлөөт худалдааны хэлэлцээр хийгдэхээр ярилцаж байгаа нь Киргиз улсад ч эергээр нөлөөлөх чухал алхам гэдгийг онцолж байлаа.
Өнөөдрийн уулзалтаар хоёр улсын худалдаа аж үйлдвэрийн танхимын хамтын ажиллагааг идэвхжүүлж, худалдааны эргэлтийг нэмэгдүүлэхэд илүү анхаарч ажиллах, бизнес форум зохион байгуулах, соёл, спорт, аялал жуулчлалын салбарын хамтын ажиллааг сайжруулж, соёлын олон талт арга хэмжээ зохион байгуулах зэрэг улс төр, нийгэм, эдийн засаг, соёлын салбарыг хөгжүүлэх зэрэг өргөн хүрээнд ярилцаж, санал солилцлоо.
Манай хоёр орон 1992 оны 4-р сарын 22-нд дипломат харилцаа тогтоосноос хойш 33 жилийн турш бүхий л салбарт хамтран ажиллаж, найрамдалт харилцаагаа өргөжүүлж байна.
Тод мэдээ
Боловсролын байгууллагын дотуур байруудад урьдчилан сэргийлэх хяналт шинжилгээ хийжээ
Эрүү шүүлтээс урьдчилан сэргийлэх үндэсний ажиллагаанаас хүний эрх, эрх чөлөө зөрчигдөж болзошгүй тогтолцооны шалтгаан, нөхцөл, түүнд нөлөөлж буй хүчин зүйлийг илрүүлэх, тогтоох, хамгаалах хүрээнд улсын хэмжээнд үйл ажиллагаа явуулж байгаа сурагчдын болон оюутны дотуур байруудад урьдчилан сэргийлэх шинжилгээ хийжээ.
Энэ хүрээнд ХЭҮК-ын Эрүү шүүлтээс урьдчилан сэргийлэх асуудал эрхэлсэн гишүүнийн баталсан удирдамжийн дагуу Эрүү шүүлтээс урьдчилан сэргийлэх үндэсний ажиллагааны албан хаагчид АШУҮИС, СЭЗДС-ийн оюутны дотуур байранд урьдчилан сэргийлэх хяналт шинжилгээ хийж ажилласан байна.
Хяналт шинжилгээний хүрээнд “Эрүү шүүлт тулгах, бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж шийтгэхээс ангид байх эрх”-ийн хэрэгжилт, гэмт хэрэг, зөрчлөөс урьдчилан сэргийлэх чиглэлээр хийсэн ажил, арга хэмжээ зохион байгуулсан ажил, аюулгүй, ээлтэй орчин бүрдүүлсэн байдалтай газар дээр нь танилцаж, оюутны байранд амьдарч байгаа оюутнууд болон ажиллагсдаас асуумж авч, хүсэлт гаргасан хүүхдүүдтэй ганцаарчлан уулзсан байна.
