Тод мэдээ
Монгол-Казахстаны парламентын бүлгийн дарга Х.Баделхан Элчин сайд Жалгас Адилбаевтай уулзлаа
УИХ-ын гишүүн, УИХ дахь Монгол-Казахстаны парламентын бүлгийн дарга Х.Баделхан өнөөдөр (2021.06.29) Бүгд Найрамдах Казахстан Улсаас Монгол Улсад суугаа Онц бөгөөд Бүрэн эрхт Элчин сайд Жалгас Адилбаевтай уулзлаа.
Уулзалтын эхэнд ноён Элчин сайд Жалгас Адилбаев Их Монгол Улс байгуулагдсаны 815, Тулгар төр байгуулагдсаны 2230, Ардын хувьсгал болон МАН-ын 100 жилийн ой тохиож байгаад баяр хүргэв.
Мөн Монгол Улсын 6 дахь Ерөнхийлөгчийн сонгуульд МАН-аас нэр дэвшигч У.Хүрэлсүх үнэмлэхүйн ялалт байгуулсанд баяр хүргээд Монгол Улсын Ерөнхий сайд байхдаа 25 жилийн дараа Бүгд Найрамдах Казахстан Улсад түүхэн айлчлал хийх үеэрээ олон гэрээ, хэлэлцээр байгуулсан. Уг гэрээ, хэлэлцээрт тусгагдсан ажлуудыг урагшлуулж, хэрэгжүүлэхэд парламентын бүлгийн дарга хувьд онцгой анхаарч өгөхийг хүслээ.
Мөн Казахстаны улс төрийн нөхцөл байдал, өөрчлөлт шинэчлэлт, цар тахлын үед авч хэрэгжүүлж буй ажлуудын талаар товч мэдээлэл өгөв. Дэлхий нийтийг хамраад буй цар тахлын үед Монгол Улсын авч хэрэгжүүлж байгаа арга хэмжээг өндрөөр үнэлж байгаагаа Элчин сайд онцоллоо. Казахстаны Эрдэм шинжилгээний хүрээлэнгээс КАЗВАК хэмээн ковидын эсрэг вакциныг гарган авсан бөгөөд энэхүү вакциныг Монгол Улсад хүмүүнлэг тусламжийн хэлбэрээр 15-20 мянган тунг хандивлах боломжтой гэдгийг Гадаад харилцааны яаманд мэдэгдсэн гэлээ.
Монгол-Казахстаны парламентын бүлгийн дарга Х.Баделхан Бүгд Найрамдах Казахстан Улс тусгаар тогтносны 30, хоёр танхимтай Парламенттай болсны 25 жийн ой тохиож байгаад баяр хүргэв.
2019 онд Монгол Улсын Үндсэн хуульд оруулсан нэмэлт, өөрчлөлтөөр Монгол Улсын Ерөнхийлөгчийг 6 жилийн хугацаатайгаар 1 удаа сонгохоор хуульчилсан. Энэ хуулийн өөрчлөлт шинэчлэлтийн дагуу сонгуулиа амжилттай зохион байгуулж, шинэ Ерөнхийлөгч УИХ-д тангаргаа өргөсөн талаар мэдээлэл солилцов.
Монгол Улсын Ерөнхийлөгч У.Хүрэлсүх Ерөнхий сайдын үүрэгт ажилтай байхдаа Нур-Султан хотод хийсэн айлчлалын үеэр “Алт цэвэршүүлэх үйлдвэр”-ийн төслийг гэрээлсэн. Уг төслийн ажлыг хэрэгжүүлэх, эрчимжүүлэхэд анхаарч, хамтран ажиллахаа Монгол-Казахстаны парламентын бүлгийн дарга Х.Баделхан илэрхийллээ.
Мөн Бүгд Найрамдах Казахстан Улсаас санаачилга гарган КАЗВАК хэмээн ковидын эсрэг вакциныг нийлүүлэх гэж буйд талархаж буйгаа илэрхийлэв. Хоёр улсын хамтын ажиллагааг хөгжүүлж шинэ шатанд гаргахад УИХ дахь Монгол-Казахстаны парламентын бүлэг чухал үүрэгтэй гэдгийг дурдаад цар тахалд баригдалгүй 2 талын бүлгийн гишүүдийн цахим уулзалт, хурал зөвлөгөөнийг цаг алдалгүй зохион байгуулах талаар талууд ярилцав.
Тод мэдээ
Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл өргөн мэдүүллээ
Монгол Улсын Их Хурлын дарга Д.Амарбаясгаланд 2025 оны долоодугаар сарын 03-ны өдөр Улсын Их Хурлын гишүүн Д.Рэгдэл, Б.Уянга, Г.Хосбаяр нар Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төсөл өргөн барилаа.
Тус хуулийн нэмэлт, өөрчлөлтөд:
- Төрийн өмчит эрдэм шинжилгээний байгууллага нь тухайн байгууллагын судалгааны үндсэн чиглэлээр Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу зарлагдсан сонгон шалгаруулалтад оролцоход тендерийн болон гүйцэтгэлийн баталгаанаас чөлөөлөх тухай зохицуулалтыг тусгасан.
- Үндэсний эрдэм шинжилгээний бүтээлийн нэгдсэн санг олон улсын жишигт нийцүүлэн хөгжүүлж, мэдлэгийн дата төв байгуулж, ил тод байлгах зохицуулалтыг тусгасан. Үүнийг Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай хуулийн 42-р зүйлийн 42.2 буюу захиалагчийн эрх үүрэгт судалгааны ажлыг ил тод байлгах үүргийг тусгах байдлаар, ингэхдээ энэхүү үүргээ ШУТ сангийн цахим хуудаст байршуулах, шинээр MORI платформ үүсгэх, tendergov.mn сайтад байршуулах, эсхүл www.sudalgaa.gov.mn үндэсний судалгааны нэгдсэн платформд байршуулах замаар шилэн болгох зохицуулалтыг тусгажээ.
- Хуулийн 18-р зүйлийн 18.2.2-ийг “Дээд боловсролын тухай хуулийн 4.1.4-т заасан судалгааны их сургууль” гэж өөрчилсөн.
- Хуулийн 32 дугаар зүйлийн 32.2 дахь хэсгээс “Үндэсний хорооны тогтоол, зөвлөмжийг үндэслэн” гэсэн агуулгыг хасах тухай заалтыг оруулсан байна гэж Улсын Их Хурлын Хэвлэл мэдээллийн газраас мэдээллээ.
Тод мэдээ
Унадаг дугуйтай бага насны хүүхэд замын хөдөлгөөнд оролцож байх үедээ ачааны машинд дайруулж, амь насаа алджээ
Унадаг дугуйтай бага насны хүүхэд замын хөдөлгөөнд оролцож байх үедээ ачааны машинд дайруулж, амь насаа алдсан гэх харамсалтай дуудлага мэдээлэл бүртгэгджээ. Тодруулбал, энэ оны зургаадугаар сарын 27-ны өдөр Увс аймгийн цагдаагийн газарт “Гурван замын уулзварт ачааны автомашин унадаг дугуйтай хүүхэд дайрсан байна” гэсэн мэдээллийг ирүүлсэн байна.
Тус аймгийн цагдаагийн газрын жижүүрийн шуурхай бүрэлдэхүүний алба хаагчид шалгалтын ажиллагааг явуулахад урьдчилсан байдлаар иргэн “Б” нь HOWO ZZ3257 маркийн улсын дугаартай автомашиныг жолоодож яваад унадаг дугуй унаж явсан бага насны хүүхдийг дайрч, амь насыг нь хохироосон харамсалтай нөхцөл байдал тогтоогдоод байна.
Сурагчдын зуны амралт эхэлсэн эдгээр өдрүүдэд эцэг эхчүүд та бүхэн хүүхдэд тавих хараа хяналтаа сайжруулах, хүүхдийг унадаг дугуй, суррон, скүүтэртэй Замын хөдөлгөөнд оролцуулахгүй байх, Жолооч та хөдөлгөөний аюулгүй байдлыг сайтар хангаж, анхаарал болгоомжтой зорчихыг сэрэмжлүүлж байна.
Тод мэдээ
Тэтгэврийн зээлд тавьсан хязгаарлалтыг цуцлах асуудлаар санал нэгдлээ
Тэтгэвэр барьцаалсан зээлд тавьсан 5050 өр орлогын харьцааг ахмадууд эсэргүүцэж буйтай холбогдуулан Ерөнхий сайд Г.Занданшатар Монголбанкны Ерөнхийлөгч Б.Лхагвасүрэнтэй уулзаж ярилцлаа.
Улмаар тэтгэврийн зээлд ямар нэг хязгаарлалт тавихгүй байх талаар талууд санал нэгдлээ. Хэрэглээний зээлийн нийтлэг зохицуулалтаас тэтгэврийн зээлийг гаргах замаар ахмадуудын тавьж буй шаардлагын хүрээнд шийдэл гаргах боломжтой гэж талууд үзсэн байна. Иймээс ирэх даваа гарагт Монголбанкны Мөнгөний бодлогын зөвлөл дахин хуралдаж, тэтгэвэр барьцаалсан зээлийн асуудлыг хэлэлцэхээр болжээ.
Мөн Ерөнхий сайд Г.Занданшатар тэтгэврийн зээлийн хүүг бууруулах чиглэлээр Монголбанк Гэр бүл, хөдөлмөр, нийгмийн хамгааллын яамтай хамтарч ажиллахыг хүслээ.
